پنجاب حکومت دا اک چنگا کم

پنجاب حکومت نے جدوں دوجے تاریخی مقامات دی بحالی لئی کم شروع کیتا تے ایس باغ، بارہ دری تے لائبریری دی قسمت وی جاگ پئی
تے اسسٹنٹ کمشنر ہیڈ کوارٹر جناب شبیر حسین بٹ دی ذاتی دلچسپی نال اک وار فیر ایہنوں پوری آب و تاب نال آباد کرن دی کوشش شروع ہو گئی

عتیق انور راجا

کجھ سال پہلے ایہہ خبر پڑھن نوں ملی کہ تحصیل میونسپل ایڈمنسٹریٹر نے شیرانوالہ باغ وچ مہاراجہ رنجیت سنگھ بارہ دری نوں اصلی حالت وچ دوبارہ تعمیر کرن ئی محکمہ آثار قدیمہ توں قدیمی نقشہ منگوا لیا اے۔ ایہہ خبر نوں پڑھ دے بوہت سارے شہری خوشگوار کیفیت وچ مبتلا نظر آئے۔ کجھ دیر بعد کجھ کم ہویا وی ضرور پر فیر افسراں دی ترجیحات بدل گئیاں تے اوہ ایس تاریخی ورثے نوں اوہ اہمیت نہ دے سکے جیہڑا ایس دا حق سی۔ شہر دے وسط وچ ہون دی وجہ نال میرا ایس باغ تے لائبریری وچ اک عرصے توں آنا جانا لگیا رہیا اے تے میں پچھلی کئی ورھیاں توں شہر دے ادیباں و شاعراں نوں دعوت دیندا چلا آ رہیا واں کہ ہفتہ وار یا گھٹ توں گھٹ ماہانہ اک ادبی محفل شیرانوالہ باغ دی بارہ دری وچ رکھی جائے ۔ اسیں سابق انتظامیہ توں ایس سلسلے وچ گل بات کیتی پر سکیورٹی وجوہات دی بنا اُتے ایس بارہ دری وچ مشاعرے یا موسیقی دی محفل سجان دی اجازت نہ مل سکی۔ اک ویلا سی کہ شہریاں دی اک کثیر تعداد شیخ دین محمد پبلک لائبریری توں استفادہ کیتا کردی سی پر پچھلے کئی ورھیاں توں ایس دی خستہ حالی آپ کسے سائبان دی تلاش وچ سی۔ لائبریری دی ظاہری عمارت ویکھ کے طالب علماں نے ایدھے آنا چھڈ دتا۔ سکیورٹی تے روشنی دا مناسب انتظام نہ ہون دی وجہ نال باغ تے بارہ دری نشئیاں تے تماش بیناں دا پسندیدہ مقام سی۔ پنجاب حکومت نے جدوں دوجے تاریخی مقامات دی بحالی لئی کم شروع کیتا تے ایس باغ، بارہ دری تے لائبریری دی قسمت وی جاگ پئی تے اسسٹنٹ کمشنر ہیڈ کوارٹر جناب شبیر حسین بٹ دی ذاتی دلچسپی نال اک وار فیر ایہنوں پوری آب و تاب نال آباد کرن دی کوشش شروع ہو گئی۔ بٹ صاحب نے سانوں یقین دلوایا کہ نہ صرف اوہ بلکہ ساری انتظامیہ ادبی و ثقافتی تقریبات منعقد کرن والیاں دے نال کھڑے نظر آئے گی۔ ہن لائبریری وچ ادبی تے بارہ دری وچ ثقافتی محفلاں منعقد ہو رہیاں نیں جنہاں وچ اے سی شبیر بٹ صاحب بڑی محبت نال شریک ہو رہے نیں تے پچھلے مہینے ایہناں ای دے حکم، تجویز تے راہنمائی وچ بارہ دری وچ اک محفل سماع تے اک تصویری نمائش دا انعقاد کیتا جا چکیا اے۔ شبیر بٹ صاحب باغ، بارہ دری تے لائبریری دی بہتری لئی پرجوش نیں تے ڈپٹی کمشنر گوجرانوالہ جناب دانش افضال ایس باغ وچ اک مستقل ادبی گوشہ تے چائے خانہ بنان دی نوید سنا رہے نیں۔ ہر دور وچ نوجواناں وچ ادبی ذوق نوں پروان چڑھان وچ ادبی بیٹھکاں تے ٹی ہائوسز نے بوہت اہم کردار ادا کیتا اے۔ اک زمانے وچ گوجرانوالہ سٹی ریلوے اسٹیشن دے ساہمنے ٹی ہائوس آباد سی۔ جد کہ ریلوے اسٹیشن دے اندر واقع ٹی ہائوس وی ایس قسم دی سرگرمیاں دا مرکز رہیا اے۔ اک عرصہ توں ایہہ محفلاں سونیاں پئیاں سن۔ کجھ دوست اپنے طور تے ادبی محفلاں دا انعقاد کردے رہندے نیں پر ایہناں دی محدودیت ایہناں دی افادیت وچ رکاوٹ سی۔ ٹی ہائوس قسم دے کھلے مقامات وچ ہر بندا بلا روک ٹوک آ جاندا سی تے سیاسی، ادبی تے فکری اختلافات دے باوجود باہم مل بیٹھن وچ کوئی حجاب نہیں ہوندا سی جد کہ دل دی بھڑاس کڈن دے نال نال سنجیدہ غور و فکر دا موقع وی مل جاندا سی۔ ہن جے انتظامیہ بارہ داری وچ اک ادبی گوشہ تے اک ٹی ہائوس بنان دی خوش خبری سنا رہی اے تے بوہت امید اے کہ ایہہ باغ، بارہ دری تے لائبریری نوجواناں دی ذہنی و فکری تربیت وچ اہم کردار ادا کرے گی۔ بس کرنا ایہہ وے کہ باغ دی صفائی ستھرائی اُتے خاص دھیان دتا جائے روشنی دا خاص طور تے بارہ دری وچ بہتر انتظام کیتا جائے تے انتظامیہ، شہر دے معززین تے ادبی تنظیماں نوں ملا کے اک کمیٹی بنا دتی جائے جیہڑی ایتھے مستقل محفلاں سمجھاندے رہن۔ شہر دے مرکز وچ جی ٹی روڈ اُتے واقع ہون نال شیرانوالہ باغ بارہ دری تے لائبریری دی اہمیت ہور وی ودھ جاندی اے۔ اج شاید بوہت سارے نوجواناں نوں ایہہ گل یاد وی نہ ہوئے کہ ایس تاریخی بارہ دری وچ کنہاں کنہاں ہستیاں نے اپنے پیر رکھے نیں۔ مہاراجہ رنجیت سنگھ دے باپ مہاسنگھ دی بارہ دری دے چبوترے توں شہر دی ہر سیاسی تے سماجی تحریک دا آغاز ہویا کردا سی۔ ایس بارہ دری اُتے قائداعظم، محترمہ فاطمہ جناح، مولانا عطا اللہ شاہ بخاری تے پنڈت نہرو جہے سیاستداناں نے خطابت دے جھنڈے لائے نیں۔ سب کجھ ممکن اے جے خلوص نیت نال کوشش کیتی جائے۔ ایہہ بارہ دری ایس دور دی یاد گار اے جدوں مہاراجہ رنجیت سنگھ نے لہور فتح کرن توں پہلاں گوجرانوالہ نوں اپنا عارضی دارالحکومت بنا رکھیا سی۔ رنجیت سنگھ اوہ واحد پنجابی حکمران ہوئے نیں جنہاں نے ملتان توں پشاور تیکر پورے طمطراق نال حکومت کیتی سی۔