پاکستان دا مثبت چہرہ

دبئی ایکسپو 2020 نوں پچھلے سال منعقد ہونا سی پر کورونا وائرس دی عالمی وبا پاروں سفری
پابندیاں دی وجہ نال ایہنوں موخر کیتا گیا تے ہن ایہنوں رواں سال شروع کیتا گیا اے

علی انوار

پچھلے دناں دبئی جان دا اتفاق ہویا تے اوتھے دبئی ایکسپو دے ناں توں اک ہزار ایکڑ اُتے لق و دق صحرا وچ جدید سہولتاں نال مرقع دبئی ایکسپو دا یکم اکتوبر توں آغاز ہو چکیا سی جیہڑا چھ مہینے تیکر جاری رہوے گی تے ایس دوران پوری دنیا توں سیاح دبئی آن گے تے دنیا بھر دے ملکاں نے اوتھے اپنے سٹال وی لا رکھے نیں۔راقم الحروف نوں وی دبئی ایکسپو جان دا اتفاق ہویا تے دبئی ایکسپو دی چکا چوند نے اکھاں چندھیا دتیاں۔ دبئی ایکسپو لئی نواں میٹرو سٹیشن بنایا گیا جتھے لکھاں ڈالر مالیت دے پویلین تیار کیتے گئے تے مختلف خدمات لئی ایتھے روبوٹ تیکر فراہم کر دتے گئے نیں۔ دبئی ایکسپو 2020 نوں پچھلے سال منعقد ہونا سی پر کورونا وائرس دی عالمی وبا پاروں سفری پابندیاں دی وجہ نال ایہنوں موخر کیتا گیا تے ہن ایہنوں رواں سال شروع کیتا گیا اے۔ اٹلی دے شہر میلان وچ 2015 وچ ہون والی انج دی ای اک نمائش منعقد ہوئی سی جس دی پیروی کردے ہوئے یو اے ای حکومت نے دبئی ایکسپو دے انعقاد دا فیصلہ کیتا سی۔ دبئی وچ ہون والی ایس ایکسپو دی تیاری تے انتظامات اُتے اندازاً 8.6 ارب ڈالرز دی لاگت آئی اے۔ نمائش وچ شریک 190 ملکاں دے وکھرے وکھرے پویلین بنائے گئے نیں تے ہر ملک نے اپنے پویلین نوں سجان تے نمایاں کرن لئی کاص اہتمام کیتا اے۔ پاکستان دی منفرد ثقافتاں نال مزین پاکستان پویلین وی دبئی ایکسپو دا حصہ اے۔پاکستان پویلین وچ وڈی سکرینز اُتے پاکستان دے سیاحتی علاقیاں دی عکاسی کیتی گئی اےپاکستان دے گلیشئر، پہاڑ، دریا، سمندر، ریگستان، گلگت دا سردریگستان باعث کشش بنیا ہویا اے۔ نمائش وچ پاکستان دے مختلف مذہباں دی وی عکاسی کیتی گئی اے جد کہ پاکستانی ثقافتی لباس پائے پر جوش پاکستانی رضا کار آن والیاں نوںخوش آمدید کہہ رہے نیں۔ پاکستان پویلین نے اکتوبر ’’بلوچستان‘‘ دے ناں کیتا اے۔ دبئی ایکسپو 6 مہینے جاری رہوے گی ایس مناسبت نال نمائش وچ پاکستان دے چارے صوبیاں، کشمیر تے گلگت بلتستان دے شوز وی ہون گے۔ پاکستانی پویلین وچ پاکستانی الیکٹرک کارز، بلوچی کلچر تے ماحولیات اُتے سیمینار وی کرائے گئے نیں۔ علاوہ ازیں پاکستانی بالاں دی مصوری دی نمائش وی کیتی گئی اے۔ پاکستان پویلین پاکستان دی ثقافت، تاریخ، جغرافیہ، سیاحت، معاشی امکانات تے ہنر مند کاریگراں دی مہارت نوں اجاگر کرے گا۔ پاکستانی پویلین وچ 8 نمائش گاہواں مقرر کیتیاں گئیاں نیں جنہاں وچ خطے دی تاریخ، ہنر مندی، خوبصورت مناظر، مذہبی ہم آہنگی تے جدید پاکستان نوں اجاگر کیتا جائے گا۔ ایکسپو پاکستان وچ پاکستانی ذائقیاں نال دنیا نوں روشناس کران لئی ڈھابہ تے دعوت دے ناں تے ریستوران وی قائم کیتے گئے نیں۔پویلین دے ذریعے چھ مہینے تیکر جاری رہن والی نمائش وچ ’’انویسٹ ان پاکستان‘‘ مہم چلائی جائے گی۔ حکومتی ادارے ، نجی شعبے پاکستان وچ سرمایہ کاری تے کاروباری امکانات اجگر کرن گے۔ اللہ تعالیٰ دی مہربانی نال پاکستان دنیا دے ایہناں کجھ گنے چنے ملکاں وچ شامل اے جتھے صحرا، پہاڑ، ریگستان، میدان، نخلستان، تے چٹیل میدان موجود نیں تے اللہ تعالیٰ دا بے پایاں کرم اے کہ پاکستان نوں اللہ تعالیٰ نے ایہناں سب نعمتاں نال نوازیا اے۔ ایس دے علاوہ پاکستان دے لوکاں وچ بے بہا ٹیلنٹ اے جس دی وجہ نال پاکستانی لوک دنیا بھر وچ مختلف شعبہ جات وچ چھائے ہوئے نیں۔ دبئی ایکسپو توں پاکستان ل ئی اہم موقع اے کہ اوہ اپنے ملک وچ سیاحت تے سرمایہ کاری نوں فروغ دے سکدا اے کیوں جے متحدہ عرب امارات ایہناں دو شعبیاں دی وجہ نال پوری دنیا دا مرکز بنیا ہویا اے تے ایس دے مقابلے وچ پاکستان نوں اللہ نے چار موسماں نال نوازیا اے گرم سمندر اے، دریا نیں اپنی بندرگاہواں نیں، نظاریاں لئی پہاڑ نیں۔ لکھاں ایکڑ رقبے اُتے صحرا نیں فیر دنیا دا سب توں اُچا میدان پاکستان وچ اے۔ اٹھ ہزار میٹر توں بلند چودہ چوٹیاں وچوں پنج پاکستان وچ نیں۔ پنج صوبے نیں ہر صوبے دی وکھری وکھری ثقافت اے فیر کشمیر جہیا جنت نظر خطہ پاکستان دا حصہ اے۔ گلگت ، بلتستان دا سرد صحرا پہاڑاں دے وچکار موجود اے۔ پاکستان دے کھانے دنیا بھر وچ مشہور نیں۔ پاکستان دے پھلاں دی دنیا وچ مانگ اے پاکستان دا آم دنیا دا منفرد ترین آم اے تے دنیا پاکستانی آم دی دیوانی اے۔ پاکستانی کپاس بہترین کپاس اے ایتھے دی کاٹن انڈسٹری دنیا نوں لیڈ کر سکدی اے۔ متنوع ثقافت پاکستان دا منفرد اعزاز اے ایہناں ساری شیواں نوں بے کیش کران دی لوڑ اے دنیا نوں دسن دی لوڑ اے کہ پاکستان اک پرامن تے مہمان نواز لوکاں دا ملک اے لوکاں نوں پاکستان دا مثبت چہرہ وکھان دی لوڑ اے۔ غیر ملکی سرمایہ کاراں نوں ایتھے راغب کرن دی لوڑ اے کیوں جے پاکستان دنیا دے ایہناں پہلے پنج ملکاں وچ شامل اے جس دے کول سب توں زیادہ نوجوان آبادی موجود اے ایس دا صنعتی شعبے وچ استعمال کر کے انقلاب برپا کیتا جا سکدا اے۔
سیاست توں ہٹ کے ہن کراچی یا لہور دے ناں دی ایکسپو کران دی لوڑ اے تاکہ دنیا نوں پاکستان جہے شاندار ملک توں روشناس کرایا جا سکے جس دے مہمان نواز لوک دنیا نوں خوش آمدید کہہ سکن۔ دبئی جے دنیا دے دو سو دے نیڑے ملکاں نوں اپنے نکے جہے صرا وچ اکٹھا کر سکدا اے تے پاکستان لئی ایہہ کوئی مشکل امر نہیں ہونا چاہیدا اوہ جے اپنے صحرا نوں نخلستان وچ بدل سکدے نیں تے اللہ نے سانوں صحرائواں دے نال نخلستان وی دتے نیں میدان وی دتے نیں پہاڑ وی دتے نیں تے ساڈے شہر زمانہ قدیم توں دنیا وچ موجود نیں بس ہن ویلا اے کہ پاکستان دا مثبت چہرہ دنیا نوں روشناس کرایا جائے تے سیاست نوں بالا طاق رکھدے ہوئے ایس لئی ہنے توں سب سیاست داناں نوں مل کے کم کرنا چاہیدا اے تاکہ اک دن پاکستان وچ وی لہور یا کراچی ایکسپو ہوئے تے پاکستانی قوم دنیا نوں خوش آمدید کہن لئی باہواں پھیلائی نظر آئے۔ آمین