کپتان جی شکریہ!

ارشاد بھٹی

عمران خان دی 22سالہ جدوجہد دے دو بنیادی نکات ریفارمز‘ بلاامتیاز احتساب‘ تحریک انصاف منشور دے دو وڈے وعدے‘ اک ادارہ جاتی اصلاحات‘ دوجا چوراں‘ ڈاکوئواں‘ لٹیریاں نوں نشان عبرت بنانا‘ عمران خان نے کئی واری کہیا کہ اقتدار ملیا‘ اداریا ںنوں مضبوط‘ آزاد‘ خودمختار بناواں گا‘ ملک لٹن والیاں نوں نہیں چھڈاں گا۔ عمران خان آئے دن کہندے اقتدار ملیا تے کرپشن دا خاتمہ پہلی ترجیح ہووے گی تے فیر عمران خان نوں اقتدار مل گیا‘ اوہ وزیراعظم بن گئے‘ فیر جدوں کپتان نے ق لیگ‘ جہنوں اوہ ڈاکو لیگ کہندے سن نال اتحاد کیتا تے اسیں سارے ایہ سوچ کے چپ رہے کہ ایہ کپتان دی سیاسی مجبوری‘ جدوں ایم کیو ایم نال ہتھ ملایا جہنوں اوہ بھتہ خور قاتل کہندے سن تے اسیں ایہ سوچ کے چپ رہے کہ کپتان نے اوس ایم کیو ایم نال ہتھ ملایا جو مائنس قائد تحریک‘ کپتان نے جدوں نیب دے ملزماں نوں پروڈکشن آرڈر تے اسمبلی اجلاساں وچ سدیا‘ جدوں کوٹ لکھپت جیل وچ قید شہبازشریف جہناں تے پبلک منی خوردبرد دے الزامات نیں‘ اوہناں نوں پبلک اکائونٹس کمیٹی دا چیئرمین بنایا‘ جدوں مجرم نوازشریف دا ساڑھے چھ گھنٹے کابینہ اجلاس دے بعد ناں ای سی ایل چوں کڈھ کے لندن گھلیا۔ جدوں پچھلی حکومتاں دے متنازعہ لوکاں نوں وزیر بنایا‘ جدوں اپنے دوستاں‘ کابینہ ممبراں دے کارنامیاں تے اکھاں بند کر لئیاں‘ جدوں یوٹرن تے یوٹرن مارے‘ جدوں پہلاں نیب ترمیمی آرڈیننس لے آئے‘ جدوں ہر شاخ تے سائیں بزدار بٹھا دتا‘ جدوں بیڈ گورننس‘ بیڈپرفارمنس دے عملی نمونے وکھائے‘ جدوں معیشت دے ٹائی ٹینک وچ سوراخ کیتے تے جدوں مہنگائی تے بیروزگاری غربت نوں اسمان تک اپڑایا۔ اودوں وی اسیں ایہ سوچ کے چپ رہے کہ کپتان آپ ایماندار‘ صاف نیت‘ ملک لئی کجھ ضرور کرے گا‘ کپتان نوں وقت‘ موقع دینا چاہیدا اے۔ سانوں اپنے کپتان تے بھروسہ سی کیوں جے اسیں تے اوس کپتان نوں جان دے سی جو کہندا سی کہ 90 دیہاڑیاں وچ کرپٹس نوں اندر کر دیواں گا تن مہینیاں وچ کرپشن مکا دیواں گا‘ تن مہینے لئی نیب مینوں دے دیو ملک کرپشن فری کر دیواں گا۔
اسیں تے اوس کپتان نوں جان دے سی جو کہندا سی عمران خان وزیراعظم بنیا تے سب توں پہلاں احتساب وزیراعظم خان دا ہووے گا فیر عمران خان دی کابینہ دا ہووے گا تے فیر احتساب تھلے جاوے گا۔ اسیں تے اوس کپتان نوں جان دے سی جو کہندا سی میں اقتدار وچ آ کے اداریاں نوں ایناں مضبوط کر دیواں گا کہ اوہ کرپشن ہون ای نہیں دین گے۔ اداریاں نوں ایناں خودمختار بنا دیواں گا کہ اوہ بلاخوف و خطر وزیراعظم تے اوہدی کابینہ تے چیک رکھن گے ‘ایہدے تے اسیں جھوم جاندے سی جدوں کپتان کہندا میں کسے نوں این آر او نہیں دیاں گا‘ جدوں وی مایوسی ہون لگدی تے میں کسے نوں این آر او نہیں دیاں گا۔ سن کے فیر توں خوش ہو جاندے کیوں جے سانوں یقین سی دنیا ایدھر دی اودھر ہو جاوے پر کپتان کسے نوں این آر او نہیں دیوے گا پر فیر کپتان نیب ترمیمی آرڈیننس 2021ء لے آیا‘ تن سالہ اقتدار وچ سو واری میں کسے نوں این آر او نہیں دیاں گا کہن والے کپتان نے این آر او دے دتا۔ اپنیاں نوں‘ این آر او دے دتا اپوزیشن نوں‘ این آر او دے دتا بیوروکریسی نوں‘ این آر او دے دتا تاجراں نوں‘ کپتان دا سب توں وڈا وعدہ‘ نعرہ‘ دعویٰ سی احتساب دا ایسے کپتان نے بقلم خود احتساب دا جنازہ پڑھا دتا‘ اوہ کپتان جنہے کرپشن مکانی سی‘ کرپٹاں نوں اندر کرنا سی‘ ایسے کپتان نے کرپٹاں نوں پتلی گلی چوں کڈھ دتا۔ کرپشن حلال کر دتی تے اوہ کپتان جنہے نیب نوں مضبوط کرنا سی اوسے کپتان نے نیب دے پر وڈھ دتے‘ نیب نوں ٹوتھ لیس کر دتا‘ ایس طرح خیر نال کپتان دا نیب ترمیمی آرڈیننس آڈٹ لیس‘ پرفارمنس لیس‘ جمہوریت لئی نویں زندگی بنیا‘ خیر نال کپتان دا نیب ترمیمی آرڈیننس جھوٹ‘ دس نمبری‘ منافقت بھری سیاست لئی خوش خبری ثابت ہویا‘ خیر نال کپتان دا نیب ترمیمی آرڈیننس آل بچائو‘ مال بچائو‘ کھال بچائو لئی بمپر آفر ہویا۔
خیر نال کپتان دا نیب ترمیمی آرڈیننس پاکستان‘ پاکستانیاں تے ظلم ثابت ہویا۔ خیر نال اپنی 22سالہ سیاسی جدوجہد دے بعد کپتان نے جہڑے دو شاہی ٹبراں توں قوم دی جان چھڑائی جہڑے بادشاہواں‘ شہزادے‘ شہزادیاں نوں لٹ مار دا حساب دین لئی عدالتاں وچ سدیا‘ کپتان نے آرڈیننس راہیں ساریا ںنوں ریلیف پیکیج دے دتا۔ ایتھے ایہ ضرور کہنا‘ حیرت اپوزیشن دی دو نمبری‘ منافقت تے‘ ایس آرڈیننس تے اوہناں دا دل باغ باغ ہو جانا چاہیدا اے کیوں جے اوہناں تے میثاق جمہوریت وچ سی نیب نوں ختم کرنا‘ اوہناں دے امام خمینی نوازشریف کہہ چکے نیب دے پر کٹنے نیں‘ اوہناں دے اک زرداری سب تے بھاری کہہ چکے نیب تے معیشت‘ نیب تے پاکستان اکٹھے نہیں چل سکدے۔ اوہناں دے شہبازشریف کہہ چکے نیب آمر دا تحفہ ایہنوں ختم کر دینا چاہیدا اے۔ اوہناں دے مولانا کہہ چکے نیں نیب نوں جندرا مار دینا چاہیدا اے اوہناں دے بلاول بھٹو کہہ چکے نیب ظالم‘ نیب کالے قنون والا‘ اوہناں دی مریم نواز کہہ چکی نیب ورگا ادارہ جمہوریت تے ظلم‘ پوری اپوزیشن آئے دن نیب نوں لتاڑدی رہی‘ پوری اپوزیشن آئے روز نیب تے چڑھائیاں کردی رہی‘ پوری اپوزیشن نیب دے اختیارات توں تنگ سی۔ ایس لئی نیب ترمیمی آرڈیننس تے اپوزیشن نوں کپتان دا شکرگزار ہونا چاہیدا اے کپتان نوں مبارکباد دینی چاہیدی اے بنی گالا مٹھائی گھلنی چاہیدی اے۔ اپوزیشن نوں تے جماعت بھنگڑے تے دھمالاں پانیاں چاہیدیاں نیں جس طرح کپتان دے پہلے نیب ترمیمی آرڈیننس پاروں راجہ پرویز اشرف اک کیس چوں چھٹ گئے سن اوسے طرح ایس نیب آرڈیننس دی برکت نال 56 کمپنی تے آشیانہ کیساں توں شہبازشریف کامیاب ہو جان گے۔ شاہد خاقان عباسی‘ مفتاح اسماعیل‘ احسن اقبال سنے 18 اپوزیشن سیاستدان فیض یاب ہون گے۔
کپتان دے نیب ترمیمی آرڈیننس توں آٹا‘ گندم‘ چینی‘ ایل این جی‘ مالم جبہ‘ بی آر ٹی سنے 9 سکینڈلاں توں کپتان دے کھڈاریاں نوں وی کلین چٹ مل جاوے گی کیہ کمال آرڈیننس‘ حکومت وی فیض یاب‘ اپوزیشن وی فیض یاب‘ مینوں امید اے ایس آرڈیننس دے بعد ہن اسدعمر کھل کھلا کے ترقیاتی فنڈز خرچ کر سکن گے۔ شوکت ترین ملک وچ سرمایہ کاراں دیاں لائناں لا دین گے بیورو کریسی 24گھنٹے کم کرے گی تاجر ملک وچ منصوبیاں دی بھرمار کر دین گے مطلب عوامی خوشحالی‘ ملکی ترقی دا دور شروع ہون والا‘ سارے دعا کرو‘ سپریم کورٹ آرڈیننس کالعدم قرار نہ دے دیوے‘ رنگ وچ بھنگ نہ پا دیوے‘ جاندے جاندے اپنے پیارے کپتان نوں ایہ ضرور کہنا‘ کپتان تہاڈے دو وعدے وعدے‘ اصلاحات ہو نہ سکیاں‘ احتساب دا جنازہ کڈھ دتا‘ کپتان جی شکریہ۔
(بشکریہ روزنامہ جنگ)