کشمیر وچ ہندو توا تے نازی ازم دا جبر
بھارت دی انھی طاقت دے ساہمنے نہ کشمیری حریت پسند ہتھیار پان لئی تیار نیں تے نہ پاکستان دے عزم وچ کوئی کمی پیدا ہوئی اے
اسد اللہ غالب
کشمیر دی جنت نظیر وادی لہولہان اے گلی کوچیاں وچ سڑکاں اُتے ، گھنے جنگلاں وچ شہیداں دیاں لاشاں ڈگ رہیاں نیں۔ ستر ورہے تیکر بھارت دی ہر حکومت نے کشمیر وچ جبر تے تشدد دا بازار گرم رکھیا پر بی جے پی ساری پرانی حکومتاں توں ظلم و ستم وچ بازی لے گئی۔ ست عشریاں تیکر کشمیر نوں بھارتی آئین دے تحت خصوصی درجہ حاصل رہیا۔ پر بی جے پی دی حکومت نے اپنے ای ملک آئین نوں رونددے ہوئے پنج اگست دو ہزار 19 نوں ایس دی کٹھ پتلی دا کردار ادا کردے رہے۔ دو سال پہلاں پنج اگست نوں دیگر اقدامات دے علاوہ بھارت نے مقبوضہ کشمیر وچ کرفیو نافذ کر دتا، انٹرنیٹ تے وائی فائی سروس، حتیٰ کہ ٹیلی فون نوں بند کر دتا۔ وڈی سڑکاں نوں خاردار تاراں نال بند کر دتا تے سنگین بردار فوجی گلیاں وچ پہرے اُتے مامور کر دتے گئے ہر قسم دی نقل و حرکت نوں بند کر دتا گیا تے جیہڑا وی گھر توں باہر پیر رکھدا اے ایہنوں گولی دا نشانہ بنا دتا جاندا اے۔ پچھلے دو ورہے توں جدوں دنیا کرونا لاک ڈائون نال دو چار اے تے کشمیر دے لوک ڈبل لاک ڈائون دا ساہمنا کر رہے نیں۔ کوئی کشمیری مرد و زن وائرس دا شکار ہو جائے تے ایہنوں ہسپتال تیکر رسائی وی نہیں دتی جاندی، حیرت دی گل تے ایہہ وے کہ جدوں لوک بھارتی فوج دے کرفیو دی وجہ نال پہلے ای لاک ڈائون وچ سن تے فیر اوتھے کرونا پھیلیا ای کنج، آہنی پردے دے پچھے کشمیر وچ کیہ ہو رہیا اے تے کشمیریاں اُتے کیہ بیت رہی اے ایس دا حال کوئی نہیں جان دا کیوں جے بھارت نے انسانی حقوق دے اداریاں دے داخلے اُتے پابندی لا رکھی اے۔ سرچ اپریشن دی آر وچ بھارتی فوج 30 ہزار نوجوان کشمیریاں نوں گھراں توں غائب کر چکی اے تے ایہہ نوجوان سیف بائوسوں وچ ٹارچر دا شکار نیں یا ایہناں نوں شہید کر دتا گیا اے ایس دی خیر خبر کسے نوں نہیں ملدی، بھارت نے کشمیر دی خصوصی حیثیت ختم کرن دے نال نال اپنے آئین وچوں آرٹیکل35 اے وی حذف کر دتا جس دی وجہ نال غیر کشمیریاں نوں ریاستی شہریت حاصل کرن وچ آسانی ہو گئی اے تے کشمیر وچ جائیداداں خریدن دی وی کھلی چھوٹ مل گئی اے۔ بھارت دے طول و عرض توں ہندوئواں دے جتھے کشمیر وچ آباد ہو رہے نیں جس دی وجہ نال آبادی دا تناسب خطرے وچ پئے گیا اے۔ بی جے پی دی ہندو توا حکومت کشمیریاں دی نسلی تطہیر دی گھنائونی سازش نوں پروان چڑھا رہی اے۔ واضح رہوے کہ بی جے پی نے نسلی تطہیر دا ایہہ نظریہ ہٹلر دے نازی ازم توں اخذ کیتا اے جس نے یہودیاں دا وسیع پیمانے اُتے قتل عام کر کے دنیا وچ بدنامی کمائی، ہٹلر دے دور وچ مخالفین نوں کچلن لئی اوچھے ہتھ کنڈے اختیار کیتے جاندے رہے لوکاں نوں لاپتہ کرنا، ٹھکانے لانا بجلی دے جھٹکیاں نال موت دی نیند سلادینا نازی ازم دا شیوہ بن گیا سی۔ بھارت وچ بی جے پی نے آر ایس ایس دی کوکھ توں جنم لیا اے تے دنیا جان دی اے کہ آر ایس ایس دے بانی نازی ازم دے سحر وچ گرفتار سن۔ بی جے پی نے اقتدار وچ آ کے ہٹلرانہ پالیسیاں تشکیل دتیاں نیں تے کشمیر اُتے وس نہیں ایس نے پورے ہندوستان وچ اقلیتاں دا جینا دوبھر کر دتا اے۔ بی جے پی شہریت دا اک انج دا قانون لیائی اے جس دے تحت بھارت دے کسے وی شہری توں ایس دی شہریت کھوئی جا سکدی اے۔مسلماناں نوں شہریت دے ایس قانون توں خوفزدہ کیتا جا رہیا اے تے بھارت دی دیگر اقلیتاں وی ایس قانون دا نشانہ بن رہیاں نیں۔ ستم ظریفی ایہہ وے کہ پوری دنیا بنیادی حقوق دی پہرے دار ہون دا دعویٰ کردی اے۔ اقوام متحدہ دا وی انسانی حقوق دا اک چارٹر موجود اے پر کیہ مجال کہ بھارت دے اوچھے ہتھکنڈیاں دے خلاف انسانی حقوق دے عالمی ادارے ذرا جہیا وی احتجاج کردے ہون۔ اوہناں نے بھارتی حکومت ولوں انسانی حقوق دی سنگین خلاف ورزیاں اُتے چپ سادھ رکھی اے۔ مزید ستم ظریفی ایہہ وے کہ بھارت نوں انسانی حقوق دے چارٹر اُتے سزا دین دی بجائے ایہنوں ایہہ انعام دتا گیا اے کہ اوہ سلامتی کونسل دا رکن بن بیٹھا اے۔فیٹف جہے ادارے وچ وی بھارت نوں شامل کر لیا گیا اے انج لگدا اے کہ پوری انسانیت بھارت دی ہندو توا تے نازی ازم دے اگے گھٹنے ٹیک چکی اے تے ایہنوں کھل کھیڈن دی آزادی دے دتی گئی اے۔ بھارت اک پاسے یو این او دے انسانی حقوق دے چارٹر دی خلاف ورزیاں دا مرتکب ہو رہیا اے تے دوجے پاسے ایس نے کشمیر وچ استصواب دے بارے وچ سلامتی کونسل دی ساری قرار داداں نوں پائے حقارت نال ٹھکرا دتا اے جے ایہو جرم پاکستان یا کسے ہور مسلم ملک توں سرزد ہوندا تے ایہنوں نشان عبرت بنا دتا جاندا پر بھارت دنیا دا لاڈلا بنیا ہویا اے ایہنوں کھلی چھٹی حاصل اے کہ اوہ اپنی اقلیتاں دے ناک وچ دم کرے یا کشمیریاں دی نسل کشی کرے یا سلامتی کونسل دی قرار داداں نوں ٹھکرائے ایس توں پچھ گچھ کرن والا کوئی وی نہیں۔
بھارت دے ایہناں سنگین مظالم دے پیش نظر پاکستان نے حق تے انصاف دا ساتھ نہیں چھڈیا، پاکستان کشمیریاں دے جائز حقوق لئی اواز بلند کر رہیا اے۔ پاکستان دے وزیراعظم عمران خان نے اعلان کیتا اے کہ اوہ کشمیر دے وکیل تے کشمیر دے سفیر بنن گے تے کشمیریاں نوں ایہناں دے حقوق دلوان لئی بھرپور کردار ادا کرن گے۔ بھارت دی اندھی طاقت دے ساہمنے نہ کشمیری حریت پسند ہتھیار پان لئی تیار نیں تے نہ پاکستان دے عزم وچ کوئی کمی پیدا ہوئی اے۔ پاکستان دیاں کوششاں نال کشمیر دا مسئلہ پچھلے دو ورھیاں وچ سلامتی کونسل زیر بحث لیا چکی اے سلامتی کونسل نے اک وار فیر اپنے ایس موقف دا اعادہ کیتا اے کہ کشمیر دا مسئلہ اک آزادانہ غیر جانبدارانہ تے شفاف استصواب دے تحت حل کیتا جائے جس وچ کشمیریاں نوں ایہہ رائے دین دا حق حاصل ہوئے کہ اوہ بھارت وچ رہنا چاہندے نیں یا پاکستان وچ شامل ہون دے خاہش مند نیں۔ سلامتی کونسل دا ایہہ موقف پاکستان دی سفارتی کوششاں دی فتح دے مترادف اے تے اوہ دن دور نہیں جدوں کشمیر توں بھارت دے ہندو توا جبر تے نازیاں جہے تشدد دا خاتمہ ہو جائے گا۔ تے کشمیری غلامی دی زنجیراں توڑ دین گے۔
