آزاد کشمیر دا سفر

آزادکشمیر جنت نظیر خوبصورت وادیاں تے دلکش مناظر دی وجہ نال ملکی تے غیر ملکی سیاحواں دی توجہ دا مرکز اے

تحریر۔شاہدہ نوید

آزادکشمیر جنت نظیر خوبصورت وادیاں تے دلکش مناظر دی وجہ نال ملکی تے غیر ملکی سیاحواں دی توجہ دا مرکز اے ایہناں ای نظاریاں توں لطف اندوز ہون لئی تقریباً 40 خواتین اُتے مشتمل اک گروپ بیگم پروین سرور دی سربراہی وچ ہفتہ 2 اکتوبر دی صبح گورنر ہائوس توں روانہ ہویا۔ گورنر غلام سرور نے اک نکی جہی تقریب وچ سب نوں الوداع کیتا۔ میری طرح بوہت ساری خواتین دا ایہہ بالاں دے بغیر تے خاص طور تے آزاد کشمیر دا وی پہلا سفر سی جیہڑا کہ بوہت مشکل گل سی تن گھنٹے بعد کلر کہار دے مقام اُتے دوپہر دا پرتکلف کھانا کھادا کلر کہار توں اسلام آباد تقریباً1توں ڈیڑھ گھنٹہ دا سفر اے رات دے 11 وجے اسیں مظفر آباد تھلے اپڑے تے اوتھے تیز بارش ہو رہی سی تیز بارش دی وجہ نال سفر لمبا سی۔مظفر آباد جیہڑا کہ آزاد کشمیر دا دارالخلافہ اے اک وڈا شہر ہون دے نال بوہت خوبصورت وادی وی اے سویرے ناشتے دے بعد وادی نیلم ول سفر دا آغاز کیتا گیا رستے وچ دریا دے دوجے پاسے جموں دا اک پنڈ وی ویکھیا ایس اُتے انڈیا دا جھنڈا لہرا رہیا سی۔ ڈرائیور دے مطابق آزاد کشمیر تے جموں دے پنڈ دے لوک پہلے آپس وچ ملدے سن پر ہن پنڈ آمنے سامنے ہون دے باوجود وی نہیں مل سکدے۔
چونکہ سفر وچ ساری خواتین سن ایس لئی گپ شپ کردے سفر دی تھکاوٹ گھٹ ہوئی سی۔ مظفر آباد تو کیرن تیکر دا سفر سڑک چوڑی نہ ہون دی وجہ نال ایہہ 3 گھنٹے دا اے نہیں تے ایہہ گھٹ وی ہو سکدا اے اک مقام اُتے کجھ گڈیاں دی لائن ساڈی مخالف سمت وچ آ گئی۔ ڈرائیور نے مہارت نال گڈی پچھے کر کے سائیڈ اُتے لائی ایس طرح بھاری پتھراں نال بھرے ٹرک تے گڈیاں نوں جان دا رستہ دتا گیا نہیں تے دو گڈیاں اک ویلے وچ سڑک اُتے نہیں لنگھ سکدیاں۔ کیرن وچ دریائے نیلم دے کنارے دوپہر دے کھانے دا انتظام سم سب نے تصویراں تے وڈیو بنائیاں ایتھے نیٹ ورک نہیں چلدا صرف اوتھے دا ایس کام لوکل چلدا اے کیرن توں 15 منٹ دے فاصلے اُتے اپر نیلم اے جیہڑا کہ خوبصورت وادی اے۔
اپرنیلم وچ رنگ برنگے لکڑی دے گھر تے بلند و بالا پہاڑ ایس دی خوبصورت وچ وادھا کردے نیں پہاڑ دے دوجے پاسے جموں کشمیر اے مقامی لوکاں دے مطابق اکثر ایتھے فائرنگ دی اواز وی آندی اے سامان ہوٹل وچ رکھ کے وادی وچ گھمن نکلے تے اگے ای اک گھر وچ کجھ بچے کھیڈ رہے سن نیڑے گئے تے اک کُڑی عروج نے ساڈا پرجوش استقبال کیتا تے چاہ پیتے بغیر نہ جان دی فرمائش کیتی جیہڑی کہ اسیں ٹال نہ سکے۔ ہلکی بارش وچ باہر برآمدے وچ بہہ کے چاہ نال لطف اندوز ہوئے ایس دی ماں جیہڑی کہ بوہت ای خوش اخلاق سی ایہناں نال گلاں وی ہوئیاں ٹھیک 8 دن بعد افسوسناک خبر ملی کہ عروج دی والدہ دی برین سٹروک دی وجہ نال وفات پا گئی اے۔ ایس دے بعد مینوں اوتھے اک وڈے ہسپتال دی شدید کمی محسوس ہو رہی اے۔ وادی نیلم 144 کلومیٹر تیکر پھیلی ہوئی اے۔ اپر نیلم توں ناشتے دے بعد شاردا لئی روانہ ہوئے۔ ایہہ سفر وی 2 گھنٹے دا اے۔ پر سڑک دی تنگی دی وجہ نال 3 گھنٹے دا ہو گیا۔
رستے وچ بوہت ساری بھیڑ بکریاں، گھوڑے، خچر دے بوہت وڈے ریوڑ ویکھے جیہڑے کہ کئی مقامات اُتے نظر آندے نیں۔ ایتھے دے مقامی لوکاں دا ذریعہ معاشی وی ایہو جانور نیں۔ ایہناں نوں پال کے قربانی اُتے فروخت کیتا جاندا اے۔ تقریباً تن گھنٹے بعد دریا دے کنارے گرم گرم آلو دے پراٹھے پیش کیتے گئے کشتی دی سیر وی کیتی تے موسم نوں خوب انجوائے کیتا۔ شاردا یونیورسٹی جیہڑی کہ 200 سال پرانی بدھ مت دے دور دی اے صرف 10 منٹ دے فاصلے اُتے سی۔ کجھ لوک پیدل چلے گئے پر پہاڑ دی اونچ نیچ دی وجہ نال تے پل دے اُتوں لنگھ کے جان دی وجہ نال اسیں جیب وچ جانا مناسب سمجھیا جیہڑا کہ چنگا فیصلہ سی نال ای نکا جہیا بازار اے جتھوں روایتی خریداری وی کیتی گئی یونیورسٹی کافی اُچائی اُتے وے واپسی وی جیپ دے ذریعے 10 منٹ دے دشوار سفر نال ہوٹل اپڑے ہوٹل دے اردگرد دا حسین منظر سی اک پاسے لکڑے دے رنگ برنگے گھر تے دوجے پاسے دریائے نیلم دا نیلا پانی جس دی وجہ نال شاید ایس دا ناں دریائے نیلم وی رکھیا گیا۔ رات نوں ہوٹل دے احاطے وچ بون فائر دا انتظام سی جس وچ کشمیری چائے وی پیش کیتی گئی۔
اگلی صبح ناشتے دے بعد واپس ایسے مقام دریائے کنارے اُتے آئے جتھوں یونیورسٹی گئے سی۔ کجھ لوکاں نے دوبارہ کشتی دی سیر کیتی اچانک بادل آ گئے تے بارش شروع ہو گئی ساڈا ادھا گروپ دوجے ہوٹل وچ سی کیوں جے اک ہوٹل وچ 25 لوکاں دی گنجائش سی۔ حسین وادی وچ خوبصورت موسم نوں انجوائے کردے اسیں ایتھوں واپس مظفر آباد ول روانہ ہوئے۔
سب لوکاں دی خواہش اُتے اخروٹ خریدے گئے تے اک ہوٹل وچ آ کے چاہ پیتی شام نوں 6 وجے مظفر آباد ہوٹل وچ کھانا کھادا جس وچ کڑی تے سبزی شامل سن۔ خواتین ہون تے شاپنگ نہ ہوئے ساری خواتین دے اسرار اُتے بازار گئے تے سب نے شاپنگ کیتی۔ رات نوں 11 وجے مچھلی دے نال کھانا کھادا مسز سرور دے نال گلاں ہوئیاں تصویراں بنائیاں گئیاں۔ اگلے دن سویرے پیر چناسی جیہڑا کہ تقریباً 16 ہزار دی بلندی اُتے اک مقام اے جان دا پروگرام طے ہویا اوتھے موجود دربار اُتے دعا کیتی پر بوہت گھٹ ویلے لئی رکے کیوں جے واپسی اُتے صدر آزاد کشمیر سلطان محمود صاحب نے چاہ اُتے مدعو کیتا سی۔پریذیڈنٹ ہائوس وچ چاہ دا پرتکلف انتظام سی میری ملاقات کجھ دن پہلے غلام محی الدین دیوان دے گھر ایہناں نال ہو چکی سی جس وچ ایہناں نوں آزاد کشمیر آن دا دسیا تے اوہناں نے پرجوش طریقے نال خوش آمدید کہیا تے ملاقات دا وعدہ وی کیتا۔ ایس سفر وچ حکومت دی خاص توجہ کجھ گلاں ول دلوانا چاہواں گی۔ سیاحت دے فروغ لئی سڑکاں کشادہ تے آرام دہ کیتیاں جان تاکہ ملکی تے غیر ملکی سیاح جھجک ایتھے دے حسین نظاریاں توں لطف اندوز ہو سکن ہجے ساڈا ارادہ کیل جان دا سی جیہڑا کہ رستے تے موسم دی خرابی دی وجہ نال ملتوی ہو گیا۔ مظفر آباد توں اگے نیٹ ورک نہیں چلدا صرف اوتھے دی ایس کام سم لوکل دا نیٹ ورک چلدا اے۔ ایتھے قابل ذکر گل ایہہ ویاے کہ مقامی لوکاں دا ذریعہ معاش صرف بھیڑ بکریاں تے لکڑی اے جس نوں ضائع نہ کیتا جائے ایتھے دے لوکاں دے حالات نوں بہتر کرن لئی تعلیم تے ہنر نوں فروغ دین دی لوڑ اے تاکہ ایہہ لوک چنگے روزگار دے موقعے حاصل کر کے ترقی ول گامزن ہون آئو مل کے کشمیری بھراواں دا ساتھ دیئے اوتھے پھیلی ہوئی غربت نوں مل کے دور کریئے تاکہ ایہہ وادی ہور وی خوبصورت تے حسین ہو جائے۔