استاد محترم دی عزت پہلی ترجیح

طلعت عباس خان

سعادت حسن منٹو توں کسے نے پچھیا کیہ حال اے تہاڈے ملک دا؟ کہیا بالکل انج ای حال اے جیویں جیل دا اذان فراڈیا دیندا اے‘ امامت قاتل کراندا اے تے نمازی چور ہوندے نیں۔ جے وکیلاں دا حال پچھو تے تسیں ایہ کہندے کہ وکیلاں دے الیکشن ہر ورھے اپنے وقت تے ہوندے نیں تے بڑے مہنگے ہوندے نیں۔ جت کے اکثر بار دے نمائندے سارا ورھا وکیلاں دے مسئلے حل کرن دی تھاں اپنے مالی معاملیاں ول دھیان دیندے نیں۔ وکیلاں دے زیادہ نمائندے بار دے الیکشناں نوں کامیابی دی پوڑھی بنا کے بار توں بنچ وچ شامل ہون دی کوشش کردے نیں۔ اجہے نمائندے لکھاں لا کے کروڑاں بناندے نیں۔ ہن تے کجھ وکلاء نمائندیاں دیاں جعلی ڈگریاں سامنے آئیاں نیں جعلی ڈگریاں والے وکیل بارز تے بار کونسلاں دے نمائندے بن چکے نیں۔ ڈر اے ایہناں وچوں کجھ ایہ بنچ وچ بیٹھن وچ کامیاب نہ ہو گئے ہون۔ ایہ جعلی وکیل الیکشن جت کے کیس لیندے نہیں کیس فیر بک کردے نیں۔ اجہے بار نمائندیاں دی وجہ نال وکیلاں دے اپنے مسئلے حل نہیں ہوندے۔ چھ ورھیاں توں سپریم کورٹ ہائوسنگ سکیم وچ وکیلاں نوں پلاٹ نہیں دلوا سکے۔ ہن وی کرپشن دیاں آوازاں اٹھ رہیاں نیں۔ ایہ پھڑے ایس لئی نہیں جاندے اجہے جعلی کرپٹ وکلاء دا روپ دھار کے بار کونسلاں وچ بیٹھے ہوئے نیں۔ ایہناں وچ کجھ تے ننگے ہو چکے نیں تے کجھ ہون جا رہے نیں۔ ڈسٹرک کورٹ وچ عدالتاں دکاناں وچ اج وی موجود نیں پر ینگ وکلاء دے چیمبراں نوں ڈھا دتا جاندا اے کہ ایہ غیرقنونی بنائے گئے سن جد کہ اوہناں دیاں اپنیاں عدالتاں غیرقنونی قائم نیں۔
جی ٹین وچ جوڈیشل کمپلیکس دا پی سی ون بن چکیا سی پر عدالتاں جی الیون وچ تے وکیلاں دے بار تے چیمبرز جی ٹین وچ بنائے جا رہے نیں جد کہ جی ٹین دا پلاٹ ایناں وڈا اے کہ اوہناں نوں جی الیون وچ کمپلیکس بنان دی لوڑ نہیں سی۔ وکیل نمائندیاں دے غلط رویاں تے ایکشن توں ہن بنچ اوہناں دی سنن نوں تیار نہیں۔ ایس لڑائی نال آٹے دے نال گھن وی پس چکے نیں۔ اک سینئر وکیل ایڈووکیٹ سپریم کورٹ عمر ستر ورھے توں ودھ اوہناں نوں راتیں ستیاں پیا اٹھا کے تھانے دی حوالات وچ بند کر دتا جاندا اے۔ رات نوں اوہناں نوں حوالات وچ چرسی چوراں دے نال رکھیا جاندا اے۔ فیر دہشت گردی دی عدالت وچ بطور دہشت گرد دے پیش کیتا جاندا اے۔ جج صاحب نے ایہ جان دے ہوئے کہ اوہناں دا ناں ایف آئی آر وچ نہیں ایہ چوہدری ظفرگوندل نہیں ایہ چوہدری ظفروڑائچ صاحب نیں پر فیر وی تن راتاں اوہناں نوں اڈیالہ جیل وچ گھل دتا جاندا اے۔ تن دیہاڑ جیل دی یاترا دے بعد اوہو جج صاحب اوہناں نوں باعزت بری کر دیندے نیں۔ سمجھیا نہیں ایہ فیصلہ جج صاحب قنون دے مطابق کیتا یاں فون دے مطابق۔ ایس موقعے تے نہ بار دے نمائندے اوہناں دے کم آئے تے نہ ای بار کونسل دے نمائندے اوہناں دی مدد نوں اپڑے۔ ایس واقے دے بعد وی بار تے بار کونسلاں دے نمائندیاں نے اپنی آواز اٹھانا گوارا نہ کیتی۔ اجہے وچ اوہناں بے بس وکلاء کجھ بے قصور سن اوہناں نوں وی دہشت گردی وچ پھڑیا گیا۔ وکیلاں دی ایس مشکل گھڑی وچ نڈر‘ بے باک‘ سینئر ایڈووکیٹ سپریم کورٹ سردار لطیف کھوسہ فرشتہ بن کے عدالتاں وچ بناں کسے بار دے عہدے دے جنگ لڑی تے جتی۔ کھوسہ صاحب دی ایہو ادا پاکستان دے سارے وکیلاں نوں پسند آئی۔ فیر وکیلاں دی درخواست تے خواہش دا احترام کردے ہوئے صدارتی امیدوار دے طور تے سردار لطیف خان کھوسہ صاحب نے رضامندی ظاہر کیتی تے فیر پروفیشنل گروپ نے ایہدا اعلان کیتا۔
پروفیشنل گروپ وچ جہڑے چمکدے تارے نیں اوہ کسے دوجے دھڑے وچ کتھے‘ پروفیشنل گروپ وچ سینئر ایڈووکیٹ سپریم کورٹ تے سابق صدر سپریم کورٹ بار، رائٹر دانشور محترم حامد خان ، سینئر ایڈووکیٹ سپریم کورٹ ، سابق صدر سپریم کورٹ بار ، سابق اٹارنی جنرل پاکستان ،رائٹر ،دانشورمحترم منیر اے ملک سابق جسٹس سندھ ہائی کورٹ، سینئر ایڈووکیٹ سپریم کورٹ سابق صدر سپریم کورٹ بار دانشور محترم رشید اے رضوی ورگیاں قد آور شخصیات موجود نیں جہناں تے پاکستان دے سارے وکیلاں نوں مان اے۔ کسے تے کسے قسم دا کوئی الزام نہیں جد کہ دوجے دھڑے دے سینئر وکیلاں تے کرپشن تے جعلی ڈگریاں دے الزامات زبان زدعام نیں۔ ہن وکیلاں دے دوجے دھڑے نے کھوسہ صاحب دے مقابلے وچ آپ دے شاگرد نوں کھڑا کر دتا اے جد کہ اوہناں کول پاکستان بار کونسل دا عہدہ وی اے۔ ایہ عہدہ وی اوہناں دے استاد محترم کھوسہ صاحب دا دتا ہویا اے۔ اک ورھے دے عہدے لئی استاد دا احترام تے پیار دا رشتہ ختم کرن دی مثال قائم کیتی جا رہی اے پر کہیا جا رہیا اے کہ شاگرد سمجھدار اے۔ اپنے آپ نوں بے توقیر نہیں کرے گا۔ سارے جان دے نیں عہدے عزتاں لئی ہوندے نیں۔ تربیت دی کمی دا حال ایہہ وے‘ سارے جان دے نیں کہ حادثے وچ اوہ ڈرائیور قصوروار سمجھیا جاندا اے جو اگے چلدی ہوئی گڈی نوں پچھوں ٹکر مارے۔ انج دی ای ٹکر اک لیڈی وکیل نے سامنے والی گڈی نوں پچھوں ٹکر ماری فیر رولا پیا‘ دھمکیاں دتیاں کہ میں وکیل آں۔ قصور وی اپنا تے رقم نقصان توں ودھ لین دی ڈیمانڈ کردی رہی۔ ایس لئی کہ اوہ خاتون وکیل اے۔ ایہ شکر کرے کہ اوہدا واسطہ اک ادارے دے رحمدل سرکاری افسر نال پیا جہناں نے اپنے ادارے تے اپنی عزت دا خیال رکھدے ہوئے تنخواہ دا کجھ حصہ اوس خاتون وکیل نوں دے کے اپنی عزت محفوظ رکھن وچ کامیاب ہوئے۔ اوہ کم جو مرد نہیں کردے اوہ ہن خاتون وکیلاں کرن لگ پئیاں نیں اللہ خیر کرے۔ ایہ سب تربیت دی کمی اے۔ لیڈی وکیل دے کلائنٹ دی ضمانت کینسل ہوئی‘ عدالت وچ ای کلائنٹ نے اپنا پرس‘ پیسے‘ انگوٹھی‘ لاکٹ تے کار دی چابی اوس لیڈی وکیل دے حوالے کیتی کہ ایہ ساریاں چیزاں میری ماں نوں دینا۔ اوہ کار وچ باہر عدالت دے بیٹھی میرا انتظار کر رہی اے اپنے منشی نوں کہنا کہ میری کار تے میری ماں نوں گھر چھڈ آوے گا۔ ہن اوس وکیل صاحبہ نے ساری رقم زیورات تے کار اپنے کول رکھ لئے تے کلائنٹ دی ماں نوں ٹیکسی وچ گھر گھل دتا۔ کجھ عرصے بعد کلائنٹ دے ٹبر نے بار دے صدر اگے اوس لیڈی وکیل دی شکایت کیتی جہدے تے بار دے صدر نے انکوائری کیتی تے ایہ لیڈی وکیل ایہدے وچ ملوث پائی گئی۔ صدر بار نے اوہدے ساریاں شیواں تے کار واپس لے کے ملزم دے گھر اپڑائیاں۔ اوہدا بار دا لائسنس کینسل کر دتا پر بار کونسل نے اوہنوں بحال کر دتا اج جنی وی خرابی وکیلاں وچ اے اوہدے ذمہ دار اوہدے والدین سینئر وکلاء کسے حد تک وکلاء دے بار ایسوسی ایشن تے بار کونسل دے نمائندے نیں جہناں نے اوہناں دی تربیت نہیں کیتی۔ ایس لئی ضروری اے کہ بار الیکشناں وچ ووٹ سوچ سمجھ کے کاسٹ کرو تے استاد نوں عزت دیو۔٭٭