حکومتاں نہیں اسیں چور آں

شکیل امجد صادق

کسے پنڈ وچ چوری دیاں بڑیاں وارداتاں ہو رہیاں سن تے ہر چوری دا کھرا اک میراثی دے گھر جاندا سی۔ پنڈ والے جدوں وی کھرا پھڑ کے میراثی دے گھر اپڑدے تے میراثی قرآن ہتھ وچ پھڑ کے قسماں کھانا شروع کر دیندا تے کہندا: اللہ دی قسم جدوں توں پنگھوڑے توں اتریا واں‘ کدی چوری نہیں کیتی تے نہ ای ایس چوری نال میرا تعلق واسطہ اے۔ پنڈ والے اوہدی قسم تے یقین کرکے‘ اعتبار کرکے اوہنوں چھڈ کے چلے جاندے تے چور دی تلاش وچ جٹ جاندے پر کدی وی چور نوں نہ لبھ سکے۔ اک واری پنڈ والیاں نے چوری دی واردات دے بعد چور دا بھرپور طریقے نال پچھا کیتا۔ چور نسدا نسدا‘ ہفدا ہویا‘ ڈگدا ڈھیہندا سدھا میراثی دے گھر وچ وڑ گیا۔ پنڈ والے وی اوس چور دے پچھے میراثی دے گھر گئے تے مال مسروقہ دے نال میراثی نوں رنگے ہتھیں پھڑ لیا۔ جدوں میراثی نوں دے دھنادھن جتیاں ماریاں جا رہیاں سن تے نال قسم خوری تے جھوٹ دے طعنے وی دتے جا رہے سن۔ اوس دن میراثی دی چنگی دھلائی ہوئی۔ مار کھاندے کھاندے میراثی فیر چلایا قسم لے لوو‘ میں اج تک جھوٹی قسم نہیں کھادی‘ سارے پنڈ والے میراثی دی ایس حرکت تے اک واری فیر حیران ہو گئے۔جدوں ایس گل تے اوہنوں ہور جتیاں پین لگیاں تے میراثی ہتھ جوڑ کے بولیا مولا خوش رکھے‘ اللہ دی امان میری پوری گل سن لوو۔ فیر اوہ پ نڈ والیاں نو ںاندر کمرے وچ لے گیا جتھے اک جھولا لٹکیا ہویا سی۔ جھولے نوں ویکھ کے میراثی بولیا میں جدوں وی چوری کرکے آئوندا تے سدھا ایس جھولے وچ لیٹ جاندا۔ جدوں پنڈ والے آئوندے تے میں جھولے توں لہہ ے قرآن اٹھا کے قسم کھاندا کہ جدوں توں جھولے توں اتریا واں میں چوری نہیں کیتی۔
ساڈے سیاستدان‘ حکمران‘ لیڈر تے نام نہاد سیاسی نجات دہنداواں دی ذہنی کیفیت وی میراثی ورگی اے کہ اوہناں نے چوری نہیں کیتی۔ چور تے بس پچھلی حکومت ای سی۔ مہنگائی نوں پر لگ جان چور پچھلی حکومت‘ بجلی مہنگی ہووے چور پچھلی حکومت‘ گیس مہنگی ہووے چور پچھلی حکومت‘ دوائیاں قوت خرید نوں مات دے جان چور پچھلی حکومت‘ کھنڈ مہنگی ہو جاوے چور پچھلی حکومت‘ پٹرول ہر پندرہ دن بعد مہنگا ہو جاوے چور پچھلی حکومت‘ مافیا من مانی کرے تے اوہنوں ہتھ پانا مشکل ہو جاوے چور پچھلی حکومت‘ آف شور کمپنیاں دے آپ مالک ہون چور پچھلی حکومت‘ ایتھے بے بہا سہولتاں اپنے حکومتی نمائندیاں نوں ملن چور پچھلی حکومت‘ اپنے کیتے دھرے دا بھار دوجیاں تے چور پچھلی حکومت۔ جاپان وچ پچھلے 30 ورھیاں وچ کوئی چوری نہیں ہوئی ۔ ایہ گل نہیں کہ اوتھے میراثی نہیں‘ قتل نہیں ہویا‘ کوئی بھکھا نہیں سُتا‘ زلزلے دے وقت کیمپاں وچ سب کجھ رکھ دتا جاندااے کوئی اک چھٹانک لوڑ توں ودھ نہیں لیندا‘ دیانتداری وچ دنیا وچ پہلے نمبر تے اے۔ سڑک تے اک کروڑ سٹ دیو کوئی نہیں چکدا‘ تسیں موڈھا مارو‘ سامنے والا معذرت کردا وکھائی دیوے گا ترقی تے ٹیکنالوجی وچ دنیا توں دس ورھے اگے جیندے نیں کم ایناں کردے نیں کہ وزیراعظم ہتھ جوڑ کے آرام دے مشورے دیندا اے۔ سگرٹ دی سواہ جھاڑن دی ڈبیا جیب وچ رکھدے نیں۔ صفائی اینی سڑکاں تے منہ نظر آوے‘ پابندی وقت اینی کہ پنج منٹ ٹرین لیٹ ہوئی تے پوری کمپنی بند کر دتی جاندی اے۔ اخلاق ایناں اُچا تسیں حیرت نال منہ تکدے رہ جائو گے۔ اخلاص‘ مہمان نوازی تے ثقافت کمال دے درجے نوں چھو رہی اے۔ محبت وفا اینی کہ جاپانی بیوی بوجا کرن لگ جاوے تے تہانوں ایناں کھلائے کہ موٹے ہون دا ڈر پیدا ہو جاوے۔ چاول دی فصل مرغوب غذا اے۔ اک واری قحط پیا تے تریہہ ورھے دا اجیہا ذخیرہ کر لیا کہ دنیا چوں چاول نایاب ہو گئے پر اوتھے ختم نہیں ہوئے۔ جاپانی جہدے ہو گئے بس پتھر تے لکیر اوہدے رہے۔ نظام صحت ایسا کہ ٹوائلٹ تہانوں جسم دی پوری ڈیٹیل دے دیوے۔
دونمبری تے بے ایمانی دا تصور وی نہیں تے جس ملک وچ لکھاں لوک تبلیغی اجتماعات وچ جاندے ہون‘ جتھے لکھاں لوک دعوت دین لئی سفر کردے ہون‘ جتھوں لکھاں لوک بیت اللہ عمرہ تے حج لئی جاندے ہون‘ میلاد النبیؐ دے موقعے تے ہر شہر وچ جلوساں وچ لکھاں لوک شامل ہون جس ملک وچ ہر رات لکھاں محفل میلاد تے دروس قرآن ہوندے ہون‘ جس ملک وچ یوم عاشور والے دن لکھاں لوک غم حسینؑ وچ عزاداری کردے ہون۔ جس ملک وچ عید تے جمعہ دے وڈے وڈے اجتماعات ہوندے ہون‘ جس ملک وچ تسبیحاں پڑھن والے لکھاں وچ تے درود و سلام دی گنتی ارباں وچ ہووے۔ اوہ ملک ایمانداری وچ دنیا وچ 160 ویں نمبر تے آوے تے کافراں دا جاپان ایمانداری وچ نمبرون ملک قرار پائے۔
تے سوال تے اٹھے گا کہ اسیں کنہوں دھوکھا دے رہے آں؟ اصل وچ اسیں اپنے ای عوام نوں دھوکھا دے رہے آں۔ اسیں آپ بے ایمان آں جو اپنے سراں تے بے ایماناں نوں مسلط کرنے آں اسیں آپ چور آں جو اپنی زندگی دی باگ ڈور چوراں دے حوالے کر دینے آں۔ ٭٭