طیبہ والیا گل تیرے اتے مکنی اے۔۔۔
حکمران اپنی عوام اُتے گولی چلان دا آرڈر انج دے رہے سن جویں کسے وڈے دشمن دی فوج لئی دتا جاندا اے
چودھری عبدالغفور خان
حضرت علی ؓ دا فرمان اے کہ بداخلاقی تے بدزبانی کم نوں انج خراب کردے نیں جویں سرکہ شہد نوں۔ اُنج انسان دا جسم اک دکان وانگر اے تے زبان ایس دا تالا اے جدوں تالا کھلدا اے تے پتہ چلدا اے کہ دوکان سونے دی اے یا کوئلے دی۔ آقا کریم ؐ دا فرمان اے کہ ’’جیہڑے لوک حسن اخلاق تے دھیمے لہجے وچ گل کردے نیں ایہناں اُتے جہنم دی اگ حرام اے تے ایہناں دا جسم جہنم دی اگ اُتے حرام اے ‘‘(ترمذی)۔ ایسے لئی حسن نماز حسن روزہ حسن زکوٰۃ یا حسن حج نہیں کہیا گیا بلکہ حسن اخلاق کہیا گیا اے۔ اسلام سانوں عفودرگزر دا حکم دیندا اے۔ معاف کرنا اللہ دی اوہ صفت اے جو مالک کائنات نے اپنے بندے نوں عطا کیتی اے۔ حضرت علی ؓ نے فرمایا کہ ایس بندے توں نہ ڈرو جیہڑا بدلہ لینا جان دا ہوئے بلکہ ایس توں ڈرو جیہڑا اپنے معاملات اللہ اُتے چھڈ دیوے تے جدوں جناب علی ؓ اُتے اک بدبخت نے زہر وچ بجھے ہوئے خنجر نال حملہ کیتا تے آپ لئی دُدھ تے شہد لیایا گیا پر جدوں آپ نے اپنے قاتل ول ویکھیا تے ایس دا رنگ پیلا پئے گیا سی تے اوہ گھبرایا ہویا سی آپ نے حکم دتا کہ اوہ دودھ تے شہد ایہنوں پلایا جائے۔
بحیثیت مسلمان اج اسیں کتھے کھڑے آں اخلاقی پستیاں نوں چھُو چکے آں اپنے ذاتی مفادات لئی اسیں کوئی وی حد کراس کرن لئی ہمہ وقت کمربستہ ہونے آں۔ نہ کدی انجام دی پرواہ کیتی اے نہ مالک کائنات دا ڈر اے نہ محبوب خدا دی ناراضگی دا ڈر اے۔ لگدا اے جویں آب حیات پی رکھیا اے۔ کجھ دن دے اقتدار لئی اپنے بھراواں دا خون بہانا جویں تماشہ بن گیا اے۔ حکمران اپنی عوام اُتے گولی چلان دا آرڈر انج دے رہے سن جویں کسے وڈے دشمن دی فوج لئی دتا جاندا اے۔ میں بوہت سارے وڈے لوکاں نوں بے نقاب ہوندے ویکھیا اے۔ وزیر داخلہ طاقت دے نشے وچ اینے گم ہو گئے کہ کہندے نیں کہ میں بحیثیت وزیر داخلہ پنجاب نوں رینجرز دے حوالے کر رہیا واں۔ جویں کراچی رینجرز دے حوالے کیتا سی۔ وزیر صاحب کراچی وچ تے دہشت گرد سن جتھے انسانی جسم دے اعضاء کٹے جاندے سن۔ سر کٹ کے اسکوٹر اُتے سجائے جاندے سن بوری بند لاشاں ملدیاں سن اپنے پرائے سب دی ٹارگٹ کلنگ ہوندی سی۔ تسیں میرے آقا کریم ؐ دا نعرہ لان والیاں نوں دہشت گرد سمجھ لیا ذرا غور کرو عہد شکن کون اے؟ تہانوں خیال نہیں آیا کہ سانحہ ماڈل ٹائون والیاں نوں اللہ کریم نے نشان عبرت بنا دتا۔ مینوں سانحہ ماڈل ٹائون تے سانحہ یتیم خانہ وچ فرق نظر نہیں آندا۔ میں ایہہ سمجھن توں قاصر واں کہ لبیک یا رسول اللہ ؐ شریک اقتدار کجھ لوکاں دی چھیڑ کیوں بن گئی اے۔ نہ اللہ توں ڈردے او نہ عدالتاں دے فیصلے من دے او کرنا کیہ چاہندے او؟ اللہ دا شکر اے کہ وزیراعظم نے عزت والے لوکاں دی کمیٹی بنائی۔ بلا شک و شبہ کمیٹی وچ شامل تن معتبر لوک جنا ب شاہ محمود قریشی میرے آقا دی آل تے اولاد جناب علی محمد خان میرے آقا کریم ؐ دے غلام تے جناب اسد قیصر صاحب بحیثیت سپیکر تے ذاتی حیثیت وچ پاک مٹی دے بنے ہوئے نیں۔ خوف خدا تے عشق رسول ؐ نال سرشار بندے سن جنہاں نے اپنا بہترین رول ادا کر کے پاکستان نوں اک وڈے حادثے توں بچا لیا۔ میرے آقا کریم ؐ دا فرمان عالیشان اے کہ ’’کوئی عزت والا ای کسے عزت والے نوں عزت دے سکدا اے ‘‘۔ 23 لکھ ووٹ لین والیاں نوں دہشت گرد ثابت کرن اُتے تلے ہوئے او کجھ تے خدا دا خوف کرو تہانوں اندازہ نہیں ویلا آن اُتے مینوں لگدا اے ہر گلی محلے توں لبیک یا رسول اللہ ؐ دی اواز آئے گی۔ جس دا کوئی نہ ہوئے اوہدا خدا ہوندا اے۔
ساڈی مذہبی جماعتاں تے ایہناں دے وڈے وڈے لیڈران جیہڑے ہر ویلے میرے ملک اُتے کسے نہ کسے طرح قابض ہون دی پلاننگ کردے رہندے نیں مینوں اوہ کدھرے نظر نہیں آئے۔ وزیراعظم دے دوست مذہبی سکالر وی نہیں بولے۔ وڈا نقصان ہون دے بعد ساڈے درود سلام پڑھن والے اکابرین نے بلدی ہوئی اگ نوں بھڑکن توں پہلے بجھا دتا میں ایہناں نوں صرف ایہو کہواں گاکہ ’’ بڑی دیر کی مہرباں آتے آتے ‘‘۔ اللہ دا کرم اے کہ اک وڈا سانحہ ہون توں پہلے وزیراعظم نے اکھاں کھول لئیاں نیں ایس وچ صدر پاکستان دے رول نوں کسے صورت نظر انداز نہیں کیتا جا سکدا۔ جے میں ایتھے اپنے معتبر تے معزز اداریاں دے رول دا ذکر نہ کراں تے ناانصافی ہوئے گی جنہاں دے اشارہ ابرو نے ایس بلدی ہوئی اگ نوں بجھان لئی اپنا فیصلہ صادر کیتا۔ خدا لئی پاکستان نوں زندہ رہن دیو ایس نوں دنیا وچ تماشہ نہ بنائو ایہہ واحد حکومت اے جیہڑی آپ ایشو بناندی اے ہر ویلے کہندی اے آ بیل مجھے مار۔
ایہہ ملک میرے آقا کریم ؐ دے ایجنڈے اُتے بنیا اے۔ میرے آقا کریم ؐ دے دیوانیاں نے پاکستان دی بنیاداں وچ اپنا خون بھریا اے میرا مشورہ اے کہ جنہا زور لبیک یا رسول اللہ ؐ والیاں نوں دہشت گرد ثابت کرن وچ لگیا اینا زور پاکستانی قوم دی بے بسی نوں دور کرن اُتے لائو۔ کرپشن، بدعنوانی، نااہلی نوں ختم کرو مہنگائی نال مردے لوک چیخ رہے نیں پر افسوس کہ انڈر ٹریننگ ٹیم ہر دن بربادی دی نویں کہانی لکھدی اے۔ پاکستان دا نقصان ہو رہیا اے۔ لوک سابقہ حکمراناں دی غلطیاں بھُل رہے نیں۔ تہاڈی نااہلیاں دا سب توں زیادہ فائدہ سابقہ حکمراناں نوں مل رہیا اے۔ دنیا دا اقتدار عارضی اے اک دن سب کجھ ختم ہونا اے۔ یقین جانو اللہ دی قسم محشر وچ میرے آقا کریم ؐ دی نسبت ای نجات دا ذریعہ اے ایس لئی مینوں کہن دیو کہ:
طیبہ والیا گل تیرے اُتے مکنی اے
نبیاں وی آنا اوتھے ولیاں وی آناں اے
ساری خدائی تیرے بوہے اُتے ڈُھکنی اے
