ایہناں نوں کم کرن دیو!

مظہر برلاس

آکسفورڈ یونیورسٹی وچ پڑھان والے عظیم پاکستانی پروفیسر عدیل ملک نے اپنے وطن تے ہم وطناں لئی آکسفورڈ پاکستان پروگرام شروع کیتا اے۔ پچھلے کالم وچ ایہدا تذکرہ کیتا تے دنیا بھر توں پاکستانیاں نے خوشی دا ظہار کیتا۔ جہڑے لوک اپنی دھرتی لئی کم کردے نیں اوہناں دا نہ صرف ذکر ہونا چاہیدا اے سگو ںاوہناں دی حوصلہ افزائی وی ہونی چاہیدی اے۔ اک ورھے پہلاں المصطفیٰ آئی ہسپتال دی افتتاحی تقریب وچ شرکت دا موقع ملیا سی۔ ایہ ہسپتال لوکاں دی بھرویں خدمت کر رہیا اے۔ المصطفیٰ ٹرسٹ دے سربراہ عبدالرزاق ساجد سارا سال سرگرم رہندے نیں تے اوہناں دے ہاں خدمت دا ایہ جذبہ وی سارا سال زندہ رہندا اے۔ ایسے طرح مسلم ہینڈز دے سربراہ پیر سید لخت حسنین دنیا بھر دے مسلمان ملکاں وچ متحرک نظر آئوندے نیں ایہ کم پاکستان وچ اوہناں دے بھائی سید ضیاالنور نبھاندے نیں۔ انج تے اوہناں نے پوری دنیا وچ ادارے قائم کر رکھے نیں پر اپنے آبائی قصبے سوہدرہ وچ بڑے شاندار تعلیمی ادارے قائم کیتے نیں۔ ایہ کم خالصتاً خدمت دے جذبے نال کیتا گیا اے۔
لہور وچ بزرگ شہریاں لئی کومل سلیم نے شاندار ادارہ بنایا اے۔ الخدمت دی خدمت نوں وی نہیں بھلایا جا سکدا۔ ایدھی ویلفیئر ٹرسٹ دی خدمات نوں یاد کیتے بناں خدمت دے سفر دی کہانی مکمل نہیں ہوندی۔ چھیپا دی خدمات وی شاندار نیں۔ بلوچستان اسمبلی دی سابق رکن فرخ عظیم شاہ دی تنظیم ایمان پاکستان پورے صوبہ بلوچستان وچ فلاحی تعلیمی ادارے قائم کر رہی اے۔ ایہناں تعلیمی اداریاں وچ عالمی مستند اصولاں دے تحت ابتدائی تعلیم مادری زباناں وچ دتی جاوے گی۔ ایس مقصد لئی اوہناں نوں اک ہور رکن اسمبلی ثمینہ سعید دا وی ساتھ حاصل اے۔ کراچی یونیورسٹی دے استاد پروفیسر ڈاکٹر عبدالرشید بین الاقوامی روحانی کونسل دے سربراہ نیں اوہ دنیا بھر وچ انساناں دی اصلاح لئی نہ صرف کم کر رہے نیں سگوں اعلیٰ اخلاقی بنیاداں تے روحاں نوں تازہ وی کر رہے نیں۔ ایسے طرح تھیلیسمیا وچ مبتلا بچیاں لئی کم کرن والے ادارے سندس فائونڈیشن دے سربراہ محمد یٰسین خان ہر ویلے خدمت دے جذبے دے تحت کم کر رہے نیں۔ زمرد خان نے یتیم بچیاں لئی ہوم سویٹ ہوم بنا رکھیا اے۔ پیر ضیاالحق نقشبندی نے غریب‘ نادار تے مستحق طلبہ دی رہنمائی لئی خوبصورت ادارہ قائم کیتا اے۔ ڈاکٹر امجدثاقب دی خدمات توں کون واقف نہیں۔ اسلامی نظریاتی کونسل وچ بطور رکن لمے عرصے توں خدمات نبھان والے علامہ افتخارحسین نقوی دراڈے علاقیاں وچ پین دے پانی دی فراہمی دا بندوبست کر رہے نیں جدوں اوہناں نے پہلے پہل ایس کم دا آغاز کیتا تے راجن پور وچ لوگ سفید پانی ویکھن لئی اکٹھے ہو گئے سن۔
ایہ ساریاں گلاں مینوں ایس لئی یاد آ رہیاں نیں کہ حال ای وچ افضل چوہدری نوں پنجاب دی انسانی حقوق تے بین الاقوامی ہم آہنگی دی وزارت نے خصوصی مشیر مقرر کیتا اے۔ اوہ دنیا نوں دسن گے کہ ساڈے ملک وچ انسانی حقوق دا کناں پاس کیتا جاندا اے۔ ساڈے ایتھے کنی بین المذاہب ہم آہنگی موجود اے۔ افضل چوہدری بنیادی طور تے دانشور تے لکھاری نیں تے لمے عرصے توں مغربی دنیا وچ بین المذاہب ہم آہنگی تے کم کر رہے نیں۔ افضل چوہدری بھاویں چہکدی کتاباں دے لکھاری نیں پر اوہناں دی مذہبی ہم آہنگی تے انسانیت تے لکھیاں جان والیاں دو کتاباں تلاش تے میں اور تم واہوا شہرت رکھدیاں نیں۔ ملکی تے غیرملکی یونیورسٹیاں توں علاوہ یونیسکو تے او آئی سی ورگے پلیٹ فارماں تے امن دے مسافر دی حیثیت نال درس دین والے افضل چوہدری برطانوی پارلیمنٹ وچ وی امن دے سفیر دے طورتے جانے جاندے نیں۔ اوہناں دا ادارہ سرچ پیس فائونڈیشن انسانیت‘ امن تے مذہبی ہم آہنگی لئی سیمینار تے تقریباں کروان دے حوالے نال مشہور اے۔
کم کوئی وی کر سکدا اے میں عمران خان دے سیاسی کردار تے گل نہیں کر رہیا پر سماجی حوالیاں نال ایہ گل تے قابل تعریف اے کہ عمران خان نے پاکستان ورگے ملک وچ کینسر ہسپتال بنایا۔ ہسپتال دے نال نال اوہناں نے میانوالی وچ شاندار تعلیمی ادارہ وی قائم کیتا۔ جتھے مستحق طلبہ اوہ تعلیم حاصل کر رہے نیں جہدا اوہ تصور وی نہیں سن کر سکدے۔ حکومتاں وچ شامل کجھ وزراء بڑے کم کردے نیں تے کجھ صرف مصروف نظر آئوندے نیں۔ مذہبی امور دے وفاقی وزیر نورالحق قادری نے پچھلے تن ورھیاں وچ شاندار کم کیتا اے۔ اوہناں نے جتھے حج‘ عمرہ تے زیارات تے جان والیاں لئی شاندار کم کیتا کربلا معلی وچ پاکستان ہائوس قائم کیتا‘ سفری سوکھتاں پیدا کیتیاں‘ اقلیتاں دیاں مقدس تھاواں تے سہولتاں لئی وی بھرواں کم کیتا۔ عیسائیاں‘ ہندوئواں دے تہواراں تے خدمات نبھائیاں‘ سکھاں لئی بند دروازے کھول دتے۔ ایسے طرح بدھ ازم دیاں مقدس تھاواں تے وی سہولتاں نوں یقینی بنایا۔
اطلاعات دے وفاقی وزیر فواد چوہدری اپنی وزارت وچ جدت دی غرض نال کجھ منصوبے شروع کرن والے نیں پر اوہ اصل خدمت جہلم دے لوکاں دی کر رہے نیں۔ مصروفیات پاروں اوہناں نے اجیہا اہتمام کر رکھیا اے کہ اوہناں دے برادر عزیز فراز چوہدری ہر ویلے لوکاں نال رابطے وچ رہندے نیں۔ جہلم وچ انڈسٹری‘ سڑکاں تے ادارے بن رہے نیں۔ اسلام آباد لئی علی اعوان چنگا کم کر رہے نیں‘ جے ایتھے پنجاب دے انسانی حقوق تے اقلیتی معاملیاں دے وزیر اعجاز عالم آگسٹن دی گل نہ کیتی گئی تے گل ادھوری رہ جاوے گی۔ اوہناں نے کوشش کرکے ایچ ای سی توں پہلی واری تعلیمی اداریاں وچ اقلیتاں لئی دوفیصد کوٹہ مختص کروایا اے‘ یوحنا آباد نوں ماڈل ٹائون بنوا رہے نیں۔
دوستو! جو وی ایس وطن لئی کم کرے گا اوہ لوکا ںدیاں نظراں وچ محترم ہو جاوے گا۔ جہڑے لوک وطن لئی کم کر رہے نیں اوہناں دی حوصلہ افزائی کرو‘ اوہناں نوں کم کرن دیو کہ بقول پروفیسر سعیداکرم:
نگاہِ ناز، نگاہِ نیاز بن جائے
خیال و خواب کا کچھ تو جواز بن جائے