شاکرشجاع آبادی

ارشاد بھٹی

جتھے روحی بانو اکلوتے پُتر دے قتل مگروں پاگل ہو کے گلیاں‘ بازاراں وچ رل مر جاوے‘ جتھے اداکار علی اعجاز دی کل جمع پونجی ذاتی مکان تے قبضہ ہو کے مقدمہ بازی وچ ایہ ویلا آ جاوے کہ اک دن اوہ علی اعجاز جہدے گیراج وچ نویں ماڈل دیاں گڈیاں کھڑیاں رہندیاں سن اوہ رکشے دے انتظار وچ منہ لکا کے سڑک تے کھڑا ملے‘ نیڑیوں دو منڈے گزرن‘ اک کہوے ارے یار ایہ تے اداکار علی اعجاز لگ رہیا اے دوجا بولے ایہ ایتھے سڑک تے کیوں کھڑا ہویا اے پہلا کہوے لگ رہیا اے رکشے‘ ٹیکسی دا انتظار کر رہیا اے دوجا کہوے یار ایہناں اداکاراں دا حال ایناں خراب کیوں ہوندا اے۔ علی اعجاز دسدے نیں ایہ گل انج تیر بن کے میرے دل نوں لگی کہ میں اوتھے سڑک کنڈھے بہہ کے دھاڑاں مار مار کے رون لگ پیا۔ جتھے سٹیج دا بادشاہ امان اللہ آخری عمر وچ کل دے لونڈے لپاڑیاں توں جھڑکاں سہندے مرے‘ اوہنوں روز ایہہ سننا پوے کہ امان اللہ ہن توں ختم ہو گیا ایں‘ جتھے سٹیج دی رونق ایوب اخترالمعروف ببوبرال نوں بیمار ہو کے حمزہ شہباز دے خیراتی پیسیاں دا انتظار کرنا پوے۔
جتھے اداکار‘ گلوکار‘ ہدایتکار‘ لکھاری‘ کمپیئر‘ پتہ نہیں کیہ کیہ‘ سعیدخان المعروف رنگیلا زندگی دے آخری لمحیاں وچ اپڑے تے اوہنوں وی امداد دی لوڑ پے جاوے۔ جتھے سٹیج اداکار غیاث الدین المعروف شوکی خان کار حادثے وچ مرے تے اوہدے خاندان دی کوئی پرت کے خبر وی نہ لوے‘ جتھے دو ہزار سٹیج ڈرامیاں وچ کم کرن والے مرتضیٰ حسن المعروف مستانہ دا ہیپاٹائٹس سی وگڑ کے جگر دا کینسر بنے۔ باہر علاج لئی پیسیاں دا انتظام نہ ہو سکے تے اوہ بہاولپور دے اک ہسپتال وچ مر جاوے۔ جتھے جمیل فخری ورگے اداکار دا گبھرو پتر ایازفخری امریکہ وچ لاپتہ ہووے تے اوہ ایتھے روز حکومتی بوہے کھڑکاوے‘ روز سرکاری دفتراں دے چکر لاوے‘ روز کہوے‘ حکومتی سطح تے امریکہ وچ میرے گواچے پُتر دا پتہ لایا جاوے‘ فیر اک دن جدوں اوہنوں پتہ لگے کہ پُتر کسے نے مار دتا تے دفتر در دفتر رلدے جمیل فخری نوں برین ہیمرج ہووے‘ کومے وچ جائے تے اوتھوں سدھا مرحوم پُتر دے کول جا اپڑے‘ جتھے مشہور ٹی وی ڈرامہ عینک والا جن دی نصرت آرا المعروف بل بتوڑی دو وقت دی روٹی نوں ترسدی مر جاوے‘ جتھے زوال آن دے بعد وحیدمراد لہور دی اک مارکیٹ وچ اکلا کھڑا ہووے تے کوئی سلام لین والا نہ ہووے‘ جتھے اوول دا ہیرو کرکٹر فضل محمود لاٹھی دے سہارے چلدا سڑک تے لوکاں نوں روک روک کسے دفتر دا پتہ پچھن دی کوشش کر رہیا ہووے تے کوئی رک کے پتہ نہ دس رہیا ہووے۔
جتھے چھوٹے قد دے وڈے فنکار جاوید کوڈو فالج حملے دے بعد چلن پھرن توں قاصر ہووے تے سارے نظراں پھیر لین۔ جتھے عمرشریف ورگے لیجنڈ لئی بیرون ملک علاج لئی پیسیاں دا انتظام ہوندے ہوندے ایناں وقت گزر جاوے کہ عمرشریف راہ وچ ای خالق حقیقی نوں جا ملے۔ جتھے شوبز مطلب اک شعبے وچ اجہی بے حسی دیاں بیسیوں مثالاں ہون‘ جتھے ادب‘ صحافت‘ کھیڈسنے ہر میدان وچ اجہی بے رحمی‘ بے کسی دیاں سینکڑوں مثالاں موجود‘ اوتھے مینوں علم شاکرشجاع آباد لئی رونا دھونا‘ ایس حوالے نال کجھ لکھنا‘ کہنا فضول‘ پر کیہ کراں‘ دل دے ہتھوں مجبور ہو کے لکھن تے مجبور۔ اپنی طرز دے نامور شاعر‘ جنوبی پنجاب دی محرومیاں دی آواز سگوں جنوبی پنجاب دے شیکسپیئر‘ شاکر شجاع آبادی کس حال وچ ایہ سب ویکھ‘ سن چکے‘ بھاویں معذوری‘ محرومی‘ غریبی بھری ویڈیو وائرل ہون دے بعد اوہناں نوں سندھ حکومت توں دس لکھ مل چکے‘ حکومت پنجاب دے تن لکھ وی اوہناں تک اپڑ چکے‘ جہانگیرترین امداد کر چکے‘ وظیفہ لا چکے‘ اوہ اک سرکاری ہسپتال وچ داخل وی ہو چکے پر دکھ ایہہ‘ لودھراں دے لاگے علاقے چاہ ٹبے والے وچ پیدا ہون‘ مٹھو بستی (شجاع آباد) راجہ رام (ظریف شہید) وچ بچپن‘ لڑکپن گزارن والے 66 سالہ شاکر شجاع آبادی دی جے اوہ ویڈیو سامنے نہ آئوندی جہدے وچ وڈی داڑھی‘ میلے کچیلے کپڑے تے ٹُٹیاں جتیاں وچ فالج زدہ شاکر شجاع آبادی نوں اوہناں دے اک عزیز موٹرسائیکل تے اپنے نال بنھ کے ہسپتال چیک‘ اپ لئی لے جا رہے‘ اوہناں دے عزیز نے اوہناں نوں موٹرسائیکل تے ایس لئی اپنے نال بنھیا سی کہ شاکر شجاع آبادی ایس قابل وی نہیں کہ آپ موٹرسائیکل تے بہہ سکن‘ بہہ کے توازن برقرار رکھ سکن‘ جے ایہ ویڈیو سامنے نہ آئوندی تے لہو دا عرق‘ پتھرموم‘ بلدین ہنجو‘ پیلے پتر ورگیاں کتاباں دے لکھاری‘ آپ بولن توں محروم پر آواز توں محروم طبقے دی آواز شاکرشجاع آبادی کیہ انج ای رُل رُل مر جاندے۔
دکھ ایہ وی‘ ست دن دی عمر وچ ٹائیفائیڈ بخار دا شکار ہو کے اج وکھووکھ بیماریاں‘ فالج‘ غربت دے حملیاں توں زندہ لاش بنے شاکر شجاع آبادی جو بولن دی کوشش وچ بڑبڑائے‘ ایس بڑبڑراہٹ نوں اوہناں دا پُتر ٹرانسلیٹ کر کے اگے دسے‘ اینے وڈے شاعر ایس حال تک کیوں اپڑے‘ دکھ ایہ وی بچپن وچ بہاولپور فروٹ‘ سبزی منڈی وچ سارا دن مزدوری کر کے پنج روپیے کما کے گھر لیان تے بیمار ماں دا علاج کرن والے حکیم نوں دوائی‘ علاج دے ناں تے پنج روپیے دے کے روزانہ پیاز دے نال روٹی کھا کے سو جان والے شاکر شجاع آبادی اج ایس حال تک نہ اپڑدے جے اوہناں دا ویلے سر علاج ہو جاندا۔ اوہناں نوں علاج لئی امریکہ گھل دتا جاندا۔ کوئی حکومت ڈیڑھ کروڑ دا خرچہ برداشت کر لیندی‘ دکھ ایہ وی شاکرشجاع آبادی دے دو پُتر‘ تن دھیاں‘ سارے بیروزگار‘ کئی وار پُتراں نے درخواستاں دتیاں کہ جے سانوں نوکری مل جاوے تے اسیں اپنے باپ دا خرچ چک لیے‘ پر نہ ایہ پرانے پاکستان وچ ہویا تے نہ ہن نویں پاکستان وچ ہو رہیا اے پر اک واری کسے سرکاری بابو نے شاکر شجاع آبادی دے پڑھے لکھے پُتر تے ترس کھا کے اوہنوں جمعدار دی نوکری دی پیش کش کیتی پر بعد وچ اوہ ایس پیش کش توں وی مُکر گیا۔
سب توں وڈا دکھ ایہہ‘ گزرے سوا تن ورھیاں توں پنجاب مطلب ادھے پاکستان دا حکمران سائیں عثمان بزدار جو شاکر شجاع آبادی وانگوں آپ وی جنوبی پنجاب دے‘ جہناں نوں بقول عمران خان وزارت اعلیٰ ایس لئی ملی کہ اوہناں دا تعلق جنوبی پنجاب دے اک ماڑے علاقے توں‘ آپ اینے پسماندہ کہ اپنے گھر وچ بجلی نہیں تے جنوبی پنجاب دی پسماندگی دور کرن دی ڈاڈھی خواہش اوہناں دے دل وچ‘ ایس سائیں عثمان بزدار دی سوا تن ورھیاں وچ شاکر شجاع آبادی تے نظر نہ پئی۔ اوہناں دے بچیاں نوں نوکری‘ کوئی سرکاری وظیفہ‘ کوئی علاج‘ سائیں بزدار نے جنوبی پنجاب دی پسماندگی دور کیہ کرنی سی اوہ تے اک شاکر شجاع آبادی دی پسماندگی دور نہ کر سکے‘ ہاں ایہ سنیا جا رہیا اے کہ سائیں بزدار نے اپنی کیہ اپنی ست نسلاں دی پسماندگی دور کر لئی اے۔ سائیں دے ہن چار شہراں وچ گھر‘ اک لائولشکر پروٹوکول دے ناں تے نال‘ سائیں آئے دن انج سرکاری ہیلی کاپٹر نسان کہ جے پنج سالہ مدت پوری کر گئے تے شہبازشریف دے ہیلی کاپٹر نسان دا ریکارڈ ٹُٹ جاوے گا‘ سائیں دی گورننس‘ پرفارمنس یاں پنجاب دے ہر محکمے وچ کرپشن الزامات اک پاسے رکھو۔ سوا تن سالہ وزارت اعلیٰ وچ سائیں بزدار سوئمنگ سکھ گئے‘ گورنر ہائوس وچ روزانہ واک‘ اپنے کھانے پینے دا مکمل خیال‘ جُتیاں‘ کپڑے پان دا اجیہا ڈھنگ آ گیا کہ اک واری پنجاب ہائوس اسلام آباد وچ ملے‘ پچھن تے دسن لگے کیہ ایہ کپتان چپل جو میں پائی ہوئی اے ایہدا چمڑا عام نہیں ایہ بڑا خاص چمڑا‘ ایہ پیراں نوں سکون وچ رکھے۔ ایہ وی سائیں نے دسیا کہ جدوں اوہ اسلام آباد آن تے نارمل چائے نہیں پیندے سگو ںاوہناں لئی خاص قسم دی چائے بنائی جاوے جو اوہناں دا خاص بندہ کدھروں ہور توں بنا کے لیاوے ہن ایہ یاد نہیں کہ سائیں نے چائے مطلب ددھ پتی وچ پایا جان والا ددھ بکری دا دسیا سی یاں مجھ دا‘ ایس توں علاوہ سائیں اپنے آپ نوں فٹ رکھن لئی کیہ کیہ کرن۔
(بشکریہ روزنامہ جنگ)