T-20ورلڈ کپ پاکستانی شاہیناں نے بھارت نوں دُھول چٹا دتی

شاہین آفریدی دی تباہ کن بائولنگ ،مین آف دی میچ قرار، بابر اعظم تے رضوان دی ریکارڈ پارٹنر شپ

خالد یزدانی

آئی سی سی ٹی ٹونٹی ورلڈ کپ دے مقابلیاں دا آغاز ہو چکیا اے۔ پچھلے دن دبئی دے سٹیڈیم وچ ورلڈ کپ دے سپر 12 مرحلے وچ پاکستانی شاہیناں نے اپنے افتتاحی میچ وچ بھارتی کرکٹ ٹیم نوں 10 وکٹاں توں ہرا کے تاریخی فتح حاصل کیتی۔ ایہہ کسے وی ورلڈ کپ وچ پاکستان دی بھارت دے خلاف پہلی جت اے۔ پاکستان تے بھارتی ٹیماں دے وچکار کسے وی فارمیٹ دا مقابلہ ہوئے تے جتھے وی ہوئے ایس نوں سٹیڈیم وچ ویکھن لئی شائقین کرکٹ نوں مہنگی ٹکٹاں وی خریدنیاں پیندیاں نیں ایسے طرح عام کرکٹ میچاں دی نسبت پاک بھارت میچ نوں دونواں ملکاں وچ وڈی تعداد وچ ٹی وی اُتے وی ویکھیا جاندا اے۔ اتوار نوں ٹی ٹوئنٹی سپر 12 دے گروپ دے پہلے میچ وچ بنگلہ دیش تے سری لنکا وچ مقابلہ سی جیہڑا سری لنکا دی ٹیم نے سنسنی خیز مقابلے دے بعد جتیا، ایسے طرح اک دن پہلے میچ وچ دفاعی چیمپئن ویسٹ انڈیز نوں انگلینڈ دی ٹیم نے عبرتناک شکست دتی سی جد کہ سب دیاں نظراں پاک بھارت دے میچ اُتے لگیاں سن۔ پاکستانی ٹیم دے کپتان بابر اعظم نے ٹاس جت کے بھارتی ٹیم نوں کھیڈن دی دعوت دتی سی۔ شاہین نے پہلے اوور دا چوتھا گیند یارکر کرایا جس اُتے روہت شرما بلا نہ لا سکے۔ اوہ بغیر کوئی رن بنائے پویلین واپس آئے۔ سکور ہجے چھ تیکر اپڑیا سی کہ دوجے اوپنر لوکیش راہل وی شاہین دی گیند نہ سمجھ سکے تے کلین بولڈ ہو گئے ۔ ویرات کوہلی دا ساتھ دین سوریا کماریادیو آئے تے دونواں نے تیجی وکٹ لئی 25 رنز بنا کے سکور نوں 31 تیکر اپڑایا۔ ایسے اثنا وچ پاکستانی ٹیم دے کپتان نے چھٹے اوور لئی حسن علی نوں بائولنگ دا کہیا حسن علی نے 11 سکور بنان والے بھارتی کھلاڑی سوریا کماریادیو نوں وکٹ کیپر رضوان دے ہتھوں پویلین روانہ کیتا۔ ایس دے بعد محمد حفیظ بائولنگ لئی آئے تے پاکستان نے کیچ دی اپیل مسترد ہون اُتے ریشابھ پنت دے خلاف ریویو لیا گیا پر فیلڈ امپائر دا فیصلہ درست ثابت ہویا تے پاکستان دا ریویو ضائع گیا۔اننگز دے 12 ویں اوور وچ ریشابھ پنت نے جارحانہ انداز اپنایا تے حسن علی نوں لگاتار دو چھکے لائے ایس اوور وچ 15 سکور بنے پر اگلے ای اوور وچ سپنر شاداب خان دی گیند اُتے چھکا لان دی کوشش وچ اوہ اُچا شاٹ کھیڈ بیٹھے تے بائولر نے اپنی ای گیند اُتے کیچ لین وچ کوئی غلطی نہیں کیتی۔ بھارت دے وکٹ کیپر بلے باز نے آئوٹ ہون توں پہلاں 39 سکور دی اننگز کھیڈی، ویرات کوہلی نے ذمے دارانہ بیٹنگ دا سلسلہ جاری رکھدے ہوئے نصف سنچری مکمل کر لئی۔ رویندراجدیجا نے 13 سکور دی اننگز کھیڈی پر حسن علی نوں چھکا لان دی کوشش وچ متبادل کھلاڑی نوں کیچ دے بیٹھے۔ شاہین شاہ آفریدی نے بھارتی کپتان دی اننگز دا خاتمہ کر دتا کوہلی نے 49 گینداں اُتے 57 سکور بنائے۔ اننگز دے آخری اوور وچ حارث رئوف نے پانڈیا نوں پویلین گھلیا تے بھارت دی ٹیم ستویں وکٹ توں محروم ہو گئی۔ بھارت نے مقررہ اووراں وچ 7 وکٹاں دے نقصان اُتے 151 سکور بنائے تے پاکستان نوں فتح لئی 152 سکور ہدف دتا۔ پاکستان نے اننگز دا آغاز کیتا تے محمد رضوان نے بھوونیشور کمار نوں چوکا تے چھکا لا دتا۔ ایس دے بعد فاسٹ بائولرز دے خلاف پاکستانی بلے بازاں نے آسانی نال سکور کیتے۔ بابر اعظم نوں شروع وچ سکور بنان وچ مشکلات دا ساہمنا کرنا پیا پر فیر اوہناں نے رویندراجدیجا نوں چھکا تے ورن چکراورتھی نوں چوکا لا کے جارحانہ انداز اختیار کیتا۔فیر دونویں بلے بازاں نے ریکارڈ پارٹنر شپ بنا کے پاکستانی ٹیم نوں فتح نال ہمکنار کیتا تے بھارتی ٹیم نوں نہ صرف عبرتناک شکست دتی بلکہ پاکستان توں ہار اُتے بھارتیاں دے چہرے مایوسی نال لٹک گئے۔ بھارت وچ انتہا پسند تے سب کجھ برداشت کر لئیاں نیں پر پاکستانی ٹیم توں شکست ایہناں نوں ہضم نہیں ہوندی شاید ایس شکست دا بدلہ ایس ورلڈ کپ دے بعد ای ایہناں دی ٹیم توں لیا جائے گا۔ پاکستان دی کرکٹ ٹیم دے ہتھوں انج دی ہزیمت ایہناں نوں چکنی پئی کہ ایس شکست دے بعد ایہناں دے کرکٹ دے وڈے وڈے پنڈتاں دے منہ بن ہو گئے سن۔
ٹی ٹوئنٹی ورلڈ کپ وچ پاکستانی ٹی دے ہتھوں بھارتی ٹیم دی شکست دے بعد جتھے ساری قوم خوشیاں منا رہی اے اوتھے پاکستان دی بھارت دے خلاف کامیابی اُتے بھارت دے زیر قبضہ مقبوضہ وادی وچ کشمیری مسلماناں نے سبز ہلالی پرچم لہرائے تے پاکستان زندہ باد دے نعرے بلند کیتے۔
اوتھے وزیراعظم پاکستان عمران خان نے قومی ٹیم تے خاص طور تے بابر اعظم نوں مبارکباد، محمد رضوان تے شاہین شاہ آفریدی نوں شاندار کارکردگی اُتے خراج تحسین پیش کیتا۔ وزیراعظم عمران خان نے سماجی رابطیاں دی ویب سائٹ ٹویٹر اُتے اپنے اک ٹویٹ وچ کہیا اے کہ بھارت دے خلاف شاندار فتح اُتے قومی ٹیم تے خاص طور تے بابر اعظم نوں مبارکباد پیش کرنا واں۔ وزیراعظم نے شاہین شاہ آفریدی تے محمد رضوان نوں بہترین کارکردگی وکھان اُتے خراج تحسین وی پیش کیتا۔ اوہناں نے اپنے ٹویٹ وچ لکھیا کہ ، قوم نوں تہاڈے ساریاں اُتے فخر اے، ایسے طرح ساری قوم ایس فتح دا جشن منا رہی اے ایس پاک بھارت میچ توں پہلاں 10 وکٹاں توں جت دی تاریخ اُتے نظر ماری جائے تے پتہ چلدا اے، آئی سی سی ٹی 20 میچاں وچ ہن تیکر 4 ٹیماں 10 وکٹاں توں کامیابی حاصل کر چکیاں نیں۔ 20 ستمبر 2007 نوں آسٹریلیا نے سری لنکا نوں 10 وکٹاں توں شکست دتی سی، دوجے نمبر اُتے 20 ستمبر 2012 نوں جنوبی ا فریقہ نے زمباوے نوں 10 وکٹاں توں شکست دتی۔ ٹی 20 ورلڈ کپ 2021 دے سب توں وڈے میچ وچ پاکستان دی کرکٹ ٹیم نے بھارت نوں سنسنی خیز مقابلے دے بعد شکست نال دوچار کیتا۔
ایہو وجہ اے کہ ساری پاکستانی قوم بھارت دی پاکستانی ٹیم دے ہتھوں شکست اُتے جشن منا رہی اے تے ڈھول دی تھاپ اُتے بھنگڑے پا رہی اے تے بھارت وچ صف ماتم بچھی اے۔ وڈے وڈے دعوے کرن والیاں دے منہ بن ہو گئے نیں۔ شکست دے بعد اختتامی تقریب وچ بھارتی ٹیم دے کپتان ویرات کوہلی دا کہنا سی کہ پاکستانی ٹیم نے سانوں آئوٹ کلاس کر دتا۔ پاکستان نے شروع وچ ای چنگی بولنگ کیتی جس دی وجہ نال چنگا نہیں کھیڈ پائے، ابتدائی تن وکٹاں جلدی ڈگن دے بعد سنبھل نہیں سکے۔ پاکستانی بولراں دی چنگی بولنگ دے اگے بیٹنگ آسان نہیں سی۔ پچ شروع وچ بوہت سلو سی تے پاکستان نے کوالٹی بولنگ کیتی۔ پاکستانی بولرز نے اپنی کلاس نوں ثابت کیتا۔ اوس دی وجہ نال وی بولنگ وچ مسائل دا ساہمنا کرنا پیا۔ ابتدائی میچ وچ شکست دے بعد ساڈے لئی ٹورنامنٹ ختم نہیں ہویا۔ اگلے میچاں وچ خامیاں نوں دور کر کے چنگا کھیڈاں گے۔ قومی ٹیم دے کپتان بابر اعظم نے کہیا کہ بھارت نال مقابلے لئی جیہڑا پلان کیتا سی ایس اُتےعمل کیتا۔ سب نے 100 فیصد رزلٹ دتا۔ ایونٹ دا ہجے آغاز اے۔ ریلیکس نہیں ہوواں گے۔ بابر نے کہیا کہ گیند بلے اُتے بوہت چنگا آ رہیا سی کوشش سی جنہا لمبا کھیڈیے اینا چنگا اے۔ اسیں ریلیکس نہیں ہوواں گے ہجے بوہت لمبا رستہ طے کرنا اے۔