امید اے فلم پسند آئی ہووے گی

شکیل امجد صادق

اک سہانی سویر اک بندے دی گڈی اوہدے گھر دے ساہمنیوں چوری ہو گئی۔ بڑی حیرانی والی گل سی تے مسلسل حیرانی وی اپنے پر کھولے روشن صبح نوں اداس کیے جا رہی سی پر شام ڈھلدیاں ای اوہو گڈی صاف ستھری حالت وچ مکمل پالش دے نال اوسے تھاں تے کھڑی پائی گئی جتھوں اوہ چوری ہو گی سی تے گڈی دے اندر اک خط پیا سی جہدے تے لکھیا سی کہ میں تہہ دل نال معذرت چاہنا واں کہ مینوں ایہ غیرمہذب تے غیرتہذیب یافتہ قدم اٹھانا پیا پر میں کیہ کردا ایہ قدم نہ چکدا تے ہور کیہ کردا میری بیوی دی حالت ڈلیوری پاروں بڑی ماڑی سی تے تیزی نال وگڑ رہی سی مینوں کوئی سمجھ نہیں سی آ رہیا کہ میں کیہ کراں تے کیویں اوہنوں ہسپتال اپڑاواں۔ کوئی پرسان حال نہیں سی جیویں موجودہ حکومت دا رویہ اپنی غریب تے بیروزگار عوام نال اے۔ بس ایس وجہ نال میں چوری ورگا گھنائونا قدم اٹھایا تہاڈی گڈی چوری کیتی تے اپنی بیوی نوں جیویں تیویں کر کے ممکن ہویا ہسپتال لے کے گیا پر میں اپنے کیتے تے بڑا شرمندہ واں تے امید کرنا واں تسیں مینوں میری ایس حرکت تے معاف کر دیو گے اللہ تہانوں بہت زیادہ اجر دیوے گا۔ میں تہاڈی صحت وسلامتی لئی اللہ دے حضور دعاگو آں۔ اللہ تہانوں ہمیشہ سلامت رکھے تے میرے ولوں تہانوں تے تہاڈی فیملی لئی اک عدد تحفہ اے۔ میں امید کرنا واں تسیں قبول فرما کے مینوں عزت بخشو گے۔ ایہ اج رات دے فلم دے شو دیاں ٹکٹاں نیں تے نال کجھ کھانے پینے دیاں چیزاں وی نیں براہ مہربانی قبول کرو۔ ایہ سب اوس مدد دے بدلے میں تہاڈی گڈی دے راہیں ہوئی نہیں تے میری بیوی مر گئی ہوندی تے چن ورگا پُتر ایس دنیا وچ آن توں پہلاں ای دم توڑ چکیا ہوندا۔ مینوں ایہ قلق ساری عمر رہنا سی۔ بس ایہ سب تہاڈے راہیں ممکن ہویا گڈی دا مالک ایہ سب پڑھ کے مسکرایا کہ بناں محنت گڈی وی دھلی دھلائی مل گئی تے مفت وچ رات دے شو دیاں ٹکٹاں وی مل گئیاں۔رات نوں جدوں فیملی فلم ویکھ کے واپس آئی تے اوہناں دے گھر ڈکیتی دی واردات کیتی جا چکی سی۔ پورا گھر سامان توں خالی کیتا جا چکیا سی تے اوتھے اک خط پیا ملیا جہدے تے لکھیا سی امید اے فلم پسند آئی ہووے گی۔
ملک وچ مہنگائی دس سال دی بلند ترین سطح تے اپڑ گئی اے۔ پاکستان دے ادارہ شماریات دا کہنا اے کہ ملک وچ کھان پین دیاں چیزاں دیاں قیمتاں وچ ڈھیر وادھا ہویا اے۔ پاکستان وچ پچھلے مہینے دے آخر تے مہنگائی دی شرح ہور دو فیصد وادھے نال 14 فیصد توں وی اُتے ہو گئی اے مہنگائی دی موجودہ شرح پچھلے دو ورھے دی بلند ترین سطح تے اپڑ گئی اے۔ ادارہ شماریات دے مطابق جنوری وچ وی کھان پین دیاں قیمتاں وچ سب توں ودھ وادھا ریکارڈ کیتا گیا جہناں وچ کنک‘ آٹا‘ چینی‘ گڑ‘ کھانے دا تیل‘ پھل تے دوجیاں شیواں شامل نیں۔ ادارہ شماریات دے مطابق پنڈاں وچ شہراں دی نسبت مہنگائی دی شرح وچ زیادہ وادھا ہویا اے۔ رپورٹ موجب پنڈاں وچ ایل پی جی دی قیمت ست ورھے دی بلند ترین سطح تے ویکھی جا رہی اے۔ اعدادوشمار موجب تحریک انصاف دی حکومت دے برسراقتدار آن دے بعد ملک وچ مہنگائی دی شرح 5.80 توں ودھ کے 14.6 فیصد تک جا اپڑی اے۔ یاد رہوے کہ ملک وچ 2007-08ء دوران مہنگائی دی شرح 17فیصد ریکارڈ کیتی گئی سی جو ہن تک ملکی تریخ وچ افراط زر دی بلند ترین شرح قرار دتی جاندی اے۔ واضح رہوے کہ حکومت نے جاری ورھے مہنگائی دی شرح 11توں 13فیصد جد کہ عالمی مالیاتی ادارے نے 13فیصد رہن دا امکان ظاہر کیتا سی۔ پر ایس ویلے ایہ شرح ایہناں دوہاں اندازیاں توں وی ودھ چکی اے۔ معاشی ماہرین دا کہنا اے کہ اگلے دو مہینے دوران وی ایہ شرح زیادہ رہن دی آس اے جہدے بعد ایہدے وچ کمی دی امید نہیں کیتی جا سکدی۔ مہنگائی دی وجہ روپیے دی قیمت وچ کمی اے۔
کراچی وچ رہندے اک معاشی تجزیہ کار منیرافضل دا کہنا اے کہ کھان پین دیاں شیواں دی گرانی وچ وادھے دی مڈھلی وجہ روپیے دی قیمت گھٹ ہونا سی۔ بھاویں کئی مہینے توں ہن روپیے دی قیمت وچ استحکام تے نظر آئوندا اے پر کھان پین والیاں شیواں دیاں قیمتاں وچ حالیہ وادھا حقیقت وچ پاکستانی روپیے دی 40فیصد دے نیڑے گراوٹ دے آفٹر شاکس ای نیں۔ منیرافضل دا کہنا سی کہ حکومت نے گیس دیاں قیمتاں وچ وادھے دا عندیہ دتا اے جہدے تے عملدرآمد ہونا باقی اے۔ ایہناں وجوہات تے جاری دو مہینے تک مہنگائی ہور ودھن دا ڈر اے۔ ہن جے ایہ مہنگائی ایس تسلسل نال جاری رہی تے کوئی غریب روئے زمین تے نہیں رہوے گا۔ مڈل کلاس توں لے کے تھلڑا طبقہ ایس مہنگائی دے ہتھوں مجبوریاں دے ڈھائے چڑھ جاوے گا تے اپنی موت آپ مر جاوے گا۔ بقول شوزیب کاشر
روٹی کے دو نوالے ہیں مشکل سے دستیاب
مہنگائی اس قدر ہے کہ مر جائے آدمی
ساڈے نال وی اوہو ہویا اے جو کار دے مالک دے نال ہویا۔ دوستو امید اے کہ تہانوں پچھلے 43ورھے یعنی 1988ء توں ہن تک وکھائیاں جان والیاں فلماں پسند آئیاں ہون گئیاں۔٭