ریاست دے حقوق تے چنگا شہری
مطلوب ورائچ
مغرب وچ زندگی سوکھی ای نہیں پرتعیش نظر آئوندی اے۔ کئی ملکاں نوں تے حکومت ولوں شہریاں نو ںدتی جان والی مراعات تے اوہناں لئی دستیاب سہولتاں نوں ویکھدے ہوئے لوک جنت نظیر وی کہندے نیں۔ میری زندگی دا لماں عرصہ یورپی ملکاں تے کینیڈا وچ گزریا اے۔ ایہ سارے ملک بلاشبہ اپنے قدرتی منظر تے اپنے تخلیق کردہ مرکزاں‘ شاہراہواں تے سیرگاہواں پاروں خوبصورتی وچ وی مثالی نیں۔ عوام خوشحال نیں‘ حکومتاں جمہور دی منتخب کردہ تے جمہور نوں جوابدہ نیں۔ کئی ملک ان گنت وسیلیاں نال بھرے پئے نیں تے بہت سارے اجہے وی نیں جو وسیلے تے اینے زیادہ نہیں رکھدے پر اوہناں ولوں وی لوکاں نوں اوہو سہولتاں دتیاں جاندیاں نیں جو کوئی وی ترقی یافتہ تے امیرترین ملک اپنے لوکاں نوں دے سکدا اے۔ کیہ ایہ سہولتاں تے مراعات قرض لے کے دتیاں جاندیاں نیں۔ ایہدے تے بعد وچ گل کرنے آں پہلے ذرا سہولتاں تے مراعات دا جائزہ لے لیے۔ ہر شہری دی تعلیم تے صحت دے معاملے ریاست دے ذمے نیں۔ تعلیم ایہناں ملکاں وچ اپنے شہریاں لئی سستی اے۔ بیرون ملک توں آن والیاں لئی مہنگی اے۔ کنی مہنگی اے؟ اینی مہنگی اے کہ پاکستان دی 22 گریڈ دے بیوروکریٹس تے ایماندار وزراء تے مشیر وی اپنے بچیاں نوں اوہناں ملکاں وچ نہیں پڑھا سکدے۔ اک وفاقی وزیر دا پُتر کینیڈا وچ پڑھ رہیا سی۔ اک موقعے تے اوہنے میرے توں بھاری رقم ادھار لئی سی سالانہ فیس دی ادائیگی لئی‘ ایسے طرح ہر شہری نوں علاج دی فری سہولت اے۔ ریٹائرمنٹ تے کئی ملکاں وچ شہری نوں گھر تک وی دتا جاندا اے۔ ایہناں ملکاں وچ وی غریب لوک نیں‘ بیواواں نیں‘ بیروزگار وی نیں اوہناں دے گھر تک روزانہ تے ہفتہ دی بنیاد تے راشن اپڑا دتا جاندا اے۔ آزاد معاشرہ اے‘ پڑھے لکھے لوک نیں‘ مقدمے نہ ہون دے برابر نیں‘ انصاف وچ کدی تاخیر نہیں ہوندی‘ ٹرانسپورٹ سستی اے‘ گڈیاں آسان قسطاں تے مل جاندیاں نیں۔ جدوں اسیں ایہناں ملکاں دے شہریاں نوں ملیاں سولتاں نوں ویکھنے آں تے یقینا رشک آئوندا اے۔ کاش ساڈے ملک وچ ایہ سب ہو سکے۔ انج ناممکن نہیں‘ عین ممکن اے جہڑے ملکاں وچ ایہ ساریاں سہولتاں دتیاں جاندیاں نیں اوہ ساریاں ریاست اپنی جیب چوں نہیں دیندی۔ مراعات اوس ٹیکس پاروں دتیاں جاندیاں نیں جو شہری اپنی آمدن تے ادا کردے نیں۔ اوہناں توں ٹیکس جبری وصول نہیں کیتا جاندا۔ ہر ٹیکس گزار راضی خوشی نال دیندا اے۔ ساڈے ایتھے ٹیکس دا رواج ای نہیں۔ 30 ہزار توں ودھ آمدنی تے ٹیکس لاگو اے۔ اجہے کنے لوک نیں جو ٹیکس ادا کردے نیں؟ سب توں ودھ ٹیکس گزار سرکاری ملازم نیں اوہ وی اوہناں دیاں تنخواہواں توں کٹوتی کیتی جاندی اے نہیں تے اوہ اوہناں وچوں وی بڑی ڈنڈی مار جان۔ اجہے تاجراں دی گنتی لکھاں وچ اے جو ارباں روپیے دا کاروبار کردے نیں۔ کروڑاں دا کاروبار کرن والے تے کئی کروڑ ہون گے پر ٹیکس ادا کرن والے صرف پنجی لکھ لوک نیں۔ میں شہریاں لئی جہڑیاں مراعات دی گل کیتی پاکستان وچ ہر اوہ شہری ایمانداری نال ٹیکس ادا کرے جہدے تے ٹیکس لاگو ہوندا اے تے یقین کرو پاکستان وی جنت نظیر بن سکدا اے۔ تعلیم تے صحت دی سہولت ہر شہری لئی فری دستیاب ہو سکدی اے۔ من و سلویٰ دی طلب ضرور کرو پہلے ایہدا اہتمام ٹیکساں دی صورت وچ ضروری اے۔ ٹیکس اسیں لوک دیندے نہیں تے توقع رکھنے آں کہ ریاست ہر ممکن سہولت مع لڑائی جھگڑیاں‘ جائیداد دے تنازعات دے مقدمے وی اپنے خرچ تے لڑے۔
دوستو! ایتھے میں کجھ حقیقتاں دی وضاحت کر دینا اپنا پہلا فرض سمجھنا واں کہ میری لکھت دا اُتلے والا حصہ پڑھ کے تسیں یقینا سوچ رہے ہوو گے کہ جے یورپ تے امریکہ وچ ٹیکس گزار نوں ایہ سب کجھ ملدا اے تے فیر پاکستان دی حکومت ٹیکس گزاراں نوں ایہ مراعات کیوں نہیں دیندی۔ ایس سوال دے جواب وچ ایہ گل یقینا پیش کیتی جا سکدی اے کہ یورپین تے نارتھ امریکن معاشرے نے اپنی آبادی تے مکمل کنٹرول رکھیا اے۔ کجھ مغربی خانداناں وچ صرف اک بچے تے ای اکتفا کیتا جاندا اے۔ میں یورپی تے نارتھ امریکہ دے کجھ امیر ترین خانداناں نوں ذاتی طور تے جاننا واں تے پچھلے 38 ورھے توں یورپین معاشرے دا حصہ آں۔ میں سوائے کجھ اک خاداناں دے جہناں دے دو بچے نیں زیادہ تر فی خاندان اک بچے ای نوں ویکھیا اے پر پاکستان وچ جدوں ایہ سوال تسیں کسے امیر یاں غریب اگے کرو تے جواب وچ اک رٹا رٹایا جیہا فقرہ سنن نوں ملدا اے کہ رزق تے اللہ تعالیٰ کیڑے نوں وی پتھر وچ وی دے دیندا اے تے جو پیدا ہوندا اے اوہ اپنا رزق نال لے کے آئوندا اے۔
دوستو! مذہبی حقیقتاں توں اختلاف تے انحراف ممکن نہیں پر ریاست دا رہر ذمہ دار شہری اپنی معاشی حیثیت دے مطابق اپنی فیملی دا سائز ودھاوے تے یقینا ریاست پاکستان وی تہاڈے ٹیکس دے بدلے تہانوں مغربی معاشرے ورگیاں سہولتاں دے سکدی اے۔٭٭
