عجب تیری دنیا‘ عجب تیری کایا

امرجلیل

سر‘ تسیں جس اعلیٰ منصب تے بیٹھے او تہانوں اُکا زیب نہیں دیندا کہ تسیں لوکاں نال فقرے بازی کرو۔ فقرے چست کرنا تہانوں ایس لئی وی چنگا لگدا اے کہ آل دوالے کھڑے لوک تہاڈی فقرے بازی توں خوب محظوظ ہوندے نیں۔ ہسدے ہسدے دوہرے ہو جاندے نیں۔ ایہو گل تہانوں فقرے بازی تے اکساندی اے۔ تسیں اپنی ذہانت دے قائل ہو جاندے او تے فیر فقرے گھڑنا تہاڈی عادت ہو جاندی اے۔ جے کوئی مصیبت دا ماریا ہویا بندا پانی دی کمی دی شکایت لے کے تہاڈے کول آئوندا اے فیر وی تسیں فقرے بازی نال آل دوالے کھلوتے لوکاں نوں ہسان دا موقع ہتھوں نہیں جان دیندے۔ مصیبت دے مارے ہوئے تہاڈے پچھدے نیں پانی دی کنی کمی اے تہاڈے کول؟ مصیبت دا ماریا ہویا بندا کہندا اے سر بڑی کمی اے۔ تسیں اوس نامراد دی گھبراہٹ ویکھ کے خوش ہوندے او۔ تہاڈی فقرے بازی تے فدا لوک انہماک نال تہاڈے ول ویکھ رہے ہوندے نیں۔ اودوں تسیں مصیبت دے مارے ہوئے بندے توں پچھدے او‘ کیہ اینی کمی اے کہ ڈب مرن لئی لوکاں نوں چلو بھر اپنی وی نہیں ملدا؟ تسیں اپنے طنزومزاح تے آپ ای ٹھاٹھاں مار کے ہس پیندے او۔ آل دوالے کھلوتے بندے تہاڈے ماتحت ہسدے ہسدے ادھ موئے ہو جاندے نیں۔ اسیں میڈیا والے وی کھلواڑ توں باز نہیں آئوندے۔ دوجے دن اسیں تہاڈے فہم و فراست دے عکاس فقرے اپنے اپنے اخبار دی شہ سرخی بنا لینے آں۔ فیر تسیں خوشی دے مارے آپے توں باہر ہو جاندے او۔ تسیں اپنا منصب بھل جاندے او۔ تسیں اپنے کم کاج بھل جاندے او۔ تہاڈا سارا دھیان فقرے سازی تے لگ جاندا اے۔ تسیں طنزو مزاح نال بھرپور فقرے گھڑدے رہندے او۔ بے بساں تے کسّے ہوئے تہاڈے اپنے فقرے جدوں تسیں اخباراں دیاں شہ سرخیاں وچ پڑھدے او اودوں تسیں خوشی انتہا تے ہوندی اے اپنے ٹبر نوں سد کے اخباراں دیاں شہ سرخیاں وکھاندے او۔ حالاں کہ تسیں اپنی ظرافت دے تحریری ثبوت اپنے ڈیڑھ ورھے دے پوترے تے دو ورھے دے نواسے نوں وی وکھاندے او۔ سر جی‘ فقرے تے فقرہ چست کرن والیاں دی پاکستان وچ کوئی کمی نہیں۔ پر سر جی لوک تہاڈے منصب تے دبدبے توں ڈردے نیں‘ اک واری تہاڈے طنزیہ فقرے دا جواب کسے نے طنزیہ فقرے نال دتا سی۔ تسیں اوس بندے نوں ملک چوں غداری دے الزام وچ جیل گھل دتا سی اوہ بدبخت‘ ہن تک جیل وچ سڑ رہیا اے۔ اصل وچ اوہ بدبخت اظہار دی آزادی نال دھوکھا کھا گیا سی۔ اوہ بدبخت بھل گیا سی کہ جس معاشرے وچ قائداعظم محمد علی جناح دی تقریر سنسر تے ایڈیٹ ہو سکدی اے اوس ملک وچ اظہار دی آزادی دیاں گلں مضحکہ خیز لگدیاں نیں۔ اوس بدبخت دی اپنی غلطی سی‘ اوہ بھل بیٹھا سی کہ اعلیٰ منصباں تے بیٹھے حضرات دے طنزیہ فقریاں دا جواب طنزیہ فقریاں نال نہیں دتا جاندا۔ ایہ جرم اے‘ صاحب اقتدار دا طنزیہ فقرہ سن کے تسیں دھون نیویں کر کے چپ کرکے کھلوتے رہنا اے۔ لوکاں دی ٹھاٹھاں ماردی ہسی برداشت کرنی اے۔ سوائے صبر دے تہاڈے کول ہور کوئی واہ نہیں۔ ستاریاں دی گردش دی وجہ نال جے اللہ نہ کرے تہانوں اعلیٰ منصب تے بیٹھے ہستی دے سامنے جان سگوں پیش ہون دی نوبت گلے پے جاوے تے فیر تسیں اپنے نال تسبیح لے جانا کدی نہیں بھلنا۔ پیشی دوران تسیں تسبیح دے دانے اک اک رکے پھراندے رہنا تے دل ای دل وچ کہندے رہنا‘ ان اللہ مع الصابرین۔ طنزیہ فقریاں دی بوچھاڑ وچ تسیں کسے قسم دی انسلٹ‘ کسے قسم دی تضحیک محسوس نہیں کرو گے۔
ایہ حکایت‘ ایہ بیانیہ نوے سالہ سنیاسی باوے دا اے۔ سنیاسی باوا نے برصغیر ونڈ توں پہلاں تے بٹوارے دے بعد نوے ورھے تک دا زمانہ ویکھیا اے۔ سنیاسی بابا پریشان نہیں ہوندا۔ سنیاسی باوا حیران ہوندا اے۔ نوے سالہ سنیاسی باوا نے اک دور انج دا وی ویکھیا اے جدوں چھوٹے منصب توں وڈے منصب تک مامور افسران اپنا اپنا کم‘ انہماک نال کردے سن۔ کسے دوجے دے کم وچ لت نہیں سن اڑاندے۔ میڈیا وچ پذیرائی دی خواہش نہیں سن رکھدے۔ زیادہ تر سن دے سی‘ بولدے گھٹ سن‘ جو سن دے سن اوہ لکھدے سن‘ فیر دور آیا فلماں دا‘ وڈے وڈے تے اہم منصوبیاں تے مامور لوکاںدی افسانوی کہانیاں تے فلماں بنن لگ پئیاں۔ فلمی کرداراں توں متاثر ہو کے حقیقی دنیا وچ اعلیٰ منصباں تے مامور اہم شخصیات وی بولن لگ پئیاں۔ فلمی اہم شخصیات دے مکالمے کرشن چندر‘ راجندر سنگھ بیدی‘ سلیم جاوید ورگے معتبر قلمکار لکھدے سن حقیقی دنیا دے اعلیٰ منصب دار اپنے مکالمے آپ بنان تے بولن لگ پئے۔ رہی سہی کسر ٹیلی ویژن نے کڈھ دتی۔ حقیقی دنیا دے اعلیٰ منصباں تے مامور حضرات جدوں مکالمہ بازی تے اتر آئوندے اودوں پتہ نہیں چلدا کہ اسیں حقیقی منصب دار نوں سن رہے ہوندے نیں یاں کہ فلمی تے ٹیلی ویژن ڈرامیاں دے کسے کردار نوں سن رہے ہوندے نیں۔ عجب تیری دنیا‘ عجب تیری کایا۔٭٭