ڈی جی آئی ایس آئی جنرل ندیم احمد انجم

ابرار ندیم

کجھ دن پہلاں جدوں میڈیا تے ساڈے نویں ڈی جی آئی ایس آئی جنرل ندیم احمد انجم دی تعیناتی دی خبرآئی تے سوشل میڈیا تے یاراں نے ایس خبر دے خوب چرچے کیتے تے ملکی سلامتی دے حوالے نال ایس اہم عہدے تے جنرل صاحب دی تعیناتی دا بڑا گرمجوشی نال سواگت کیتا۔ پر فیر اللہ جانے اس حسن انتخاب نوں کہدی بری نظر لگ گئی کہ وزیراعظم ہائوس توں بطور ڈی جی آئی ایس آئی اوہناں دی تعیناتی دے نوٹیفکیشن دا معاملہ کجھ دیہاڑ لئی کھڈے لائن لگ گیا جہدے تے ایہو کہیا جا سکدا اے کہ ہوئی تاخیر تو کچھ باعث تاخیر بھی ہو گا۔ ہن ایتھے ایہ باعث تاخیر کیہ سی سانوں ایہدے نال بالکل وی کوئی غرض نہیں ایس لئی کہ ایہ وڈیاں دیاں گلاں نیں پر ہاں ایہدے تے دیر سویر دے چکر وچ ساڈے ورگے عام بندے لئی اک چنگی بھلی الجھن ضرور پیدا ہو گئی کہ اللہ نہ کرے جے جنرل صاحب نوں ایہ ذمہ داری نہ دتی گئی تے اوہناں سارے تہنیتی پوسٹاں دا کیہ بنے گا جو ساڈے ورگیاں نے بڑی محنت نال جنرل ندیم احمد انجم دے ناں فوٹو نال سوشل میڈیا تے پوسٹ کیتیاں سن۔ ایس توں پہلاں کہ ساڈے ورگے معصوماں دی ایہ الجھن باقاعدہ کسے روگ دا کارن بن دی شکر الحمداللہ کہ کجھ دن دی تاخیر دے بعد سہی آخر کار وزیراعظم ہائوس توں بطور ڈی جی آئی ایس جنرل ندیم احمد انجم دے ناں دا باقاعدہ نوٹیفکیشن جاری ہو گیا۔
یقینا ڈی جی آئی ایس آئی دے عہدے لئی اوہناں دا انتخاب ایس گل دا گواہ اے کہ اوہ وی اپنے پہلے افسراں وانگوں ایس اہم ترین ذمہ داری دے اہل اک بہادر‘ قابل تے ذہین فوجی افسر نیں ایس لئی کہ افواج پاکستان دے اندر افسران بالا دیاں ترقیاں تے تعیناتیاں دا اک اجیہا فول پروف نظام اے جہدے وچ کسے مصلحت یاں ذاتی پسند و ناپسند دی تھاں صرف ملکی مفاد تے میرٹ نوں ترجیح دتی جاندی اے۔ ایہو وجہ اے کہ پچھلی کئی دہائیاں توں پیشہ ورانہ حوالیاں نال افواج پاکستان دا شمار دنیا دی صف اول دی افواج وچ کیتا جاندا اے۔ ساڈے ایتھے ملکی سلامتی نوں اندرون و بیرون محاذاں تے درپیش چیلنجاں دے تناظر وچ ڈی جی آئی ایس آئی دے عہدے انتخاب ہمیشہ توں اہمیت والا رہیا اے۔ مادر وطن دے دفاع لئی دتیاں گئیاں قربانیاں دے تناظر وچ انج تے افواج پاکستان دے ہر جوان تے افسر نال ساڈی عوام دل و جان نال محبت کردی اے پر افغان جنگ وچ مجاہدین راہیں روس ورگی سپرپاور نوں شکست دین دے حوالے نال آئی ایس آئی دے پچھلے چیف جنرل حمیدگل ورگے دیومالائی کرداراں تے اوہناں دی جرأت و بہادری تے ذہانت دیاں داستاناں نے جس طرح اوہناں نوں عوامی ہیرو بنا دتا ایہدے بعد ساڈے ملک دا اک عام شہری وی آئی ایس آئی دی اہمیت نوں خوب سمجھدا اے۔
آئی ایس پی آر دی اک پریس ریلیز موجب جنرل ندیم احمد انجم آئی ایس آئی دے 25ویں ڈی جی نیں۔ ایہدا مطلب اے ایہناں توں پہلاں ہن تک افواج پاکستان دے 24افسران ایس عہدے تے بڑی کامیابی نال اپنی قومی ذمہ داریاں نبھاندے رہے نیں جہناں دے اعتراف وچ ساڈی عوام نے وی اوہناں نوں ہر دور وچ اپنیاں ڈھیر محبتاں تے چاہتاں نال نوازیا اے پر ایہ گل مننی پوے گی کہ اینے مختصر ویلے وچ تے اینی تیزی نال قومی و سوشل میڈیا تے جو پذیرائی ساڈے نویں ڈی جی آئی ایس آئی جنرل ندیم احمد انجم دے حصے وچ آئی اے ایس توں پہلاں ایہدی مثال ویکھن وچ نہیں ملدی۔ سینئر صحافی غریدہ فاروقی صاحبہ اپنے اک ٹویٹ وچ کہندیاں نیں جنرل ندیم احمد انجم میدان حرب دے جری و مردمجاہد‘ طبعاً کم گو پر پیشہ ورانہ قابلیت وچ صف اول تے چہرے توں نرم خو دکھن والے جرنیل سخت گیر اصولاں دے حمایتی نیں۔ خدا گواہ اے ایہ گل جے عارف حمید بھٹی یاں چوہدری غلام حسین ورگا کوئی صحافی کہندا تے اوہناں نال خواہ مخواہ وی اختلاف کیتا جا سکدا سی پر کیوں جے انج ساڈی پسندیدہ تے دبنگ صحافی غریدہ فاروقی صاحبہ دا کہنا اے ایس لئی ایہدے تے میں پچھے ایس امام دی نیت بنھدے ہوئے ایہو کہواں گا کہ مستند اے غریدہ فاروقی صاحبہ دا فرمایا ہویا۔ پر فیر وی ذہن وچ ایہ سوال ضرور پیدا ہوندا اے کہ ساڈے نویں ڈی جی آئی ایس آئی وچ اجہی کہڑی خاص گل اے کہ اودھر اوہناں دی تعیناتی دا اعلان ہویا اے تے اودھر لوکاں نے اوہناں نوں راتوں رات سوشل میڈیا سٹار بنا دتا اے۔ ممکن اے ساڈے تجزیہ نگار صحافی دوستاں صابرشاکر تے ارشاد بھٹی نے اپنے اپنے حساب نال کسے شو یاں کالم وچ ایہدا جواب وی گھڑ لیا ہووے پر لوکاں نے اوہناں نوں جس پذیرائی نال نوازیا اے ایس حوالے نال میں تے ایہہ سمجھدا واں کہ جنرل صاحب دی دوجیاں خوبیاں دے نال ایہدا اک وڈا کارن شاید کسے فلمی ہیرو ورگی اوہنا ںدی پرکشش شخصیت وی اے جہدا اک وڈا ثبوت ایہہ وے کہ سوشل میڈیا تے جٹ‘ مغل‘ جنجوعہ‘ شیخ‘ ارائیں تے گجر سنے شاید ای کوئی اجہی برادری ہووے جنہے اوہناں نوں اپنی برادری دا ظاہر کرکے سوشل میڈیا تے بڑے دھڑلے نال مبارکباد نہ دتی ہووے۔
ایہناں وچوں اک دلچسپ پوسٹ کسے مغل زادی ولوں اے جہدے وچ اوہ فرماندیاں نیں ساڈی مغل برادری ولوں جنرل ندیم احمد انجم نوں ڈی جی آئی ایس آئی بنن تے مبارکباد پیش کرنے آں۔ ڈی جی صاحب اکھاں توں ای مغل لگدے نیں جو ایہناں نوں مغل نہ منے اوہ کافر۔ جہدے تے میں ایہو کہواں گا کہ بے شک ایہ بڑی زیادتی اے کیوں جے ایہناں محترمہ نے جنرل صاحب نوں مغل نہ منن دی صورت وچ انج کافر دا فتویٰ نہ دتا ہوندا تے بطور راجپوت دوجیاں برادریاں وانگوں میرا وی اردہ سگوں حق وی سی کہ میں وی جنرل رانا ندیم احمد انجم دی بطور ڈی جی آئی ایس ئی تعیناتی تے ہن تک سوشل میڈیا تے مبارکباد دی گھٹو گھٹ اک ادھی پوسٹ تے ضرور لگا چکیا ہوندا۔ ٭٭