فوج تے پولیس وردی وچ حسینائواں دی اداکاری

سونیا حسین تے صبا قمر وی پولیس وردی وچ سیریل کلر وچ وکھائی دین گیاں، تصویراں وائرل ہو چکیاں نیں

شہزاد فراموش

اکثر ڈرامیاں تے فلماں وچ ہیرو، ہیروئن یا دیگر اداکار پولیس یا فوج دی وردی وچ ملبوس کردار نبھاندے نظر آندے نیں۔ جدوں پی ٹی وی دی سکرین ہر گھر دا انتخاب سی تے انج جنہاں نے ’’الفا براوو چارلی، اندھیرا اجالا اور دھواں‘‘ جہے ڈرامے ویکھے، ایہناں دے کردار ایہناں دے ذہن وچ ضرور زندہ ہون گے۔ ایہناں ڈرامیاں دے زیادہ تر کردار وردیاں وچ وکھائی دتے سن۔ ایسے پولیس وردی نوں پا کے اداکار قوی خان تے عرفان کھوٹ تے بعد وچ روبینہ اشرف نے اپنی صلاحیتاں دا لوہا منوایا۔ ’’دھواں‘‘ ڈرامے دے رائٹر عاشر عظیم نے اپنے ای تحریر کردہ ڈرامے وچ اک پولیس افسر تے خفیہ ایجنٹ دا مرکزی کردار کیتا سی جنہوں بوہت پسند کیتا گیا بعدا زاں جدوں اوہناں نے ایسے پیٹرن اُتے فلم بنائی سی تے ایہنوں بین کر دتا گیا سی تے اوہ ایتھوں چلے گئے سن پر ایہہ کسے نوں وی نہیں پتہ کہ وردی وچ کیتے گئے کم وچ جے ذرا جہی وی بھول چوک ہو جائے تے فیر انج دی غلطی سچ مچ وچ تہانوں ہیرو تے زیرو کر سکدی اے تے قیدی دے درجے اُتے وی لے جا سکدی اے۔
ایتھے اسیں ایہناں شوبز دی حسینائواں دا ذکر کرنے آں جنہاں نے پولیس یا فوج دی وردی وچ لازوال کردار نبھائے۔ سپر سٹاف ماہرہ خان اج کل پاکستان دی پہلی خاتون لیفٹیننٹ جنرل نگار جوہر دی زندگی اُتے بنن والی ٹیلی فلم وچ مرکزی کردار نبھا رہیاں نیں۔ ماہرہ خان دی ٹیلی فلم’’ ایک ہے نگار‘‘ دا ٹریلر وی جاری ہو چکیا اے۔ اوہ اپنے کردار وچ تے فوجی وردی وچ بوہت بھلی وکھائی دے رہیاں نیں۔ ہن اوہناں نے ایہنوں نبھایا کنج ایہہ تے مکمل ویکھ کے ای پتہ چلے گا۔ پاک فوج نے ایس فلم دے ذریعے لیفٹیننٹ جنرل نگار جوہر نوں خراج تحسین پیش کیتا اے۔ ایہہ ٹیلی فلم پاک فوج دی پہلی تھری سٹار جنرل دے عہدے اُتے ترقی پا کے ملک دی پہلی لیفٹیننٹ جنرل تے پاکستان دی پہلی خاتون سرجن نگار جوہر دی زندگی اُتے مبنی اے۔ 2 منٹ دے ٹریلر وچ نگار جوہر دی ابتدائی زندگی توں لے کے ایہناں دے لیفٹیننٹ جنرل بنن تیکر دی کہانی نوں وکھایا گیا اے۔ ایس سفر وچ اوہناں نے کنی مشکلاں تے فتوحات حاصل کیتیاں ایہہ وی وکھایا گیا اے۔ ماہرہ خان نے فلم دا ٹریلر سوشل میڈیا اکائونٹ اُتے شیئر کردے ہوئے ایس کردار نوں کرن دا تجربہ بیان کردے ہوئے لکھیا ایس لئی کائنات دی شکر گزار واں ایہہ تجربہ، ایہہ کردار، ایس وار ، میں امید تے دعا کرنی واں کہ اسیں جنرل نگار دی زندگی تے میراث دے نال انصاف کیتا۔ماہرہ خان نے پوسٹ وچ فلم ٹیم دا وی شکریہ ادا کیتا۔ نگار جوہر پاکستان دی پہلی خاتون سرجن نیں جنہاں نے اپنی زندگی لگن دے نال میڈیکل دے شعبے وچ کم کردے لنگھائی۔ ٹیلی فلم وچ ماہرہ خان دے مقابل اداکار بلال اشرف مرکزی کردار وچ نظر آن گے۔ ایہناں دے نال خوشحال خان ، سہیل سمیرا تے سارہ وی فلم وچ شامل نیں۔ ’’ایک ہے نگار‘‘ دی کہانی عمیرہ احمد نے تحریر کیتی۔ نینا کاشف تے ماہرہ خان دی پروڈکشن کمپنی سلفری فلمز دے بینر تلے ایس فلم نوں تیار کیتا گیا اے۔ ایہہ ٹیلی فلم نجی چینل توں پیش کیتی جا رہی اے۔

ایدھے سونیا حسین تے صبا قمر وی پولیس افسر بنن نوں تیار وکھائی دے رہیاں نیں۔ پچھلے دناں ایہناں دی پولیس وردی وچ تصویراں سوشل میڈیا اُتے گردش کردیاں رہیاں نیں۔ دونواں حسینائواں دی وردی اُتے ایس پی سارا دا ناںلکھیا ہویا اے جیہڑا آسانی نال پڑھیا جا سکدا اے۔ خبراں نیں کہ جلدی ای سونیا حسین تے صبا قمر اک ساتھ ہدایتکار عدنان سردار ے آن والے ڈرامہ وچ پولیس افسر دے روپ وچ وکھائی دین گیاں۔ اداکارہ سونیا حسین تے صبا قمر دی ڈرامے دے کرداراں دی پولیس وردی وچ تصویراں جتھے سوشل میڈیا اُتے وائرل نیں اوتھے دونواں نو ں پولیس دے اک ای عہدے تے ایہناں دے یونیفارم اُتے اک ای ناں دا بیج ویکھ کے شائقین حیران وہ رہ گئے۔
دونواں اداکارائواں نے انسٹا گرام اُتے تصویراں شیئر کردے ہوئے ڈرامیاں وچ پولیس افسر بنن دی تصدیق وی کیتی اے۔ سونیا حسین نے انسٹا گرام اُتے وردی وچ تصویر شیئر کردے ہوئے تصدیق کیتی کہ اوہ عمیرہ احمد دے لکھے ڈرامے وچ سپرنٹنڈنٹ آف پولیس دے روپ وچ وکھائی دین گیاں۔ اداکارہ نے دسیا کہ اوہ ڈرامے وچ ایس پی سارا سکندر دا کردار کرن گیاں تے اوہناں نے سکیورٹی افسر دے کردار اُتے خوشی دا اظہار وی کیتا۔ سونیا حسین نوں پنجاب پولیس دی وردی وچ ویکھیا جا سکدا اے اگرچے سونیا نے تصدیق کیتی کہ اوہ ڈرامے وچ سارا سکندر نامی پولیس افسر دا کردار ادا کرن گیاں پر اوہناں نے ڈرامے دا ناں تے ایس دی کاسٹ متعلق کجھ نہیں دسیا۔

دوجے پاسے صبا قمر نے وی انسٹا گرام اُتے پولیس وردی وچ اپنی تصویر شیئر کردے ہوئے دسیا کہ اوہ عمیرہ احمد دے لکھے گئے ڈرامے وچ ایس پی سارا دے روپ وچ وکھائی دین گیاں۔ حیران کن طور تے صبا قمر دی پولیس وردی اُتے وی تصویر وچ ایہناں دی وردی پنجاب پولیس توں کجھ مختلف وکھائی دے رہی اے۔ سوشل میڈیا پوسٹس وچ دعویٰ کیتا گیا کہ صبا قمر تے سونیا حسین لکھاری حمیرہ دے لکھے ڈرامے سیریل کلر، وچ پولیس افسر بنن گیاں تاں سونیا حسین نے اپنی پوسٹ وچ سیریل کلر دا ناں یا ہیش ٹیک استعمال نہیں کیتا جد کہ صبا قمر نے مذکورہ ڈرامے دا ہیش ٹیگ استعمال کیتا سی۔ سونیا حسین نے میڈیا نوں دسیا کہ اوہ عمیرہ احمد دے ڈرامے سیریل کلر وچ پولیس افسر بنن گیاں تاں اوہناں نے ڈرامے دی کاسٹ وچ صبا قمر دے ہون یا نہ ہون دی تصدیق نہیں کیتی البتہ اوہناں نے دسیا کہ جگن کاظم سنے دیگر اداکار ڈرامے دا حصہ ہون گے۔ فوج دی وردی وچ ہانیہ عامر وی فلم ’’پرواز ہے جنون‘‘ وچ ہیروئن دے روپ وچ ویکھیاں گئیاں سن تے ایس فلم نے ریکارڈ بزنس وی کیتا سی۔ ہانیہ عامر نے کہیا کہ فلم پرواز ہے جنون وچ کم کرن دا تجربہ بوہت چنگا سی اوہ فہد مصطفی تے ڈاکٹر علی کاظمی دی مشترکہ پروڈکشن تے بگ بینگ انٹرٹینمنٹ دا نواں ڈرامہ سیریل وی کر رہیاں نیں۔ پاک فضائیہ اُتے ہانیہ عامر دی فلم پرواز ہے جنون، نوں چین دے سینما گھراں وچ وی نمائش لئی پیش کیتا گیا۔ پاکستان تے سعودی عرب وچ دھوم مچان والی ’’پرواز ہے جنون‘‘ چین وچ 40 سال بعد ریلیز ہون والی پہلی پاکستانی فلم اے ۔ ایہہ فلم سعودی عرب وچ وی کمرشل بنیاداں اُتے ریلیز کیتی جان والی پہلی پاکستانی فلم اے۔