حکمران تے سرکاری ’’حکمران‘‘

شکیل امجد صادق

اک کسان کول اک باندر سی تے اوہ کسان دے وکھووکھ کماں وچ اوہدا ہتھ وی ونڈاندا سی۔ کسان نوں باندر دا بڑا آرام تے سکھ سی۔ باندر دے نال نال کسان نے اک کھوتا وی رکھیا ہویا سی تے کئی کم کھوتے توں وی لیندا سی۔ باندر کیوں جے فطرتی طور تے شرارتی جانور اے۔ باندر رات نوں کچن وچ جا کے آٹا کھا جاندا تے واپسی تے کجھ آٹا لیا کے کھوتے دے منہ تے مل دیندا تے آپ آرام نال سوں جاندا۔ سویرے مالک اٹھ کے آٹا تھوڑا پا کے کھوتے دی چھترول کر دیندا جد کہ باندر دور بیٹھا دنداں وچ تیلی مار رہیا ہوندا تے دل ای دل وچ اپنی چالاکی تے خوش ہوندا۔ ایہو کجھ لوکاں دے نال ہو رہیا اے۔ حکمران تے سرکاری ’’حکمران‘‘ لوکاں دے پیسیاں تے عیاشی کردے ہوئے دور بیٹھے دنداں وچ تیلی مار رہے نیں۔ پٹرول تو ںاکٹھے ہون والے ارباں روپیے دے ٹیکس اپنے پروٹوکول تے سکیورٹی تے خرچ کرن دے بعد وی لوکاں نوں ایہ آکھ کے ذلیل کر رہے نیں کہ ایہ ٹیکس نہیں دیندے۔ اوہو عوام ارباں روپیے ایہناں حکمراناں دی سکیورٹی تے پروٹوکول تے خرچ کرن دے بعد کسے حادثے دی صورت وچ اپنے واسطے کسے چیریٹی دی ایمبولینس لبھ رہے ہوندے نیں۔
ایسے طرح اک میراثی بیمار ہو گیا ڈاکٹر کول گیا تے اوہنے بہت زیادہ فیس منگی بڑیاں منتاں کرن تے وی ڈاکٹر نے اوہنوں رعایت نہ دتی تے پورے پیسے لئے جدوں اوہ صحت مند ہو گیا تے ہن اوہ سارے پنڈ وچ ڈاکٹر بارے لوکاں نوں قصے سناندا پھردا سی۔ میں خواب وچ مر گیا تے فرشتے مینوں اسماناں تے لے گئے اوتھے جا کے میں اوہناں نوں کہیا کہ مینوں چھڈ دیو‘ مینوں پتہ اے کہ میں کدھر جانا اے اوہناں نے مینوں چھڈ دتا ساری زندگی نیکی دا کم کوئی نہیں سی کیتا ایہو سوچ کے میں نیویں پا کے دوزخ ول ٹر پیا۔
دروازہ کھڑکایا تے دوزخ دے فرشتے نے کھڑکی وچوں سر باہر کڈھیافرشتہ: ’’کیہ گل اے‘‘؟مراثی: ’’میں نواں نواں مریا واں، تے اندر آنا ایں فرشتہ: ’’ناں کیہ تیرا’’مراثی:پھجا مراثی‘‘ فرشتے نے دوزخیاں دی ساری لسٹ ویکھی، کدھرے وی میرا ناں نہ ملیا۔میں بڑا خوش، اْوتھوں مْڑ کے میں جنت ول ٹر پیا۔
جنت دا دروازہ کھڑکایا تے اوتھوں دے فرشتے نے کھڑکی وچوں سر باہر کڈھیافرشتہ: ’’کیہ گل اے‘‘؟ مراثی: ’’میں نواں نواں مریا واں، دوزخ ول میرا ناں نہیں ملیا، تے مینوں اندر آون دیو۔فرشتہ: ’’ناں کیہ تیرا‘‘ مراثی: ’’پھجا مراثی‘‘ فرشتے نے جنتیاں دی ساری لسٹ دیکھی، میرا ناں لبھدیاں اودھے پسینے چھٹ گئے پر کِدھرے وی میرا ناں نہ لبھیا۔ اونے دس کے فٹا فٹ کھڑکی بند کر دتی ہْن میں بڑا پریشان کہ کدھر جاواں۔ٹردا ٹردا جدوں اوس تھاں پہنچیا جتھے فرشتیاں مینوں چھڈیا سی تے مینوں چودھری جی دِسے۔چودھری جی: اوہ پھجیا، حرامدیا، ایدھر کیہ کردا پیا ایں؟مراثی: چودھری جی کیہ دساں۔ نواں نواں مریا واں تے میرا ناں دوزخ تے جنت وچ کدھرے وی نہیں ملدا پیاتے سمجھ نہیں آؤندی ہن میں کتھے جاواں!چودھری جی: اْوئے پھجیا توں کدھرے ڈاکٹر بشیر کولوں تے علاج نہیں سی کرایا؟ اوہ ٹائم پورا ہوون توں 4 سال پہلاں ای بندے نوں مار دیندا اے مینوں آپ 2 سال ہو گئے باہر ای پھردے نوں۔
جے دو ورھے ہور حکومت دی ایہو صورتحال رہی تے مہنگائی تے کنٹرول نہ ہویا‘ مافیاز تے ہتھ نہ پایا گیا‘ چور بازاری ختم نہ ہوئی‘ قیمتاں کنٹرول نہ ہوئیاں‘ لاقانونیت تے قابو نہ پایا گیا تے پوری امید اے ادھی عوام وقت توں پہلاں خودکشی کر لوے گی تے باقی ادھی سر تے کفن بنھ کے مرن دی تیاری کر رہی ہووے گی: بقول غالب
آج واں تیغ و کفن باندھے ہوئے جاتا ہوں میں
عذر میرے قتل کرنے میں وہ اب لائیں گے کیا