طائر ِ لاہوتی!

ابرار ندیم

استاد محترم عام طور تے کسے وی معاملے وچ اپنی ناپسندیدگی دا اظہار غصے یاں ناراضگی نال نہیں کردے پر پچھلے دیہاڑے ملاقات وچ اوہ اپنے مزاج دے الٹ کجھ خاموش جہے وکھائی دتے تے میں اوہناں دا حال احوال پچھن دی غرض نال پچھیا سرجی! تہاڈی طبیعت تے ٹھیک اے؟ ایہدے تے اوہناں نے مینوں اک لمحے لئی جیویں شکوہ بھری نظراں نال ویکھیا تے فیر معنی خیز انداز وچ کہن لگے رانا صاحب! ٹھیک ہو جائو۔ میرے لئی اوہناں دا ایہ انداز نواں ہون دے باوجود مینوں ایہ س سمجھن وچ بالکل دیر نہیں لگی کہ ضرور ایس واری میرے توں کوئی وڈی غلطی ہو گئی اے جہدی وجہ نال استاد محترم نوں میری سرزنش لئی انج دا لہجہ اپنانا پایا۔ میں اوہناں دے ایس لہجے دی تاب نہ لاندے ہوئے بے اختیار اپنے کھبے پاسے بیٹھے شاہ جی ول امداد طلب نظراں نال ویکھیا پر ایس توں پہلاں کہ میریاں نظراں شاہ جی نال دوچار ہوندیاں اوہناں نے متوقع طور تے میری ہون والی کلاس نوں سمجھدے ہوئے مکمل انجان بن کے دوجے پاسے ویکھنا شروع کر دتا۔ حالاں کہ ایہ گل استاد محترم دے علم وچ وی اے کہ میں اک عرصے توں اپنا کوئی وی الٹا سدھا کم کرن توں پہلاں شاہ جی نال ضرور مشاورت کرنا واں۔ ایہ وکھری گل اے کہ شاہ جی دے اوس مشورے تے عمل کرن یاں نہ کرن دا فیصلہ میں بعد وچ کسے سچ مچ دے سمجھدار بندے نال مشورہ کرن دے بعد ای کرنا واں۔ ہن جے کوئی ایہ پچھے کہ فیر شاہ جی نال ایس مشورے دا تردد کس لئی کرنا واں تے ایہدا اک جواب تے ایہہ وے کہ ایویں تے دوجا کسے سیانے دا ایہ قول کہ کسے وی کم کرن توں پہلاں جے کوئی بندہ نہ ملے تے بندے نوں کندھ نال ای مشورہ کر لینا چاہیدا اے۔ بھاویں شاہ جی توں علاوہ اوس ویلے اوتھے جذباتی بھائی وی موجود سن پر اوہناں نوں جانن والے ایس گل توں چنگی طرح واقف نیں کہ کسے وی مشکل گھڑی وچ اوہ ہمیشہ مشکل گھڑی دے نال کھڑے ہوندے نیں ایس لئی میں ایہ سوچ کے کہ ایس اوکھے ویلے وچ اوہناں توں کسے قسم دی مدد دی توقع رکھنا اپنی مشکل نوں ہور زیادہ طول دین والی گل ہووے گی اوہناں ول بالکل وی نہیں ویکھیا حالاں کہ اوہ کسے چالاک ماسی سس وانگوں استاد محترم دی تنبیہ سن کے ہن اوہدے پچھے چھپے راز نوں جانن لئی بے چین نظراں نال میرے ول ای ویکھ رہے سن۔
ایس لئی جدوں مینوں پورا یقین ہو گیا کہ ایس مشکل وچ مینوں اپنے سجیوں کھبیوں کسے قسم دی حمایت ملن والی نہیں تے میں معصوم بنن دی اداکاری کردے ہوئے کہیا سرجی! میں کجھ سمجھیا نہیں۔ ایہدے تے استاد محترم نے فیر اوسے معنی خیز انداز وچ کہیا رانا صاحب ایہو تے میں کہہ رہیا واں کہ سمجھ جائو‘ سدھر جائو اجے ویلا اے‘ تسیں جس راہ دے مسافر بننا چاہ رہے او نہ تے اوہدی کوئی منزل اے تے نہ ای اوہدے وچ کوئی واپسی دی گنجائش اے۔ ایس دوران جذباتی بھائی جو کافی دے مگ وچ کھنڈ گھول کے لکڑی دے چمچ تے لگی کافی دی جھگ نوں ہن کسے وڈی چھپکلی وانگوں اپنی گز بھر دی لمی زبان باہر کڈھ کے بار بار چٹ رہے سن لفظ واپسی دا سن کے ایہ سمجھے کہ شاید استاد محترم نوںاوہناں دی واپسی دی فکر ہو رہی اے اوہناں نے اچی آواز دے نال کافی دا اک گھٹ بھردے ہوئے میرے ول اشارا کرکے کہیا سرجی! تسیں میری واپسی دی فکر نہ کرو ایہ میرے تے چھڈ دیو گے۔ ایہدے تے استاد محترم دے چہرے تے اک لمحے لئی مسکراہٹ پھیل گئی جہدا فائدہ چکدے ہوئے میں گل بدلن لئی کہیا سرجی! جے تسیں مینوں جذباتی بھائی دی پرلے درجے دی ایس نامعقول سوچ تے اوہناں نوں دوچار جگتاں لان دی اجازت دیو تے میرا خیال اے کہ میری ایس آزمودہ پھکی توں کجھ ہور ہووے یاں نہ ہووے اوہناں دا ہاضمہ ضرور ٹھیک ہو جاوے گا جو میرے خیال وچ ایس جینٹری والے ماحول وچ ساڈے نال بہہ کے کافی پین نال کافی خراب ہو گیا اے۔باقی رہیا میری اج ہون والی کلاس دا سوال تے اوہنوں کسے ہور دن پرکھ لیے میں ایہدے لئی تہاڈی خدمت وچ تسیں جدوں تے جتھے کہوو گے حاضر ہو جاواں گا۔
ایہدے تے استاد محترم کہن لگے میرے خیال وچ تے ایہدی تھاں تہاڈا ہاضمہ ٹھیک کرن دی لوڑ اے۔ ایہدے تے استاد محترم نے اک نظر میرے تے شاہ جی ول ویکھدے ہوئے کہیا میں معدے والے ہاضمے دی گل نہیں کر رہیا میرا اشارا رنا صاحب دی سوچ والی بدہضمی ول اے جہدا کھلم کھلا اشتہار ایہ کجھ اپنے آپ نوں گروی رکھن لئی اپنے ہر دوجے تریجے کالم وچ دینے آں۔ ایہدے تے میں ڈردے ڈردے کہیا سرجی! جے تسیں برا نہ منو تے عرض کراں کہ ایہدی اک وجہ تسیں تے تہاڈے ورگے اوہ صاحب کردار تے بااصول صحافی نیں جہناں نے ہر دور وچ ظلم تے ناانصافی دے خلاف قلم دی حرمت تے حق و سچ دا بول بالا کرن لئی اپنی ساری عمر وقف کر دتی پر ایہدے بدلے وچ ساڈے معاشرے نے اوہناں نوں سوائے خالی واہ واہ تے محرومیاں دے کجھ نہیں دتا۔