عمران خان دے دشمن کتھے نیں

مظہر برلاس

اکتوبر 2005ء وچ جہڑے دیہاڑیاں زلزلہ آیا سی پاکستان وچ شوکت عزیز دی حکومت سی۔ آزادکشمیر وچ سردار عتیق احمد خان دی حکومت سی ایہناں حکومتاں دے بعد پاکستان تے آزادکشمیر وچ پہلے پیپلزپارٹی تے فیر (ن) لیگ دیاں حکومتاں آئیاں۔ ہن دوہاں تھاواں تے تحریک انصاف دی حکومت اے۔ آزادکشمیر وچ تے حال ای وچ تحریک انصاف دی حکومت قائم ہوئی اے۔ اوتھے سردار عبدالقیوم نیازی وزیراعظم نیں جد کہ پاکستان وچ پی ٹی آئی حکومت تن ورھے مکمل کر چکی اے۔ ایہناں تن ورھیاں وچ حکومت معاشی مشکلات دا شکار رہی۔ عالمی حالات نوں بدلن وچ دیر لگی کیوں جے جدوں عمران خان اقتدار وچ آئے سن تے پاکستان خارجی محاذ تے اکلاپے دا شکار سی معاشی صورتحال پریشان کن سی کیوں جے (ن) لیگ نوں پتہ سی کہ اگلی حکومت اوہناں دی نہیں بنے گی ایس لئی اوہناں نے معیشت دا بیڑا غرق کر دتا ملک نوں مقروض کر دتا۔ ساڈیاں بہت ساریاں سڑکاں تے عمارتاں اسحاق ڈار نے گروی رکھوا دتیاں سن۔ ایہناں حالات وچ عمران خان اقتدار وچ آئے۔ اوہناں دی وفاق توں علاوہ پنجاب تے خیبرپختونخوا وچ حکومت بن گئی بلوچستان وچ اوہناں دی اتحادی حکومت بن گئی۔
اج دی صورتحال ایہہ وے کہ سوائے سندھ دے ہر تھاں تحریک انصاف حکومت وچ اے پر مسئلے عمران خان دی جان نہیں چھڈ رہے۔ ایہناں مشکلات دی کجھ وجوہات نیں جہناں تے غور کیتا جا سکدا اے ایہ مشکلات حل ہو سکدیاں نیں پر ایہدے لئی سنجیدگی دی بڑی لوڑ اے۔ لوکاں نے 2018ء دے الیکشن وچ بڑیاں امیداں دے نال تحریک انصاف نوں ووٹ دتا کیوں جے عمران خان نے اپنی 22سالہ تبلیغ وچ بڑے دعوے تے بہت سارے وعدے کیتے سن‘ اوہناں نے کرپشن خلاف بڑیاں زوردار تقریراں کیتیاں سن۔ تحریک انصاف جتی تے دو صوبیاں وچ اوہنوں اپنے وزرائے اعلیٰ بنان دا موقع ملیا۔ عمران خان نے دوہاں صوبیاں وچ اجہے وزرائے اعلیٰ اتارے جو سیاسی میدان وچ کمزور تے ناتجربہ کار سن۔ عمران خان دے کول ہور وی آپشن سن پر پتہ نہیں اوہناں نے ایہ فیصلے کیوں کیتے۔ کہدے مشورے نال کیتے۔پنجاب ورگے اہم صوبے دا وزیراعلیٰ سردار عثمان بزدار نوں بنا دتا حالاں کہ سردار عثمان بزدار کسے ہور جماعت توں نویں نویں پی ٹی آئی وچ شامل ہوئے سن۔
سردار عثمان بزدار دی خاموش طبیعت تے کارکردگی نوں پرکھدے ہوئے عمران خان دے مخلص دوستاں نے ابتدائی دیہاڑیاں وچ ای آکھ دتا سی کہ خان صاحب! پنجاب دا وزیراعلیٰ تہاڈیاں پالیسیاں خلاف کم کر رہیا اے۔ وزیراعظم عمران خان ایہناں گلاں نوں ہمیشہ نظرانداز کردے تے عثمان بزدار دے حق وچ گلاں شروع کر دیندے۔ جدوں بہت ساریاں شکایتاں آئیاں اودوں وی وزیراعظم عمران خان نے عثمان بزدار تے اعتماد کیتا۔ پنجاب بارے کرپشن دیاں داستاناں گردش کر رہیاں نیں۔ ہن تے مسلم لیگ ن پنجاب دے صدر رانا ثناء اللہ برملا ایہدا اظہار کر رہے نیں کہ ایوان وزیراعلیٰ وچ بولیاں لگدیاں نیں پوسٹنگ‘ ٹرانسفر دے ناں تے وی منڈی لگدی اے جے ایہناں گلاں نوں اپوزیشن دیاں گلاں کہہ کے نظرانداز کر وی دتا جاوے تے وی ایہدا جواب کہدے کول اے کہ اک کمشنر نوں وزیراعظم دے حکم تے کرپشن پاروں کڈھیا جاندا اے پر فیر اوہو افسر کجھ مہینے بعد پنجاب دا طاقتور ترین افسر بن جاندا اے اک ہور کمشنر ڈسکہ الیکشن وچ حکومتی بدنامی دا کارن بن دا اے تے اوہنوں کرشماتی طور تے پنڈی گھل دتا جاندا اے۔ جتھے اوہ رنگ روڈ دا کٹا کھول دیندا اے۔ ایہدے نال وزراء تے حکومت دی بدنامی ہوندی اے پر وزیراعلیٰ پنجاب وفاقی وزراء دی ایس بے عزتی تے خوش رہندے نیں کیوں جے رنگ روڈ دا کٹا کسے دے منہ بولے چاچا تے اک ہور ہستی نوں فائدہ اپڑان لئی کھولیا گیا سی۔ ایس منصوبے دی تکمیل نال تحریک انصاف دے ووٹ بینک وچ وادھا ہونا سی پر ساڈے ملک وچ ذاتی بینک بیلنس وچ وادھے دے سامنے ووٹ بینک دا وادھا کوئی حیثیت نہیں رکھدا۔ تہانوں یاد ہووے گا کہ راولپنڈی دے ایس کھیڈ دا بڑا چرچا ہویا سی ایہدے لئی بڑیاں انکوائریاں کھولیاں گئیاں‘ تحقیق کرن والے ادارے سرگرم ہوئے‘ ہن اطلاعواں نیں کہ کجھ وی نہ ملیا۔ اک عام بندے دی حیثیت نال ذہن وچ سوال ابھردا اے کہ جدوں تسیں رنگ روڈ پنڈی وچ کرپشن دی داستاناں دا چرچ کیتا سی تے فیر ایہ کرپشن ثابت کیوں نہ ہوئی؟۔
انج ایس دور وچ لوک حیران نیں کہ پنجاب ورگے وڈے صوبے وچ کئی واری چیف سیکرٹی‘ آئی جی تے دوجے افسر بدل چکے نیں پر کپتان صوبے دے چیف ایگزیکٹو نوں بدلن لئی تیار نہیں۔ پنڈورا پیپرز وچ آف شور کمپنیاں دے انکشافات مگروں ہن اداریاں نوں اہل خانہ تے وی نظر رکھنی ہووے گی انج ایہ کمال وی ایسے عہد دا اے کہ پہلے وزراء نوں کرپشن دے ناں تے فارغ کیتا جاندا اے تے بعد وچ فیر توں وزیر بنا دتا جاندا اے۔ ایسے طرح دا اک لہوری وزیر کسے نویں کارنامے لئی فیر توں سرگرم اے۔ صوبہ خیبرپختونخوا وچ پرویز خٹک جدوں وزیراعلیٰ سن تے اوہناں نے دل و جان نال کم کیتا۔ ایہدا پھل پی ٹی آئی نوں الیکشن وچ ملیا۔ ہن پتہ نہیں کہدے کہن تے محمود خان نوں وزیراعلیٰ بنایا گیا‘ خیبرپختونخوا دے موجودہ وزیراعلیٰ نے ساریاں تبدیلیاں نوں مٹی وچ ملا کے رکھ دتا اے۔ ایتھے وی حکومت شاید وزیراعظم دے پرنسپل سیکرٹری ای سرگرم نیں۔ وفاق وچ شروع توں ای اک وزیر نے معیشت دا بیڑا غرق کیتا‘ ہن عمران خان کہندے نیں کہ سانوں پہلے دن ای آئی ایم ایف دے کول ٹر جانا چاہیدا سی‘ پہلے نو مہینے دے سفر دا خمیازہ اجے تک بھگتنا پے رہیا اے۔ عمران خان نوں خارجی محاذ تے کئی کامیابیاں ملیاں نیں اوہناں نے اپنے آپ نوں عالمی لیڈر دے طور تے منوایا اے۔ اوہناں دی دیانتداری تے جرأت دی دنیا قائل اے پر خان صاحب جدوں تک اپنے گھر‘ آل دوالے تے دفتر چوں کرپٹ بندیاں نوں وکھ نہیں کردے اوس ویلے تک اوہناں دے خواباں نوں تعبیر نہیں مل سکدی۔ اپنے وعدیاں تے لوکاں دیاں خواہشاں لئی اوہناں نوں بہت کجھ چھڈنا ہووے گا‘ اوہناں نوں اپنے لاڈلیاں دی محبت چوں نکلنا ہووے گا‘ خان صاحب نوں یاد رکھنا چاہیدا اے کہ اوہناں لوکاں نوں تہاڈے نال نہیں دولت نال پیار اے تے حضرت علیؓ ہوراں دے بقول دولت دی حیثیت صرف مٹی اے۔
بقول اقبال
سلطانیِ جمہور کا آتا ہے زمانہ
جو نقشِ کہن تم کو نظر آئے، مٹا دو