بلدیاتی اداریاں تے سیاسی نظام دے نال کھلواڑ

برمنگھم دے چوہدری عبدالغفار پاکستان دے اگلے الیکشناں وچ حصہ لین لئی پرتول رہے نیں

اسد اللہ غالب

پاکستان وچ بلدیاتی نظام دی کیفیت شعر دے ایس مصرے توں ملدی جلدی اے کہ : ’’اُدھر ڈوبے اِدھر نکلے‘‘۔جویں ای کوئی بلدیاتی اداریاں نوں زندہ کرن دی غلطی کردا اے تے نال ای ایہناں دے گلے اُتے تلوار چل جاندی اے۔ ایہہ تاثر برمنگھم دے چوہدری عبدالغفار دا اے۔ جنہاں نے ایہہ خبر سن کے اطمینان دا اظہار کیتا سی کہ عدلیہ نے بلدیاتی ادارے بحال کر دتے نیں پر ہن اوہ پاکستان وچ اپنی جان پہچان دے لوکاں نوں فون کردے نیں تے ایہناں نوں بڑی دکھی کر دین والی خبراں ملدیاں نیں کہ بلدیاتی اداریاں دی بحالی محض اک تماشا اے تے اک وکھاوا اے، ایہناں نوں ایس وقت بحال کیتا گیا اے جدوں ایہناں دی ٹرم وچ صرف دو مہینے باقی نیں تے دوجے پاسے کوشش ایہہ کیتی جا رہی اے کہ ایہناں دے اختیارات وچ مینگنیاں پائیاں جان۔
ساڈے اوورسیز پاکستانی اپنے ہاں تے ایہناں اداریاں نوں انتہائی منظم، خود مختار تے فعال ویکھنے آں۔ ایہناں نوں ساری شہری سہولتاں ایہناں ای اداریاں نال ملدیاں نیں ۔ ہسپتال توں لے کے تعلیمی ادارے ایہناں ای دے کنٹرول وچ چلدے نیں۔ گلیاں دی تعمیر تے صفائی ستھرائی ایہناں ای اداریاں دے ہتھ وچ اے۔ سوشل سکیورٹی دے نظام دی کامیابی دا دارو مدار وی ایہناں ای اداریاں دے سر اُتے وے۔ ہر سہولت دروازے اُتے دستیاب ہوندی اے ، شہریاں نوں صوبائی یا مرکزی حکومتاں یا ارکان پارلیمنٹ دے پچھے نہیں نسنا پیندا، ٹین ڈائوننگ اسٹریٹ دے چکر نہیں لانے پیندے، شاہی سرکار تے دربار ول نہیں ویکھنا پیندا، کیہ مجال کہ سرخ فیتہ کسے دے مسئلے دے حل دی راہ وچ رکاوٹ بن سکے پر عبدالغفار کہندے نیں کہ پاکستان وچ جیہڑے بلدیاتی ادارے بحال ہوئے نیں اوتھے ایہناں دے جانن والیاں دے ہتھ بنھے ہوئے نیں ایہناں نوں ایہناں نوں فنڈ ملدا اے نہ اختیارات دتے جاندے نیں بس اوہ اپنے دفتراں وچ بیٹھے مکھیاں مارن دا کم کردے نیں۔
برمنگھم دے چوہدری عبدالغفار پاکستان دے اگلے الیکشناں وچ حصہ لین لئی پرتول رہے نیں۔ ایہناں دا کہنا اے کہ ودھ توں ودھ تارکین وطن پاکستان دی سیاست وچ آ کے حصہ لین، کامیابی دے جھنڈے لائے تے ایتھے دے گلے سڑے بدبو دار نظام نوں بدلن دی کوشش کرن۔ عبدالغفار کہندے نیں کہ پاکستان دے گلی کوچیاں تے نالیاں توں ای بدبو نہیں آندی بلکہ اقتدار دے اُچے ایوان وی بدبودار نیں، ملک دا سیاسی تے انتظامی ڈھانچہ دیمک چٹ چکی اے تے اک کھوکھلا فرسودہ نظام پاکستان دی بنیاداں نوں لرزہ براندام کر رہیا اے۔ انگریز اپنے ترکے وچ جس پٹواری تے تھانہ منشی دا نظام چھڈ گیا سی۔ ایہنوں اج چوہتر ورہے بعد وی اسیں گلے نال لایا ہویا اے۔ اسیں تھانہ کلچر تے پٹواری کلچر دے چنگل وچ پھسے ہوئے آں۔ نت نویں مافیاز نے سر چک لیا اے۔ کدھرے کلاشنکوف کلچر پھنکار رہیا اے کدھرے ہیروئن مافیا بدمست ہاتھی بنیا ہویا اے، کدھرے منی لانڈرنگ مافیا قومی خزانے اُتے ہتھ صاف کر رہیا اے۔
چوہدری عبدالغفار کہندے نیں کہ کوئی ساڈے توں پچھے کہ پاکستانی سیاست داناں، بیورو کریٹاں، صنعت کاراں تے میڈیا پرسناں نے بیرون ملک کنہی جائیداداں بنا لئیاں نیں۔
عبدالغفار صاحب کہندے نیں کہ اوورسیز پاکستانی ساڈے پارلیمانی نظام دا حصہ بنن گے، اقتدار وچ شریک ہون گے تے اوہ یقینی طور تے یورپ تے امریکہ وانگوں اک منظم سسٹم نوں نافذ کرن دی کوشش کرن گے، انج دا سسٹم جس اُتے عوام اکھاں بند کر کے اعتماد کر سکن۔
میں چوہدری عبدالغفار توں پچھیا، تسیں فوری طور تے پاکستان وچ کیہڑی اصلاحات تجویز کردے او، اوہناں نے برجستہ کہیا کہ سب توں پہلے تے شفاف تے غیر جانبدارانہ بلدیاتی الیکشن کروائے جان تے ایہناں  بلدیاتی اداریاں نوں اوہ سارے اختیارات دتے جان جیہڑے یورپ تے امریکہ دے بلدیاتی اداریاں نوں حاصل نیں۔ بلدیاتی اداریاں دا ناظم تے کونسلر عوام دی پہنچ وچ ہوندا اے تے اوہ شہر دے چوک وچ کھڑے ہو کے ایس دا احتساب کر سکدے نیں، انج دی صورت حال وچ کوئی وی کونسلر تے ناظم غیر اصولی، غیر قانونی تے غیر آئینی اقدام کرن توں پہلے ہزار وار سوچے گا کہ ایہنوں عوام دے اندر رہنا اے تے عوام دے اگے جواب دہ ہونا اے۔ جد کہ موجودہ صورت حال وچ ارکان اسمبلی عوام دے ووٹاں نال کامیاب ہو کے اپنا علاقہ چھڈ دیندے نیں تے اوہ لہور، اسلام آباد تے کراچی دے پوش علاقیاں وچ ڈیرے جما لیندے نیں۔ ایہناں دی لینڈ کروزراں دے اگے پچھے مسلح گڈیاں دے جتھے ہوندے نیں جیہڑے عوام تے ارکان اسمبلی دے وچکار دیوار بن جاندے نیں۔
چوہدری عبدالغفار نے ٹھنڈہ آہ بھردے ہوئے کہیا کہ امریکہ تے یورپ دے ارکان پارلیمنٹ ملکی پالیسیاں بناندے نیں، قانون سازی وچ مصروف رہندے نیں جد کہ پاکستان دے منتخب ارکان اپنے لئے خصوصی فنڈ دا مطالبہ کردے نیں، ایہہ روایت پوری دنیا وچ موجود نہیں ، جیہڑی صرف پاکستان وچ ویکھن نوں ملدی اے۔ ایس بنا اُتے عوام دے دکھ درد دا درماں کرن والا کوئی نہیں۔ ایس طریقہ کار نے پاکستان نوں اندر توں کھوکھلا کر دتا اے۔ حکومت کارکردگی وکھان توں قاصر اے تے اپوزیشن صرف شور شرابہ دی حد تیکر محدود اے جد کہ ایہنوں متبادل پالیسیاں تشکیل دینی چاہیدی اے تے حکومت جتھے ناکام وکھائی دیوے اوتھے اپوزیشن ایس لئی اگے ودھن دا رستہ کڈ ے۔
پہلے مرغی یا انڈا والی بحث وانگوں ایس بحث دا وی کوئی نتیجہ نہیں نکلدا کہ پہلے حکومت نوں اُتوں ٹھیک کیتا جائے یا تھلے توں، چوہدری عبدالغفار صاحب کہندے نیں کہ دونویں کم اک ساتھ ہونے چاہیدے نیں حکومت اپنے فرائض پہچانے تے بلدیاتی ادارے عوام دی خدمت لئی جتن کرے۔ ایس سلسلے وچ کوئی تاخیر نہ کیتی جائے تے جویں ای نویں بلدیاتی الیکشن ہون ایہناں نوں مقامی حکومتاں دا درجہ دتا جائے تے خود مختار کیتا جائے۔
جنرل الیکشنز دے انعقاد وچ وی کوئی زیادہ ویلا نہیں رہیا، ایس وچ حصہ لین والیاں اُتے واضح کر دتا جائے کہ اوہ ایہنوں دولت دا کھیڈ نہ بنان، ایس ویلے ایم پی اے، ایم این اے نوں الیکشن مہم اُتے کروڑاں روپئے خرچ کرنے پیندے نیں جنہوں پورا کرن لئی فیر اوہ حکومتی خزانے دی لوٹ مار کر کے اپنی جیب بھردا اے۔ ایسے طرح کرپشن دا بازار گرم ہو جاندا اے۔ سانوں ایس عادت توں چھٹکارا پانا چاہیدا اے تے اپنے ارکان پارلیمنٹ نوں قانون سازی تیکر محدود کر دینا چاہیدا اے۔ حکومتی مشینری وچ ارکان پارلیمنٹ دا عمل دخل ودھ رہیا اے، من مرضی دی ٹرانسفراں کرائیاں جا رہیاں نیں جد کہ ترقی یافتہ ملکاں وچ انج دا کوئی سسٹم نہیں۔
چوہدری عبدالغفار کہندے نیں کہ اوہ اک صاف ستھری سیاست نوں رائج کرن لئی پاکستان دے انتخابی دنگل وچ وڑنا چاہندے نیں اوہ پارلیمانی تے انتظامی اصلاحات لئی وی اواز چکن گے تے بلدیاتی اداریاں نوں وی خود مختار بنان اُتے زور دین گے۔
پاکستان وچ ایہو نظام حضرت قائداعظم دے پیش نظر سی تے ہن ایس دے احیاء دی سخت لوڑ محسوس کیتی جا رہی اے سانوں ملک نوں داخلی طور تے مستحکم کرنا ہوئے گا تے خارجہ محاذ اُتے پاکستان دے وقار نوں سربلند کرنا ہوئے گا تاکہ قائداعظم دی روح نوں چین نصیب ہو سکے۔