پارلیمنٹ دے اجلاس وچ حکومتی کامیابی

ہن پی ٹی آئی دی حکومت نوں اک ای فکر اے کہ مہنگائی نوں ہر صورت کنٹرول کر کے ایس دے جن نوں بوتل وچ بند کرنا اے
الیکٹرانک ووٹنگ مشین توں 80 فیصد فائدہ پی ٹی آئی نوں ای اپڑے گا ایس طرح آئندہ حکومت بنان وچ وی پی ٹی آئی نوں مشکل دا ساہمنا نہیں کرنا پئے گا

فیصل ادریس بٹ

پارلیمنٹ دے مشترکہ اجلاس وچ اپوزیشن دے احتجاج دے باوجود پی ٹی آئی دی حکومت 33 بل منظور کران وچ کامیاب ہو گئی۔ انتخابی اصلاحات دے حوالے نال بل اُتے متحدہ اپوزیشن نوں اعتراضات سن تے ایس حوالے نال 11 نومبر دے اجلاس توں پہلاں ای متحدہ اپوزیشن ولوں حکومتی اقدامات اُتے تنقید دا عمل جاری سی پر ہن حکومت واضح طور تے کامیاب ہو چکی اے تاں اپوزیشن دے اعتراضات وی موجود نیں پر ایس قانون سازی نال افواہواں دا بازار وی ٹھنڈا ہو گیا اے جیہڑا اک پیج دے بارے وچ قیاس کیتا جا رہیا سی اوہ وی ہن اپنی موت آپ مر چکیا اے کیوں جے اپوزیشن دا خیال سی کہ حکومت تے مقتدر حلقیاں وچ ادارہ جاتی ٹرانسفرز تے پوسٹنگ دے حوالے نال اختلافات ودھ چکے نیں ایس لئی ہن حکومت دا اقتدار ڈول رہیا اے۔ تے ہن قانون سازی دا عمل وی ممکن نہیں۔ پر وزیراعظم عمران خان دا اعتماد اپنی تھاں اُتے قائم دائم سی تے آخر کار حکومت نے ہدف حاصل کر لیا اے۔ ویکھنا ایہہ وے کہ کیہ واقعی اپوزیشن ہن ایس قانون سازی نوں اعلیٰ عدالتاں وچ چیلنج کرے گی یا فیر پرانی تنخواہ اُتے ای کم کردی رہوے گی۔ ایس عمل نال ہن اپوزیشن نوں وی اگے ودھدے ویلے سوچنا چاہیدا اے کہ اوہ آئندہ وی ایسے طرح دے سہاریاں اُتے عوام دے حقوق دی جنگ لڑن گے یا فیر کوئی پائیدار رستہ اختیار کرن گے؟ ہن تیکر تے اپوزیشن دی کارکردگی مایوس کن رہی اے تے حکومت دے اتحادی جنہاں دے متعلق تحفظات سن کہ اوہ ہن حکومت دا ساتھ چھڈ دین گے انج وی نہیں ہو سکیا جد کہ حکومت ہن مزید مضبوط ہو کے ایہہ دعویٰ کر رہی اے کہ اوہ ہن عوام دے مسائل حل کرے گی۔ ویکھنا ہوئے گا کہ حکومت نوں ملن والا ریلیف کیہ عوام دی تکلیفاں نوں وی گھٹ کرے گا یا عوام انج ای مہنگائی دی چکی وچ پسدے رہن گے۔
دوجے پاسے جے ویکھیا جائے تے مسلم لیگ نون دے قائد میاں نواز شریف دے حوالے نال پھیلائی جان والی خبراں کہ پنڈی دی اہم شخصیات دی لندن وچ ایہناں نال ملاقات ہوئی اے تے معاملات طے پا چکے نیں جہی خبراں وی دم توڑ رہیاں نیں۔ وزیراعظم عمران خان تے ایہناں دی کور ٹیم وفاقی وزیر اطلاعات و نشریات فواد چوہدری، وفاقی وزیر مملکت فرخ حبیب، وزیر خارجہ شاہ محمود قریشی، بابر اعوان، پرویز خٹک، شہریار آفریدی، ڈاکٹر شہباز گل تے شیخ رشید نے مل جل کے کپتان دی سربراہی وچ ٹونٹی 20 ورلڈ کپ اک وار جت لیا اے۔ وزیراعظم نے پارلیمنٹ دے مشترکہ اجلاس وچ حکومتی بلاں دی منظوری کروا کے اتحادی جماعتاں دی ناراضگی تے اسٹیبلشمنٹ دا اک پیج اُتے نہ ہون دی خبراں نوں وی زائل کر دتا اے۔ پارلیمنٹ دے مشترکہ اجلاس نوں کامیاب بنان دے حوالے نال جے وزیراعلیٰ پنجاب سردار عثمان بزدار دا ذکر نہ کیتا جائے تے ناانصافی ہوئے گی۔ سردار عثمان بزدار جنہاں نے دبئی ایکسپو 2020 وچ شرکت کرنی سی، اوہ پروگرام وی منسوخ کر دتا تے پنجاب تے خاص طور تے جنوبی پنجاب دے اوہ اراکین قومی اسمبلی جیہڑے پی ٹی آئی دی حکومت توں ناراض سن ایہناں دے گھراں وچ جا کے ایہناں نوں نہ صرف منایا بلکہ پارلیمنٹ دے مشترکہ اجلاس وچ شرکت کر کے بلاں دی منظوری بارے وی یقینی وعدے وعید لئے۔ وزیراعلیٰ پنجاب سردار عثمان بزدار مشترکہ پارلیمنٹ دے اجلاس توں اک دن پہلاں اسلام آباد چلے گئے سن جیہڑے رات گئے تیکر اوتھے قیام پذیر رہے۔ اپنے پچھلے کالم وچ تحریر کیتا سی کہ پی پی ٹی آئی نال مذاکرات لئی عثمان بزدار نوں ٹاسک دینا چاہیدا اے جیہڑا نہ صرف اپنے قبیلے دا سردار اے بلکہ اک دیہاتی کلچر پنجایت دی سمجھ بوجھ رکھن والا بندا اے۔ لگ ایہہ رہیا اے کہ اپوزیشن دے نال اک وار فیر ہتھ ہو گیا اے کیوں جے مشترکہ اجلاس وچ اپوزیشن دے رہنمائواں دی باڈی لینگویک ایس قدر ڈسٹرب نظر آئی جس نال ایہناں دے اندرونی حالات سمجھن وچ بوہت آسانی ہو رہی سی۔ سپیکر نال دھینگا مشتی، جھگڑا ایس گل دی نشاندہی سی کہ ایہناں نال کسے نے کجھ ہور گل کیتی اےتے گرائونڈ ریئلٹی اُتے کجھ ہور نظر آ رہیا اے۔ کجھ دن پہلے محسوس ہو رہیا سی کہ پاکستان تحریک انصاف دی حکومت کجھ دن دی مہمان اے بلکہ نگران وزیراعظم یا ان ہائوس تبدیلی دی صورت وچ دو ناں وی لکھے تے سدے جا رہے سن۔ جدوں گل ایتھوں تیکر اپڑ جائے تے اجلاس وچ حکومتی قوانین دی منظوری اپوزیشن رہنمائواں لئی اک بوہت وڈاسانحہ اے۔ پی ٹی آئی دی حکومت وچ اپنے قوانین دی منظوری کامیابی نال کروا لئی اے۔ ہن پی ٹی آئی دی حکومت وزیراعظم وزراء اعلیٰ تے وفاقی تے صوبائی وزراء نوں اک کم اُتے ہماتن گوش ہو جاندا اے کہ مہنگائی نوں ہر صورت کنٹرول کر کے ایس دے جن نوں بوتل وچ بند کرنا اے۔ جے انج کرن وچ پی ٹی آئی کامیاب ہو جاندی اے تے ایس وچ کوئی شک نہیں کہ الیکٹرانک ووٹنگ مشین توں 80 فیصد فائدہ پی ٹی آئی نوں ای اپڑے گا ایس طرح آئندہ حکومت بنان وچ وی پی ٹی آئی نوں مشکل دا ساہمنا نہیں کرنا پئے گا۔