اخبار وی مریڑے پئے گئے نیں

غلام شبیر عاصم

سویرے سویرے جدوں تک اخبار نہ پڑھ لئیے من نوں آوازاری تے بے چینی جہئی لگی رہندی اے۔ اج کل سوشل میڈیا دی بھرمار دے باوجود وی اخبار پڑھن دا چسکا دِلوں دماغوں نہیں لہہ سکیا۔ اخبار پڑھن دا وکھرا جہیا سواد تے چسکا اے۔ ہزار ڈِشاں وی ہون جیویں دال چولاں دے شونقی تِکے کباب، چانپاں تے پٹھ دے گوشت توں ودھ کے دال چولاں دا سواد لیندے نیں۔ اخبار پڑھن دے شونقی وی ایسے طرحاں اخبار پڑھ کے مزا لیندے نیں۔ میں سویرے سویرے اخبار دے سٹال تے گیا تے اوتھوں اک وڈا قومی اخبار خریدیا تے چا والی دکان تے آگیا۔ اخبار کھولیا تے اخبار دا ادارئیے تے کالماں والا صفحہ ای غیب سی۔ اوہدے جس صفحے اتے اداریہ تے کالم چھپدے نیں اوس صفحے تے ’’سیرت النبیؐ‘‘ بارے ایڈیشن سی تے دوجے پاسے پرائیویٹ فرماں تے مارکیٹاں دے اشتہار سن۔ میں سمجھ گیا کہ سیرت النبؓی بارے اچیچا اڈیشن وی ضروری سی تے کاغذ دے کوٹے دی کمتی وجہوں اخبار مالکان کنجوسی کر گئے نیں۔ مینوں بڑا عجیب لگا۔ کیونکہ کالم پڑھن لئی تے میں اخبار خریدن دا اچیچ کیتا سی۔ ایہ گل حقیقت اے کہ ادارتی صفحہ کسے وی اخبار یا رسالے دی روح منیا جاندا اے۔ ایہدے بغیر کوئی اخبار یا رسالہ بغیر روح دے جسم والی مثال رکھدا اے۔ میں چاء پی کے اوسے ویلے اتھوں اٹھیا تے سٹال تے جاکے اخبار بدلیا۔
اج کل ملکی حالات تے حکومتی پالیسیاں دی وجہوں اخبار وی مریڑے پے گئے نیں۔ 20 صفحیاں والے اخبار سونگڑ کے 8 صفحیاں تے آگئے نیں بعض اخباراں اپنے سنڈے میگزین بند کردتے نیں۔ عوام دی طرحاں اخباراں دیاں وی پسلیاں تے باچیاں نکل آئیاں نیں۔اخباراں دے صفحے وی پہلاں نالوں گھٹ گئے تے اخباراں اندر کم کرن والے بندے وی۔ اخباراں نوں سرکاری اشتہار وی نہیں مِلدے تے ملکی کاروباری حالاں دی خرابی پاروں پرائویٹ اشتہار وی بھرویں تے رجویں نہیں مِلدے۔ایس کرکے اخباراں دے مالکاں نے ادبی ایڈیشن،بالاں دے ایڈیشن، میک اپ ایڈیشن، شوبز ایڈیشن تے ہور اجہئے کئی ایڈیشن بند کرکے، اخبار چالو رکھ کے اپنا لنگ پردہ رکھیا ہویا اے۔ تحریک انصاف دی حکومت توں پہلاں عوام دی طرحاں اخبار وی صحت مند تے نِگھر ہندے سن۔ ہون مہنگائی نے ملک و قوم دی حالت شوگر دے کسے مریض طرحاں مریڑی تے پتلی کردتی اے۔ ہون بندے تے اخبار وی پچھاتے ای نہیں جا رہئیے۔ اک قومی اخبار جیہدے عام دناں وچ وی 20 صفحے ہندے سن۔ اج اوس اخبار نوں ہتھ پایا تے دوپہر دے کسے اخبار وانگوں ہولا لگ رہیا سی۔
اخباراں دے دفتراں وچ کدی جائی دا سی تے گہما گہمی ہندی سی پر ہون تے اخبار دے جس وی دفتر وچ جائیے سہما سہمی ہندی اے۔ چھوٹے اخباراں دے دفتراں توں کڈھے گئے کئی صحافیاں نے اپنے خلاف بیوی بچیاں دے دھرنے توں بچن لئی فوٹو کاپی،جوس کارنر،تِکے کباب تے برگراں دا کم چھوہ لیا اے۔ ایہ وی ویکھیا اے کہ کسے چھوٹے روزنامہ دے دفتر وچ اِکو بندہ کمپوزر بیٹھا اے تے کم کری آرہیا اے۔ چھوٹے کئی اخبار تے ایسے دکھوں بند ہوگئے نیں۔ سوچنے آں کدی تے اخباراں دے مونہہ تے رونق آوے گی۔ کدے تے دفتراں اندر کم کرن والیاں دی گہما گہمی ہووے گی۔ صفحے ودھن گے، ایڈیشن آون گے۔ اخباراں دے دفتراں اندروں کڈھے گئے عملے دی رزق روٹی دا بوہا کھلے گا۔ ہاکراں (اخبار ویچن والے) دی وی لہر بحر ہووے گی۔ اخباراں وچ چھپن والے ادبی ایڈیشن علمی،ادبی تخلیقی تے تحقیقی تحریراں تے انٹرویوآں دے ذریعے معاشرے اندر اک خاص طبقے دی عِلمی تے فکری اساری کر رہے سن۔ ایڈیشن نہ چھپن نال ایہ کم پوری طرحاں بند ہوچکیا اے۔ بلاشبہ کوئی وی مکمل اخبار اپنے قاریاں لئی عِلم و ادب تے جانکاری دا اجیہا چشمہ اے جِتھوں ہر ذہن اپنی لوڑ تے سبھا موجب اپنی عِلمی تس مٹاوندا اے۔ اک اخبار اپنی تھاویں اک طرحاں دی یونیورسٹی اے جِتھوں مفت برابر بہت تھوڑے پیسیاں وچ ہر طرحاں دا عِلم تے جانکاری مِل جاندی اے۔صحافت دی تاریخ گواہ اے کہ ملک و قوم نوں ٹھیک تے اک سیدھ تے رکھن لئی اخبار کڈھنا بوہت ضروری رہیا اے۔ اخباراں دے مالکاں تے صحافیاں حق آواز نوں چکن لئی قیداں وی بھوگیاں تے اخبار کڈھن لئی اپنے گردے وی کڈھ ویچے پر اخبار نہ بند کیتا۔ اخباراں رسالیاں دا صحت مند ہوکے اپنے پیراں اتے ٹھیک طرحاں کھلوتے رہنا، مضبوط تے نِگھر ملک و معاشرے دی نشانی اے۔ اخباراں نے ہمیش ملک و قوم نوں سِدھا تے سوکھا رستہ وکھاون تے اوس تے چلاون لئی اپنا کردار ادا کیتا اے۔ جے اخباراں ای اجاڑے چڑھیاں رہیاں تے پھیر ملک وقوم نوں اک لِیہ اتے پا کے ٹورنا اخباراں لئی حدوں ودھ مشکل ہوجائے گا۔ لوڑ ایس گل دی اے کہ جیویں کِیویں وی اخباراں نوں مسئلیاں دے کھوبے وچوں کڈھ کے پورے زور تے ٹوہر نال اصل مقصد دی راہ تے ٹرن دتا جاوے۔ ٭٭