پاکستان بھارت میچ سوشل میڈیا اُتے ٹاپ ٹرینڈ

شاہد حسن

پاکستان تے بھارت دی کرکٹ ٹیماں دے وچکار دبئی وچ ہون والے ٹی ٹونٹی ورلڈ کپ توں پہلے ای سوشل میڈیا اُتے دونویں ملک کرکٹ لوورز وچ جتھے لفظی جنگ چھڑی اوتھے الیکٹرانک میڈیا وی بڑا متحرک نظر آیا۔ ایہہ کہنا غلط نہیں ہوئے گا کہ پاکستان تے انڈیا دے وچکار اک کرکٹ میچ تے دبئی دے سٹیڈیم وچ ہویا پر اک دوجا میچ سوشل میڈیا اُتے صارفین دے وچکار وی جاری رہیا۔
پاکستان تے بھارتی ٹی وی چینلرز اُتے ایس میچ توں پہلاں ای لائیو پروگرام شروع ہو گئے سن پاکستان دے مختلف چینلز اُتے پاکستان دے سابق کرکٹر جس وچ آصف اقبال ، جاوید میاں داد، دے علاوہ سہیل تنویر، عمر گل تے دیگر اپنے اپنے تجزیئے پیش کردے رہے تے پاک بھارت ایس میچ دے دوران وی اوہ لائیو پروگراماں وچ شریک سن۔ جتھے تیکر سوشل میڈیا دا تعلق اے ایس پاک بھارت میچ توں پہلاں دونویں ملکاں دے کرکٹ شائقین نے اپنے اپنے جذبات دا اظہار کیتا۔ ٹوئٹر اُتے ہیش ٹیگ ،گرین شرٹس ول ڈن تے پاک ورسز انڈیا ٹاپ ٹرینڈ بن گیا۔
آئی سی سی ٹی 20 ورلڈ کپ میچ وچ بھارت دے خلاف شاندار کارکردگی تے جیت اُتے مبارکباد دتی اے۔ ڈی جی آئی ایس پی آر ولوں کیتے گئے ٹویٹ وچ کہیا گیا اے کہ آرمی چیف دا اپنے پیغام وچ کہنا اے کہ پاکستان کرکٹ ٹیم نے ساڈے ساریاں دا سر فخر نال اُچا کر دتا اے۔ پاکستان کرکٹ بورڈ دے چیئر مین رمیز راجہ نے بھارت دے خلاف پاکس تان دی تاریخی فتح نوں قابل فخر لمحہ قرار دتا اے۔ اوہناں نے ورلڈ کپ وچ تاریخی فتح اُتے الحمداللہ دے الفاظ ادا کردے ہوئے کہیا اللہ رب العزت دی تعریف دے بعد کہیا کہ ایہہ تے بوہت ای شاندار آغاز اے پر یاد رکھو سفر ہجے شروع ہویا اے۔ گرین شرٹس دی بھارت دے خلاف ورلڈ کپ ایونٹ وچ تاریخی فتح اُتے کہیا اے کہ ایہہ سارے پاکستان لئی قابل فخر لمحہ اے۔
وزیر مملکت اطلاعات و نشریات فرخ حبیب نے کہیا کہ پاکستانی شاہیناں نے ٹی۔20 وچ اک وار فیر ہندوستان نوں اڑا کے رکھ دتا۔ بابر تے رضوان نے چھکیاں، چوکیاں دی بارش، شاہین آفریدی دی 3، حسن علی دی 2، شاداب تے رئوف دی اک اک وکٹ نے دہلی دے درودیوار ہلا کے رکھ دتے۔ ہندوستان جس محاذ اُتے ساہمنے آ کے مقابلہ کرے گا ایسے طرح منہ دی کھائے گا۔ وزیر داخلہ شیخ رشید احمد نے ویڈیو پیغام وچ کہیا کہ جس جرات، ولولے ، دبدبے نال پاکستانی ٹیم نے اپنے روایتی حریف نوں ہرایا اے ایس اُتے ایہناں نوں سلام پیش کرنا واں۔ وفاقی وزیر اطلاعات و نشریات چوہدری فواد نے اک بیان وچ کہیا کہ اللہ تعالیٰ دے فضل و کرم، قوم دیاں دعائواں تے کھلاڑیاں دی محنت نال اج پاکستان کرکٹ ٹیم نے فتح حاصل کر کے قوم دا سر فخر نال بلند کر دتا اے۔ ٹی ٹوئنٹی ورلڈ کپ ہوئے، ایشیا کپ ہوئے یا چیمپئنز ٹرافی جتھے پاکستانبھارت کرکٹ ٹیماں آمنے ساہمنے ہون تے اوہ میچ دنیائے کرکٹ دا سب توں وڈا میچ بن جاندا اے۔ بابر اعظم ، محمد رضوان تے شاہین آفریدی دی پرفارمنس زبردست رہی۔ بلاول بھٹو نے وی ایس جت اُتے قوم نوں مبارکباد دیندے ہوئے کہیا کہ بابر اعظم محمد رضوان تے شاہین شاہ آفریدی سنے پوری ٹیم نے بہترین کارکردگی وکھائی۔
پاکستانی ٹیم دے اک پرستار حامد نے لکھیا بھارت لئی اک ہور ‘‘سرپرائز’’ دا دن اے۔ اک ہور صارف نے بھارت نوں للکاردے ہوئے لکھیا کہ ‘‘تیار ہو ’’اک بھارتی صارف نے پنجرے وچ قید ٹی وی دی تصویر لاندے ہوئے کہیا پاک بھارت میچ دیاں تیاریاں دونواں ملکاں وچ جاری نیں۔ اسلم نے پاکستانی ٹیم نوں گیم چینچر قرار دے دتا تے ماہ نے لکھیا کہ پاک بھارت میچ نے شائقین دیاں راتاں دیاں نیندا اڑا رکھیاں نیں۔پاکستانی اداکارہ مائزہ خان نے لکھیا: اف۔۔۔۔ دل فخر نال پھٹ رہیا اے۔ واہ