جسمانی و حربی صلاحیتاں دے تیجے بین الاقوامی پیسز مقابلے

حافظ محمد عمران

افواجِ پاکستان دا شمار بلاشبہ دنیا دی بہترین فوجاں وچ کیتا جاندا اے۔ جسمانی، ذہنی تے تکنیکی ہر سطح اُتے افواج پاکستان دنیا دے ترقی یافتہ ملکاں دی فوج توں کسے طور گھٹ نہیں۔ ایس دا محرک ساڈے فوجی جواناں دی سخت گیر تربیت اے۔ کسے وی سپاہی دی عسکری زندگی اوس مسلسل تربیت نال عبارت اے جس نال اوہ اپنے پیشہ وارانہ ددور وچ لنگھدا اے۔ ایس تربیتی سلسلے وچ پاک فوج دے عسکریتی ادارے انج دی مشقاں دا اہتمام کردے نیں جنہاں دی بدولت فوجی جوان ہر طرح دے موسماں تے ہر طرح دے حالات وچ اپنے اہداف حاصل کرن دے قابل ہو جاندے نیں۔ پیسز (Paces) (فزیکل ایجیلیٹی اینڈ کامبیٹ ایفیشنسی سسٹم) دا تصور وی انج دی تربیتی مشقاں دی اک کڑی اے۔ 2011 وچ اوس ویلے دے چیف آف آرمی سٹاف جنر اشفاق پرویز کیانی نے پیسز (Paces) دا تصور پیش کیتا جس دا مقصد فوجی جواناں نوں جسمانی طور تے ایس قدر مضبوط بنانا سی کہ اوہ مخصوص حالات تے محدود ذرائع وچ اپنی جسمانی صلاحیتاں دی بدولت اہداف دے حصول نوں یقینی بنا سکن۔ پاک فوج دی سطح اُتے پیسز (Paces) مقابلیاں دا انعقاد تسلسل نال کیتا جاندا اے۔ اقوام عالم دی فوج نوں ایس تصور نال متعارف کروان لئی بین الاقوامی پیسز (Paces) مقابلیاں دا آغاز دو ہزار سولہ وچ کیتا گیا۔
ایسے سلسلے وچ تیجے بین الاقوامی پیسز مقابلے یکم توں ست نومبر دو ہزار 21 تیکر منعقد کیتے جا رہے نیں۔ ایس سلسلے وچ فوٹریس سٹیڈیم لہور وچ رنگا رنگ افتتاحی تقریب دا انعقاد ہویا ۔ لیفٹیننٹ جنرل سید محمد عدنان ایس موقعے اُتے مہمان خصوصی سن۔ 11 ملکاں دے فوجی دستے تے پاک فوج دے ارکان ایہناں مقابلیاں وچ پہلی پنج پوزیشناں حاصل کرن والی ٹیم دے فوجی جوان تیجے انٹرنیشنل پیسز کمپیٹیشنز 2021ء وچ اپنی جسمانی مستعدی تے مہارتاں دا مظاہرہ کرن گے۔ پاک فوج دی پنج رجمنٹل ٹیماں وی ایہناں مقابلہ جات دا حصہ ہون گیاں۔ مقابلیاں وچ شرکت کرن والے 11 ملکاں وچ عراق‘ اردن‘ نائیجیریا‘ فلسطین‘ ازبکستان‘ سری لنکا تے متحدہ عرب امارات دے فوجی دستے مختلف مقابلیاں وچ شرکت کرن گے جد کہ مصر‘ امریکہ‘ میانمار تے انڈونیشیا دے فوجی دستے بطور مشاہدہ کار (Observers) تیجے انٹرنیشنل پیسز کمپیٹیشنز وچ شریک ہون گے۔
پاک فوج ہن تیکر دو بین الاقوامی پیسز کمپٹینشز دا انعقاد کر چکی اے۔ ایس سلسلے وچ پہلے ایڈیشن دے مقابلے 18 توں 24 اکتوبر 2016 نوں منعقد کیتے گئے سن۔ ایہناں مقابلیاں وچ 17 ملک تے پاکستان دے نو فوجی دستیاں نے شرکت کیتی۔ افتتاحی پیسز مقابلیاں وچ پاک فوج دی سروسز کور نے پہلی تے عوامی جمہوریہ چین تے سری لنکا دے فوجی دستیاں نے بالترتیب دوجی تے تیجی پوزیشن حاصل کیتی۔
دوجے بین الاقوامی پیسز کمپٹیشنز دا انعقاد اٹھ توں چودہ اکتوبر 2018 نوں کیتا گیا ایہناں مقابلیاں وچ 23 مہمان ملکاں دے فوجی دستیاں نے شرکت کیتی جد کہ پاک فوج دی سولہ ٹیماں دے جواناں نے جسمانی مہارتاں دا مظاہرہ کیتا۔ ایہناں مقابلیاں وچ بین الاقوامی سطح اُتے عوامی جمہوریہ چین تے مقامی سطح اُتے پاک فوج دی انجینئرنگ کور نے فتح سمیٹی۔
پیسز (فزیکل ایجیلیٹی اینڈ کامبیٹ ایفیشنسی سسٹم) دے تصور دی تعبیر لئی 2011ء وچ پیسز سیل دا قیام عمل وچ لیایا گیا سی جس دا مقصد انج دی تربیتاں تے مشقاں دا اہتمام سی جنہاں دے ذریعے فوجی جواناں دی جسمانی تے ذہنی مستعدی نوں یقینی بنانا تے جواناں دی انج دی استعداد کار وچ وادھا کرنا سی جس وچ ایہناں نوں گولہ بارود تے تکنیکی معاونتاں دے بغیر اہداف حاصل کرنے ہوندے نیں۔
دیگر بوہت سارے مقابلیاں دے نال نال پیسز (Paces) کمپیٹیشنز وچ پل اپس‘ سٹ اپس تے دوڑ دے مقابلے شامل نیں۔
ایہناں مقابلیاں وچ فوجی جوان خالصتاً اپنی جسمانی فٹنس تے سٹیمنا دا مظاہرہ کردے نیں۔ فوجی جواناں دی جسمانی مہارت تے طاقت ایہناں دے تندرست و توانا ہون دا ثبوت اے۔فورکور دے سپاہی محمد رضوان نے 2294سٹ اپس‘ انجینئرنگ کور سبیپر شوکت علی نے 1859 پش اپس تے آرٹلری سنٹر دے نائیک محمد بلال نے 351 پل اپس دے نال دوجے بین الاقوامی پیسز مقابلہ جات وچ نویں ریکارڈ قائم کیتے۔
کامبیٹ ایفیشنسی ٹیسٹ جسمانی مستعدی‘ ذہنی استعداد تے فوجی مہارتاں دا مجموعہ اے۔ ایس مقابلے وچ شریک بندیاں نوں محدود ذرائع دے نال تن تنہا اپنا ہدف حاصل کرنا ہوندا اے۔ اوہ مختلف رکاوٹاں نوں عبور کردے ہوئے مختلف ذیلی اہداف حاصل کردا اے تے آخر وچ مطلوبہ نتیجے دا حصول ایس دی جِت دا ضامن ہوند ااے۔ 2018 وچ ہون والے دوجے بین الاقوامی پیسز مقابلہ جات وچ عبدالغفور نے محض 46.72 سیکنڈز وچ کامبیٹ ایفیشنسی ٹیسٹ مکمل کرکے نواں ریکارڈ قائم کیتا۔
پاک فوج اپنی کرشماتی دفاعی طاقت تے ناقابل شکست پیشہ ورانہ صلاحیتاں دے حوالے نال اپنی وکھری پہچان رکھدی اے۔ سانوں قدرتی آفات دا ساہمنا ہوئے یا سرحداں اُتے دشمناں دا مقابلہ، پاک فوج ہر محاذ اُتے ناقابل شکست تے کامیاب و کامران نظر آندی اے۔ ایہہ ناقابل تسخیر عزم تے بے مثال صلاحیت ایہناں مستقل مشقاں دی مسلسل تربیت دا نتیجہ اے جس نال ہر جوان اپنی پیشہ وارانہ زندگی دے دوران لنگھدا اے۔ پیسز دا تصور اکیسویں صدی دے ایس سائنسی ماحول وچ جسمانی استعداد تے ذہنی مہارتاں دے اہمیت دا آئینہ دار اے۔
اقوام عالم وچ قوماں نوں حاصل آزادی دی لمبی داستان اے پر ایہہ طے اے کہ آزادی بھیک نال ملن والی شے ہر گز نہیں۔ دنیا دی تاریخ وچ قوماں نے آزادی حاصل کرن لئی بڑیاں قربانیاں دتیاں نیں۔ آزادی بوہت وڈی نعمت اے۔ قوماں نوں ایس لئی لمبی تے صبر آزما جدوجہد توں لنگھنا پیندا اے۔ فیر ایس آزادی تے ایس دی سالمیت نوں برقرار رکھنا وی من حیث القوم اجتماعی ذمہ داری اے جس لئی دوجے شعبہ ہائے زندگی دے نال نال ملکی فوج اپنی دھرتی نوں بیرونی خطرات توں محفوظ رکھن لئی شبانہ روز مستعدد تے تیار رہندی اے۔
افواج پاکستان دا طرہ امتیاز ایہہ وے کہ اوہناں نے قیام پاکستان توں ہن تیکر وطن عزیز نوں نہ صرف سرحداں اُتے بلکہ اندرون سرحد بیرونی سازشاں توں وی ایہنوں محفوظ رکھیا اے۔ پاکستان دشمناں توں گھریا ہویا اے۔ پاکستان دی فوج نوں بیک وقت اندرونی و بیرونی دشمناں دا ساہمنا اے۔ بیرونی دشمناں توں سب واقف ہوندے نیں پر بسااوقات اندرونی دشمن بیرونی دشمن توں زیادہ خطرناک ثابت ہوندا اے پر افواج پاکستان نے ہمیشہ دونواں دشمناں دا مقابلہ کیتا۔ آزادی جے جسم اے تے اندرونی امن و سلامتی ایس دی روح ہوندی اے۔ سیلاباں وچ مدد ہوئے یا زلزلیاں وچ خدمت ، موسماں دی شدت ہوئے یا امن عامہ متعلق ایہناں مسائل دے تدارک وچ ، افواج پاکستان ہر میدان وچ قوم دے نال کھڑی نظر آندی اے۔
افواج پاکستان نوں کھیڈاں وچ وی ہمیشہ نمایاں مقام حاصل رہیا اے۔ افواج پاکستان نال تعلق رکھن والے کئی کھلاڑی قومی و بین الاقوامی سطح اُتے بہترین کھیڈ دا مظاہرہ کر چکے نیں۔ فوج وچ چنگے کھلاڑی نوں قدر دی نگاہ نال ویکھیا جاندا اے۔ پاکستان دے کئی کامیاب منتظمین دا تعلق وی افواج پاکستان نال اے۔ قومی کھیڈ ہاکی وچ کئی نامور کھلاڑیاں تے ایڈمنسٹریٹرز دا تعلق افواج پاکستان نال رہیا اے۔ پیسز جہے مقابلیاں دے انعقاد نال نہ صرف افواج پاکستان وچ فٹنس تے مہارت دے نویں دور دا آغاز ہویا اے بلکہ ایس دے نال نال بین الاقوامی سطح اُتے وی ساڈے فوجی جواناں نے اپنی صلاحیتاں دا لوہا منوایا اے۔ ایہناں مقابلیاں دے مسلسل انعقاد نال دنیا دے اہم ملکاں دی فوج دے وچکار تعلقات مضبوط ہون وچ مدد ملی اے جد کہ دیگر ملکاں دی فوجی صلاحیتاں نوں جانچن تے ایہناں دے کم کرن تے انداز نوں پرکھن دا موقع وی ملدا اے۔ انج دے مقابلیاں دا انعقاد شرکا وچ نواں جوش و جذبہ پیدا کردے ہوئے صلاحیتاں نوں نکھارن وچ اہم کردار ادا کردا اے۔
فوج نہ صرف ملکی سرحداں دی محافظ اے بلکہ اوہ اندرونی دشمناں دا مقابلہ کردے ہوئے وی کامیابیاں حاصل کر رہی اے۔ دنیا دہشت گردی دے خلاف جنگ وچ افواج پاکستان دی خدمات دا اعتراف کردی اے۔ پچھلی دہائی وچ ملک نوں دہشت گردی توں پاک کرن لئی فوجیاں نے قیمتی جاناں دا نذرانہ پیش کیتا اے۔ اج ملک وچ امن بحال اے تے ایس دا کریڈٹ افواج پاکستان نوں جاندا اے۔ اج اسیں آزادانہ گھوم پھر رہے آں۔ دہشت گرداں دا خوف ختم ہو رہیا اے۔ بم دھماکیاں توں جان چھُٹی اے کھیڈ دے ویران میدان آباد ہوئے نیں، دنیا دا پاکستان اُتے اعتماد بحال ہویا اے تے ایس بحالی وچ شہداء دا خون شامل اے۔ فوجی جواناں نے اپنا خون دے کے ساڈے لئی امن نوں بحال کیتا اے۔ ساڈی خوشیاں لئی اوہناں نے اپنی قیمتی جاناں دا نذرانہ پیش کیتا اے۔ حتیٰ کہ پاکستان سپر لیگ مقابلیاں دی اپنے میداناں اُتے واپسی وچ وی افواج پاکستان نے اہم کردار ادا کیتا سی۔
ہر مشکل ویلے وچ فوج ملک و قوم دی خدمت وچ سب توں پہلے تے سب توں نمایاں نظر آندی اے حتیٰ کہ کرونا نال نمبڑن لئی وی افواج پاکستان دی خدمات حاصل کیتیاں گئیاں۔ جدوں کدی قوم نوں لوڑ محسوس ہوندی اے فوج اگلی صفاں وچ نظر آندی اے۔ کرونا دے دناں وچ افواج پاکستان نوں بلان دا مقصد وی ایہو سی کہ ایس خطرے توں بچیا جا سکے۔ احتیاطی تدبیراں اُتے عمل نہ کرن والیاں نوں قانون نافذ کرن والے اداریاں دے ذریعے قابو کیتا جائے، حفاظتی تدبیراں اُتے عمل لئی سختی کیتی جائے۔ ایس اہم کم لئی افواج پاکستان دی خدمات حاصل کرن دی وجہ ایہہ سی کہ عوامی سطح اُتے افواج پاکستان نوں عزت تے قدر دی نگاہ نال ویکھیا جاند اے۔ فوج دی موجودگی ایہہ دسدی اے کہ عوام فوجی جواناں نوں ویکھ کے قانون اُتے عمل کرن دی کوشش کردے نیں عموماً تاثر ایہو اے فوج وچ قانون اُتے عمل ہوندا اے، افسران تے جوان قانون اُتے عمل کردے ہوئے مسلسل ایس ماحول وچ رہندے نیں جتھے ایہہ عمل ایہناں دی زندگی دا حصہ بن چکیا ہوندا اے۔ حالات کجھ وی ہو جان افواج پاکستان نوں جیہڑا ہدف دتا جاندا اے اوہ دستیاب وسائل وچ رہندے ہوئے ایہنوں حاصل کرن دی کوشش کردے نیں ۔ فوج دی موجودگی وچ لوکاں نوں ایہہ احساس ہوندا اے کہ ہن کسے دے نال کوئی رعایت نہیں ہوئے گی جیہڑا قانون اُتے عملدرآمد نہیں کرے گا اوہ سزا دا مستحق ہوئے گا۔
فوج ہر سطح اُتے ملک دشمناں دے خلاف کم کردی اے۔ عوام دا فوج اُتے اعتماد ایہہ ظاہر کردا اے کہ قوم نے اپنی فوج دے خلاف ہون والے ہر پروپیگنڈا نوں ہمیشہ مسترد کیتا اے فوج ملک و قوم نوں بڑی مشکل توں بچان لئی میدان عمل وچ اے۔ ساری سیاسی جماعتاں، سول سوسائٹی، صحافیاں، کاروباری شخصیات نوں متحد ہو کے ملک نوں درپیش مسائل دا مقابلہ کرنا اے۔ اسیں اتحاد نال دشمناں دیاں چالاں تے سازشاں نوں ناکام بنا سکنے آں۔ ایہہ فوج ساڈی فوج اے۔ ایہہ ساڈے دفاع لئی اے، فوج ساڈا دفاع کردی اے تے بحیثیت شہری سانوں فوج دا دفاع کرنا اے۔ ایہناں مفاد پرستاں نال جیہڑے اپنے مذموم مقاصد وچ ناکام ہون دے بعد فوج نوں متنازع بنان دی کوشش کردے رہندے نیں۔ سانوں ایہناں دا رستہ وی روکنا اے تے ایہناں دی اصلاح دی کوشش وی کرنی اے کیوں جے ایہہ ملک ساڈے ساریاں دا اے ۔ ایس ملک دی بنیاد وچ ساڈے ساریاں دے بزرگاں دا خون اے۔ اسیں ساریاں نے مل کے ایس دی حفاظت نوں یقینی بنانا اے۔ ایس حفاظت وچ فوج دا اہم کردار اے تے اسیں اپنی فوج نوں مزید مضبوط تے طاقتور بنانا اے جس طرح فوج ہمیشہ قوم دے نال کھڑی ہوندی اے قوم نوںوی فوج دے نال کھڑا ہونا اے۔ اللہ ایس ملک نوں سازشاں توں محفوظ فرمائے تے ایس ملک نوں تاقیامت قائم و دائم فرمائے۔ آمین۔ ایہناں سارے حالات نال اک باصلاحیت فورس ای نبردآزما ہو سکدی اے، چنانچہ فوج دی جسمانی و حربی صلاحیتاں نوں پیسز مقابلیاں دے انعقاد نال دنیا نوں نہ صرف پرامن، محفوظ، دفاعی اتبار نال باصلاحیت ذہنی طور تے مضبوط فوجی جواناں دا بہترین پیغام جاندا اے بلکہ ایہناں مقابلیاں دے انعقاد نال دنیا نوں ساڈے ساریاں دے کھیل دوست ہون دا پیغام وی جاندا اے۔ایہناں مقابلیاں دا انعقاد خوش آئند اے۔ ایہناں مقابلیاں وچ شریک غیر ملکی یقینا خوشگوار یاداں دے نال واپس جان گے تے ایہناں نوں پاکستان دا حقیقی رنگ ویکھن دا موقع وی ملے گا۔ پاکستان زندہ باد دے نعرے دشمناں ل ئی واضح پیغام نیں۔ سبز ہلالی جھنڈا سربلند رہوے گا تے دشمناں نوں ہر محاذ اُتے شکست ہوئے گی۔
پاکستان زندہ باد!!!!!