جشنِ عید میلاد النبی ﷺ

ربیع الاول امت مسلمہ لئی کلیدی اہمیت دا حامل مہینہ اے، ایس مہینے مبارک وچ ای
حضور انور سرور کونین حضرت محمد ﷺ نوں دنیانوں ہنیریاں توں کڈن لئی گھلیا گیا

آفاق بٹ

ماہ ربیع الاول امت مسلمہ لئی خاص اہمیت دا حامل مہینہ اے کیوں جے ایس مہینے نبی آخر الزماں ﷺ دی دنیا وچ تشریف آوری ہوئی، جیہڑی انسان کامل، ہادی عالم تے وجہ تخلیق کائنات نیں۔ ربیع الاول امت مسلمہ لئی کلیدی اہمیت دا حامل مہینہ اے، ایس مہینے مبارک وچ ای حضور انور سرور کونین حضرت محمد ﷺ نوں دنیانوں ہنیریاں توں کڈن لئی گھلیا گیا۔ پیغمبر اکرم ﷺ پوری دنیا لئی نمونہ بن کے آئے، اوہ ہر شعبے وچ ایس اوج کمال اُتے فائز نیں کہ ایہناں جہیا کوئی سی تے نہ ای آئندہ آئے گا۔ عید میلاد النبی اک تہوار یا خوشی دادن اے جیہڑا دنیا بھر وچ مسلمان مناندے نیں۔ ایہہ دن حضور اکرم ﷺ دی ولادت دی مناسبت نال منایا جاندا اے۔ ایہہ ربیع الاول دے مہینے وچ آندا اے جیہڑا اسلامی تقویم دے لحاظ نال تیجا مہینہ اے۔ اونج تے میلاد النبی تے محافلِ نعت دا انعقاد پورا سال ای جاری رہندا اے پر خصوصا ً ماہ ربیع الاول وچ عید میلاد النبی ﷺ دا تہوار پوری مذہبی عقیدت تے احترام نال منایا جاندا اے۔ یکم ربیع الاول توں ای مسجداں تے دیگر مقامات اُتے میلاد النبی تے نعت خوانی ( مدحِ رسول صلی اللہ علیہ و آلہ وسلم) دی محفلاں شروع ہو جاندیاں نیں جنہاں علما کرام آنحضرت ﷺ دی ولادت با سعادت، آپ دی ذات مبارکہ تے سیرت طیبہ دے مختلف پہلوئواں اُتے روشنی پاندے نیں۔ ایسے طرح مختلف شعراء تے ثناء خواں رسول آنحضرت ﷺ دی شان اقدس وچ نعتیہ گلہائے عقیدت تے درود و سلام پیشکردے نیں۔ بارہ ربیع الاول نوں سارے اسلامی ملکاں وچ سرکاری طور اُتے عام چھٹی ہوندی اے ۔ ایس دے علاوہ امریکہ، برطانیہ، کینیڈا، کوریا، جاپان تے دیگر غیر اسلامی ملکاں وچ وی مسلمان کثرت نال میلاد النبی تے نعت خوانی دی محفلاں منعقد کردے نیں۔ قرآن دی روشنی وچ ارشاد باری تعالیٰ ہویا (تے ایہناں نوں اللہ دے دن یاد دلائو)۔ (ابراہیم،5) امام المفسرین سیدنا عبد اللہ بن عباس ( رضی اللہ عنہما )دے نیڑے ایام اللہ توں مراد اوہ دن نیں جنہاں وچ رب تعالیٰ دی کسے نعمت دا نزول ہویا ہوئے۔ ایہناں دناں وچ سب توں وڈی نعمت دے دن سید عالم ﷺ دی ولادت و معراج دے دن نیں، ایہناں دی یاد قائم کرنا وی ایس آیت دے حکم وچ داخل اے۔ (تفسیر خزائن العرفان)۔ حضرت آمنہ رضی اللہ عنہ فرماندیاں نیں (جدوں آپ ﷺ دی ولادت ہوئی تے نال ای انج دا نور نکلیا جس نال مشرق توں مغرب تیکر ساری کائناب روشن ہو گئی)۔ مسلمان تے عید میلاد ﷺ دی خوشی وچ اپنے گھراں تے مسجداں اُتے چراغاں کردے نیں خالق کائنات نے نہ صرف ساری کائنات وچ چراغاں کیتا بلکہ اسمان دے ستاریاں نوں فانوس تے قمقمے بنا کے زمین دے نیڑے کر دتا۔حضرت عثمان بن ابی العاص رضی اللہ عنہ دی والدی فرماندیاں نیں (جدوں آپ ﷺ دی ولادت ہوئی میں خانہ کعبہ دے کول سی، میں ویکھیا کہ خانہ کعبہ نور نال روشن ہو گیا تے تارے زمین دے اینے نیڑے آ گئے کہ مینوں ایہہ گمان ہویا کہ کدھرے اوہ میرے اُتے نہ ڈگ پین) جشن میلاد النبی ﷺ حضور نبی اکرم ﷺ دی ولادت با سعادت دی تاریخی خوشی وچ مسرت و شادمانی دا اظہار اے تے ایہہ انج دا مبارک عمل اے جس نال ابولہب جہے کافر نوں وی فائدہ اپڑدا اے۔ جے ابولہب جہے کافر نوں میلاد النبی ﷺ دی خوشی وچ ہر پیر نوں عذاب وچ تخفیف نصیب ہو سکدی اے تے ایس مومن مسلمان دی سعادت دا کیہ ٹھکانا ہوئے گا جس دی زندگی میلاد النبی ﷺ دی خوشیاں منان وچ لنگھی ہوئے۔ حضور سرور کائنات ﷺ آپ وی اپنے یوم ولادت دی تعظیم فرماندے تے ایس کائنات وچ اپنے ظہور وجود اُتے سپاس گزار ہوندے ہوئے پیر دے دن روزہ رکھدے سن۔
آپ صلی اللہ علیہ وآلہ وسلم دا اپنے یوم ولادت دی تعظیم و تکریم فرماندے ہوئے تحدیثِ نعمت دا شکر بجا لیانا حکم خداوندی سی کیوں جے حضور نبی اکرم ﷺ ای دے وجود مسعود دے تصدق و توسل نال ہر وجود نوں سعادت ملی اے۔ جشن میلاد النبی ﷺ دا عمل مسلماناں نوں حضور نبی اکرم ﷺ اُتے درود و سلام جہے اہم فرائض دی رغبت دلواندا اے تے قلب و نظر وچ ذوق و شوق دی فضا ہموار کردا اے۔ صلوۃ و سلام بذات خود شریعت وچ بے پناہ نوازشات و برکات دا باعث اے۔ ایس جمہور امت نے میلاد النبی ﷺ دا انعقاد مستحسن سمجھیا۔ سیرت طیبہ دی اہمیت اجاگر کرن تے جذبہ محبتِ رسول ﷺ دے فروغ لئی محفلِ میلاد کلیدی کردار ادا کردی اے۔ ایسے لئی جشن میلاد النبی ﷺ وچ فضائل، شمائل، خصائل تے معجزات سید المرسلین ﷺ دا تذکرہ تے اسوئہ حسنہ دا بیان ہوندا اے۔ خیر البشر دی ذات اقدس ایس کائنات لئی باعث رحمت تے ہے ای پر ایہناں نوں ہر شعبے وچ اوہ معراج حاصل اے جس دی مثال ای نہیں ملدی۔ عالم دین حضور پاک دی زندگی دا احاطہ کرنا تے انسان لئی شاید ممکن نہ ہوئے پر ہر شعبہ ہائے زندگی وچ اوہ عام انسان لئی بہترین عملی نمونہ نظر آئے۔ آپ ﷺ نے علم و نور دی انج دیاں شمعاں روشن کیتیاں جس نے عرب جہے علم و تہذیب توں عاری معاشرے وچ جہالت دے ہنیریاں نوں ختم کر کے ایہنوں دنیا دا تہذیب یافتہ معاشرہ بنا دتا۔ آپ ﷺ نے اپنی تعلیمات وچ امن، اخوت، بھارہ چارہ، یکجہتی تے اک دوجے نوں برداشت دا درس دتا۔ جتھے اک پاسے ایس مہینے اسیں آپ ﷺ دی ولادت دا جشن منانے آں اوتھے ساڈے اُتے لازم اے کہ اسیں آپ ﷺ دی تعلیمات اُتے عمل کریئے تاں ای اسیں آپ ﷺ نال محبت دا دعویٰ کر سکنے آں، اج دے ایس پر فتن دور وچ جے اسیں اپنے انفرادی تے اجتماعی مسائل نوں بھُل کے ملت اسلامیہ دے عظیم مفاد وچ اکٹھے ہو جائیے تے آپ ﷺ دی تعلیمات نوں اپنے لئی مشعل راہ بنا لئے تے گھر دی دہلیز اُتے ریاست تے عالم اسلام دی مضبوطی تیکر سارے مسائل حل ہو جان گے۔
بشکریہ۔ قیصر کامران صدیقی
مصطفیٰ جانِ رحمت پہ لاکھوں سلام
شمعِ بزمِ ہدایت پہ لاکھوں سلام
جس سہانی گھڑی چمکا طیبہ کا چاند
اس دل افروز ساعت پہ لاکھوں سلام