پِلاک دے پربندھ ہیٹھ کُل پاکستان مقابلہ گائیکی سیف الملوک
وزیر ثقافت پنجاب خیال احمد کاسترو نے مقابلے وچ شرکت کرن والیا ں نوں نقد انعامات تے سرٹیفکیٹس پیش کیتے
رپورٹ: آفاق بٹ
پنجاب انسٹیٹیوٹ آف لینگوئج آرٹ اینڈ کلچر، محکمہ اطلاعات وثقافت دے زیر انتظام کُل پاکستان مقابلہ گائیکی سیف الملوک دا انعقاد کیتا گیا جس وچ ملک بھر توں نوجواناں، بزرگاں تے خواتین نے بھرپور حصہ لیا۔
ایس مقابلے وچ منصفین دے فرائض جناب حسین مجروح، ڈاکٹر سعادت علی ثاقب تے ڈاکٹر محمد جواد نے ادا کیتے ۔ ایس کُل پاکستان مقابلے وچ 43 لوکاں نے حصہ لیا۔ مقابلے وچ اول انعام محمد بلال، دوم انعام محمد ابوسفیان تے سوم انعام شبانہ عباس نے حاصل کیتا۔ انعامی رقم بالترتیب 50 ہزار، 30 ہزار تے 20 ہزار روپے اُتے مشتمل سی جد کہ باقی حصہ لین والیاں نوں فی کس 2 ہزار روپئے تے سرٹیفکیٹس دتے گئے۔ وزیر ثقافت پنجاب جناب خیال احمد کاسترو نے مقابلے وچ شرکت کرن والیا ں نوں نقد انعامات تے سرٹیفکیٹس پیش کیتے۔
اوہناں نے پلاک دی ادبی و ثقافتی خدمات نوں خوب سراہیا تے ایس طرح دی تقریبات دے انعقاد اُتے مبارکباد پیش کیتی۔ آخر وچ ڈائریکٹر جنرل پِلاک ڈاکٹر صغرا صدف نے شرکت کرن والیاں دا شکریہ ادا کیتا تے ایس عزم دا اظہار کیتا کہ پلاک آئندہ وی خصوصاً صوفیاء دے کلام دی ترویج تے معاشرے وچ امن، محبت، برداشت دی قدراں نوں فروغ دین لئی ایسے طرح دی ثقافتی سرگرمیاں دا بھرپور انتظام کردا رہوے گا تے لوکاں لئی تفریح دے موقعے پیدا کردا رہوے گا۔
