چھیڑ خانیاں !

ابرار ندیم

میں جدوں وی کسے ‘‘پسوڑی‘‘ وچ ہونا واں اللہ جانے شاطر نوں کنج خبر ہو جاندی اےاوہ کسے ’’غیبی دشمن‘‘ وانگوں میری مشکل نوں مزید ودھان اچانک کدھرو آندا اے شاطر کہن دی حد تیکر تے میرا دوست اے پر حرام اے جو اج تیکر ایس نے کسے مشکل وچ میرے نال دوستی نبھائی ہوئے۔ ایہہ ظالم انج دا شیطان اے بلکہ انج دا ظالم شیطان اے کہ اصلی شیطان وی ایس توں پناہ منگدا ہوئے گا۔ پچھلے اک گھنٹے توں مینوں مسلسل ایہہ پریشانی لاحق سی کہ میں اگلے ڈیڑھ دو گھنٹیاں وچ اپنا کالم مکمل کر کے ایہنوں اخبار نوں ای میل کرنا سی پر میرے خیال دا گھوڑا سوچ دے مسلسل تازیا نے کھا کے وی کسے اڑیل ٹٹو وانگوں اپنی تھاں توں ٹھس توں مس نہیں ہو رہیا سی۔ ہفتے وچ چھ دن ایدھے اُودھےدی مصروفیت تے سوشل میڈیا اُتے دلچسپی دے دوران میرے ذہن وچ کالم لئی انج انج دے رنگ برنگے، مزیدار، اچھوتے تے زبردست خیال آندے نیں کہ رہے ناں خدا دا، پر کیہ پتہ ایس وچ کیہ بھید اے کہ میں جدوں وی کالم لکھن بیٹھ نا واں ہفتے بھر ذہن وچ ’’گھڑمس‘‘ مچان والے ایہہ نیلے پیلے تے کھٹے میٹھے قسم دے سارے موضوعات اک دم ذہن توں انج غائب ہو جاندے نیں جویں گدھے دے سر توں سینگ۔ ایس دے بعد کافی دیر تیکر اپنے دماغ توں کوئی زور زبردستی یا ترلامنت کر کے اج ای دی طرح کالم ل ئی کسے گھے پٹے موضوع دا انتخاب کرن وچ اوکھے سوکھے کامیاب ہو وی جاواں تے کالم لکھدے ہوئے شادی والے گھر وچ عین ’’سلامی‘‘ دین دے موقعے اُتے اچانک ناراض ہو جان والے کسے ، رپھڑی، قسم دے رشتے دار وانگوں لفظ اپنا ’’ وَکھرا ‘‘سیاپا پا کے منہ دوجے پاسے پھیر کے بہہ جاندے نیں۔ انج دے کڑے ویلے وچ اکثریاپنی بے بسی نوں محسوس کر کے میں ہمیشہ ایہہ سوچنا واں کہ پتہ نہیں اوہ کیہڑے وڈے کالم نگار نیں جیہڑے کسے وی موضوع اُتے لکھن یا بولن دا ارادہ کردے نیں تے خیال تے لفظ ایہناں دے ساہمنے غلاماں وانگوں ہتھ بنھ کے اک لین وچ کھڑے ہو جاندے نیں۔
دوجے پاسے اک میرے جہیا نمانا کالم نگار اے کہ جدوں وی کجھ لکھن دا ارادہ کردا اے تے لگدا اے جویں سوچ نوں دندل پین دے نال خیالاں وچ اک بھگدڑ جہی مچ گئی اے۔ لفظ میرے اگے انج ہتھ جوڑ کے کھڑےہو جاندے نیں جویں میرا ارادہ ایہناں لفظاں نوں اپنے کالماں وچ بنا سنوار کے ورتن دا نہیں بلکہ ایہناں نوں اُلٹا لٹکا کے ایہناں دی کھال اتارن دا ہوندا اے۔ گو اج مینوں کالم نگاری دے ایس دشت دی سیاحی کردے چنگا خاصہ عرصہ ہو گیا اے پر اج وی جدوں میں کالم لکھن بیٹھنا واں تے دماغ دیاں چولاں ہل جاندیاں نیں جس نال کئی کئی دن تیکر میری سوچ وچ ’’کھلیاں‘‘ پئیاں رہندیاں نیں۔ ایس ویلے دل توں اک آہ نکلن دے نال ذہن وچ ایہہ سوال وی در آندا اے کہ اللہ جانے اوہ ویلا کدوں آئے گا جدوں اپنے سر اُتے وی اک وڈے کالم نگار دا سہرہ سجے گا تے فیر کالم لکھدے ہوئے اپنے اگے وی لفظ تے خیال ہتھ بنھے کھڑے ہون گے۔ ادھیڑ عمری وچ دوجی شادی دی حسرت جہی ایہہ رنگین خواہش اپنی تھاں پر ایس ویلے صورتحال ایہہ سی کہ کالم لکھن لئی میں کسے نیب زدہ سیاسی یا غیر سیاسی ملزم جہی شکل بنائے لفظاں دے اگے ہتھ جوڑے کھڑا سی۔ ممکن سی کجھ دیر وچ ساڈے وچکار افہام و تفہیم دی کوئی صورت نکل آندی کہ ایسے دوران میرے کمرے دا دروازہ کھلیا تے شاطر اک دم توں میرے ساہمنے آیا ایس توں پہلے کہ میں ایس دی اچان آمد اُتے ایس دا ترلامنت کر کے اپنا کالم مکمل کرن دی غرض نال ایہنوں کج دیر لئی کمرے توں باہر جان لئی کہندا۔ ایس نے مینوں کجھ کہن سنن دا موقع دتے بغیر ڈرامائی انداز وچ تاڑی وجاندے ہوئے کہیا ، من گئے استاد تہاڈی کاریگری نوں تسیں تے یاراں دے وی استاد نکلے۔ میں تے ہن تیکر ایہو سمجھ رہیا سی کہ مختلف اخباراں وچ ’’مفتو مفت‘‘ بلکہ پلے توں پیسے دے کے لکھن والے نکے موٹے شوقیہ مضمون نگاراں وانگوں تسیں وی ساڈے جہے دوستاں تے عزیزاں تے اپنی دانشوری دا رعب پان لئی سال چھ مہینے وچ اپنا کالم نگاری دا شوق پورا کر کے سکون نال محلے وچ اپنی پرچون دی دکان چلائو گے پر ایہہ جیہڑا تسیں پچھلے کجھ عرصے توں اپنے علامتی تے تمثیلاتی قسم دے کالماں وچ کھوتیاں تے الوئواں دے استعاراں تے اشاریاں کنائیاں وچ کجھ کھوتیاں تے الوئواں نال ’چھیڑ خانیوں‘‘ دا سلسلہ شروع کر رکھیا اے تے بس ایہناں نوں پڑھ کے مینوں پورا یقین ہو گیا اے کہ مستقبل وچ تہاڑی پرچون دی دکان چلے نہ چلے تہاڈی کالم نگاری دی ایہہ دکان ضرور چلے گی۔ شاطر دے منہ توں اپنے لئی توصیفی کلمات سن کے میں ایس نوں کہیا ’’ طنز کر رہے او؟‘‘۔ایس اُتے اوہ تھوڑا خفا ہو کے کہن لگا، یار میں خواہ مخواہ تہاڈے اُتے طنز کیوں کراں گا جد کہ تہانوں چنگی طرح پتا اے میرے دل وچ جو کجھ ہوندا اے میں ایہنوں کسے لگی لپٹی دے بغیر کسے وی بندے دے منہ اُتے دے مارنا واں۔ میں سچ مچ تہاڈے کالماں دی تعریف کر رہیا واں بس مینوں اک گل دا ڈر اے کہ حق تے سچ دی ایس راہ اُتے چلدے ہوئے تہانوں خاصی مشکلات دا ساہمنا کرنا پئے سکدا اے۔ بس تسیں اک گل دا خیال رکھنا کہ سچائی دی ایس راہ اُتے چلدے ہوئے کجھ قوتاں ولوں تہاڈے اُتے جس قسم دا وی دبائو پان یا تہانوں ڈران دی کوشش کیتی جائے تسیں کسے صورت پچھے نہیں ہٹنا۔ البتہ جے کوئی پارٹی چنگی قیمت اُتے تہاڈی خدمات خریدن دی پیشکش کرے تے ایس سنہری موقعے نوں ضائع نہیں کرنا۔ ایس سلسلے وچ جے تہاڈی قسمت نے یاوری کیتی تے تسیں کجھ مہرباناں دے ’’ریڈار‘‘اُتے آ گئے تے مینوں امید اے میڈیا منڈی وچ کجھ دیہاڑی دار ’’طائر لاہوتیوں‘‘ نوں میسر مخصو”ص سہولتاں دی طرح تہاڈے لئی وی ’’ ریڈی میڈ‘‘ کالماں دے نال من و سلویٰ دا بندوبست ہو جائے گا۔