عشرہ شانِ رحمت اللعالمین ﷺ دے سلسلے وچ ’’ محفل سماع‘‘

تقریب مہاراجہ رنجیت سنگھ شیرانوالہ باغ گوجرانوالہ وچ منعقد ہوئی

رپورٹ: آفاق بٹ

شانِ رحمت اللعالمینﷺ دے سلسلے وچ ضلعی انتظامیہ گوجرانوالہ تے سائبان ویلفیئر سوسائٹی دے زیر اہتمام ’’محفل سماع‘‘بارہ مہاراجہ رنجیت سنگھ شیرانوالہ باغ گوجرانوالہ وچ منعقد ہوئی۔ ایس بابرکت محفل نوں اسسٹنٹ کمشنر ہیڈ کوارٹر گوجرانوالہ جناب شبیر بٹ صدر سائبان عتیق انور راجہ نے خصوصی کوششاں نال پایہ تکمیل تیکر اپڑایا۔ صدر چیمبر شعیب بٹ، سابقہ صدر چیمبر الحاج سعید احمد نوں خاص مہمان دے طور مدعو کیتا گیا سی۔ مفتی عمران صاحب نے تلاوت قرآن پاک جد کہ چیف آرگنائزر خرم شہزاد بھٹہ ،چوہدری سلیم اسلم چیئرمین سائبان، چوہدری طاہر جاوید نمبر دار،یعقوب انجم مغل، چوہدری عبد اللہ،یسین گجر مہماناں نوں خوش آمدید کہن لئی پھُل لئے کھڑے سن۔ شیرانوالہ باغ وچ موجود ایس تاریخی یادگار دے احاطے وچ رنگ برنگے قمقمیاں نال سجے پنڈال وچ رات دے ویلے انج دا پرلطف ماحول سی کہ ہر کسے دے چہرے اُتے مسکراہٹاں، محبتاں تے لباں اُتے واہ واہ دیاں صداواں سن۔ محفل سماع وچ سابق صدر چیمبر سعید احمد تاج صاحب تے صدر چیمبر شعید بٹ صاحب ،وحید بٹ،انزار گکھڑ ریڈ نیوز،بلال ثاقب (PRO)،سجاد مشتاق،طارق مغل،عمر رفیق،صاحب مہمانان خصوصی دے طور تے مدعو سن جد کہ پرنس آف قوالی لکی علی چاند وہمنوا نے اپنے فن دا خوب مظاہرہ کیتا۔ حاضرین محفل دی فرمائش اُتے کلام سنائے تے خوب داد سمیٹی۔

حاضرین نے ثقافتی مرکز اُتے انج دی شاندار تقریب منعقد کروان اُتے ٹیم سائبان نوں خراج تحسین پیش کیتا۔

محفل سماع وچ شرکت کرن والیاں وچ نفیسہ طاہرہ ، بلال خان، دلدار احمد،اسامہ مغل، حافظ عبد القادر، رانا اظہر، میاں اشتیاق ، راجہ افضال عزیز، راجہ عزیزدے علاوہ کثیر تعداد وچ شہریاں نے شرکت کیتی۔