عشرہ شانِ رحمۃ للعالمینﷺ دے سلسلے وچ وزیر اعلیٰ پنجاب سردار عثمان بزدار دا دورہ پِلاک
وزیراعلیٰ پنجاب نے پنجاب کلچرل میوزیم وچ نصب نامور مصور
جناب اسلم کمال دے صوفی شعراء اُتے مشتمل میورل دا افتتاح کیتا
رپورٹ: آفاق بٹ
پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے زیر اہتمام عشرہ شانِ رحمۃ للعالمینﷺ دے سسلے وچ وزیراعلیٰ پنجاب سردار عثمان بزدار نے پلاک دا دورہ کیتا تے خطاطی دی نمائش دا افتتاح کیتا۔ اوہناں نے پاکستان تے ایران دے خطاطاں دے کم دی بے حد تعریف کیتی تے فن پاریاں نوں فن مصوری دا انمول اثاثہ قرار دتا۔ وزیراعلیٰ پنجاب نے پنجاب کلچرل میوزیم وچ نصب نامور مصور جناب اسلم کمال دے صوفی شعراء اُتے مشتمل میورل دا افتتاح کیتا تے ایہنوں فن مصوری وچ اک گراں قدر اضافہ قرار دتا۔ ایس موقعے اُتے اک نعتیہ البم وی ریلیز کیتا گیا۔ وزیراعلیٰ پنجاب نے پلاک دے مختلف حصیاں دا دورہ کردے ہوئے پنجابی زبان، فن تے ثقافت لئی پلاک دی کارکردگی دی بھرپور تعریف کیتی۔ ایف ایم پنجاب رنگ ریڈیو اُتے اوہناں ے لائیو پروگرام وچ خصوصی گل بات کیتی تے پلاک لوک اسٹوڈیو دے تحت ہون والی ریکارڈنگز نوں سراہیا۔ وزیراعلیٰ دے دورہ دے دوران صوبائی وزیر ثقافت خیال احمد کاستر، سیکرٹری اطلاعات و ثقافت پنجاب راجہ جہانگیر انور، ڈائریکٹر جنرل پلاک ڈاکٹر صغرا صدف، ڈائریکٹر جنرل پبلک ریلیشنز پنجاب ثمن رائے، ڈائریکٹر پلاک محمد عاصم چودھری تے خاقان حیدر غازی وی ایہناں دے نال سن۔ صوبائی وزیر ثقافت پنجاب، سیکرٹری اطلاعات و ثقافت، پنجاب تے ڈائریکٹر جنرل پلاک ولوں وزیراعظم پنجاب نوں اسمِ محمد ﷺ تے کلمہ طیبہ اُتے مشتمل پینٹنگز وی بطور تحفہ پیش کیتیاں گئیاں۔
