چھیڑخانیاں!
ابرار ندیم
میں جدوں وی کسے پسوڑی وچ پینا واں اللہ جانے شاطر نوں کیویں خبر ہو جاندی اے تے اوہ کسے غیبی دشمن وانگوں میری مشکل نوں ہور ودھان لئی اچانک کدھروں نہ کدھروں آ جاندا اے۔ شاطر کہن دی حد تک تے میرا دوست اے پر حرام اے جو اج تک اوہنے کسے مشکل وچ میرے نال دوستی نبھائی ہووے۔ ایہ ظالم اجیہا شیطان اے سگوں اجیہا ظالم شیطان اے کہ اصلی شیطان وی ایہدے توں پناہ منگدا ہووے گا۔ پچھلے اک گھنٹے توں مینوں مسلسل ایہ پریشانی لگی ہوئی سی کہ میں اگلے ڈیڑھ دو گھنٹیاں وچ اپنا کالم مکمل کرکے ایہنوں اخبار نوں ای میل کرنا سی پر میرے خیال دا گھوڑا سوچ دے مسلسل تازیانے کھا کے وی کسے اڑیل ٹٹو وانگوں اپنی تھاں توں ٹس توں مس نہیں سی ہو رہیا۔ ہفتے وچ چھ دن ایدھر اودھر دی مصروفیت تے سوشل میڈیا تے دلچسپی دوران میرے ذہن وچ کالم لئی اجہے اجہے رنگ برنگے‘ مزیدار‘ اچھوتے تے زبردست خیال آئوندے نیں کہ رہے رب دا ناں‘ پر پتہ نہیں ایہدے وچ کیہ بھید اے کہ میں جدوں وی کالم لکھن بیٹھنا واں ہفتے بھر ذہن وچ گھڑمس مچان والے ایہ نیلے پیلے تے کٹھے مٹھے قسم دے سارے موضوعات اک دم ذہن چوں انج غایب ہو جاندے نیں جیویں کھوتے دے سر توں سِنگھ۔ ایہدے بعد کافی دیر تک اپنے دماغ چوں کوئی زور زبردستی یاں ترلامنت کرکے اج وانگوں ای کالم لئی کسے گھسے پٹے موضوع دا انتخاب کرن وچ اوکھے سوکھے کامیاب ہو وی جاواں تے کالم لکھدے ہوئے شادی والے گھر وچ سلامی دین دے موقعے تے اچانک ناراض ہو جان والے کسے رپھڑی قسم دے رشتے دار وانگوں لفظ اپنا وکھرا سیاپا پا کے منہ دوجے پاسے پھیر کے بہہ جاندے نیں۔
اجہے کڑے وقت وچ اکثر اپنی بے بسی نوں محسوس کر کے میں ہمیشہ ایہ سوچنا واں کہ پتا نہیں اوہ کہڑے وڈے کالم نگار نیں جو کسے وی موضوع تے لکھن یاں بولن دا ارادہ کردے نیں تے خیال تے لفظ اوہناں دے سامنے غلاماں وانگوں ہتھ بنھ کے اک قطار وچ کھلو جاندے نیں۔ دوجے پاسے اک میرے ورگا نمانا کالم نگار اے کہ جدوں وی کجھ لکھن دا ارادہ کرنا واں تے لگدا اے جیویں سوچ نوں دندل پین دے نال خیالاں وچ اک بھگدڑ جہی مچ گئی اے۔ لفظ میرے سامنے ایس طرح ہتھ جوڑ کے کھلو جاندے نیں جیویں میرا ارادہ ایہناں لفظاں نوں اپنے کالماں وچ بنا سنوار کے ورتن دا نہیں سگوں ایہناں نوں الٹا لمکا کے اوہناں دی کھل لاہن دا ہوندا اے۔ بھاویں اج مینوں کالم نگاری دے ایس دشت دی سیاحی کردے چنگا بھلا عرصہ ہو گیا اے پر اج وی جدوں میں کالم لکھن بیٹھنا واں تے دماغ دیاں چولاں ہل جاندیاں نیں جہدے توں کئی کئی دن تک میری سوچ وچ کھلیاں پئیاں رہندیاں نیں۔ اوس ویلے دل چوں اک آہ نکلن دے نال ذہن وچ ایہ سوال وی آئوندا اے کہ اللہ جانے اوہ وقت کدوں آوے گا جدوں اپنے سر تے وی اک وڈے کالم نگار دا سہرا سجے گا تے فیر کالم لکھدے ہوئے اپنے سامنے وی لفظ تے خیال ہتھ بنھ کے کھلوتے ہون گے۔
وڈی عمر وچ دوجے ویاہ دی حسرت ورگی ایہ رنگین خواہش اپنی تھاں پر ایس ویلے صورتحال ایہہ سی کہ کالم لکھن لئی میں کسے نیب زدہ سیاسی یاں غیر سیاسی ملزم ورگی شکل بنائے لفظاں دے اگے ہتھ جوڑے کھلوتا سی۔ ممکن سی کجھ دیر وچ ساڈے درمیان صلاح سوتر دی کوئی صورت نکل آئوندی کہ ایسے دوران میرے کمرے دا بوہا کھلیا تے شاطر اک دم میرے سامنے آن کھلوتا۔ ایس توں پہلاں کہ میں اوہدی اچانک آمد تے اوہدا ترلا منت کر کے اپنا کالم مکمل کرن دی غرض نال اوہنوں کجھ دیر لئی کمرے چوں باہر جان لئی کہندا۔ اوہنے مینوں کجھ کہن سنن دا موقع دتے بناں ڈرامائی انداز وچ ساڑی ماردے ہوئے کہیا من گئے استاد تہاڈی کاریگری نوں تسیںتے یاراں دے وی استاد نکلے۔ میں تے ہن تک ایہو سمجھ رہیا سی کہ وکھووکھ اخباراں وچ مفتومفت سگوں پلے توںپیسے دے کے لکھن والے چھوٹے موٹے شوقیہ مضمون نگاراں وانگوں تسیں وی ساڈے ورگے دوستاںتے عزیزاں تے اپنی دانشوری دا رعب پان لئی سال چھ مہینے وچ اپنا کالم نگاری دا شوق پورا کرکے سکون نال محلے وچ اپنی پرچون دی دکان چلائو گے پر ایہ جو تسیں پچھلے کجھ عرصے توں اپنے علامتی تے تمثیلاتی قسم دے کالماں وچ کھوتیاں تے الوئواں دے استعاریاں تے اشارے کنائیاں وچ کجھ کھوتیاں تے الوئواں نال چھیڑخانیاں دا سلسلہ شروع کر رکھیا اے تے بس ایہناں نوں پڑھ کے مینوں یقین ہو گیا اے کہ مستقبل وچ تہاڈی پرچون دی دکان چلے نہ چلے تہاڈی کالم نگاری دی ایہ دکان ضرور چلے گی۔ شاطر دے منہ چوں اپنے واسطے توصیفی کلمات سن کے میں اوہنوں کہیا طنز کر رہیا ایں؟ ایہدے تے اوہ تھوڑا خفا ہو کے کہن لگا یار میں ایویں ای تیرے تے طنز کیوں کراں گا جد کہ تینوں چنگی طرح پتہ اے میرے دل وچ جو کجھ ہوندا اے میں اوہنوں کسے لگی لپٹی دے بناں کسے وی بندے دے منہ تے دے مارنا واں۔ میں سچ مچ تیرے کالماں دی تعریف کر رہیا واں بس مینوں اک گل دا ڈر اے کہ حق تے سچ دی ایس راہ تے چلدے ہوئے تینوں واہوا مشکلات دا سامنا کرنا پے سکدا اے۔ بس توں اک گل دا خیال رکھنا کہ سچائی دی ایس راہ تے چلدے ہوئے کجھ قوتاں ولوں تہاڈے تے جس قسم دا وی دبائو پان یاں تینوں ڈران دی کوشش کیتی جاوے توں کسے صورت پچھے نہیں ہٹنا پر جے کوئی پارٹی چنگی قیمت تے تیری خدمات خریدن دی پیش کش کرے تے اوس سنہری موقعے نوں ضائع نہ کرنا۔ ایس سلسلے وچ جے تیری قسمت نے یاوری کیتی تے تسیں کجھ مہرباناں دے ریڈار دے آ گئے تے مینوں امید اے میڈیا منڈی وچ کجھ دیہاڑی دار طائر لاہوتیاں نوں ملیاں مخصوص سہولتاں وانگوں تیرے لئی وی ریڈی میڈ کالماں دے نال من و سلوی دا بندوبست ہو جاوے گا۔ ٭٭
