کرونا توں پاک پنجاب، ریڈ ویکسینیشن دا آغاز

14ہزار نویں ویکسینیشن سنٹر قائم، 12 ہزار توں ودھ ٹیماں گھر گھر جا کے مہم کامیاب بنان گیاں ،
لوکاں نوں ودھ توں ودھ ویکسینیٹ کر کے لاک ڈائون توں بچایا جا سکدا اے

فیصل ادریس بٹ

وزیراعلیٰ پنجاب سردار عثمان بزدار نے صوبہ بھر وچ ڈینگی دی صورتحال، کرونا دی دم توڑدی لہر تے لا اینڈ آرڈر دے پیش نظر اپنا سعودی عرب دا دورہ منسوخ کر کے صوبہ بھر دے افسران نوں مثبت پیغام دتا اے۔ عمرے دی ادائیگی حقوق اللہ اے جد کہ انسانیت دی خدمت حقوق العباد اے سردار عثمان بزدار نے پنجاب نوں مکمل طور تے کرونا توں پاک کرن لئی ہنگامی بنیاداں اُتے ریڈ ویکسی نیشن مہم دے مشن دا آغاز کر دتا اے۔ سردار عثمان بزدار دا کہنا سی بے روزگاری تے لاک ڈائونز توں بچائو لئی اپنے آپ نوں ویکسینیٹ کرانا ہوئے گا۔

صحت مند زندگی، بیماریاں توں پاک معاشرہ تے صحت نال وابستہ ہر قسم دی سہولتاں دی فراہمی حکومت پنجاب دا اہم مشن اے۔ وزیراعلیٰ سردار عثمان بزدار نے صوبہ پنجاب نوں کرونا توں پاک کرن دا مصمم ارادہ کر رکھیا اے تاکہ ہر شہری ایس وبا دے حملے توں محفوظ رہ سکے۔ ایس سلسلے وچ وزیراعلیٰ نے صوبہ بھر وچ ہدایات جاری کر دتیاں نیں جس دے مطابق حکومت پنجاب 25 اکتوبر توں 12 نومبر تیکر صوبہ بھر وچ ویکسی نیشن دی سب توں وڈی ریڈ مہم دا آغاز کر رہی اے۔ ریڈ (RED) ویکسی نیشن مہم پنجاب دے سارے ضلعیاں وچ شروع کیتی جا رہی اے۔ ڈسٹرکٹ ہیلتھ اتھارٹیز نوں ضلعی انتظامیہ دے نال مل کے ریڈ ویکسی نیشن مہم نوں کامیاب بنان لئی اہم کردار ادا کرنا ہوئے گا۔ ریڈ ویکسینیشن مہم نوں کامیاب بنان لئی صوبہ بھر وچ مزید 14 ہزار نویں ویکسی نیشن سنٹرز قائم کیتے جان گے جس اُتے سیکرٹری پرائمری ہیلتھ عمران سکندر بلوچ تے سیکرٹری سپیشلائزڈ ہیلتھ ڈاکٹر احمد جاوید قاضی اپنا اپنا پراجیکٹ مکمل کر چکے نیں تے تیزی نال ویکسینیشن سینٹر قائم کیتے جا رہے نیں۔ مہم دے دوران 12 ہزار توں ودھ ٹیماں ہر محلے تے پنڈ وچ جا کے ویکسی نیشن دا اہتمام کرن گیاں۔ منتخب نمائندگان تے سماجی کارکنان گھر گھر جا کے ویکسی نیشن مہم نوں کامیاب بنان گے۔ ریڈ ویکسی نیشن مہم نوں ساری انتظامیہ کامیاب بنائے گی۔ کرونا وائرس ہن تیکر پنجاب وچ 12 ہزار 8 سو توں ودھ قیمتی جاناں نگل چکیا اے۔ گھٹ ویکسی نیشن والے ضلعیاں نوں ریڈ مہم دے دوران کارکردگی بہتر کرن دا نادر موقع ملے گا۔ ودھ توں ودھ لوکاں نوں ویکسینیٹ کرن دے بعد اسیں لاک ڈائونز توں بچ سکنے آں۔ امید اے ودھ توں ودھ آبادی نوں ویکسینیٹ کر کے اسیں معمول دی زندگی ول تیزی نال ودھاں گے۔ کرونا دے خلاف جنگ صرف تے صرف ودھ توں ودھ آبادی نوں ایس مہم وچ شامل کر کے جتی جا سکدی اے۔
عوامی شعور دی وائرس دے خلاف بیداری مہم
محکمہ اطلاعات و ثقافت پنجاب نوں ایس سلسلے وچ اہم ذمہ داریاں دتیاں گئیاں نیں سیکرٹری اطلاعات پنجاب راجہ جہانگیر دا کہنا اے کہ کرونا وبا ہجے ختم نہیں ہوئی پر احتیاطی طور تے ہر لمحہ ایس توں باخبر رہ کے اپنے آپ نوں بچان ہوئے گا۔ حکومت پنجاب دا اہم محکمہ اطلاعات و ثقافت کرونا وائرس دے بارے وچ عوامی شعور دی بیداری لئی اہم کردار ادا کر رہیا اے۔ سیکرٹری اطلاعات و ثقافت راجہ جہانگیر انور دی ہدایت اُتے ڈائریکٹوریٹ جنرل پبلک ریلیشنز لہور وچ قائم خصوصی مانیٹرنگ سیل کرونا وائرس پاروں دنیا بھر وچ آن والی تبدیلیاں تے واقعات دی ہر لمحہ مانیٹرنگ کر رہیا اے۔ پرنٹ، الیکٹرانک تے سوشل میڈیا اُتے ؑڈی جی پی آر ثمن رائے دی زیر نگرانی کرونا توں بچائو بارے حفاظتی اقدامات دے سلسلے وچ خصوصی آگہی مہم بدستور جاری اے۔
ڈائریکٹوریٹ جنرل پبلک ریلیشنز دے زیر اہتمام اطلاعاتی ماہرین کرونا وائرس متعلق جھوٹی تے من گھڑت افواہواں دا سدباب کرن دے نال نال عوام وچ بے جا خوف و ہراس پھیلان دی کوشش نوں ناکام بنان لئی پوری طرح متحرک نیں۔ پنجاب دے سارے ضلعیاں وچ تعینات ڈسٹرکٹ انفارمیشن آفیسرز ضلعی انتظامیہ دے نال مل کے مقامی سطح اُتے عوامی نوں کرونا وائرس بارے کیتے جان والے حکومتی اقدامات بارے آگاہی فراہم کر رہے نیں۔ پنجاب دی متحرک وزیر صحت یاسمین راشد تے سپیشل اسسٹنٹ ٹو سی ایم حسان خاور برائے اطلاعات میڈیا توں روزانہ دی بنیاد اُتے آپ رابطہ کر کے ایہناں نوں اپ ڈیٹ حقائق توں آگاہ رکھدے نیں۔ حسان خاور ماضی وچ آن والے معاون خصوصی برائے اطلاعات وانگوں اپوزیشن دے خلاف غیر اخلاقی گل بات بلاوجہ دی تنقید دی بجائے اپنی فارن کوالیفکیشن دا بھرپور فائدہ چکدے ہوئے پی ٹی آئی حکومت دے پروجیکٹس تے ایس دے مثبت اقدامات نوں ہر فورم اُتے جا کےاجاگر کر رہے نیں۔
مذہبی تعلیمات توں ذہن سازی
مذہبی امور و اقاف دے صوبائی وزیر سید سعید الحسن شاہ نے کرونا وائرس دی صورت حال دے پیش نظر حکومتی اقدامات لئی سارے علمائے کرام تے میڈیا دے تعاون توں عوامی سطح اُتے بھرپور تائید حاصل کیتی۔ ایہناں دا کہنا سی وزیراعظم پاکستان عمران خان تے نیشنل کمانڈ اپریشن سینٹر، انتظامیہ تے عسکری اداریاں نوں جنہی وی خراج تحسین پیش کیتا جائے گھٹ ہوئے گا۔۔۔ جنہاں دی شبانہ روز کاوشاں تے انتھک محنت توں کرونا دے خلاف بوہت جرات مندانہ کردار ادا کیتا تے عوامی سطح اُتےشدید بداحتیاطی تے غفلت دے باوجود دانشمندی دا مظاہرہ کیتا گیا۔ سمارٹ لاک ڈائون دے ذریعے ایس وبا دے مہلکت اثرات نوں گھٹ توں گھٹ رکھن دی کوشش کیتی گئی۔وزیراعلیٰ پنجاب سردار عثمان بزدار کرونا مریضاں لئی قائم آئسولیشن /قرنطینہ مراکز باقاعدگی نال دورے کیتے۔ وزیراعلیٰ پنجاب سردارعثمان تے محکمہ صحت دا عملہ ایس وبا دے کنٹرول وچ اپنی ساری کاوشاں بروئے کار لیا رہیا اے۔ جس اُتے اوہ خراج تحسین دے مستحق نیں۔ ساڈے گوانڈھی ملک بھارت وچ وی کرونا دی دوجی لہر نے وڈے پیمانے اُتے تباہی پھیلائی جتھے اک دن وچ ساڑھے تن لکھ توں ودھ لوک ایس وبا دا شکار ہوئے جد کہ پاکستان وچ حکومت عوام مذہبی طبقات، مشائخ، علماء کرام تے قومی ادارے متعلقہ مسئلے دی سنگینی توں مکمل طور اُتے گاہ رہے۔ایس سلسلے وچ کسے وی قسم دی احتیاط دا دامن ہتھ توں نہ چھڈیا گیا۔ ایس دے باوجود مزید احتیاط تے عملی اقدامات کرنا ساڈے لئ ویلا دی اہم لوڑ اے۔ ایس لئی کرونا دی ہر وڈی لہر وچ وزیراعظم نے عوام دے درد تے مذہبی عقیدت دا احترام کردے ہوئے ملک بھر وچ مکمل طور تے لاک ڈائون توں اجتناب کیتا اے۔ مسیتاں وچ سماجی فاصلیاں نوں برقرار رکھیا گیا۔ نماز عید دے اجتماعات نوں وی محدود رکھیا گیا تے عید دی شاپنگ نوں وی گھٹ توں گھٹ توں سطح اُتے کیتا گیا۔ انج دے سارے اقدامات ساڈے علماء کرام تے مشائخ حضرات دے کلیدی کردار تے لوکاں دے تعاون توں ای ممکن ہوئے۔

اسلام نے پاکیزگی تے طہارت نوں نصف ایمان دا د رجہ دتا ہویا اے۔ جس دی تائید اج غیر مسلم اقوام وی کر رہی اے۔ میڈیا نے بروقت آگاہی دے کے قوم اُتے بوہت وڈا احسان کیتا اے۔ جس دی پیروی وچ لوکاں وچ حکومت ولوں جاری احتیاطی تدبیراں اخبار کیتیاں گئیاں۔ رسول اللہ ؐدا فرمان اے کہ جس مسلمان نے پیاز کھادا ہوئے اوہ ساڈی مسجد دے نیڑے نہ آئےتے پیاز دی بدبو نال اذیت نہ اپڑائے۔ ایس حدیث دے مطابق پیاز دی بدبو دی وجہ نال مسجد وچ آنا منع اے جدوں تیکر منہ توں بدبو ختم نہ ہوئے۔ ایس لئی جیہڑے لوک وائرس نال متاثر ہوئے یا ایہناں وچ متاثر ہون دی علامات پائی گئی تے اوہناں نے آپ ای مسجداں وچ آن توں اجتناب کیتا کیوں جے وائرس دے پھیلن دا نقصان بہرصورت کدھرے ودھ ہو سکدا سی۔ انج دے بندے جیہڑے کرونا وائرس دی علامت یا سابقہ کسے بیماری دی بنا اُتے خائف ہون تے خطرہ محسوس کردے نیں کہ باجماعت نماز تے جمعہ وچ حاضری توں مینوں نقصان ہو سکدا اے تے انج دے بندیاں لئی باجماعت نماز ادا کرن تے جمعے وچ حاضری توں رخصت رہی۔
بلاشبہ حکومت تے خاص طور تے محکمہ صحت ولوں جاری کردہ احتیاطی تدبیراں اُتے عمل کرنا ضروری اے۔ جیلاں وچ وی قیدیاں دی سکریننگ دا آغاز کیتا گیا۔ انسپکٹر جنرل جیل خانہ جات پنجاب شاہد سلیم بیگ دی زیر نگرانی نہ صرف صوبے بھر دی جیلاں وچ کرونا دے خاتمے لئی مہم چلائی گئی بلکہ کرونا 135 اُتے سختی نال عمل درآمد وی ممکن بنایا گیا کیوں جے جیل وچ کرونا پھیلن نال وڈی تعداد وچ نقصان دا اندیشہ سی۔ آئی جی شاہد سلیم بیگ وچ کرونا دی بدترین صورتحال نال احسن طریقے نال نبڑنا لہور کیمپ جیل وچ سپرنٹنڈنٹ نور حسن بگھیلہ دی مانیٹرنگ وچ قیدیاں لئی خصوصی ہوپتال وی قائم کیتا گیا اے۔ کوٹ لکھپت جیل دے سپرنٹنڈنٹ اعجاز اصغر نے وی جیل وچ قائم ہسپتال نوں بنیادی سہولتاں نال آراستہ کر کے کرونا دے خاتمے وچ اہم کردار ادا کیتا۔صوبہ بھر دے شہراں تے قصبات دی سطح اُتے صفائی تے دیگر ضروری امور نوں وی متاثر نہیں ہون دتا گیا۔ سرکاری ہسپتالاں وچ کرونا وائرس دے تصدیق شدہ تے مشتبہ مریضاں دی مناسب دیکھ بھال حسب معمول جاری اے۔ ساری انتہائی نگہداشت یونٹس وچ ضروری طبی سامان وافر مقدار وچ موجود اے۔ سیکرٹری پرائمری ہیلتھ عمران سکندر کرونا وبا دے بعد ڈینگی دی شدید لہر نال نبڑن لئی دن رات خدمات انجام دے رہے نیں۔ وزیراعلیٰ پنجاب دی ہدایت تے تیز تر حکمت عملی دی بنا اُتے ویکسین دی تیاری لئی طبی ماہرین تے محققین نوں سارے وسائل دتے گئے۔ ایہناں ساری کامیابیاں اُتے قوم کرونا دے خلاف جاری مہم وچ برسر پیکار ڈاکٹرز ہیلتھ پروفیشنلز، صحافی تے دیگر ڈیوٹیاں سرانجام دین والے افسران نوں خراج تحسین پیش کردی رہی اے۔
ایس ویلے جدوں پنجاب توں کرونا دے خاتمے دے بعد ڈینگی دی وباء سر چک رہی اے ایس دے قلع قمع لئی وی عمران سکندر ایس عزم دا اعادہ کیتے ہوئے نیں۔ محکمہ صحت وچ اپنے تجربات دی بنیاد اُتے انقلابی تبدیلیاں لیا کے وزیراعلیٰ سردار عثمان بزدار تے وزیراعظم پاکستان عمران خان دے ویژن نوں اگے ودھان وچ وی کم کر رہے نیں۔ سیکرٹری سپیشلائزڈ ہیلتھ احمد جاوید قاضی طب دے شعبے وچ ملک دے سب توں وڈے تے معروف ادارے کنگ ایڈورڈ میڈیکل کالج دے لائق فائق اولڈ سٹوڈنٹ رہے نیں۔ اپنی خاداد صلاحیتاں دے نتیجے وچ سپیشلائزیشن دے دوران اوہ متعدد میڈلز وی حاصل کر چکے نیں۔ ڈاکٹر احمد جاوید قاضی نہ صرف ہسپتالاں دے مسائل بلکہ ڈاکٹراں نوں درپیش مسائل وی بخوبی سمجھدے نیں ڈاکٹر احمد جاوید قاضی وزیراعلیٰ پنجاب عثمان بزدار دے بیان دے مطابق ہسپتالاں نوں مریضاں لئی سہولتاں دا مرکز بنان اُتے فوکس کیتے ہوئے آں۔ احمد جاوید قاضی کرونا تے ڈینگی دے مریضاں نوں ہسپتال وچ ساری سہولتاں بہم اپڑان لئی کوشاں نیں جد کہ ایس کم لئی فیلڈ ہسپتال وی قائم کر دتے گئے نیں جتھے دوائیاں دی فراہمی تے علاج بالکل مفت ہو رہیا اے۔ حکومت کرونا وائرس توں بچائو لئی سارے فیصلے عوام دے مفاد وچ چک رہی اے۔ پنجابی حکومت نے کرونا وائرس نال نمبڑن لئی بروقت اقدامات کیتے۔ کرونا مریضاں لئی قائم ہسپتال وچ ڈاکٹر تے طبی عملہ دن رات ڈیوٹی سرانجام دے رہیا اے۔حکومت نے ڈاکٹرز، نرسز تے پیرا میڈیکل سٹاف دی ٹریننگ اُتے وی خصوصی توجہ دتی اے۔ عوام احتیاطی تدبیراں اُتے سختی نال عملدرآمد کرن، ہتھ بار بار دھون، کرونا وائرس دے خلاف جنگ وچ عوام نوں ہر محاذ اُتے حکومت دا ساتھ دیندے رہنا ہوئے گا۔ حکومت کرونا وائرس دے مریضاں دی سہولت دی خاطر سارے وسائل بروئے کار لیا رہی اے۔ کرونا وائرس دے خلاف جنگ وچ سارے ادارے مل کے کوشش کر رہے نیں۔ عوام توں وی ایہو توقع کیتی جاندی اے کہ اوہ اپنے لئی تے دوجیاں لئی احتیاطی تدبیراں اُتے سختی نال عملدرآمد کرن۔
شہریاں دی حد تیکر شعور اجاگر کرن دے نال نال ساڈے کول ایس سلسلے وچ نظم نسق دے اداریاں دی وی ذمہ داری رہی اے۔ لہور پولیس شہر وچ امن و امان نوں برقرار رکھن دے نال نال کرونا ایس او پیز اُتے عملدرآمد کروان لئی وی متحرک رہی۔ ڈائریکٹر جنرل رینجرز پنجاب ۔۔۔۔ دی ذاتی دلچسپی پاروں رینجرز نے پنجاب بھر وچ ضلعی انتظامیہ تے پولیس دیاں ٹیماں دے نال مل کے کرونا دے بارے جاری کردہ حکومتی ہدایات اُتے عملدرآمد کروان لئی ہر ممکن اقدام عمل وچ لیاندی رہی۔ کرونا وبا دے پیش نظر سی سی پی او لہور غلام محمود ڈوگر اور کیپٹن( ر) عثمان نہ صرف سخت گرمی تے حبس دے موسم وچ سڑکاں اُتے کھڑے ہو کے آگاہی پمفلٹ تے ماسک ونڈ دے رہے۔ بلکہ ضلعی حکومت تے محکمہ پولیس نے کرونا پھیلن توں روکن لئی سمارٹ لاک ڈائون اُتے عملدرآمد کروایا لہور پولیس نے لوکاں دیاں زندگیاں نوں محفوظ بنان لئی انتہائی حفاظتی اقدامات وی کیتے۔ ماسک دے استعمال، سماجی فاسلاں سنے دیگر کرونا ایس او پیز اُتے عمل نہ کرن والیاں دے خلاف روزانہ دی بنیاد اُتے کاروائیاں عمل وچ لیائیاں گئیاں۔ سابق سیکرٹری سپیشلائزڈ ہیلتھ عامر جان جیہڑے ہن پرنسپل سیکرٹری ٹو وزیراعلی پنجاب خدمات انجام دے رہے نیں نے کرونا وبا دے خاتمے لئی جارحانہ اقدامات کیتے سولہ سولہ گھنٹے آپ وی کم کیتا تے محکمہ صحت دے افسران توں وی کم لیا۔ عامر جان نوں ایس دا کریڈٹ نہ دتا جائے تے زیادتی ہوئے گی۔ بلاشبہ ایس جانفشانی توں انجام دتے گئےامور دے نال نال حکومت وی شہریاں توں توقعات وابستہ کرن وچ حق بجانب اے کہ شہری وی اپنی ذمہ داری دا احساس کردے ہوئے فیس ماسک، سماجی فاصلہ سنے کرونا ایس او پیز اُتے عملدرآمد نوں یقینی بناندے رہن تاکہ ایس وبا توں محفوظ رہیا جا سکے۔