سردار عثمان بزدار دا انداز ِگفتگو

پچھلے دیہاڑ پلاک وچ اک خطاطی دی نمائش وچ شرکت دا موقع ملیا جس دا افتتاح وزیراعلیٰ پنجاب عثمان بزدار صاحب نے کرنا سی

عتیق انور راجا

پنجاب حکومت تے سارے حکومتی محکمے مبارک باد دے مستحق نیں کہ جنہاں نے نیوزی لینڈ کرکٹ ٹیم دے پاکستان کرکٹ اُتے اچانک وار تے ملک توں فرار دے بعد اک چیلنج قبول کردے ہوئے بڑی محنت تے جانفشانی نال پنجاب دے دو شہراں راولپنڈی تے لہور وچ قومی ٹی ٹونٹی میچز دے انعقاد نوں یقینی بنا کے دنیا نوں وکھا دتا کہ پاکستان ہر لحاظ نال اک پرامن ملک اے تے پاکستانی لوک کھیڈ تے کھلاڑیاں نال بوہت محبت کردے نیں۔ تے فیر میلاد شریف دے حوالے نال گلی محلیاں توں لے کے شہراں تے شاہراہواں تیکر نکلن والے جلوساں، ریلیاں تے مجلساں نوں یقینی بنان لئی اپنا کردار بخوبی ادا کیتا۔ کرونا تے لاک ڈائون دے چلدے پچھلے دو ورھیاں توں انسانی جاناں دے تحفظ نوں لے کے کسے وی حکومت ولوں عوام الناس نوں وڈی وڈی ریلیاں تے جلسے جلوساں دی اجازت دینا ممکن نہیں سی پر ایس سال مسلمانان پاکستان دا اپنے نبی پاک ﷺ نال محبتاں دا رنگ ہر کدھرے نظر آندا رہیا اے۔ خالق کائنات اپنی مقدس کتاب وچ ارشاد فرماندا اے کہ، اے محبوب ﷺ، اسیں آپ ؐ دا ذکر بلند کر دتا، ایس فرمان دا مفہوم جیہڑا سمجھ آندا اے کہ ہر لنگھدے لمحے، دن، ہفتے تے سال دے نال نبی پاک ؐ دا ذکر دنیا وچ بلند تر ہو رہیا اے۔ آپ اُتے ایمان لیان والیاں دی تعداد ودھ رہی اے۔ پنجاب حکومت دی گل کراں تے ربیع الاول دا مہینہ شروع ہون توں کئی ہفتے پہلے میلاد شریف دے حوالے نال انج انج دے پروگرام ترتیب دتے جا چکے سن جنہاں دی ماضی وچ گھٹ ای مثال نظر آندی اے۔اک تحصیل توں لے کے وزیراعلیٰ ہائوس تیکر تے تحصیل دار توں شروع ہو کے ضلع فیر ڈویژن توں وزیراعلیٰ تیکر ہر کوئی حضرت محمد ﷺ دے ایس دنیا وچ تشریف لیان دی خوشیاں منان وچ برابر متحرک آندے رہے۔ سلام اے ایہناں پولیس والیاں نوں جیہڑے دن رات عوام الناس دی حفاظت لئی ہر کدھرے موجود رہے۔ سلام اے ایہناں سول سرکاری افسراں نوں جیہڑی چھٹی دے دن وی میلاد شریف دے حوالے نال محفلاں وچ اپنی شرکت یقینی بناندے رہے تے سلام اے ایہناں بہادر جواناں نوں جیہڑے وطن دی سرحداں دے دفاع لئی ایس عید وی اپنے گھر والیاں توں بخوشی دور رہے۔ منگل دے دیہاڑ عید میلادالنبی ؐدے موعے لہور پلاک وچ اک خطاطی دی نمائش وچ شرکت دا موقع ملیا جس دا افتتاح وزیراعلیٰ پنجاب عثمان بزدار صاحب نے کرنا سی مقررہ ویلے توں کجھ منٹ پہلے جدوں میں اوتھے اپڑیا تے سیکرٹری اطلاعات و ثقافت پنجاب راجہ جہانگیر انور، وزیر ثقافت خیال احمد کاسترو تے کجھ ہور سرکاری لوک اوتھے بیٹھے سن تے کجھ ای لمحیاں بعد پابندی وقت دا خیال کردے ہوئے وزیراعلیٰ پنجاب وی اوتھے اپڑ گئے۔ ایہناں دا استقبال کردے ہوئے سیکرٹری اطلاعات و ثقافت پنجاب راجہ جہانگیر انور نے وزیراعلیٰ نال میرا تعارف کرانا چاہیا تے سردار عثمان بزدار صاحب فوراً بولے راجہ صاحب ! نوں جاننا وی آں تے پہچاننا وی آں۔ ایہہ اک وڈے انسان دی اعلیٰ ظرفی اے کہ دو تن مختصر جہی ملاقاتاں وچ رسمی سلام دعا کرن نال عام جہے لکھاریاں نوں وی یاد رکھدے نیں۔
وزیراعلی پنجاب نال پچھلے سال کالم نگاراں دے نال کئی اک ملاقاتاں وچ سلام دعا دا شرف حاصل ہویا۔ تے جدوں وی میری ایہناں نال سلام دعا ہوئی یا جدوں وی ایہناں نوں کالم نگاراں، ٹی وی اینکرز تے روپورٹرز نال گل کردے سنیا تے ہر وار اک گل دا اعتراف کرنا پیا کہ سردار عثمان بزدار صاحب نوں گل بات دے فن وچ خوب مہارت حاصل اے۔ لمبی لمبی چھڈن والے، بے تکی گلاں کرن والے تے منہ توں جھگ کڈدے ہولے بولن والے لوکاں دی ایس ملک وچ کدی کمی نہیں رہی پر دھیمے لہجے، نپے تلے لفظاں وچ اپنا نقطہ نظر پیش کرن والے سردار عثمان بزدار جہے لوک اسیں مسنداں اُتے بیٹھے بوہت ای گھٹ ویکھے نیں۔ ایہہ یقینا ایہناں دی خاندانی تربیت دا اثر اے کہ اپنے مخالفاں بارے گل بات کردے ہوئے وی تہذیب دا دامن ہتھ توں جان نہیں دیندے میں سمجھنا واں کہ جے پاکستان دے سارے سیاست داناں نوں گل بات دا فن آ جائے تے بوہت سارے مسائل پیدا ای نہ ہون۔ نمائش وچ پاکستان تے ایران تے خطاطاں دے فن مہارت دے بوہت سارے فن پارے سجے نظر آ رہے سن۔ جنہاں دے کول توں لنگھدے ہوئے پاکستان دے مشہور مصور اسلم کمال وزیر اعلیٰ نوں تفصیلات نال آگاہ کردے رہے۔ جناب اسلم کمال دی پنجاب دے صوفی شعرا دے حوالے نال تیار کیتی گئی اک وڈی پینٹنگ نوں وزیراعلیٰ پنجاب نے اینا پسند کیتا کہ جناب قریب پنج منٹ ایسے پینٹنگ دے کول کھڑے پنجابی صوفی شعرا دے کلام تے انسانیت نال محبت دیاں گلاں کردے رہے۔ تے فیر فرمایا کہ جے اسیں ایہناں صوفیا دے پیغا م نوں اپنی زندگیاں وچ شامل کر لئے تے بوہت جلدی اک اسلامی فلاحی ریاست دی تکمیل دا خواب پورا کر سکنے آں۔ ایس موقعے اُتے اوہناں نے جلدی اک پنجابی ٹی وی چینل شروع کرن دی خوشخبری وی سنائی۔