اوورسیز پاکستانی، ای وی ایم تے اصل حقائق

مطلوب وڑایچ

پاکستان دی معیشت وچ بیرون ملک موجود پاکستانیاں دا بہت وڈا حصہ اے۔ ملک وچ کسے وجہ نال صورتحال خراب ہووے‘ معیشت ماڑی ہووے اوس دوران تارکین وطن ولوں پاکستان لئی مستقل ترسیلات جاری رہندیاں نیں جہدے پاروں پاکستان دی معیشت کدی وی ڈبی اے تے نہ ای ملک دیوالیہ ہویا اے۔ اوورسیز پاکستانیاں نوں بیرون ملک تے اپنے ملک وچ وی مسئلیاں دا سامنا رہندا اے۔ اکثر ملکاں وچ پاکستانی سفارتخانے اپنی ذمہ داری پوری نہیں کردے۔ ملک دے اندر اکثر اوورسیز پاکستانیاں دیاں جائیداداں تے قبضہ ہو جاندا اے۔ اوہناں دے نال فراڈ تے دھوکھا دہی دے کئی واقعات سامنے آ چکے نیں۔ ایس سب دے باوجود ایہ لوک ترسیلات زر وچ کمی نہیں آن دیندے۔ موجودہ حکومت سنے ماضی دی ہر حکومت نے اوورسیز پاکستانیاں دے مسئلے حل کران دی گل کیتی ایس حوالے نال کوششاں وی کیتیاں گئیاں جو نکافی ثابت ہوئیاں پر موجودہ حکومت نے بیرون ملک موجود پاکستانیاں نوں ووٹ دا حق دے کے جتھے اپنا وعدہ نبھایا اوتھے اک معرکہ وی مار لیا۔ سمندر پار پاکستانیاں دے ووٹ دے حق دی حمایت ہر پارٹی ولوں کیتی جاندی رہی اے پر جدوں عمران خان حکومت نے ایس حوالے نال پیش رفت کیتی تے اپوزیشن مخالفت وچ خم ٹھونک کے کھڑی ہو گئی۔ حکومت نوں اپوزیشن دے اجہے عزائم ویکھدے ہوئے قنون سازی لئی پارلیمنٹ دا سانجھا اجلاس سدنا پیا جتھے نوازشریف‘ شہباز تے مریم‘ عمران خان تے زرداری دے بیان ریکارڈ تے نیں کہ اوورسیز پاکستانیاں نوں ووٹ دا حق ملنا چاہیدا اے۔ ایہ اوس دور دیاں گلاں نیں جدوں ایہ لوک اپوزیشن وچ سن۔ ن لیگ تے پی پی حکومت وچ آئیاں تے اپنے ایس وعدے نوں بھلا دتا جد کہ عمران خان نے ایس معاملے نوں اگے ودھایا تے اپوزیشن پی ڈی ایم دی صورت وچ دم تے کھڑی ہو گئی۔
اوورسیز پاکستانی کسے اک پارٹی دے حمایتی نہیں اوہ اول و آخر پاکستانی نیں اوہناں لئی جو پارٹی قابل قبول ہووے گی اوہنوں ووٹ دیاں گے۔ مخالفت کرن والے پارٹیاں آپ اندازا کر لوو کہ اوہناں نے خود قابل قبول بنایا اے یاں اوہناں دی نفرت مول لئی اے۔ اپوزیشن ولوں الیکٹرانک ووٹنگ مشین دی مخالفت کیتی جا رہی اے۔ حکومت ای وی ایم نوں انتخابات وچ شفافیت نوں یقینی بنان دا ذریعہ قرار دیندی اے۔ اپوزیشن ایہنوں دھاندلی دا منصوبہ کہہ رہی اے۔ دنیا دے اکثر جمہوری ملکاں وچ ای وی ایم دے راہیں ای الیکشن ہوندے نیں۔ سسٹم بھیڑے نہیں ہوندے ایہنوں استعمال کرن والیاں دی نیت وچ فتور ہووے تے معاملے گڑ بڑ ہو جاندے نیں۔ پاکستان وچ انتخابات توں پہلاں ای دھاندلی دا رولا پے جاندا اے۔ ہر اپوزیشن انتخابی عمل تے تحفظات دا اظہار کردی رہی اے۔ عمران خان اپوزیشن وچ سن تے اوہ وی انج ای کہندے سن۔ اوہناں ولوں شفافیت لئی ای وی ایم لیاندی گئی اے۔ اپوزیشن ایہدی ڈھیر مخالفت کر رہی اے۔ اصل وچ الیکشن وچ شفافیت چاہیدی اے۔ اپوزیشن نوں مروجہ انتخابی عمل تے اعتراضات نیں۔ ہن ای وی ایم نوں وی رد کر دتا اے تے فیر اپوزیشن دس دیوے کہ انتخابی عمل نوں کس طرح شفاف بنایا جا سکدا اے۔ اپوزیشن دے اہم لیڈراں نوں شاید یاد نہیں رہندا کہ انتخابات کوئی وی منتخب حکومت نہیں کراندی نگران حکومت کراندی اے ایس لئی کیویں ممکن اے کہ اوہ عمران خان دی حمایت وچ ای وی ایم نوں استعمال کرن دی اجازت دیوے گی۔
دوستو! میں تقریباً چار دہائیاں توں یورپ تے مغربی ملکاں وچ رہ رہیا واں۔ میں ایتھوں دے انتخابی سسٹم نوں بڑا نیڑیوں ویکھیا اے۔ پی ٹی آئی دے وزراء ایہ کیویں کلیم کر سکدے نیں کہ پی ٹی آئی اوورسیز پاکستانیاں دے 90فیصد ووٹاں نوں حاصل کر سکے گی۔ میں ایتھے اک اعدادوشمار دے راہیں ایہ ثابت کرنا واں مثلاً کینیڈا وچ رہن والے کل پاکستانیاں دی گنتی ایس ویلے تقریباً ست لکھ دے نیڑے اے جد کہ پی ٹی آئی نے انٹرا پارٹی الیکشن کینیڈا وچ منعقد کروائے تے بڑی بھج نس دے بعد صرف 2900 ووٹراں نوں اپنا ممبر رجسٹر کروا سکی جد کہ امریکہ وچ تقریباً 12توں 14لاکھ پاکستانی رہندے نیں۔ جد کہ امریکہ وچ پی ٹی آئی دے رجسٹر ووٹاں دی گنتی 5800 اے جد کہ برطانیہ وچ 20 لکھ توں ودھ اوورسیز پاکستانی رہندے نیں تے بڑی بھج نس کر کے پی ٹی آئی دے 6600 ووٹ رجسٹرڈ ہوئے۔ ایہو حال تقریباً یورپ دے دوجے ملکاں وچ اے۔
میرے ذاتی مشاہدے تے چار دہائیاں تے مشتمل اوورسیز تجزبے دی بنیاد تے میں کھلا ڈلھا کہہ سکنا واں کہ اگلے الیکشن وچ پی ٹی آئی اوورسیز پاکستانیاں دے صرف دس فیصد ووٹ حاصل کر سکے گی۔ پاکستان وچ نجی چینل تے بہہ کے اعدادوشمار دا تخمینہ نہیں لایا جا سکدا ایس لئی مشاہدے تے تجربے دی لوڑ ہوندی اے۔٭