کپتان دے تن مغالطے!
ارشاد بھٹی
کپتان نوں تن مغالطے‘ تن غلط فہمیاں‘ پہلا مغالطہ‘ غلط فہمی‘ خوش فہمی‘ ایس ویلے اندرونی تے بیرونی طاقتور قوتاں‘ ادارے‘ لوکاں دے کول اوہناں توں علاوہ کوئی چوائس ‘آپشن نہیں‘ ایہدا اوہ کئی واری آف دا ریکارڈ اظہار کر چکے۔ اوہناں دے خیال وچ بیمار نوازشریف نااہل‘ سزایافتہ‘ مفرور‘ اقتدار دی دوڑ توں آئوٹ‘ آصف زرداری تے اینے کیسز‘ اوہ اینے بیمار ہن ایوان اقتدار وچ اوہناں دی واپسی ناممکن‘ شہبازشریف دی صورت وچ خطرہ موجود پر اک تے اوہناں تے ٹی ٹی کیس سنے تن کیس اینے مضبوط‘ سزا توں بچنا ناممکن‘ دوجا مریم نواز اپنے چاچے دیاں انج جڑاں کٹن گئیاں کہ اوہ کدی ہرے بھرے نہیں ہو پان گے۔ باقی رہ گئے بلاول بھٹو‘ مریم نواز‘ ہنوزدلی دوراست‘ کپتان دے خیال وچ اوہناں دے مقابلے تے سارے کرپٹ‘ کمپرومائزڈ‘ ڈیلاں‘ ڈھیلاں والے‘ ایہ سارے عوام وچ ایکسپوز ہو چکے۔
ہن کپتان دی سوا تن سالہ بیڈگورننس‘ بیڈپرفارمنس‘ غلط فیصلیاں‘ غلط پالیسیاں نوں اک پاسے رکھو‘ سوا تن سالہ خون نچوڑ مہنگائی‘ بیروزگاری‘ غربت نوں اک پاسے رکھو‘ انٹ شنٹ اندرونی و بیرونی فیصلیاں نوں اک اپسے رکھو‘ سوا تن سال وچ آ چکے کرپشن سکینڈلز پارٹی‘ کابینہ وچ بیٹھے مافیاز نوں اک پاسے رکھو‘ اوہناں دی بیک وقت چومکھی لڑائیاں نوں اک پاسے رکھو۔ جماعت وچ گروہ بندیاں نوں وی اک پاسے رکھو‘ کجھ لمحیاں لئی ایہ سب بھل جائو تے وی کپتان دے علم وچ شاید ایہ نہیں کہ پاکستان دے بدبودار نظام وچ ہر ویلے کئی آپشن موجود‘ جتھے کرپٹ ہونا‘ کرپشن کرنا کوئی برائی نہ ہووے‘ جتھے رنگے ہتھیں پھڑے جان‘ جھوٹ بولن‘ منافقت کرن والے وی باعزت ہون‘ جتھے ووٹر دا ووٹ شعور و آگہی دی تھاں‘ ذات برادری‘ تھانہ کچہری تے دوجیاں مجبوریاں دی صورت وچ دتا‘ لیا جا رہیا ہووے‘ جتھے وقت پین تے معین قریشی‘ شوکت عزیز‘ رضاباقر مطلب ہر عہدے‘ ہر سائز دے لوک امپورٹ کر لئے جان‘ اوتھے نااہل‘ مجرم‘ بیمار‘ تندرست ہر کوئی‘ ہر وقت آپشن‘ چوائس دی صورت وچ موجود‘ اوتھے جوکل رد‘ مسترد ہو چکے ہوندے نیں۔ کل اوہو حلف چک رہے ہوندے نیں‘ فیر کپتان نوں حضرت علیؓ دا ایہ قول یاد رکھنا چاہیدا اے کہ جے ایہ کرسی مستقل ہوندی تے تہاڈے تک کیویں اپڑدی ایس لئی اوہناں نوں ایہ ذہن چوں کڈھ دینا چاہیدا اے کہ صرف اوہو آپشن‘ چوائس رہ گئے‘ ایوب توں نوازشریف تک سارے ایہو سوچدے سوچدے جا چکے‘ اجیہا سوچن دی تھاں ایہ ویکھن‘ سوچو کہ قبرستان ناگزیر لوکاں نال بھرے پئے۔
عمران خان دا دوجا مغالطہ‘ غلط فہمی‘ خوش فہمی‘ مینوں سب پتا‘ اوہ کرکٹر رہے‘ چلو کرکٹ دا اوہناں نوں پتا‘ شوکت خانم ہسپتال بنایا‘ چلو سماجی ورک‘ صحت دے شعبے دا کجھ علم ہووے گا‘ اوہ نمل یونیورسٹی بنا چکے‘ کجھ تعیم دا وی اتا پتا ہو گیا‘ اوہ مغرب وچ رہے‘ چلو بہت ساریاں توں ودھ مغرب نوں وی جان دے ہون گے۔ ہن ایہ وکھری گل اوہناں دے وزیراعظم ہوندے ہوئے کرکٹ‘ صحت‘ تعلیم دا جہڑا حال‘ مغرب نال جیویں ساڈے تعلقات‘ پر چلو من لیا کرکٹ‘ سماجی کم‘ صحت‘ تعلیم‘ مغرب دا اوہناں نوں پتا پر ایس توں علاوہ وی کوئی گل کیتی جاوے‘ کپتان فوراً بول پین‘ میرے توں بھلا بہتر کون جان دا اے۔ گل سیاست دی ہووے‘ مینوں سب پتا‘ منیا اوہ دو دہائیاں توں سیاست وچ‘ پر مینوں سیاست دا سب پتا‘ ایہ ناممکن‘ گل داخلہ پالیسی دی ہووے‘ مینوں سب پتا‘ گل خارجہ پالیسی دی ہووے‘ مینوں سب پتا‘ زندگی بھر اپنے گھر دا بجٹ بنایا نہیں‘ پر مینوں ملکی معیشت دا سب پتا‘ اوہناں نو ںایہ وہم کہ اوہناں توں بہتر مذہب نوں کوئی نہیں جان دا‘ اوہ اقبال شناس بنے ہوئے‘ اوہ اپنے آپ نوں ہر قسم دے لٹریچر تے اتھارٹی سمجھو‘ اوہ تریخ دان بنے بیٹھے‘ اوہناں دا وہم اوہناں نوں تصوف دے اسرار و رموز تے دسترس‘ ایس لئی کوئی وی موضوع چھڑ جاوے‘ اوہناں دا بھاشن تیار‘ ہن مینوں سب پتا‘ ملک دا کیہ نقصان ہو چکیا‘ تسیں ویکھ لوو۔ اندرونی ملک ابتری‘ بیرون ملک تنہائی‘ ڈبدی معیشت‘ تباہ حال عوام‘ فیر مینوں سب پتا‘ کپتان دا ایہ مغالطہ‘ غلط فہمی‘ خوش فہمی‘ آئے دن اوہناں دے اپنے واسطے وی شرمندگی دا کارن بنے‘ کدی اوہ جرمنی‘ جاپان دیاں سرحداں ملا دیو‘ کدی اسدرئوف دی نظم علامہ اقبال دی نظم بنا دین‘ کدی ٹیگور دا قول خلیل جبران دا بنا دین۔ کدی اوہناں نوں حضرت عیسیٰؑ دا ذکر قرآن وچ نہ ملے‘ کدی صحابہ دا ذکر کردے کردے چوک جان‘ اوہ بیک وقت مغرب دی جمہوریت توں وی متاثر تے ایہ چینی‘ سعودی ماڈل توں وی متاثر‘ اوہ ریاست مدینہ دے وی داعی‘ پر اوہناں دے فیصلے میرٹ توں وی عاری‘ ایہ یوٹرن‘ کہیاں گلاں توں مُکرن نوں حکمت عملی وی قرار دین‘ ایہ تے کجھ مثالاں‘ اجہیاں بیسیوں مثالاں ہور وی۔
عمران خان دا تریجا مغالطہ‘ غلط فہمی‘ خوش فہمی اپنے صادق امین ہون دا زعم‘ اپنے ایماندار ہون دا یقین‘ اوہناں دی نظر وچ اوہناں توں علاوہ سب مشکوک‘ پوری اپوزیشن چور‘ ڈاکو‘ لٹیری‘ بیورو کریسی ہڈحرام‘ پچھلیاں نال ملی ہوئی‘ اوہناں نوں جوڈیشری توں وی شکایتاں‘ اوہناں نوں پچھلیاں دے نوازے ہوئے مافیا زدہ میڈیا اگے وی شکوے‘ اوہناں نوں تاجراں نال وی گلے ہور تے ہور اوہناں دیاں گلاں غور نال سنو تے لگے اوہناں نوں قوم وی ٹھیک نہیں ملی‘ ہن ایہ من لیا عمران خان آپ ایماندار‘ اوہناں نوں سپریم کورٹ توں صادق امین دا سرٹیفکیٹ وی مل چکیا‘ پر اجہی ایمانداری دا کیہ فائدہ کہ اپنی کابینہ‘ پارٹی وچ کرپٹ موجود‘ اجہی ایمانداری دا کیہ فائدہ‘ لاڈلے دیہاڑیاں لا رہے۔ آل دوالے لٹ مار ہو رہی تے تسیں جان بجھ کے چپ‘ اکھاں بند کر رکھو‘ اجہی ایمانداری دا کیہ فائدہ کہ کل تک جہناں نوں تسیں بے ایمان کہندے سی اج اوہ سارے ساتھی‘ اتحادی‘ اجہی ایمانداری دا کیہ فائدہ کہ ہر معاملے وچ مافیا جت جاوے۔ ہر معاملے وچ تسیں ہار جائو تے اجہی ایمانداری دا کیہ فائدہ کہ تہاڈے وزیراعظم بنن دے بعد ملک وچ کرپشن ودھ جاوے‘ ایس لئی حضور جس ایمانداری دا ملک‘ قوم نوں کوئی فائدہ نہ ہووے‘ اوس ایمانداری دا اچار پانا‘ بہرحال سو گلاں دی اکو گل تے اوہ دکھ دی گل‘ کپتان دن بدن اپنے ایہناں تن مغالطیاں‘ غلط فہمیاں‘ خوش فہمیاں دی دلدل وچ پھسدے جا رہے نیں۔
(بشکریہ روزنامہ جنگ)
