شرک تے شرق

محمد ناصر اقبال خان

قابل نفرت جمہوریت نے ساڈی محبوب ریاست، مشرقی معاشرت تے مقروض معیشت نوں قابل رحم بنا دتا، اج اسیں آئی ایم ایف تے ورلڈ بنک دے رحم و کرم اُتے آں جیہڑی قوم ’’خود مختار‘‘ تے ’’خود کفیل‘‘ نہ ہوئے اوہ ’’ خودار‘‘ نہیں ہو سکدی۔ یاد رکھو انسان دا بنایا ہویا نظام جمہوریت نظام خلافت دا متبادل نہیں ہو سکدا۔ میں سمجھنا واں صدارتی طرز حکومت آئی سی یو وچ پئی ساڈی ریاست لئی آکسیجن دا کم کرے گا۔ یاد رکھو ’’غرب ‘‘ تے ’’شرک‘‘ دا نظام ’’شرق‘‘ وچ کسے صورت وچ چلے گا بوہت دور تیکر جان دے بعد تے بوہت دیر توں واپسی دی صورت وچ جیہڑا شدید نقصان ہوئے گا ایس دی تلافی نہیں ہوئے گی۔ لہٰذا پارلیمانی جمہوریت توں فوری نجات وچ عافیت اے۔ اناڑیاں دے ہتھوں پوسٹ مارٹم دے نتیجے وچ بدنصیب تے نحیف ریاست دی رَگ رَگ توں خون رِس رہیا اے۔ایس بدصورت جمہوریت دی کوکھ توں کئی وار شخصی آمریت پیدا ہوئی تے ایس بدچلن جمہوریت دی نحوست توں کئی وار قومی حمیت دا جنازہ اٹھیا ایس جمہوریت نے حکمراناں نوں امیر کبیر بنا دتا جد کہ ریاست مفلس تے مقروض ہوندی چلی گئی۔ بدبودار جمہوریت ساڈی ریاست وچ دندناندے کئی سیاسی بونیاں دی ماں تے ایس دی آغوش وچ قومی چوراں لئی ’’اماں‘‘ اے۔ ایس پلید جمہوریت دی چھتری تھلے کسے بدعنوان حکمران دا احتساب تے کسے بدزبان سیاستدان دا محاسبہ نہیں ہو سکدا۔ آہ ! تاریخ گواہ اے ایس جمہوریت نے ساڈی ریاست نوں بربادیاں دے سوا کجھ نہیں دتا، ایس نظام نے کسے بارودی سرنگ دی طرح باردباراں، باکرداراں تے ایمانداراں دا رستہ روکیا جد کہ اناڑیاں، زرداریاں، بزداراں، فوادیاں، فسادیاں، شیخی ماراں تے شو بازاں دی منتخب ایواناں تیکر رسائی دا رستہ ہموار کیتا۔ جمہوریت نے ساڈے توں مدبر قومی قیادت اجتماعی لیاقت، وحدت ، رواداری تے بردباری کھوہ لئی جد کہ ریاکاری تے نفاق دا زہر ساڈی رگ رگ وچ اتار دتا۔
تختِ اسلام آباد اُتے براجمان کپتان تخت لہور اُتے جلوہ افروز بزدار تے تخت کراچی اُتے متمکن مراد علی شاہ نے ساڈی عزیز ترین ریاست نوں تختہ مشق بنایا ہویا اے۔ آزاد کشمیر، خیبر پختونخواہ تے بلوچستان توں وی کوئی نوید تے ٹھنڈی ہوا نہیں آندی۔ حکومت بچان تے اقتدار ہتھیان لئی ریاست دے نال سیاست کرن والے کردار قومی مجرم نیں۔ میں شروع توں تبدیلی سرکار نوں ’’تبادلے سرکار ‘‘ کہنا واں کیوں جے منتقم مزاج حکمراناں نے تن ورھیاں وچ دھڑا دھڑ تبادلیاں دے سوا کجھ نہیں کیتا ۔ تبدیلی سرکار دے دور اقتدار وچ انتظامی نہیں انتقامی بلکہ غلامی بنیاداں اُتے تبدیلیاں تے تقرریاں ہوندیاں نیں جیہڑا کوئی ایہناں اناڑیاں دی غلامی تے اطاعت نہیں کردا ایس دی شامت آ جاندی اے۔ پولیس کلچر دی تبدیلی دے داعی کپتان تے بزدار نے پولیس کلچر دا کچرا بنا دتا۔ پولیس وچ بار بار اکھاڑ پچھاڑ نے ایس محکمے دا مورال بُری طرح ڈیگ دتا۔ تحریک انصاف دے انصاف دا معیار تے کپتان دا دوہرا معیار ویکھو، تحریک لبیک دے نال مذاکرات دے نتیجے وچ تے مفاہمت ہو گئی ایہناں دے اسیران رہا ہو گئے جیہڑا ریاست تے سیاست لئی خوش آئند اے تاں شہیداں دی وارث لاہور پولیس دے مستعد سی سی پی او لاہور غلام محمود ڈوگر، ڈی آئی جی کیپٹن (ر)محمدسہیل چوہدری،دانشورشارق جمال خان ،فرض شناس ایس ایس پی اسماعیل الرحمن کھاڑک،پروفیشنل ایس ایس پی سیّدندیم عباس سمیت پنجاب پولیس کے اہم آفیسرزمنتقم مزاج کپتان دے انتقام دانشانہ بن گئے۔غلام محمودڈوگر نے معاملات نوں خوش اسلوبی نال سنبھال لیا سی تاں پُرعزم غلام محمود ڈوگر سنے کوئی بردباد افسر اناڑی بزدار دے نال نہیں چل سکدا۔ سرگودھا دے انتھک تے فرض شناس آر پی او اشفاق احمد خان انتہائی پراعتماد تے پروقار انداز نال اپنے ڈویژن وچ ڈیلیور کر رہے سن ایس دے باوجود ایہناں نوں راولپنڈی ٹرانسفر کر دتا گیا تاں اوہ اوتھے وی اپنی خداداد انتظامی و قائدانہ صلاحیتاں دا مظاہرہ کردے ہوئے امن و امان دی صورتحال وچ بہتری لئی اپنا کلیدی کردار ادا کرن گے۔ پچھلے دناں اک صوبائی وزیر دے بھرا دی تقریب ولیمہ وچ بزدار دے آن اُتے ہون والے قتل دی پاداش وچ منجھے ہوئے ڈی آئی جی ساجد کیانی نوں سی پی اوٹرانسفربلکہ کارنر کردتا گیا۔ ایہناں دیاں صلاحیتاں تے توانائیاں توں مستفید ہون دی لوڑ اے۔ ہن تحریک لبیک دے ہتھوں تبدیلی سرکار نے جیہڑی خفت چکی ایس دا غصہ لہور دے سی سی پی او غلام محمود ڈوگر سنے ایہناں دے ٹیم ممبرز تے متعدد آر پی اوز تے ڈی پی اوز اُتے کڈ دتا گیا۔ پنجاب پولیس دے اندرونی و انتظامی معاملات وچ کپتان دی بے جا مداخلت درحقیقت جارحیت دے زمرے وچ آندی اے۔
پولیس اک ڈسپلن فورس اے نہیں تے کوئی باضمیر تے خوددار افسر وفاق وچ کپتان تے پنجاب وچ بزدار دے نال کم کرن لئی رضا مند نہ ہوندا۔ کپتان تے ایس دے حامی تن ورھیاں دے باوجود ڈیلیور کرن تے مدمقابل قوتاں دے نال بامقصد ڈائیلاگ کرن وچ ناکام رہے پر ایس دے باوجود اوہ اپنی آئینی مدت پوری کرن اُتے بضد نیں میں فیر کہنا واں تبدیلی سرکار دے دور اقتدار وچ چور بند ہوئے نہ چوری بند ہوئی تے فیر کپتان نوں کس بنیاد اُتے صادق و امین ہون دا زعم اے۔ساڈی محبوب پر معتوب ریاست کسے دے باپ دی وراثت نہیں حکمران کرایہ دار نیں تے کرایہ داراں وانگوں رہن، ساڈے ملک عزیز دے مالک و مختار بنن دی کوشش تے فیڈریشن دے خلاف سازش نہ کرن۔جیہڑا اپنے ہتھ وچ تسبیح پھڑ کے عوامی اجتماعات وچ مخالفین اُتے کیچڑ اچھالدا ہوئے اوہ ہر گز ریاست مدینہ دا داعی تے صادق و امین نہیں ہو سکدا۔ جیہڑا عزتدار ہوئے اوہ دوجیاں دی عزت اچھالنا پسند نہیں کردا جیہڑا امانت دار ہوئے اوہ قومی وسائل دا ضیاع برداشت نہیں کردا۔ جیہڑا صادق ہوئے اوہ کسے مصلحت دے تحت وی جھوٹ نہیں بولدا۔ ایس دے قول و فعل وچ تضاد نہیں ہوندا۔ ریاست دی بقاء لئی ناکام کپتان تے ایس دی بدنام ٹیم نوں ہٹانا ازبس ضروری اے پر نیب زدہ تے آسیب زدہ اپوزیشن ایس پوزیشن وچ نہیں۔
تحریک لبیک دا مارچ روکن وچ ناکامی اُتے بدانتظامی دے علمبرداراں، انا دے اسیراں تے بزداراں نے پنجاب پولیس نوں تخت مشق بنا لیا۔ وزیراعظم عمران خان، وزیراعلیٰ پنجاب سردار عثمان بزدار سنے وفاقی و صوبائی وزراء نے حالیہ تن ورھیاں وچ پیر پیر اُتے بدترین بلنڈر Blunder کیتے ایہناں وچوں کوئی مستعفی ہویا تے نہ کسے نوں ہٹایا گیا پر پولیس حکام نوں ماورائے آئین احکامات دی عدم بجا آوری اُتے انتقام دی اگ وچ جھونک دتا جاندا اے۔ پولیس نے تحریک لبیک دا مارچ ناکام بنان تے ایس دا رستہ روکن وچ کوئی کسر نہیں چھڈی۔ ایس دوران متعدد اہلکاراں نے فرض دی بجا آوری دے دوران جام شہادت نوش کیتا پر الٹا پنجاب پولیس زیر عتاب اے، اناڑی حکمراناں نے اپنی مجرمانہ حماقتاں تے شرمناک ناکامیاں دا ملبہ وی پولیس اُتے پا دتا۔ واصف علی واصف دا قول اے۔ بادشاہ دا جرم، جرماں دا بادشاہ اے۔ حکمران اپنے سیاسی گناہواں تے انتظامی غلطیاں دا وی حساب دین۔ تحریک لبیک دے سیاسی و انتظامی معاملے نوں مکالمے نال سلجھانا سی جیہڑا سلجھایا گیا پر ایس سلسلے وچ حکومت ولوں مجرمانہ دیر نے اندھیر مچا دتا۔ یوٹرن برانڈ تبدیلی سرکار ولوں تحریک لبیک دے نال عہد شکنی دے بعد سعد رضوی دی گرفتاری دا فیصلہ عاقب نا اندیشا نہ ، منافقانہ تے مجرمانہ سی ایس متنازعہ اقدام نے ملک عوام تے سکیورٹی فورسز نوں بدامنی دی اگ وچ جھونک دتا۔
سعد رضوی دی گرفتاری دے فوری بعد تے تحریک لبیک دے حالیہ مارچ دے دوران ہون والے کشت و خون دے بعد کامیاب مذاکرات دے نتیجے وچ تحریک لبیک دی بحالی تے اسیران دی رہائی دے بعد تبدیلی سرکار اُتے ’’ سو لِتر تے سو گنڈے‘‘ دا محاورا صادق آندا اے۔ کپتا ن نیازی اپنے قبیلے دے سرخیل منیر نیاز مرحوم دی شہرہ آفاق نظم ہمیشہ دیر کر دیتا ہوں، اُتے غور کردے ہوئے اپنا طرز حکومت تبدیل کرن۔
حکومت نے ریاستی رِٹ اُتے ضرب لان والی جماعت دے نال مفاہمت کر لئی پر جیہڑی پولیس فورس اپنی زندگیاں تیکر ہتھیلی اُتے رکھے ہوئے ریاستی رٹ برقرار رکھدی تے ایس دوران اپنے پیاریاں دے جنازے چکدی اے ایس دے حصے وچ انعام دی بجائے انتقام آیا۔ حکومت ولوں پنجاب پولیس وچ ہون والی حالیہ تبدیلیاں تے تقرریاں چنگا پیغام نہیں، تبدیلی سرکار دے ایس آمرانہ اقدام نال پولیس حکام تے اہلکاراں دا جوش و جذبہ ماند پئے جانا فطری امر اے۔ کوئی سرکاری ملازم کسے حکمران دا غلام نہیں ہوندا ایہناں دی وفاداریا حکومت نہیں ریاست دے نال جد کہ ایہناں دی توانائیاں ملک و قوم لئی وقف ہوندیاں نیں۔”بردباراں” دا”بزداراں” دے رحم و کرم اُتے ہونا اک المیہ اے۔
کپتان تے ایس دا معتمد بزدار تن ورھیاں دے دوران بلند وبانگ دعویاں دے باوجود مہنگائی روکن جد کہ بدامنی دے اگے بند لان وچ ناکام رہیا اپنے پیشتر حکمراناں دی طرح موجودہ شعبدہ باز حکمران وی ڈینگی دی بجائے ڈنگیں ماردے رہے جد کہ شہری ڈینگی دے ہتھوں بے موت مردے رہے ایس دے باوجود منتظم اعلیٰ دا اپنے منصب اتے برقرار ہونا اک وڈا سوالیہ نشان اے۔ پنجاب دا ہر طبقہ بزدار توں بیزار تے ایس توں فوری تجارت دا خواہاں پر کپتان ایس دا پشت بان اے ایس رنجید ہ صورت حال نے راقم سنے معاشرے دے سنجیدہ طبقات نوں بانجھ جمہوریت توں متنفر کر دتا ۔ پاکستان دے زیادہ تر لوک جمہوریت نامی روگ توں چھٹکارے لئی صدارتی طرز حکومت ول ویکھدے نیں جیہڑا نظام خلافت دے نزدیک تر اے۔ کپتا ن تے در کنار دنیا دی کوئی طاقت جمہوریت دے نال پاکستان نوں ریاست مدینہ ثانی نہیں بنا سکدی۔ جس طرح اللہ رب العزت واحد تے ایس دا محبوب یکتا اے ایس طرح دنیا وچ کوئی دوجی ریاست مدینہ نہیں بن سکدی۔ کپتان لئی ننگے پیریں مدینہ شریف جان دی بجائے قوم دیا ںدھیاں دے سر کجنا بہتر اے۔