تہاڈی مرضی!
ارشاد بھٹی
جیویں ایہ یقین ہو گیا کہ موجودہ ساری سیاسی قیادت دی امامت وچ اصلی جمہوریت‘ اصلی ووٹ دی عزت‘ اصلی سویلین بالادستی دی منزل پانا ناممکن‘ انج ایہ یقین وی ہو گیا کہ موجودہ ساری سیاسی قیادت ذہنی‘ اندرونی طور تے خودمختار‘ آزاد‘ مضبوط اداریاں دے حق وچ نہیں سگوں خلاف‘ اداریاں دے حوالے نال اپنی سیاسی قیادت دے قول و فعل دے تضاد تے گل کرن توں پہلاں ایہ گل کہ کیوں مینوں ایہ یقین کہ موجودہ ساری سیاسی قیادت دی امامت وچ اسیں اصلی جمہوریت‘ اصلی ووٹ‘ ووٹر دی عزت‘ اصلی سویلین بالادستی دی منزل نہیں پا سکدے۔
پہلی وجہ‘ ساریاں جماعتاں دی قیادت ذہنی طور تے جمہوری نہیں‘ اصلی جمہوریت دی ’ج‘ دا وی پتہ نہیں‘ اصلی جمہوریت اوہناں نو ںچھو کے وی نہیں گزری‘ ایہ ذہنی‘ اندرونی طور تے ڈکٹیٹرز‘ سویلین ڈکٹیٹر‘ ایہ اقتدار وچ آن تے جمہوری راہواں توں پر اقتدار وچ آ کے بادشاہ بن جان‘ ایہ سب جمہوریت دی ضد‘ ایہ جمہوریت کش‘ ایہ آئے دن جمہوریت تے حملہ آور ہون‘ ایہناں دی جمہوریت جمہور لیس‘ آڈٹ لیس‘ پرفارمنس لیس‘ ایہناں دی جمہوریت اپنی ذات شریف‘ اپنے خانداناں‘ رشتے داراں‘ لاڈلیاں‘ دوستاں لئی‘ ایہناں دی جمہوریت صرف اپنیاں نوں انڈے‘ بچے دیوے۔ دوجی گل‘ ایہ سب فوجی گملیاں وچ اگی مخلوق یاں اسٹیبلشمنٹ دیاں بیساکھیاں دی مرہون منت۔ تریجی گل‘ ایہناں جمہوریت سرے محل‘ ایون فیلڈ‘ ٹی ٹیاں‘ ڈیلاں‘ ڈھیلاں نال منہ تک بھری ہوئی۔ چوتھی گل‘ جمہوریت ایہناں دے مزاجاں وچ نہیں‘ ایہناں دے رویاں وچ نہیں‘ ایہناں دیاں پارٹیاں وچ نہیں‘ ہاں جمہوریت ایہناں دیاں تقریراں‘ بیاناں‘ بھاشناں وچ ضرور۔ پنجویں گل‘ اصلی جمہوریت دی بنیاد ہووے اصول‘ منطق تے اخلاقیات تے‘ ساری سیاسی قیادت وچ کوئی اک دس دیو جو اصول‘ منطق تے اخلاقیات تے کھڑا ہووے‘ ہن سونے تے سہاگہ‘ اُتوں ایہ مخلوق‘ تھلے عوام انج کہایوب خان‘ ضیاالحق تے فوجی آمر ایہ تے برے‘ پر ایہناں دے پیدا کردہ بھٹو‘ نوازشریف چنگے‘ پرویزمشرف تے برا پر ایہدے نال ڈیلاں کرن والے‘ ایہدیاں ڈھیلاں توں مستفید ہون والے بے نظیر بھٹو توں نوازشریف تک سارے چنگے‘ مطلب بکرے دا سر حرام پر بکرے دا دھڑ حلال ایس لئی لکھ کے رکھ لوو‘ پاکستان دی موجودہ ساری سیاسی قیادت دی امامت وچ اگلے پنجاہ ورھے وی چلدے رہن منزل تک اپڑنا ناممکن‘ منزل پانا ناممکن‘ باقی جے کسے نوں ایس جمہورلیس جمہوریت وچ کجھ ٹبراں دی غلامی کرنی اے تے ست بسم اللہ۔
ایہ وی سن دے جائو جدوں وی جمہورلیس جمہوریت تے اعتراض کیتا جاوے تے یار لوک کہن ایس جمہوریت نوں چلن دیو کیوں جے ایس جمہوریت دی بہتری ہور جمہوریت وچ‘ ایس جمہوریت نوں باکمال بناوے گی جمہوریت‘ چشم بددور‘ ایہ تے انج ای جیویں جانا لہور ہووے تے ڈرائیور پشاور لے جا رہیا ہووے‘ ڈرائیور نوں ٹوکن تے جواب ملے‘ چپ کرو ڈرائیور نوں کجھ نہ کہوو‘ ایہ سانوں لہور لے جاوے گا‘ کمال اے بھائی کمال۔ گل لمی ہو گئی‘ دوجے پاسے نکل گئی‘ گل کر رہیا سی کہ ساڈی موجودہ ساری سیاسی قیادت وچوں کوئی اک وی اجیہا نہیں جو اندروں چاہندا اے کہ ساڈے ادارے مضبوط‘ آزاد‘ خودمختار ہون‘ ساریاں نوں اوہ ادارے چاہیدے نیں جو اوہناں لئی فائدہ مند ہون‘ اوہ ادارے چاہیدے نیں جہناں دے سربراہ اوہناں دے غلام بن کے رہن‘ اوہناں دی منن‘ جے تہانوں میری گل تے یقین نہیں آ رہیا تے کجھ مثالاں حاضر خدمت‘ اسیں عدلیہ‘ نیب‘ ایف آئی اے‘ الیکشن کمیشن صرف چار اداریاں دی گل کر لینے آں‘ پہلے عدلیہ‘ ایتھے پوری عدلیہ دی گل نہیں کردے‘ گل لمی ہو جاوے گی۔ صرف سپریم کورٹ دی گل کر لینے آں‘ ہن جے سپریم کورٹ دے چیف جسٹس سجادعلی شاہ ہون تے مسلم لیگ عملی طور تے سپریم کورٹ تے حملہ آور ہو جاوے پر سپریم کورٹ دے چیف جسٹس افتخار چوہدری ہون تے مسلم لیگ سپریم کورٹ دے حق وچ تحریک چلاوے‘ جے سپریم کورٹ دے چیف جسٹس سجادعلی شاہ ہون تے پی پی سپریم کورٹ دے نال تے جے سپریم کورٹ دے چیف جسٹس افتخار چوہدری ہون تے پی پی نوں سپریم کورٹ‘ عدلیہ بحالی تحریک نال کوئی غرض نہیں۔ جے سپریم کورٹ دے چیف جسٹس افتخار چوہدری ہون تے عمران خان دی روز سپریم کورٹ تے چڑھائیاں‘ پر سپریم کورٹ دے چیف جسٹس ثاقب نثار ہون تے عمران خان سپریم کورٹ دے گن گان‘ دوجے پاسے سپریم کورٹ دے چیف جسٹس ثاقب نثار ہون تے مسلم لیگ دی نظر وچ سپریم کورٹ ڈکٹیٹر‘ ججز بغض و عناد نال بھرے ہوئے‘ نوازشریف تے ثاقب نثار دی سپریم کورٹ دے مقابلے وچ اپنیاں عدالتاں لا لین تے وی درجناں مثالاں پر گل اگے ودھاندے ہوئے ہن نیب دی گل کر لینے آں۔
نیب دے چیئرمین ایڈمرل سروہی ہون تے پی پی لئی نیب کمال دا‘ قمرالزمان چوہدری چیئرمین نیب ہون تے پی پی‘ مسلم لیگ دوہاں لئی نیب چنگا‘ پر ایہناں دوہاں چیئرمیناں دے ہوندے ہوئے عمران خان لئی نیب برا‘ ہر برائی دا گڑھ‘ پر نیب دے چیئرمین جسٹس جاویداقبال ہون جہناں نوں پی پی مسلم لیگ رَل کے لیائے اوہناں دے چیئرمین بنن دے کجھ عرصہ بعد پی پی‘ مسلم لیگ لئی نیب کالے کرتوتاں والا ہو جاوے‘ پولیٹیکل انجینئرنگ کرن والا ہو جاوے‘ ڈکٹیٹر دا بنایا ہویا جمہوریت کش ادارہ ہو جاوے‘ پر جسٹس جاویداقبال دا نیب اچانک عمران خان نوں چنگا لگن لگ جاوے‘ ایف آئی اے دی گل کر لوو‘ بشیرمیمن ایف آئی اے دے ڈی جی ہون تے اچانک ایف آئی اے عمران خان لئی برا ہو جاوے‘ ایناں برا کہ ریٹائرمنٹ توں کجھ دیہاڑ پہلاں جبری ریٹائر کرن دے بعد عمران حکومت بشیرمیمن دی پنشن بند کر دیوے‘ پر اپوزیشن بشیرمیمن نال کھڑی نظر آوے‘ دوجے پاسے واجدضیا ایف آئی اے دے سربراہ بن جان تے اپوزیشن لئی ایف آئی اے برا جد کہ واجد ضیا دا ایف آئی اے تحریک انصاف لئی چنگا۔
ایتھے میں الیکشن کمیشن دی صرف اک مثال دیاں گا‘ سردار رضا نوں لیان والی اپوزیشن لئی سردار رضا دا الیکشن میشن برا ہو جاوے جد کہ تحریک انصاف لئی چنگا‘ راجہ سکندر سلطان نوں لیان والی تحریک انصاف لئی راجہ سکندر سلطان دا الیکشن کمیشن براہو جاوے پر اپوزیشن لئی چنگا‘ ایہ کجھ مثالاں‘ جیویں پہلے کہیا اجہیاں درجنوں نہیں‘ بیسیوں مثالاں ہور وی‘ پر مینوں امید اوہناں کجھ مثالاں توں تہانوں ایناں پتہ تے چل گیا ہووے گا کہ ساڈی سیاسی قیادت دی نظر وچ اداریاں دی مضبوطی ایہ کہ ادارہ اوہناں لئی فائدہ مند ہووے‘ ادارے دا سربراہ اوہناں دا اپنا بندہ ہووے‘ ساریاں دی ترجیح ادارے‘ ادارے دے سربراہ ساڈے تابع ہون‘ ساڈے فرمانبردار ہون‘ بس ساڈی سنو‘ ساڈیاں گلاں‘ باقی دوستو جے سویلین ڈکٹیٹر ای تہاڈی جمہوریت دے امام‘ جے جمہورلیس جمہوریت تہانوں قبول‘ جے ڈرامے باز جمہوراں دے ٹوپی ڈرامے تہاڈی جمہوریت دا حسن‘ جے ملک و قوم‘ اداریاں نوں بدحال کر چکے جمہوری ڈرائیوراں دی پشاور جاندی بس وچ بہہ کے تسیں لہور جانا چاہندے او تے تہاڈی مرضی اے۔٭٭
