آرٹس کونسل گجرانوالہ وچ خواتین دا مشاعرہ

مشاعرے دی پردھانی فیصل آباد دی مان جوگ شاعرہ پروفیسر صفیہ حیات ہوراں کیتی

رپورٹ: محمد اویس باسل

دل دریا پاکستان رجسٹرڈ دے ’’ناری کھیتر‘‘(women wing) دے آہر نال ادبی بیٹھک آرٹس کونسل گجرانوالہ وچ خواتین دا مشاعرہ ہویا۔مشاعرے دی پردھانی فیصل آباد دی مان جوگ شاعرہ پروفیسر صفیہ حیات ہوراں کیتی۔مشاعرے دا پربند وائس چیئرپرسن ’’ناری کھیتر‘‘دل دریا پاکستان فرحانہ عنبر ہوراں کیتا۔طارق مغل،محمد شوکت ڈار،مقصود یاور،علی احمد گجراتی ہوراں نال سانجھ پائی۔
رجب چودھری تے تہمینہ مرزا ہوراں پروگرام دا ٹورا ٹوریا۔عرفانہ امر گجرانوالہ،شہلا شہنازگجرانوالہ،نجمہ شاہین لہور توں اچیچیاں پروہنیاں سن۔ اس توں وکھ مان جوگ شاعرات وچ صفیہ چودھری گجرانوالہ،نرگس نور لہور،رجب چودھری ظفر وال،تہمینہ مرزا سیالکوٹ،فضہ ہاشمی،فرحانہ عنبر گجرانوالہ توں شامل سن۔
فرحانہ عنبر ہوراں نعت شریف پیش کرکے پروگرام دا مُڈھ بنھیا۔ فضہ ہاشمی ہوراں اپنی من کھچویں آواز وچ حنیف ساقی ہوراں دا لکھیا ہویا معروف کلام ’’ونجلی‘‘ پیش کرکے ڈھیر مانتا کھٹی۔فرحانہ عنبر تے اسسٹنٹ ڈائریکٹر آرٹس کونسل شمسہ گیلانی ہوراں آن والی شاعرات دا پُھلاں نال سواگت کیتا۔پروگرام دے آخر تے پروہنیاں لئی شام دے اَن پانی دا بھرواں جیہا آہر کیتا گیا سی۔ اس مشاعرے دی اچیچی گل ایہ سی کہ اس وچ صرف خواتین شاعرات نیں ہی مشاعرہ پڑھیا۔دل دریا پاکستان رجسٹرڈ دے بانی و صدر علی احمد گجراتی ہوراں دا آکھنا سی کہ اجہے خواتین دے اچیچے پروگرام خواتین وچ تحریک تے جہد پیدا کرن دا کارن بن دے نیں۔ خواتین دے اجہے پروگراماں وچ تنظیم دا مقصد پنجاب دی مادری زبان پنجابی نوں خواتین راہیں آن والیاں نسلاں تیکر اپڑانا اے۔ عوامی تے ادبی حلقیاں وچ تنظیم دے اس پربند دی ڈھیر سلاہنا کیتی جارہی اے۔