پلس نال کون نجِٹھے گا

غلام شبیر عاصم

ملک اندر کرپشن،بے ایمانی،کھوہ کھِنج تے وڈھی((ر شوت) جہیاں بیماریاں ہورناں سرکاری محکمیاں وچ وی ھے نیں۔پر تِن محکمے بوہتے ای ایس بیماری وچ کھبے تے انھے ہوئے پئے نیں۔محکمہ بجلی،سوئی گیس تے پلس۔ایہناں تِناں وچوں وی بوہتی آخر پلس دے محکمے نے چکی ہوئی اے۔ایس گل دا میڈیا تے میڈیا اتے عدالتاں دے ریمارکس گواہ نیں۔دوجھے محکمیاں وچ وی وڈھی ملک دیاں جڑاں وڈھ رہی اے پر ایس خرابی وچ بوہتا ہتھ پلس دا اے۔کیونکہ پلس دا محکمہ جرائم دے مکا، قانون تے عمل کرواون تے امن امان قائم رکھن لئی بنایا گیا اے مجرم تے ویلی دھڑے نہیں چاہندے کہ پلس اپنے پورے تے ٹھیک اختیار ورتن لگ پوے، کیوں جے ایسراں رسی اوہناں مجرماں دے گل نوں آوندی اے۔تے ایس کرکے پلس نوں نوٹاں دی آفر وی ہندی رہندی اے تے گھر آیا رذق کون موڑدا اے۔ تے ایسراں کرکے ایس کالے دھندے دا اثر بغیر کسے ول ولیویں دے سِدھا سِدھا سماج دے لوکاں اتے پیندا اے۔ دوجھے دو محکمے تے چنگے تے بھیڑے لوکاں نوں وی اکو جہئی سہولت دیندے نیں۔ تے پلس دی طرحاں سماج دے امن امان تے قانون تے عمل کرواون دے ایہ پابند نہیں ہندے۔ دوجے محکمیاں دی کرپشن اک خاص تھاں تک رہ جاندی اے پر پلس دی کرپشن پورے سماج اندر پسر کے کِسے بھیڑے وائرس والا کم کردی اے۔جہدی وجہوں بندا بندا ایس خرابی دا شکار ہوجاندا اے۔پلس دی کرپشن تے کوڑھ دِلی کسے پکھوں وی اکا قبول تے برداشت نئیں کیوں جے پلس جرم تے بدامنی نوں مکاون تے گھٹاون دی ذمہ دار ہندی اے۔پر بجائے ایس دے پلس دے اندر 1000, 500 دی خاطر کھلے عام تھانیاں اندر مجبور لوکاں دی مجبوری دا ناجائز فیدا چکیا جاندا اے۔ ہزاراں روپے لے کے پلس والے ایف آئی آر وچ اپنے اندر دی پلیتی اِنج رلا دیندے نیں کہ فرق کرنا ای مشکل ہوجاندا اے کہ اصل مجرم کون اے تے مدعی کون اے۔
کئی واری انج وی ہندا اے کہ غلطی یا گناہ کرن والا چھٹ جاندا اے تے مظلوم تے بے گناہ مدعی مجرم دے حِصے دی سزا بھوگدا رہندا اے۔کئی واری ملک دیاں وڈیاں عدالتاں نے وی آکھیا اے کہ پلس دا محکمہ عوام نال زیادتی کردا اے تے ایہدی اصلاح کرن دی لوڑ اے۔ پر پتا نہیں عوام دے بھلے لئی پلس نال کدوں کون نجِٹھے گا۔تے لوکاں اندروں ڈاکوواں والا پلس دا تروہ تے خوف کدوں مکے گا۔قنون نوں رتیاں تولے تے مناں دے حساب نال پیسیاں نال تول کے ویچن وجہوں ملک اندر جرم تے بد امنی مکن یا گھٹن دے بجائے پیرو پپر ودھدی جا رہی اے۔پلس اتوں لوکاں دا یقین مک گیا اے۔کیوں جے محکمہ پلس وچ کرپشن تے بے ایمانی ثابت ہون مگروں وی محکمانہ طور تے سزا انج نہیں دتی جاندی جیویں دینی چاہیدی اے۔ قتل، اغوا برائے تاوان، ڈکیتی،گینگ ریپ تے منشیات ورگے کیساں وچ پیسے کھاکے کیس دا بیڑا غرق کرن والے پلس افسراں نوں سزا دے طور تے اک توں دوجھی تھاں تے بدل کے یا اِک دو سالاں لئی گھر بہا کے اوہدے سورن دا سوچیا جاندا اے۔ پر سورن والی گل اکثر جھوٹھی ثابت ہندی اے۔ایہ سزا کوئی وڈی سزا نہیں۔کیوں کہ اوہناں محکمے وچ رہ کے کمائی اینی کر لئی ہندی اے کہ معطل ہون نال اوہناں دیگھر دا چلہا بند نہیں ہندا بلکہ اوہ گھر رہ کے پراپرٹی،آڑھت یا کوئی ہور انج دا آرام نال کاروبار چھوہ لیندے نیں۔تے پھیر واپس محکمے دے اندر آن کے پہلے توں وی زیادہ گند گھولن لگ پیند ے نیں۔اک پلس والے دی بدلی کرکے دوجھی تھاں گھلن دا ایہ نتیجہ نکلدا اے کہ پہلاں اوہ اک علاقے وچ جرم دے مڈھیں پانی پا رہیا ہندا اے۔پھر دوجھی تھاں تے جاکے ایہو کرتوت گھولدا تے پیسے رولدا اے۔سزا ایہ ہونی چاہیدی اے کہ ایہو جئے لوکاں نوں باہر کڈھ کے محکمہ پاک کیتا جائے تاں جے ایہناں دے اندر دی پلیتی پورے محکمے نوں بدنام تے خراب نہ کرے۔ تے نہ ای ایہناں دے محکمے اندر رہن نال ایہناں دے بھیڑے کرتوت کلچر دا روپ دھار سکن۔
وڈھی کھان گِجھی ہوئی پلس اپنے رویے تے کرتوتاں نال پورے سماج نوں گندا تے مجرماں نوں ان جھک تے جرم کرن دا عادی بنا رہی اے۔جرم وچ پیرو پیر وادھا ہورہیا اے۔ جرم گھٹ نہیں رہیا۔وجہ ایہ اے کہ جرم نال مجرم لوکاں دا تے پلس دا رزق روٹی جڑیا ہویا اے۔جرم دے بوٹے دا پھل پلس دے محکمے دے وڈھی کھانے لوک تے مجرم آپس وچ رل مِل کے کھا رہے نیں۔میڈیا دی رپورٹ موجب 2019 وچ لوکاں نے پلس افسراں تے اہلکاراں دے وڈھی لین دیاں 4746 تے 2020 وچ 7975 شکائیتاں درج کروائیاں،اختیاراں دا ناجائز ورتارا کرن بارے 2019 وچ 3507 تے 2020 وچ 5854 شکائیتاں کِیتیاں۔قتل دی کوشش،قتل تے دوسرے کئی وڈے جرماں دے مقدمیاں دی غلط تفتیش بارے 2019 وچ 2516 جدوں کہ 2020 وچ 4299 شکائیتاں کِیتیاں نیں۔تھانیاں وچ جھوٹھے درج ہون والے مقدمے،وڈھی کھا کے مقدمیاں وچ گھاٹا وادھا تے تفتیش وچ لاپرواہی تے بے ایمانی ورتن وچ سیاسی لوکاں دی مداخلت تے کھِچ دھرو دا کارا وی وجہ بن دا اے۔ایس گل دی وی ڈاہڈی لوڑ اے کہ تھانیاں اندروں سیاسی مداخلت،ٹاوٹی تے مونہہ ملاحظے دی روائیت مکائی جاوے۔تاں جے پلس دا محکمہ بناون دے مقصد تے فیدے کدی تے کھل کے ساڈے سامنے آسکن۔تے سماج دے لوکی پلس دی آس تے سکھ دی نیندر سوں سکن۔٭٭