آرٹس کونسل ہال گوجرانوالہ وچ نعتیہ مشاعرہ
گوجرانوالہ دے شاعراں بارگاہ رسالت مآبﷺ وچ عقیدت دے پھُل پیش کیتے
رپورٹ: آفاق بٹ
دشمن دیاں دھمکیاں جیہڑی اسیں ہنسی وچ اڑا دینے آں اے محسن پاکستان پاکستان دی ایس وجہ تسیں او ۔ 1936وچ بھوپال وچ پیدا ہون والا خان زادہ پاکستان نوں ناقابل تسخیر بنا کے اپنیا نوں اداس تے دشمنان اسلام دے سینے وچ بوہت سارے سوال چھڈ کے چلے گئے جیہڑے ہمیشہ تڑپدے سن کہ ڈاکٹر عبدالقدیر خان نے ایٹمی ٹیکنالوجی نجانے کتھے کتھے ٹرانسفر کیتی اے تے اوہ ایس لئی پرویز مشرف صاحب نوں ڈاکٹر صاحب دی حوالگی دا مطالبہ کردے رہے۔ ایہناں نوں امریکہ دے حوالے تےنہیں کیتا گیا پرایس دے بعد ایہناں دی زندگی اینی کٹھن بنا دتی گئی جیہڑی میری نظر وچ محسن کشی اے۔
کون جان دا سی کہ 1952 وچ پاکستان منتقل ہون والے قدیر خان دی روح دنیا وچ آئی ای ایس لئی اے کہ ایہہ اسلامی مملکت پاکستان نوں دنیا دی مضبوط ایٹمی طاقت بنائے گی۔ کون جان دا سی کہ کراچی یونیورسٹی توں 1960 وچ میٹالرجی وچ ڈگری لین والے قدیر خان 1967 وچ ہالینڈ توں ڈگری لین دے بعد 1972 وچ بیلجیئم توں پی ایچ ڈی دی ڈگری حاصل کر کے 1976ء وچ پاکستان وچ انجینئرنگ ریسرچ لیبارٹری قائم کر کے دنیا وچ آن دا اپنا مقصد پورا کرن گے تے 1981 وچ لیبارٹری دا ناں ڈاکٹر اے کیوں خان ریسرچ لیبارٹری رکھ کے آخر کار پاکستان نوں ایٹمی پاکستان بنا دین گے پر سوال ایہہ وے کہ پاکستان نوں ایٹمی پاکستان بنن تیکر کنہاں کٹھن مشکلات دا ساہمنا رہیا تے ساڈے قابل فخر اداریاں نے اپنی جان اُتے کھیڈ کے دنیا دیاں نظراں توں بچ کے پاکستان نوں دنیا دا ایٹمی ملک بنان لئی دنیا دے کس کس کونے وچ رسائی حاصل کیتی۔
ایس مشن دی تکمیل لئی کسے سربراہ مملکت نوں پھانسی چڑھنا پیا تے کسے نوں C130 وچ بہہ کے اپنے خالق حقیقی دے ھضور شہادت دا درجہ ملیا۔ قائداعظم دے بعد جے پاکستان دا کوئی محسن اول اے تے اوہ بلا شبہ جناب ڈاکٹر عبدالقدیر خان صاحب نیں۔ کدی سوچیے جے اج اسیں ایٹمی طاقت نہ ہوندے تے اسرائیل تے انڈیا جہے دوجے پاکستان دے دشمن سانوں نیست و نابود کرن وچ کدی دیر نہ کردے۔ اج جے ایہناں نوں ڈر اے تے ساڈے ایٹمی پروگرام نال اے تے اسیں اللہ دے فضل نال ناقابل تسخیر آں۔ ایسے لئی اج ساڈے اُتے ففتھ جنریشن وار دی یلغار اے۔ ڈاکٹر عبدالقدیر خان دی زندگی دے آخری سال بہرحال بوہت مشکل لنگھے نیں کجھ کمزور ایمان والیاں نے ایہناں نوں سکھ دا ساہ نہیں لین دتا ایس لئی ڈاکٹر صاحب ہمیشہ ایہہ کہندے رہے کہ مینوں احسان فراموش نال گلہ اے قوم توں میں خوش واں۔ حکمراناں دی اپنی ترجیحات ہوندیاں نیں آخری سالاں وچ کسے حکمران دی ترجیح وچ ڈاکٹر قدیر خان نہیں رہے تے ایہناں دی کسے نے کوئی پرواہ نہیں کیتی۔ ہندوستان نے اک مسلمان نوں ایٹمی طاقت بنان دے صلے وچ ایہناں نوں صدر مملکت بنا دتا۔میں ڈاکٹر عبدالکلام سابق صدر ہندوستان دا جنازہ ویکھدا سی تے وزیراعظم ہندوستان نوں ایہناں دے جنازے اُتے باادب ویکھیا سی۔ مینوں بہرحال شرم آئی کہ ساڈے وزیراعظم اسلام آباد وچ ہوندے ہوئے ایہناں دے جنازے اُتے نہیں گئے۔ اج اسیں بے خوف دنیا دے اگے جے Absolutly not کہنے آں تے ایس دا سبب ڈاکٹر عبدالقدیر خان نیں۔
ڈاکٹر عبدالقدیر خان دی جیہڑی عزت زندگی وچ اسیں کیتی روز محشر اوہ حکمراناں توں پچھن گے ضرور تے ایس دا جواب وی دنیا پئے گا۔ کتھے مر گئے سن ساڈے صاحب اختیار کسے نوں زحمت نہیں ہوئی کہ مرن توں پہلے حال پچھ لیندے تاکہ ڈاکٹر صاحب دے کجھ شکوے گھٹ ہو جاندے گھٹ توں گھٹ قوم نوں ایہہ ای دس دین کہ کیہڑا ڈر سی جس دی وجہ نال ڈاکٹر عبدالقدیر خان صاحب توں نظر بدل لیاں یا طاقت دا نشہ اے؟ اک دن سب نے واپس جانا اے جتھے مرضی نس لوئو اج اسیں جے کسے نوں عزت دیاں گے تے کل سانوں وی عزت ملے گی۔ ڈاکٹر عبدالقدیر خان صاحب چلے گئے جسم دی قید توں آزاد ہو کے اپنے اللہ دے حضور پیش ہو گئے تے سرخرو ہو کے گئے نیں۔
ساڈے کول ویلا اے کہ اسیں وی پاکستان لئی اینا بہترین رول ادا کریئے تے جدوں تیکر دشمن دے ایجنٹ ساڈی صفاں وچ آں قومی ترقی اُتے سوالیہ نشان رہوے گا۔ ایس لئی ہر شے نوں انج ویکھو جویں اوہ اے انج نہ ویکھو جویں تسیں ویکھنا چاہندے او۔ کدی کدی ذاتی رشتیاں اُتے ملک تے قوم نوں ترجیح دینا لازم ہو جاندا اے جے غور کریئے تے ناقابل تلافی نقصان ہو کے رہندا اے۔ میری درخواست اے کہ اپنے وزیراں مشیراں نوں اک رات لئی غریب دی جھگی وچ ایس دے بھُکے بالاں دے کول ضرور گھلو تاکہ ایہناں نوں اندازہ ہو سکے۔ جیہڑی قوم اپنے ہیروز نوں یاد رکھدی اے اوہ کدی ناکام نہیں ہوندی تے جیہڑی قوماں اپنے شہدا تے ہیروز نوں نظر انداز کر دیندیاں نیں ایہناں نوں تباہی توں کوئی نہیں بچا سکدا۔ انشاء اللہ پاکستان ناقابل تسخیر اے تے اپنی منزل دے نیڑے وے۔ ڈاکٹر عبدالقدیر خان صرف محسن پاکستان ای نہیں بلکہ محسن عالم اسلام آں کاش عالم اسلام “لا الہ الااللہ محمد رسول اللہ”دے سبز ہلالی جھنڈے تھلے اکٹھے ہو جائیے تے دنیا دی کوئی طاقت ایہناں دا خون نہیں بہا سکدی تے قبلہ اول تے کشمیر نوں آزادی توں کوئی نہیں روک سکدا۔
ڈاکٹر عبدالقدیر خان دا ناں قیامت تیکر زندہ رہوے گا تے آن والیاں نسلاں لئی مشعل راہ ہوئے گا۔
