کپتان جی کتھے او، اِک نظر ایدھر وی
تہاڈے دور اقتدار وچ صوبائی پولیس سروس دے ملازمین دے خلاف انج دی انتقامی کاروائیاں آخر کیوں ہو رہیاں نیں؟
تحریر: اکرم عامر
پنجاب پولیس وچ ضلع دی سطح اُتے ڈی پی او دے بعد ایس پی انویسٹی گیشن دا کردار انتہائی اہمیت دا حامل ہوندا اے، ڈی پی او انتظامی امور دے نال جرائم دے خاتمہ تے امن و امان دے قیام لئی کم کردے نیں تے ایس پی انویسٹی گیشن دی ذمہ داری ہوندی اے کہ اپنے ضلعے وچ درج ہون والے مقدمیاں نوں تفتیشی افسران نال میرٹ اُتے یکسو کرائے، ایس بنا اُتے ایس پی انویسٹی گیشن نوں ڈی پی او دی نسبت زیادہ سکیورٹی تے عملہ درکار ہوندا اے کیوں جے اوہناں نے جرائم پیشہ عناصر دے خلاف درج ہون والے مقدمیاں دی نگرانی کرنی ہوندی اے ایس دے نتیجے وچ وڈے جرائم پیشہ عناصر نوں ایماندار تے دیانتدار ایس پی انویسٹی گیشن اک اکھ نہیں بھاندے۔ تے جرائم پیشہ عناصر ولوں اکثر ایس پی انویسٹی گیشن نوں دھمکیاں وی ملدیاں رہندیاں نیں۔ایسے بنا اُتے پنجاب پولیس وچ ڈی پی او دے بعد ایس پی انویسٹی گیشن نوں مناسب سکیورٹی فراہم کیتی جاندی اے۔
پر جان دی امان پاواں تے سی ایس پی کیڈر نال تعلق رکھن والے ڈی پی او لیہ سید علی رضا نے اک حکیم دے تحت حال ای وچ ایس پی انویسٹی گیشن لیہ تعینات ہون والے سید محمد عباس شاہ نال اک سکہ شاہی حکم دے تحت عملہ جس وچ نائب ریڈر محمد جمیل، گن مین محمد یعقوب، گن مین محمد شاہد منیر، گن مین غلام عباس، اردلی محمد اسلان، ڈرائیور عبدالرشید، کمپیوٹر آپریٹر/گن مین اعجاز حسین کو ایس پی انویسٹی گیشن لیہ دے دفتر توں تبدیل کر کے آئندہ تقرری لئی پولیس لائن بھجوا دتا اے، ایس پی انویسٹی گیشن سید محمد عباس شاہ شیخوپورہ وچ تعینات سن کہ ایہناں نوں کجھ دن بعد تبدیل کر کے ضلع لیہ وچ تعینات کر دتا گیا سی۔ ذرائع دے مطابق ایہناں دے تبادلے دے پس پردہ حقیقت ایہہ سی کہ ایس پی انویسٹی گیشن لیہ سید محمد عباس شاہ تے ایس پی عاصم افتخار جنہاں دا تعلق صوبائی پولیس سروس نال اے نے پنجاب دے صوبائی پولیس سروس دے ملازمین دی ترقیاں دے حوالے نال عدالت نال رجوع کر رکھیا اے کہ سی ایس پیز تے صوبائی پولیس سروس دے ملازمین و افسران نوں یکساں ترقیاں دتیاں جان کیوں جے صوبائی پولیس سروس دے ملازمین دی نسبت سی ایس پیز نوں ترقی دے موقعے زیادہ دتے گئے نیں جیہڑا کہ خلاف قانون اے۔ ایس نال صوبائی پولیس سروس دے ملازمین کانسٹیبل توں افسران تیکر دی حق تلفی ہو رہی اے تے صوبائی پولیس سروس دے ملازمین دی ترقیاں محدود ہو کے رہ گئیاں نیں۔ صوبائی پولیس سروس دے ملازمین دے حقوق دی اواز چکن اُتے انتقامی طور اُتے پہلے سید عباس شاہ نوں شیخوپورہ توں ضلع لیہ بھجوایا گیا۔ ہن سی ایس پی کیڈر نے انتقامی کارروائی کردے ہوئے ایس پی لیہ توں سکیورٹی اہلکار و سٹاف دی اکثریت واپس لے لئی اے۔ ڈی پی او لیہ دے ایس اقدام نال صوبائی پولیس سروس دے ملازمین وچ بے چینی ودھ گئی اے کہ پنجاب پولیس وچ نوری مخلوق اکھوان والے سی ایس پیز صوبائی پولیس سروس دے ملازمین دے نال انتقامی کاروائیاں اُتے اتر آئے نیں ایس طرح پنجاب پولیس وچ صوبائی پولیس سروس تے سی ایس پیز وچ محاذ آرائی ودھ گئی اے جس دی وجہ صرف صوبائی پولیس سروس دے ملازمین ولوں اپنا حق منگنا اے، جنہاں دا کہنا اے کہ صوبائی پولیس سروس پنجاب دے ماتحت اے، ایہناں دی ترقی پوسٹنگ دا اختیار وی پنجاب نوں ای اے جد کہ پولیس رولز دے تحت صوبائی پولیس سروس دا 20 فیصد کوٹہ گھٹ کر کے سی ایس پیز نوں دے دتا گیا اے۔ ایس طرح صوبائی پولیس سروس دے کانسٹیبل، اے ایس آئیز، سب انسپکٹر، انسپکٹر، ڈی ایس پیز، ایس پیز تیکر ترقیاں دے حوالے نال متاثر ہوئے نیں کیوں جے ایہناں دیاں ترقیاں دے اگے سی ایس پیز نوں لا دتا گیا، ایس ناانصاف دے خلاف ایس پی انویسٹی گیشن سید عباس شاہ تے ایس پی عاصم افتخار عدالت وچ اپنے تے صوبائی پولیس سروس دے ملازمین دے حقوق دی قانونی جنگ لڑ رہے نیں جس دی پاداش وچ سی ایس پیز نے انتقامی کاروائی کردے ہوئے ایس پی انویسٹی گیشن لیہ توں سٹاف تے سکیورٹی دی اکثریت واپس لے لئی اے حالانکہ پنجاب دے ہور کسے ضلعے توں کسے ایس پی انویسٹی گیشن توں سکیورٹی واپس نہیں لئی گئی۔ ایتھے سوال ایہہ پیدا ہوندا اے کہ انج صرف ایس پی لیہ دے نال ای کیوں کیتا گیا؟ جد کہ پنجاب وچ صوبائی پولیس سروس دے دیگر ایس پیز انویسٹی گیشن توں سٹاف واپس نہیں لیا گیا۔ آئی جی پنجاب پولیس رائو سردار صاحب کیہ ایہہ تہاڈے علم وچ اے؟ جے نہیں تے تہانوں باور کرایا جا رہیا اے کہ سی ایس پیز ولوں اپنے حق لئی قانونی جنگ لڑن والے ایس پی انویسٹی گیشن لیہ دے خلاف انتقامی کاروائیاں کیتیاں جا رہیاں نیں ؟ جس نال پنجاب پولیس تے سی ایس پیز وچ دوریاں ودھ رہیاں نیں تے پنجاب پولیس دے صوبائی سروس دے ملازمین وچ بے چینی جہی کیفیت پائی جا رہی اے تے صوبائی پولیس سروس دے ملازمین بے دلی دا شکار نیں ایہو صورتحال رہی تے پنجاب پولیس دی کارکردگی متاثر ہون دا اندیشہ اے، ایتھے آئی جی پنجاب توں سوال اے کہ انج تہاڈے حکم اُتے ہویا اے تے کیوں ہویا اے؟ جے عملہ محدود کرنا سی تے پنجاب بھر دے ایس پی انویسٹی گیشنز دا کیتا جاندا؟ انج صرف ایس پی لیہ دے نال کیوں کیتا گیا؟ جیہڑا ضلع بھر وچ ہر طرح دے مقدمات جنہاں وچ سنگین نوعیت دے مقدمات وی شامل نیں دی نگرانی کردے نیں تے ایہناں نوں میرٹ اُتے یکسو کروان دا فرض نبھا رہے نیں، ایہو کم پنجاب دے دیگر ایس پی انویسٹی گیشنز دا اے تے آئی جی پنجاب صاحب انتقامی کاروائیاں توں جس طبقہ نوں دبایا جائے اوہ مزید ابھردا اے جدوں ایس پی سید عباس شاہ دے خلاف انتقامی کاروائیاں شروع ہوئیاں نیں ایس ویلے توں صوبائی پولیس سروس دے ملازمین وچ سی ایس پیز دے بارے کوئی چنگی رائے نہیں پائی جا رہی ، ہونا تے ایہہ چاہیدا سی کہ صوبائی پولیس سروس دے ملازمین دا جائز مطالبہ تسلیم کر کے صوبائی پولیس سروس تے سی ایس پیز نوں ترقی دے یکساں موقعے فراہم کیتے جاندے تے صوبائی پولیس سروس دے ملازمین وی کانسٹیبل توں ایڈیشنل آئی جی، آئی جی پنجاب تیکر اپڑ پاندے جویں کہ ماضی وچ ہوندا رہیا اے پر ایتھے تے معاملہ ای الٹ ہو گیا، صوبائی پولیس سروس دے ملازمین نے اپنے حق لئی اواز کیہ بلند کیتی، سی ایس پیز جیہڑے کہ پنجاب پولیس وچ نوری مخلوق تصور ہوندے نیں نے صوبائی پولیس سروس دے ملازمین توں انتقام لینا شروع کر دتا۔ آئی جی پنجاب نال سوال اے کہ ایس پی انویسٹی گیشن لیہ توں سکیورٹی سٹاف واپس لے کے ایہناں دی زندگی رسک اُتے لا دتی گئی اے؟ خدانخواستہ جے ایہناں دے نال کوئی ناگہانی واقعہ پیش آیا تے ایس دا ذمہ دار کون ہوئے گا؟ ڈی پی او لیہ یا تسیں جناب؟ ایتھے تہاڈے توں ایہہ وی سوال اے کہ کیہ ایس پی انویسٹی گیشن لیہ کجھ ملازماں دے نال ضلع بھر دے مقدمیاں دی نگرانی کر پان گے؟ انج ہر گز ممکن نہیں؟ جدوں عملہ ای نہیں ہوئے گا تے ایس پی انویسٹی گیشن لیہ کیہ کرن گے؟ موصوف صرف دفتر وچ بیٹھن تیکر ای محدود رہن گے، راقم دے علم وچ اے کہ ایس پی انویسٹی گیشن لیہ دا شمار پنجاب دے دیانتدار افسران وچ ہوندا اے جیہڑے جرائم پیشہ عناصر دے اگے آہنی دیوار بن جاندے نیں تے مظلوم نوں انصاف دی فراہمی وچ دیر نہیں ہون دیندے۔
ایتھے ملک دے کپتان توں سوال اے کہ تسیں تے پنجاب پولیس وچ کے پی کے وانگوں اصلاحات دا نعرہ لا کے اقتدار وچ آئے سی تے تہانوں پنجاب وچ اقتدار وچ لیان وچ صوبائی پولیس سروس جس دی تعداد لکھاں وچ اے نے اہم کردار ادا کیتا سی تہاڈے دور اقتدار وچ صوبائی پولیس سروس دے ملازمین دے خلاف انج دی انتقامی کاروائیاں آخر کیوں ہو رہیاں نیں؟ جس دی ماضی وچ کوئی مثال نہیں ملدی، کپتان جی تہانوں چاہیدا اے کہ پنجاب دے کپتان عثمان بزدار نوں ہدایت فرمائو کہ ایس معاملے دا فوری نوٹس لین تے آئی جی پنجاب تے ڈی پی او لیہ توںوضاحت طلب کرے کہ انج کیوں کیتا گیا؟ تے کپتان جی صوبائی پولیس سروس دے ملازمین دے جائز مطالبے ول وی توجہ دیو نہیں تے پنجاب وچ صوبائی پولیس سروس دے ملازمین وچ پائی جان والی بے چینی دا غبار ودھدا چلا جائے گا، جیہڑا پھٹ پیا تے صوبائی پولیس سروس دے ملازمین دیگر سرکاری ملازمین وانگوں اسلام آباد تے لہور دیاں سڑکاں اُتے احتجاج کردے نظر آن گے۔
