پِلاک ولوں نعتیہ مقابلہ دا انعقاد
رپورٹ: آفاق بٹ
پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے زیر اہتما م عشرہ شانِ رحمۃ للعالمینﷺ دے حوالے نال اک نعتیہ مقابلے دا انعقاد کیتا گیا جس وچ 3 توں 12 سال تیکر دی عمر دے بالاں نے حصہ لیا۔ نعتیہ مقابلے وچ پنجاب بھر توں آئے ہوئے بالاں نے نبی کریم ﷺ دے حضور عقیدت دے پھُل نچھاور کیتے۔
مقابلے وچ اول، دوم تے سوئم آن والے بالاں دے علاوہ وی سارے بالاں نوں تعریفی سنداں تے حوصلہ افزائی دے نقد انعامات نال نوازیا گیا۔ مقابلے وچ حصہ لین والے بچیاں وچ محمد دانیال جہانگیر، محمد غلام عباس، ابرار حسین، طیبہ ظہیر، فاطمہ عظیم، بریں ندیم و دیگر شامل سن۔
ادارے دی ڈائریکٹر جنرل پِلاک ڈاکٹر صغرا صدف نے کہیا کہ رسول اللہﷺ دی ذات نال والہانہ عشق ساڈے ایمان دا حصہ اے۔ حکومت پنجاب دی ہدایت اُتے عشرہ شانِ رحمۃللعالمینﷺ دی مناسبت نال پلاک وچ نعتیہ مشاعرے، محافل نعت تے نعتیہ مقابلاں دا انعقاد کیتا گیا۔
