جیلاں وچ اصلاحات دے پیکج اُتے عملدرآمد شروع کر دتا گیا
آئی جی پرزنر مرزا شاہد سلیم دی وفد دے نال مجید نظامی ہال وچ بریفنگ
کرنل احمد ندیم قادری، بلال بٹ، عماد صدیقی تے سعید آسی نے وفد دا خیر مقدم کیتا
پنجاب وچ جیل ریفارمز دے نتیجے وچ 57 ہزار پابند سلاسل بندے ایس توں یکساں طور تے مستفید ہو سکن گے ایہناں وچاراں دا اظہار انسپکٹر جنرل جیل خانہ جات پنجاب مرزا شاہد سلیم بیگ نے نوائے وقت دے حمید نظامی ہال وچ بریفنگ دے دوران اظہار خیال کردے ہوئے کیتا۔ آئی جی جیل خانہ جات دے نال وفد وچ شریک ڈی آئی جی طارق بابر سپرنٹنڈنٹ کیمپ جیل نور حسن بگھیلہ ڈپٹی سپرنٹنڈنٹ کوٹ لکھپت جیل مقصود اسسٹنٹ سپرنٹنڈنٹ جیل فیصل امتیاز نے نوائے وقت دفتر دا دورہ کیتا۔ جتھے اوہناں نے ڈائریکٹر جنرل آپریشنز نوائے وقت گروپ کرنل ریٹائرڈ سید احمد ندیم قادری، ڈائریکٹر مارکٹنگ بلال محمود بٹ، جنرل منیجر فنانس عماد احمد صدیقی ، ایڈیٹوریل ہیڈ سعید آسی نوں جیل اصلاحات دے بارے وچ تفصیلی بریفنگ دتی۔ آئی جی جیل خانہ جات نے اصلاحات دے حوالے نال دسیا کہ ایڈیشنل چیف سیکرٹری و امور داخلہ ظفر اللہ چٹھہ دی سربراہی وچ سفارشات وزیراعلیٰ پنجاب نوں بھجوا دتی گئیاں نیں۔جنہاں نے پنجاب اسمبلی وچ ایہنوں قانون سازی لئی باقاعدہ طور تے منظور کر لیا اے تے قانون سازی دا عمل جاری اے۔ وفد ولوں نوائے وقت دے ارکان نوں پنجاب دیاں جیلاں وچ وزٹ کرن دی دعوت وی دتی گئی۔ آئی جی پرزنرنے دسیا 127 سال پہلاں محکمہ جیل دے ملازمین تے قیدیاں لئی جیہڑے قوانین بنائے گئے سن ایس جدید دور وچ وی گوریاں ولوں اٹھارہ سو چورانوے وچ بنائے گئے قوانین اُتے ای عمل درآمد جاری سی۔ بدقسمتی نال دیگر محکمیاں دے قوانین وچ کئی وار ردو بدل ہویا پر جیل قوانین اُتے کدی توجہ نہیں دتی گئی۔
صوبہ پنجاب وچ سردار عثمان بزدار دی سربراہی وچ پہلی وار جیل ریفارمز لئی قانون سازی ش روع کر دتی گئی اے۔ صوبے دیاں جیلاں وچ 57 ہزار قیدیاں سنے جیل ملازمین تے افسران لئی حکومت دا ایہہ مثالی اقدا م اے۔ مرزا شاہد سلیم بیگ دا کہنا سی وزیراعلیٰ عثمان بزدار دا قیدیاں تے جیل عملے لئی 5 ارب 50 کروڑ روپئے دے خصوصی پریزن پیکج ایس امر دا ثبوت اے کہ جیل قوانین، قواعد تے روایات نوں تبدیل کیتا جا رہیا اے۔ قیدیاں لئی انسانی حقوق دے تحفظ نوں یقینی بنایا جائے گا۔ ایتھے بریفنگ دے دوران اوہناں نے دسیا کہ سنت رسول ؐ تے نبی کریم ؐ دی تعلیمات دی پیروی وچ وزیراعلیٰ عثمان بزدار قیدیاں نوں انسان سمجھدے نیں تے ایہناں نال انساناںای وانگوں سلوک کرن اُتے زور دیندے نیں۔ وزیراعلیٰ دے اعلان کردہ پیکج وچ عید میلاد النبی ؐ دی مناسبت نال قیدیاں دی سزا وچ 60 یوم دی عام معافی دا اعلان، قیدیاں نوں میٹرس، کمبل تے تکیہ رکھن دی اجازت ایسے جذبے دا عملی اظہار اے۔ وزیراعلیٰ دے اعلان کردہ پیکج دے مطابق موسم سرما دے پیش نظر اسیران لئی ساری جیلاں وچ گیزر لائے جان گے جیلاں وچ کیبل نیٹ ورک دے ذریعے نیوز تے انٹرٹینمنٹ چینل وکھائے جان گے۔
خواتین قیدیاں دے نکے بالاں لئی تعلیم،تفریح تے ڈے کیئر سینٹر دا اہتمام کیتا جائے گا۔ محکمہ صحت ہر مہینے ساری جیلاں وچ قیدیاں لئی میڈیکل کیمپ لائے گا جس لئی ڈاکٹر تے عملے دی خالی اسامیاں نوں پُر کیتا جا رہیا اے جد کہ ڈاکٹراں نوں تنخواہ دے نال خصوصی الائونس حاصل رہے گا۔ قیدیاں نوں ہسپتال منتقل کرن لئی ہر جیل نوں ایمبولینس دی سہولت فراہم کراں گے۔
قیدیاں دی سہولت لئی لنچ تے ڈنر دے اوقات کار وچ تبدیلی دے نال جیل عملے دے سروس سٹرکچر نوں بہتر بنان اُتے توجہ دتی جائے گی۔ وزیراعلیٰ نے جیل ملازمین دی تنخواہواں دا الائونسز دے نال اک اضافی بنادی تنخواہ دے برابر پریزن سکیورٹی الائونس دین دا وی اعلان کیتا اے۔ جیل وارڈن، ہیڈ وارڈن تے چیف وارڈن دی پوسٹاں نوں اپ گریڈ کرن دی منظور دے علاوہ 21 اپریشنل گڈیاں دین دا اعلان وی کیتا گیا اے۔ اوہناں نے کہیا کہ لوڈشیڈنگ، بجلی دی بندش تے دیگر خرابیاں توں بچن لئی ساری جیلاں نوں بتدریج سولر انرجی اُتے منتقل کیتا جائے گا۔
آئی جی جیل شاہد سلیم بیگ نے گل بات کردے ہوئے کہیا کہ معاشرے دے جرائم پیشہ تے خطرناک بندیاں نوں اسیں اپنی حکمت عملی تے ایڈمنسٹریشن دے تحت قابو کر رکھیا اے۔ ساڈے کول جیلاں وچ انج دے خطرناک مجرماں دی شکل وچ انسان موجود نیں جیہڑے وڈی تعداد وچ قتل دے واقعیاں وچ ملوث رہ چکے ہوندے نیں۔ ایہناں نوں سدھارنا ساڈی ذمہ داری اے پر افسوس ساڈے محکمے تے افسراں نوں شدید تنقید دا ساہمنا رہندا اے۔ جے جرائم پیشہ بندے جیلاں وچ مراعات توں لطف اندوز ہون گے تے سزا تے اضلاع دا مقصد ای فوت ہو جائے گا۔ ایس دے باوجود پنجاب بھر دی جیلاں دی مانیٹرنگ لئی سیف سٹی دی طرز اُتے مانیٹرنگ سیل آئی جی آفس وچ قائم کیتا گیا اے۔ آئی جی آفس وچ ای انٹیلی جنس سیل وی بنایا گیا اے۔ جس دے ٹال فری نمبر اُتے پورے پنجاب توں قیدی شکایات درج کروا سکدے نیں جنہاں دا فوری طور تے سدباب کیتا جاندا اے۔ چنانچہ حالیہ اقدامات دے نتیجے وچ جیلاں دا نظام انتہائی شفاف ہو چکیا اے جس دا کریڈٹ وزیراعلیٰ پنجاب سردار عثمان بزدار نوں جاندا اے۔
