بالی ووڈ تے کرکٹرز دے کامیاب تے ناکام افیئرز

ایہناں پریم کتھاواں دے بغیر بالی ووڈ دی داستان الفت مکمل نہیں ہوندی، خصوصی رپورٹ

رضا عباس

محبت دی کہانیاں صدیاں توں چلی آ رہیاں نیں، دنیا بدل جاندی اے بعض اوقات رسم و رواج وی بدل جاندے نیں پر عشق تے محبت دے اوہ ای مزاج نیں۔
اج دے تیز تے جدید ترقی یافتہ دور وچ وی ایس جذبے نے لوکاں نوں اپنا اسیر بنا رکھیا اے۔ گل جے عام انسان دی محبت دی ہوئے تے ایس وچ سمندراں جہی گہرائی ہوئے تے اوہ محبت توں عشق تیکر دا سفر بڑی تیزی نال طے کردا اے پر جے ذکر ہوئے بالی ووڈ دے چمکدے دمکدے ستاریاں دا تے اوتھے تے ایہنوں محض ٹائم پاس یا فیر شہرت حاصل کرن دا سستا ذریعہ سمجھیا جاندا اے۔
بوہت گھٹ اسٹارز انج دے ہوندے نیں جیہڑے واقعی اپنی محبت نبھاندے نیں۔ بالی ووڈ وچ ہیروئنز دا کرکٹرز دے نال رومانس ہمیشہ توں اک ہاٹ ٹاپک رہیا اے۔ انڈین فلم انڈسٹری دی اداکاراواں تے کرکٹرز دے وچکار معاشقے دی خبراں لوکاں دی توجہ دا مرکز بندیاں رہندیاں نیں جیہڑے اپنے پیار تے تعلقات وچ سچے سن اوہ ہجے تیکر ساتھ نبھا رہے نیں تے جنہاں دا ساتھ وقتی سی اوہ وکھرے ہو چکے نیں۔ آئو کجھ انج دے جوڑیاں دی زندگی بارے ویکھیے۔
شرمیلا ٹیگور تے منصور علی خان پٹودی
ایہہ اک کرکٹر تے ہیروئن دی اجیہی جوڑی اے جس دا ہمیشہ عزت تے احترام کیتا گیا اے۔ ایس دی وڈی وجہ ایہہ وے کہ ایہناں دونواں نے اپنے رشتے نوں خلوص دل تے محبت نال نبھایا۔ شرمیلا ٹیگور انڈین فلم دی اوہ اداکارہ نیں جنہاں بارے ایہہ کہیا جاندا رہیا کہ اوہ نہ صرف حسن دا پیکر نیں بلکہ اداکاری وی بوہت دل نال کردیاں نیں ایہناں دی ہٹ فلماں وچ ارادھنا، امرپریم، داغ، سفر، چپکے چپکے تے موسم وغیرہ شامل نیں۔ دوجے پاسے منصور علی خان وی کرکٹ دی دنیا وچ اپنے عروج اُتے سن۔ اوہ ویلا دونواں لئی ای کامیابیاں تے شہرت سمیٹن دا سی۔ منصور نے کجھ ملاقاتاں دے بعد شرمیلا نوں پرپوز کر دتا سی تے شرمیلا دی رضا مندی پاندے ای ایہہ شادی 1969 نوں ہوئی۔ ایہناں دے تن بچے سیف علی خان، سوہا علی تے زارا خان نیں۔ سیف تے سوہا تے فلم انڈسٹری وچ وارد ہوئے جد کہ زارا فیشن ڈیزائننگ نال وابستہ اے۔ ایس خوش گوار شادی دا اختتام 2011 وچ منصور علی خان دی وفات نال ہویا۔
رینا رائے تے محسن حسن خان
بدقسمتی نال شرمیلا تے منصور پٹودی دی طرح رینا رائے تے محسن خان دی شادی خوش گوار نہ رہی۔ رینا رائے گو کہ بالی ووڈ دی سپر اسٹار اداکارہ نہیں سن، پر ایہناں دے کریڈٹ اُتے کجھ چنگی تے کامیاب فلماں جویں کالی چرن، نصیب، ناگن تے جانی دشمن وغیرہ سن۔ رینا پاکستانی کرکٹر محسن حسن خان اُتے فدا ہو گئیاں ابتدا وچ تے ایہناں دونواں دے تعلقات دے حوالے نال ایہہ کہیا گیا کہ دونویں اک دوجے نال افیئر چلا رہے نیں پر بوہت جلدی لوکاں دی ایہہ قیاس آرائیاں ختم ہو گئیاں جدوں ایہناں دونواں نے 1983 وچ شادی کر لئی۔ دونویں ای اپنی شادی توں بوہت خوش سن۔ رینا نال شادی دے بعد محسن نے وی فلماں وچ اداکاری شروع کر دتی۔ اوہناں نے بالی ووڈ دی کجھ فلماں وچ کم کیتا۔ شادی دے بعد اوہ رینا دے نال پاکستان وچ مستقل رہائش رکھنا چاہندے سن رینا نے ایتھے ایڈجسمنٹ دی بوہت کوشش کیتی پر شاید ایتھے دے سوشل سرکل تے محسن دی فیملی نے رینا نوں قبول نہیں کیتا۔ ایس طرح ایہناں دونواں وچ اختلافات پیدا ہونے شروع ہو گئے تے ایہہ ودھدے ودھدے طلاق تیکر جا اپڑے۔ دونواں دی اک دھی جنت وی اے۔
سنگیتا بجلانی تے اظہر الدین
سابق مس انڈیا سنگیتا بجلانی نے بھارتی کرکٹ ٹیم دے کھلاڑی اظہر الدین نال محبت دی شادی کیتی۔ ایہناں دونواں دا افیئر کرکٹ دی تاریخ وچ سب توں زیادہ چرچا لئے ہوئے سی۔ سنگیتا مس انڈیا دا ٹائیٹل حاصل کرن دے بعد فلمی دنیا وچ اپنا ناں بنانا چاہندی سن پر ایہہ ایہناں دی بدقسمتی رہی کہ کجھ چنگی فلماں دے باوجود اوہ انڈسٹری وچ اک ناکام اداکارہ دے طور اُتے جانیاں گئیاں سنگیتا دا ابتدا وچ سلمان خان دے نال وی زور دار افیئر چلیا سی پر سلمان ایس افیئر نوں کوئی تعلق نہیں دینا چاہندا سی۔ بعد وچ سنگیتا اظہر الدین دی محبت دا دم بھرن لگیاں۔ اظہر جو کہ پہلے ای شادی شدہ سن تے ایہناں دے تن بچے سن، دل دے ہتھوں مجبور ہو گئے تے اوہناں نے سنگیتا نال دوجی شادی کر لئی۔ کجھ ای عرصے بعد کئی گلاں اُتے اختلافات پیدا ہون لگے نوبت طلاق تیکر جا اپڑی۔
نینا گپتا تے ویوین رچرڈ
بالی ووڈ دی بوہت گھٹ ہیروئنز انج دیاں نیں جنہاں دا افیئر کسے غیر ملکی کرکٹر یا کسے ہور کھلاڑی نال رہیا ہوئے۔ ایہناں ای کجھ اداکاراواں وچ اک ناں سابق اداکارہ نینا گپتا دا اے۔ فلم انڈسٹری وچ نینا نوں اک منہ پھٹ تے بولڈ خاتون کہیا جاندا سی۔ ویسٹ انڈین کرکٹر سرویوین رچرڈ دی ٹیم نے جدوں انڈیا دا دورہ کیتا اودوں اوتھے اک ہون والی پرائیویٹ پارٹی وچ نینا دی ملاقات ویوین رچرڈ نال ہوئی۔ ایہہ ملاقات پسندیدگی وچ بدل گئی۔ نینا تے بے بانگ دہل ایس گل دا اعتراف کردیاں سن ایہناں دونواں دے وچکار افیئر کئی سال تیکر رہیا تے ایہناں دے حوالے نال اخبارات وچ چٹ پٹی خبراں وی شائع ہوندیاں رہیاں۔ نینا تے ویوین رچرڈ دے وچکار سنجیدہ تعلقات سن۔ ایس دے باوجود ایہناں دونواں شادی نہیں کیتی البتہ ایہناں تعلقات دے نتیجے وچ ایہناں دی دھی ماسابا Masaba پیدا ہوئی جو کہ ہن اک نامور فیشن ڈیزائنر اے۔
روی شاستری تے امرتا سنگھ
1980 وچ فلم بے تاب توں کیریئر شروع کرن والی اداکاری امرتا سنگھ دا شمار انڈسٹری دی چنگی اداکاراواں وچ ہوندا اے جنہاں دے کریڈٹ اُتے کجھ معیاری تے سنجیدہ فلماں وی نیں۔ اسی دی دہائی وچ جدوں امرتا انڈسٹری وچ اپنے پیر جما رہیاں سن ایہناں ای دِناں انڈین کرکٹ دے کھلاڑی روی شاستری وی اپنے کیریئر دے عروج اُتے سن۔ جدوں روی دی امرتا نال پہلی ملاقات ہوئی اودوں کیوپڈ دا تیر کم کر گیا۔ ابتدا وچ تے ایہناں دونواں نے ای ایس دی سختی نال تردید دی بعدازاں دونواں نے اپنے تعلقات دا اعتراف وی کر لیا۔
باوجود ایس دے کہ دونویں اک دوجے نوں پسند کردے سن، روی دے گھر والے امرتا نال یعنی اک فلمی اداکارہ نال ایس دی شادی دے حق وچ نہیں سن۔ ایس لئی ایہہ تعلق بنا کسے انجام دے ختم ہو گیا۔ 1990 دے اختتام تیکر روی نے رتوسنگھ نال شادی کر لئی تے ایس شادی دے کجھ سال بعد امرتا سنگھ نے وی سیف علی خان نال شادی رچا لئی۔ شادی دے بارہ سال بعد امرتا نے سیف توں طلاق لے کے علیحدگی اختیار کر لئی۔
نغمہ تے سارو و گنگولی
سائوتھ دی اداکارہ نغمہ جنہاں نے ہندی فلماں وچ کم کر کے شہرت حاصل کیتی، اپنی خوب صورتی دی بنا اُتے دیگر ہیروئنز وچ وکھرا مقام رکھدیاں نیں۔ انڈین کرکٹ ٹیم دے کپتان سارو گنگولی دے نال ایہناں دے افیئر نے کئی تنازعات نوں جنم دتا۔ دونواں نوں کئی وار آندھرا پردیش دے اک مندر وچ ویکھیا گیا۔ نغمہ دے نال اپنے تعلقات دے حوالے نال سارو گنگولی نے مکمل خاموشی اختیار کر رکھی سی کیوں جے ایہناں دی فیملی سارو دی بیوی ڈونا دے نال ایہناں دے تعلقات بحال کرنا چاہ رہی سی۔ انج دی صورت حال وچ نغمہ نے میڈیا اُتے ساروو دے حوالے نال بوہت کجھ کہیا گنگولی دے اپنی بیوی دے نال تعلقات بحال ہوندے ای ایہناں دونواں دے وچکار افیئر ختم ہو گیا۔
انوشکا شرما تے ویرات کوہلی
بالی ووڈ دی نٹ کھٹ اداکارہ انوشکا شرما جس نے شاہ رخ خان دے نال فلم رب نے بنا دی جوڑی دے ذریعے دھماکے دار انٹری دتی تے ایس فلم دی کامیابی دے بعد کئی ہٹ تے کامیاب فلماں وچ کم کیتا۔ دوجے پاسے انڈین کرکٹ ٹیم دے نامور کھلاڑی ویرات کوہلی نے اپنے آپ نوں ہر طرح اک بہترین کھلاڑی ثابت کیتا اے۔ انوشکا تے ویرات دی ملاقات کجھ عرصہ پہلاں اک شیمپو دا اشتہار شوٹ کراندے ویلے ہوئی سی۔ ایس دے بعد ایہناں دی کئی بار ملاقات ہوئی جس نال دونویں رشتہ ازدواج وچ منسلک ہو گئے تے لووبرڈز ہن وی اک دوجے نال پہلی جہی محبت کردے نیں۔ ابتدا وچ تے ایہناں دونواں نے سختی نال ایس گل نوں تسلیم کرن توں انکار کر دتا پر جدوں دونویں اپنا فارغ ویلا اک دوجے نال گزارن لگے ایتھوں تیکر کہ بیرون ملک وی ایہناں دونواں دے وچکار ملاقاتاں دا سلسلہ جاری رہیا اودوں دونواں نے وی اپنے تعلق دا اعتراف کر لیا تے فیر شادی وی کر لئی۔ ہُن اوہناں دی اِک دھی وامیکا وی اے۔
کم شرما تے یووراج سنگھ
اداکارہ کم شرما دا شمار کامیاب ہیروئنز وچ تے نہیں کیتا جاندا البتہ اوہ اپنی بے باکی تے بولڈ نیس دی وجہ نال فلماں وچ کدی کدی کاسٹ کر لئیاں جاندیاں نیں۔ دوجے پا سے یووراج سنگھ انڈین کرکٹ ٹیم دا اک بہترین کھلاڑی اے۔ کم تے یووراج دے وچکار افیئر تقریباً پنج سال تیکر رہیا پر کیوں جے ایہناں دونواں ای دے خاندان نے ایہناں دی آپس وچ شادی دے حوالے نال مخالفت کیتی سی خاص طور تے یووراج دی ممی ولوں ایہناں نوں سخت مخالفت دا ساہمنا سی ایس لئی اینے عرصے دا تعلق ختم ہو گیا۔ یووراج ورلڈ کپ وچ مصروف ہو گئے تے کم نے کینیا دے اک بزنس مین نال شادی کر لئی۔
دیپکا پڈوکون، ایم ایس دھونی، یووراج سنگھ
بالی ووڈ دی گولڈن گرل دیپکا پڈوکون نوں ایس ویلے انڈسٹری وچ نمبر ون دا مقام حاصل اے۔ یقینا اوہ اک چنگی اداکارہ نیں ایس لئی دوجیاں دے نال نال انڈین کرکٹ ٹیم وچ وی ایہناں دے پرستار موجود نیں کرکٹ ٹیم دے کپتان دھونی نال اک ملاقات دے بعد ایہناں دونواں دے افیئرز دی خبراں زبان زد عام ہو گئیاں دونواں وچکار زبردست افیئر چلیا پر دھونی نوں شاید اندازہ ہو گیا سی کہ ایہہ صرف وقت گزاری اے ، ہور کجھ نہیں ایسے بنا اُتے اوہناں نے ایس تعلق نوں ختم کر دتا تاں دیپکا ولوں ایس حوالے نال کوئی بیان ساہمنے نہیں آیا۔ دھونی نے اپنی کالج دی گرل فرینڈ ساکشی نال شادی کر لئی کم شرما نال تعلق ختم کرن دے بعد یووراج سنگھ دا ناں کجھ عرصے تیکر دیپکا دے نال وی نظر آیا پر ایہہ تعلق بوہت جلدی ختم ہو گیا۔