شیر دا کلین سویپ

حناپرویزبٹ

مہنگے پٹرول دی گردان دا چرچا ہر پاسے ہو رہیا اے پر کئی ہور سوالات وی غور طلب نیں۔ پہلا عوامی سوال ایہہ وے کہ کپاہ دی پیداوار وچ چوتھے وڈے ملک دا اعزاز رکھن دے باوجود لوکاں دی اکثریت تن کجن لئی چنگا کپڑا خریدن توں وی قاصر ہو چکی اے ایہدا اپاء کیویں ہووے گا؟ دوجا عوامی سوال ایہہ وے کہ محکمہ زراعت بار بار ایہ دہراندا رہندا اے کہ گنے دی پیداوار وچ پوری دنیا وچ ساڈا پنجواں نمبر اے ایس واری سانوں بمپر فصل حاصل ہوئی کیہ فائدہ ایس پنجویں نمبر تے بمپر کراپ دا جدوں سانوں سستی چینی ای دستیاب نہیں۔ پشاور سنے کئی شہراں وچ ڈیڑھ سو روپیے کلو چینی دی خبر تے ڈاڈھا ہیجان پیدا ہو گیا اے کہ معاملہ کتھوں تک جاوے گا؟ تریجا سوال ایہہ وے کہ کنک دی کاشت وچ اٹھویں نمبر دا اساں کیہ کرنا اے کہ جدوں سانوں نہ سستی روٹی ملنی اے نہ سستا تے خالص آٹا‘ ہن تے صورتحال آٹے دی عدم دستیابی تک آ گئی اے۔ چوتھا عوامی سوال ایہہ وے کہ کیہ اسیں چاول دی پیداوار وچ اپنے دسویں مقام نوں چٹیے‘ سانوں تے چنگا چاول دو سو روپیے کلو توں گھٹ نہیں مل رہیا جد کہ عام بندہ تے چنگے چاول توں ٹوٹا چاول تے منتقل ہو گیا اے۔
اپوزیشن ولوں لانگ مارچ تے دھرنے دے سارے پتے ترتیب دتے جا رہے نیں مولانا فضل الرحمن دا ایس لانگ مارچ وچ مڈھلا کردار ہووے گا کیوں جے اوہ پہلے دن توں اک مضبوط تے مستحکم موقف رکھدے نیں جہدے تے بوجوہ عمل ممکن نہ ہو سکیا پر ایس حوالے نال میاں نوازشریف دی پالیسی تے دوراندیشی نے ثابت کر دتا اے کہ اوہ کنے ٹھیک سن‘ سب کجھ اللہ تے چھڈن دا اوہناں دا اعلان کناں ٹھیک ثابت ہویا۔ شریف خاندان دے وچکار اختلاف دی شرلی چھڈن دیاں کوششاں اجے وی جاری نیں حملہ آور نہیں سن جاندے کہ مدمقابل کنے مضبوط اعصاب دا مالک اے تے ویلے نے ثابت کر دتا کہ اوہنوں گراندے گراندے سارے حملہ آور آپ عوام دیاں نظراں وچ اینے گر گئے نیں کہ اوہناں نوں نسن دی راہ نہیں مل رہی۔ اقتصادی ترقی برپا کرن دے دعویاں وچوں اک وی حاصل نہ ہو سکیا لوکاں دا ایہ حال اے کہ اوہ دیوالیہ ہو چکے نیں گھراں دے خواب کیہ پورے ہوندے‘ ملکی کنسٹرکشن انڈسٹری نے مدد دی اپیل کیتی اے کہ اسیں موت دے کنڈھے تے اپڑ چکے آں۔ سریا76فیصد‘ سیمنٹ 52فیصد‘ ایلومینیم 74فیصد تے بجلی دی تار 43فیصد مہنگی ہو چکی اے۔ تعمیراتی سرگرمیاں عملی طور تے رک چکیاں نیں۔ سارے جان دے نیں کہ کنہے مہنگائی تے کنٹرول کیتا سی کس وزیر خزانہ نے کس طرح فوکس رہندے ہوئے اپنے ٹارگٹ کامیابی نال حاصل کیتے کہدی پالیسی تے کہدی عملیت پسندی نے پاکستان نوں ترقی دی راہ تے پا کے مہنگائی دی شرح تن فیصد کر دتی سی۔
دنیا دے اقتصادی اداریاں نے ایہنوں پاکستان دی تریخ وچ مہنگائی دی گھٹ ترین شرح قرار دتا سی ساریاں اوکڑاں دے باوجود ڈالر نوں سو دی نفسیاتی حد دے کول کول کنٹرول کیتا سی ترقی دی شرح چھ فیصد دے نیڑے ہو گئی سی حقیقی گیم چینجر منصوبے سی پیک تے کم جاری سی کراچی نوں فیر روشنیاں دا شہر بنایا سی۔ رسہ گیراں تے لٹیریاں نوں شہر بدر تے جیلاں وچ سٹ دتا گیا سی اوس دور وچ ایناں معاشی استحکام برپا کیتا گیا کہ کراچی سٹاک ایکسچینج ایشیا وچ پہلے نمبر تے پہنچ کے ہر دن نویں ہدف حاصل کر رہیا سی۔ امریکی ڈومور دی گردان دم توڑ چکی سی آئی ایم ایف توں چھٹکارا حاصل ہو چکیا سی۔ معاشی اشاریے ٹھوس تے دل آویز سن۔ پاکستان 2030ء تک ایشیا دی وڈی اقتصادی طاقت بنن جا رہیا سی۔ وڈے وڈے منصوبے لا کے کئی ورھیاں توں جاری بجلی تے گیس دی لوڈشیڈنگ وی ختم کر دتی گئی سی۔ لوک جان دے نیں کہ کنہے گلی گلی گونجدے دھماکیاں توں نجات دوائی‘ کنہے میداناں دیاں رونقاں بحال کرن لئی اک جنونی بندے نوں چیئرمین کرکٹ بورڈ لایا جنہے دن رات اک کرکے پاکستان سپرلیگ لانچ کیتی۔ صاف صاف نظر آ رہیا سی کہ اک روشن طاقتور پاکستان ابھرنا شروع ہو گیا سی موجودہ بدترین حالات وچ اک واری فیر لوکاں نے عام انتخابات نال امیداں جوڑ لئیاں نیں بلدیاتی انتخابات دے نتیجیاں توں ظاہر ہو رہیا اے کہ اگلے عام انتخابات وچ شیر ای کلین سویپ کرے گا۔ ٭٭