بس دولت دی ایہو حیثیت اے

مظہر برلاس

پہلے اک افسوسناک خبر‘ ساڈے کالم نگار ایس اے زاہد دے گبھرو پُتر داغ مفارقت دے گئے نیں۔ میرا ایس خاندان نال تعلق بڑا پرانا اے۔ میرے لئی ایس اے زاہد برادر بزرگ نیں ایہناں دے پُتر بھترئیاں تے چھوٹے بھراواں ورگے لاڈلے نیں۔ شاہ صاحب دی ہستی نوں سمجھنا بڑا اوکھا اے کہ اوہ دنیاداری توں کدھرے دور نیں پر گبھرو پُتر دی موت نے اوہناں نوں توڑ کے رکھ دتا اے۔ ہن مرحوم لئی دعا ای کیتی جا سکدی اے کہ خدائے لم یزل اوہدی مغفرت کرے۔ ایس جہان توں ساریاں نے ٹر جانا اے پر لوکاں وچ خداخوفی نہیں رہی۔ معاشرے وچ دولت دی ہوس نے انج پنجے گڈے نیں کہ رشتیاں توں دولت دی دیوی وڈی ہو گئی اے۔ لوک اختیارات تے عہدیاں دا استعمال وی دولت دی اکھاں نال کردے نیں۔ کوئی نہیں سوچدا کہ باب العلم حضرت علیؓ توں جدوں کسے نے دولت دی حیثیت بارے پچھیا تے اوہناں نے تلی تے تھوڑی جہی مٹی رکھ کے پھوک مار کے اڑاندے ہوئے فرمایا… بس دولت دی ایہو حیثیت اے… افراتفری دے ایس دور وچ لوک لوکاں نوں یاد وی گھٹ رکھدے نیں۔ مغرب دی تیز رفتار زندگی تے شاید لوکاں توں ایہ ہنر وی کھوہ لیندی اے پر میں لندن وچ رہندے اپنے راوین طاہر چوہدری توں علاوہ مستحسن بھائی سنے کئی دوستاں دا شکرگزار آں کہ اوہ مصروفیات وچوں ویلا کڈھ کے حسن اخلاق نال پچھ لیندے نیں ساڈے ایتھے تے ہن حسن اخلاق وی ختم ہوندا جا رہیا اے ایہدا حساس مینوں لہور وچ اک تقریب دوران ہویا۔
باراں ربیع الاول دے دن لہور وچ اک شاندار تقریب وچ شرکت دا موقع ملیا۔ اسلام فار آل آگاہی مہم دی افتتاحی تقریب بلوچستان اسمبلی دی سابق رکن فرح عظیم شاہ نے سجائی سی۔ ایس مہم دا صرف مقصد ایہہ وے کہ حضورؐ ہوراں دی دسی تعلیمات نال معاشرے نوں سدھاریا جا سکے۔ ابتدائی کلمات وچ بلوچستان نال تعلق رکھن والی سیاستدان فرح عظیم شاہ نے ایس پوری مہم بارے حاضرین نوں دسیا کہ ایہ مہم وقت دا تقاضا اے۔ تقریب وچ بطور مہمان خصوصی لہور دی ہردلعزیز سیاسی شخصیت صوبائی وزیر میاں اسلم اقبال نے ایس گل تے زور دتا کہ سانوں نبی پاکؐ ہوراں دی تعلیمات تے پوری طرح عمل کرنا چاہیدا اے۔ اسیں جذبات تے عمل کرنے آں تے اپنے فائدے لئی جزیات چن لینے آں۔ ایہ طرزعمل ٹھیک نہیں‘ جدوں سانوں مکمل رہنمائی دتی گئی اے تے فیر سانوں پوری طرح عمل کرنا چاہیدا اے۔ جماعت اسلامی دے سیکرٹری اطلاعات قیصر شریف تے سینئر صحافی میاں حبیب سنے رکن پنجاب اسمبلی عظمیٰ کاردار نے وکھووکھ پہلوئواں تے روشنی پائی۔ ایس موقعے تے تنزیلہ عمران خان نے بڑی خوبصورت گل کیتی کہ جے روز حشر اللہ تعالیٰ نے صرف اخلاق حسنہ بارے پچھ لیا تے کیہ اسیں سارے ایہدا جواب دے سکاں گے؟ ویمن پروٹیکشن اتھارٹی پنجاب دی سربراہ کنیزفاطمہ چدھڑ نے کجھ ورھے پہلاں دے معاشرے دا اج دے معاشرے نال خوبصورت تقابلی جائزہ پیش کیتا تے کہیا کہ اج سمجھان والے بزرگ معاشرے وچ نہیں رہے۔ لہور دی ایس یادگار تقریب دی سب توں جاندار تقریر مجیب الرحمن شامی دی سی۔ اوس دن شامی صاحب دی خطابت جوبن تے سی۔ مجیب الرحمن شامی نال ساڈی اٹوٹ محبت اے اوہ پچھلی پنج چھ دہائیاں توں قلمی جہاد توں علاوہ خطابت دے جوہر وی وکھا رہے نیں۔ آغاشور کاشمیری دے بعد صحافیاں وچ اعلیٰ پائے دا خطیب مجیب الرحمن شامی نوں ای کہیا جا سکدا اے۔ اوہناں دیاں تقریراں وچ سیاسی و سماجی معاملیاں توں علاوہ سلجھائو دیاں سرچیاں کرنیاں ضرور ملدیاں نیں۔ اوس دن وی اوہ کہن لگے… جیویں ہوا‘ پانی‘ چان تے سورج پوری کائنات لئی نیں ایسے طرح حضرت محمدؐ ہوراں دی ہستی وی پوری انسانیت لئی اے‘ اوہ رحمت اللعالمین نیں‘ رحمت المسلمین نہیں۔ اسیں دن تے منانے آں پر اوہناںؐ دیاں گلاں تے عمل کتھے کرنے آں۔ اوہناںؐ نے تے مدینے وچ بہترین معاشرہ تشکیل دتا سی اسیں کیہ کیتا‘ ساڈے معاشرے وچ تے امیراں نے اپنیاں بستیاں وکھریاں بنا لئیاں‘ اپنے سکول وکھرے کر لئے‘ اپنے ہسپتال تے گرائونڈاں وکھریاں بنا لئیاں سگوں معاشرہ ایتھوں تک اپڑ گیا اے کہ ایس معاشرے وچ امیراں نے اپنے قبرستان وی وکھرے بنا لئے۔ شامی صاحب دیاں گلاں ٹھیک نیں کیوں جے ساڈے معاشرے وچ لوکاں دے وچکار سماجی فاصلے بڑے ودھ گئے نیں۔ اجہے فاصلے کسے سامراجی سماج وچ تے ہو سکدے نیں پر اک اسلامی معاشرے نوں تے ایہ بالکل وی زیب نہیں دیندے۔
بدقسمتی نال ساڈے طبقاتی ونڈ اپنی انتہا نوں چھو رہی اے اسیں ناں تے رسول پاکؐ ہوراں دا لینے آں پر اوہناں دی تعلیمات تے عمل نہیں کردے۔ ساڈے معاشرے وچ جھوٹ‘ فریب‘ ملاوٹ‘ ذخیرہ اندوزی تے ناانصافی عام نہیں؟ ساڈے ایتھے لوک اک دوجے دا حق نہیں ماردے؟ کیہ ساڈے ایتھے منافقت دا چلن عام نہیں؟ کیہ اسیں اپنے گوانڈھیاں دا خیال نہیں رکھ سکدے؟ کیہ اسیں صفائی دے معاملے وچ ایس گل دا خیال کرنے آں کہ اوہنوں نصف ایمان قرار دتا گیا۔ کیہ ساڈے ایتھے بچیاں تے عورتاں نوں ڈرایا نہیں جاندا‘ کیہ ظلم عام نہیں؟ ہن تے لوک والدین دا احترام وی بھُل گئے نیں‘ کیہ معاف کر دین دا رویہ اے؟ کیہ عدم برداشت نہیں ودھ گیا؟ کیہ حق داراں نو ںاوہناں دا حق مل رہیا اے؟ جے ایہناں ساریاں گلاں دا جواب نہیں تے فیر عشق رسولؐ ہوراں دے دعوے کیسے؟ ساڈے توں تے اوہ لڑکی ڈھیر چنگی اے جو ایس تقریب وچ اک کونے وچ بیٹھی سی جنہے اجہے والدین لئی اک مرکز بنایا اے جہناں نوں اوہناں دیاں اولاداں چھڈ گئیاں۔ کومل سلیم نے لہور دے وکار سایہ دے ناں توں شاندار ادارہ بنا کے معاشرے دے بے رحم رویاں دا ماتم کیتا اے تے دسیا اے کہ خدمت انج وی کیتی جا سکدی اے کہ بقول فراز:
شکوہ طلمتِ شب سے تو کہیں بہتر تھا
اپنے حصے کی کوئی شمع جلاتے جاتے