توں سیاسی گرگٹ ایں؟
امرجلیل
ایہ واقعہ مینوں ادھی رات دے وقت پیش آیا سی۔ ایہ گل میں انج وی لکھ سکدا سی کہ ادھی رات دے وقت میرے نال ایہ واقعہ پیش آیا سی پر میں مناسب نہیں سمجھیا۔ جدوں مینوں ایہ واقعہ پیش آیا سی اودوں میں اکلا سی۔ واقعہ پیش آن دے دوران میں دوچار نہیں سی ہویا۔ میں اک ای سی میں دو چار حصیاں وچ کھلریا ہویا نہیں سی۔ ایس لئی میں سدھا سادا جملہ لکھیا اے کہ مینوں ایہ واقعہ ادھی رات دے وقت پیش آیا سی۔ جدوں تسیں میرے وانگوں اکلے زندگی دے آخری دیہاڑے گزار رہے ہوندے او اودوں ایس قسم دے واقعات نال تہاڈا واہ پیندا اے۔ ہن تسیں واقعے دی روداد سنو۔ ادھی رات دا وقت سی بجلی دا اتا پتا نہیں سی۔ ہوا دے اک مدھم جھونکے نال موم بتی بجھ چکی سی۔ میرے وچ اینی ہمت نہیں سی کہ ماچس لبھدا تے موم بتی فیر جلاندا۔ انھیرے وچ اکھاں کھولے پلنگ تے پئے رہنا کسے ازمائش توں گھٹ نہیں۔ متنفر خیالات دے بے لگام گھوڑے تے آلتی پالتی مار کے بہہ گیا۔ میں حیرت نال موم بتی ول ویکھن لگ پیا۔ بجھی ہوئی موم بتی دا اپنے آپ جل جانا میرے واسطے معمے توںگھٹ نہیں سی۔ حیرت دے نال نال اک انجانا ڈر میریاں رگاں وچ دوڑن لگ پیا۔ اودوں پھڑپھڑاندی لو وچ‘ میں کسے نوں سائے وانگوںاپنے کمرے وچ محسوس کیتا۔ کوئی ہے سی میرے کمرے وچ جے ڈاکہ پان آئے او تے بچہ مایوس پرت جائو گے۔ میرے کول کتاباں توں علاوہ کجھ وی نہیں تے اج کل تے ردی وچ تول کے وی کوئی کتاب نہیں پڑھدا۔ میں کہیا توں جو کوئی وی ایں‘ میرے سامنے آ‘ اوہ میرے سامنے آیا پر مینوں ٹھیک طرح وکھائی نہیں دتا۔ اوہ مینوں آئوٹ آف فوکس فوٹو وانگوں مدھم تے مبہم جیہا وکھائی دے رہیا سی۔ میرے نیڑے آ کے اوہنے کہیا‘ میرا کم اے لوکاں نوں سزا دینا۔ میں تینوں سزا دین آیا واں۔ کیوں بھائی؟ میں پچھیا‘ میں کیہ وگاڑیا اے تیرا؟ توں معاشرے دا بہت کجھ وگاڑیا اے۔ اجنبی نے کہیا‘ تسیں بندہ ہون دے باوجود گرگٹ وانگوں رنگ بدلنا ایں۔ میرا رنگ بڑا پکا اے‘ کجھ وی کر لوو نہیں بدلدا۔ میں کہیا‘ رنگ گورا کرن والیاں درجناں کریماں میں استعمال کر ویکھیاں نیں پر میں کالے دا کالا رہیا‘ میں چاہن دے باوجود گرگٹ وانگوں رنگ نہیں بدل سکدا۔ تسیں بندے لوک بڑے استاد ہوندے او۔ مافوق الفطرت بندے نے کہیا‘ تسیں لوک رنگ تے بدلدے او‘ پر من دے نہیں۔ میں ڈٹ کے کہیا‘ میں کدی رنگ نہیں بدلیا‘ میرے نیڑے آئوندے ہوئے مافوق الفطرت بندے نے پچھیا‘ تسیں سیاسی گرگٹ او‘ کنیاں پارٹیاں بدل چکے او؟
اپنی تھاں وچ اک کائیاں بندہ واں‘ میں کہیا‘ سیاست سائنس اے۔ سیاست شطرنج دا کھیڈ اے۔ حالات نوں ویکھدے ہوئے نویاں چالاں چلنیاں پیندیاں نیں۔ پارٹیاں بدلن نوں تسیں گرگٹ وانگوں رنگ بدلن نال منسوب نہیں کر سکدے۔ مافوق الفطرت بندے نے کہیا ایہو گل اسیں اک گرگٹ توں پچھی سی۔ گرگٹ نے ایہو جواب دیندے ہوئے کہیا سی کہ حالات نوں سامنے رکھدے ہوئے اسیں رنگ بدلنے آں جے اسیں سبزہ زار وچ ہوندے آں تے اچانک کدھروں خونخوار جانور ساڈا شکار کرن لئی اوتھے اپڑ جاوے تے اسیں فوراً سبزہ زار وانگوں سبز رنگ بدل لینے آں۔ شکاری سانوں پچھان نہیں سکدا۔ مافوق الفطرت بندہ مینوں اپنے آپ توں وڈا تے منجھا ہویا کائیاں لگا۔ میں ڈردے ڈردے پچھیا‘ مائی باپ تسیں کون ا و تے میرے توں کیہ چاہندے او؟ مافوق الفطرت بندے نے کہیا۔ اسیں آں مطلق العنان۔ اسیں مجرم نوں آپ پھڑنے آں۔ آپ ای اوہدے تے مقدمہ چلانے آں۔ آپ ای اوہنوں سزا دینے آں۔ میں کہیا‘ ایہ تے امیتابھ بچن دی فلم شہنشاہ دا چربہ اے۔ مافوق الفطرت بندے نے کہیا‘ امیتابھ دی فلم شہنشاہ اسیں مطلق العنان توں متاثر ہو کے بنائی گئی سی۔ میں گھبرا کے پچھیا۔ ایہدا مطلب اے کہ میری خیر نہیں‘ ٹھیک سوچیا اے توں‘ مافوق الفطرت نے کہیا‘ تسیں سیاسی گرگٹاں نے گند پایا ہویا اے ویلا آ گیا اے کہ تہانوں قرار واقعی سزا دتی جاوے تاں جے تسیں سیاسی گرگٹ رنگ بدلنا چھڈ دیو۔ پتہ نہیں کس قسم دی سزا مینوں بھگتنی پوے گی؟ میں ڈر گیا۔ مافوق الفطرت بندے نے کہیا۔ اسیں تینوں کجھ چر لئی کوئی جانور بنا دیاں گے۔ میں کٹر قسم دا جمہوریت پسند مطلق العنان آں۔ دس‘ توں کس قسم دا جانور بننا پسند کریں گا؟ میں سوچ وچ پے گیا۔ اسیں سوچن لئی تینوں مہلت دینے آں۔ مطلق العنان نے کہیا‘ توں جو جانور چاہویں گا‘ اسیں تینوں اوہ جانور بنا دیاں گے پر یاد رکھ‘ سیاسی گرگٹاں نوں اسیں گرگٹ نہیں بنن دیاں گے۔٭٭
