عاصمہ جہانگیر کانفرنس تے اِدارے

تحریر حمیداللہ بھٹی

عاصمہ جہانگیر کانفرنس وچ کئی اجیہے مقررین نوں خاص طور تے مدعو کیتا گیا جنہاں دی واحد وجہ شہرت اداریاں دی تضحیک اے تے اداریاں اُتے گرجن تے برسن والے ایہہ لوک اپنی یاوہ گوئی نوں اظہار دی آزادی دا لقب دیندے نیں پر ایہہ کسے طور آزادی اظہار نہیں بلکہ انتشار پھیلان دی انج دی سوچی سمجھی سازش اے جس دی کڑیاں بیرون ملک ملدیاں نیں ایسے لئی نام نہاد آزادی اظہار نوں سوچی سمجھی سازش لکھیا اے۔ ایس کانفرنس وچ دینی طبقے نوں تے نمائندگی دین نال دانستہ طور تے گریز کیتا گیا پر بھارت توں برکھادت سنے انج دے لوکاںنوں خاص طور تے بلایا گیا جیہڑے پاکستان تے پاکستانی اداریاں نال نفرت کردے کسے ملک نوں خاص طور تے نشانہ بنانا کسے طور آزادی اظہار دے زمرے وچ شمار نہیں کر سکدے فیر وی ادارے کنج یاوہ گوئی نوں برداشت کردے نیں سمجھ نہیں آندا؟ حالانکہ اداریاں دا وقار تے ساکھ ختم ہونا نفرت پیدا کرن دا باعث بن دا اے۔ حیران کُن گل اے کہ پاکستان وچ این جی اوز تے دشم ملک دی شخصیات نوں پذیرائی دتی جان لگی اے پر ساڈے ادارے نوٹس تیکر نہیں لیندے ایس خاموشی دی وجہ کیہ اے؟ عالمی دبائو اے یا فرائض توں غفلت ، جیہڑی وی اے ذمہ داران اپنے اطوار اُتے نظر ثانی کرن۔
آزادی اظہار دے ناں اُتے کوئی ملک کسے نوں اپنے اندرونی معاملات وچ مداخلت دی اجازت نہیں دیندا جے کوئی سینہ زوری دا مظاہرہ کرے تے آزاد و خود مختار ملک کارروائی کردے نیں ۔ترکی وچ قید حکومت مخالف رہنما عثمان کوالا دے خلاف جاری مقدمے دے بارے وچ 18 اکتوبر نوں امریکہ، جرمنی ، فرانس، ناروے، سویڈن، نیوزی لینڈ، فن لینڈ، کینیڈا، ڈنمارک تے نیدر لینڈ دے سفیراں نے مشترکہ بیان وچ مطالبہ کیتا کہ جاری مقدمے نوں منصفانہ طریقے نال جلدی جلدی انجام تیکر اپڑایا جائے جس اُتے ترک وزارت خارجہ نے بیان نوں غیر ذمہ دار کہن دے نال اندرونی معاملات وچ مداخلت قرار دیندے ہوئے پہلے وضاحت طلب کیتی بعدازاں صدر طیب اردوان نے مداخلت دے مرتکب سفیراں نوں ملک بدر کرن دا حکم جاری کیتا جس اُتے سفیراں نوں معافی منگنی پئی ،پر ساڈے ایتھے صورتحال اینی خراب اے کہ دشمن ملک دے لوک ساڈے اداریاں دی ساکھ اُتے حملے کردے نیں پر اسیں کجھ کرن دی بجائے جواب وچ مہر بہ لب رہندے آں، قوم پچھدی اے ایس مصلحت دی وجہ کیہ اے؟
ایہہ منظور پشین، افراسیاب خٹک تے علی احمد کرد جہے لوکاں نے عاصمہ جہانگیر دے ناں اُتے جیہڑا تماشا لایا اے انج دے تماشیاں دی کوئی ملک اجازت نہیں دیندا دور کیوں جائیے، گوانڈھی ملک دی صورتحال ویکھ لوئو، اوتھے ہر مسلمان، سکھ، عیسائی تے دلت غدار اے۔ سابق وزیر خارجہ سلمان خورشید دا ہندو نظریے اُتے تنقید دی پاداش وچ گھر ساڑ دتا جاندا اے نوجوت سنگھ سدھو چنگے انتظامات اُتے عمران خان نوں وڈا بھرا کہندا اے تے انتہا پسند ہندو ایہنوں پاکستان جان دے مشورے دیندے نیں پاکستان کرکٹ ٹیم دی جت اُتے خوشی دا اظہار کرن والیاں دے خلاف دہشت گردی دے پرچے ہوندے نیں کوئی وی بندا بھارتی فوج یا جنرل دے خلاف لب کشائی دی جرات نہیں کر سکدا پر ساڈے کول ماورائے عدالت قتل تے مسنگ پرسن دے ناں اُتے اداریاں نوں ہدف تنقید بنان والے اینے خودسر ہو چکے نیں کہ عسکری ناں لے کے الزام تراشی کردے تے غدار ہونا تسلیم کردے نیں پر مذمت کرنا تے درکنار انج لگدا اے کوئی نوٹس تیکر نہیں لیندا کیہ اداریاں توں تنقید کرن والے زیادہ طاقتور نیں؟
ستم ظریفی ایہہ وے کہ یاوہ گوئی کرن والے تے بلاروک ٹوک اپنی مزموم حرکتاں وچ مصروف نیں پر ملک وچ ایہناں نوں آئینہ وکھان والا کوئی نہیں شاید اک وجہ تے ایہہ وے کہ اداریاں ولوں ذرائع ابلاغ اُتے جواب دین دا مناسب طریقہ کار نہیں نہ ای کسے تقریب وچ جا کے اظہار خیال کیتا جا سکدا اے پر ایہہ جیہڑے درجناں دے حساب نال حکومتی ترجمان سارا دن میڈیا اُتے شور شرابا کردے نیں اوہ کیوں اداریاں دی ساکھ نال کھیڈن والیاں نوں جواب دین توں پہلوتہی کردے نیں؟ کجھ عرصے توں پاک فوج دے خلاف عالمی سطح اُتے تے ملک وچ منظم طریقے نال پراپیگنڈہ جاری اے افسوس دی گل اے کہ کسے سیاسی رہنما نوں ایس زہریلے پراپیگنڈے دا احساس تیکر نہیں شاید ایہناں نوں پاک فوج دے حق وچ گل کرنا نفع بخش کم نہیں لگدا پر اداریاں دے خلاف چلن والی مہم توں محب الوطن حلقے سخت مضطرب نیں کیوں جے کجھ عرصے توں ناقدین دی تعداد ودھن لگی اے جس دا فوری توڑ بوہت ضروری اے۔
بھارت وچ کوئی بندا پاک فوج تے پاکستان دے حق وچ نعرے نہیں لا سکدا نہ ای اسرائیل وچ انج دی حرکت دا سوچیا جا سکدا اے پر پاکستان وچ آزادی اظہار دے ناں اُتے انج دی کھلی چھٹی اے کہ لوک بھارت، اسرائیل تے امریکہ دے حق وچ نعرے لاندے تے ایہناں دی فوج نوں دعوت تیکر دین لگے نیں ایہہ آزادی اظہار نہیں بلکہ غداری وچ شمار ہوندا اے ہر کم دی حدود تے قیود ہوندی اے تے سوال ایہہ وے کہ اداریاںاُتے الزام تراشی دی کھلی چھٹی کیوں اے؟ جیہڑے ساڈے ہیرو نیں ایہناں نوں کجھ کٹھ پتلیاں زیر و ثابت کرن وچ مصروف نیں پر انج دے لوکاں نوں منہ توڑ جواب دین دی بجائے ہر پاسے خاموشی اے۔
جے پاکستان وچ آزادی اظہار اُتے پابندی ہوندی تے کسے نوں اداریاں دی ساکھ نال کھیڈن دی جرات ہوندی؟ ہر گز نہیں۔ ایہہ جیہڑے مظلومیت دے دعویدار نیں کیہ ایہناں نوں پتہ نہیں کہ قوم دے سپوت جان تے خون دے نذرانے دے کے وطن دی حفاظت دا فریضہ سرانجام دے رہے نیں پر کجھ اغیار دے راتب خور کیوں اپنے وطن دے سپوتاں نوں مایوس کرنا چاہندے نیں ایہہ جیہڑے وی نیں ایہناں نوں بے نقاب کرن دے نال کیتے دی سزا ملنا ضروری اے تاکہ فیر کسے نوں وطن دے رکھوالیاں اُتے انگلی چُکن دی ہمت نہ ہوئے زیادہ نرمی وی کمزوری دا ای دُجا ناں اے ملک و ملت دے دشمناں نال جیہڑا سلوک عالمی اقوام کردیاں نیں اوہ ای طریقہ کار ملک وچ رائج کیتا جانا ای انصاف اے۔ عاصمہ جہانگیر کانفرنس جے مکالمے دی شکل ہوندی تے عوامی مسائل اُتے اجاگر کرن تے محرومیاں نوں دور کرن دی تجویزاں ساہمنے آندیاں پر عوامی مسائل نوں نظر انداز کردے ہوئے پاک فوج تے عسکری قیادت نوں نشانے اُتے رکھیا گیا ایہہ زہریلی گلاں کرن والے انسانی شکل وچ اصل وچ سنپولیے نیں جنہاں نوں کچلن وچ ای ملک تے قوم دا فائدہ اے ہجوم دی بجائے قوم دے قالب وچ ڈھلن دی لوڑ اے۔
افریقہ دے ملک ایتھوپیا دے وزیراعظم ابی محمد نے کار ِ مملکت نائب وزیراعظم نوں دے کے آپ حکومت مخالف عسکریت پسند تیگرائی باغیاں دے خلاف فوج دے نال اگلے مورچیاں اُتے جا کے لڑن دا فیصلہ کیتا اے۔ عالمی خبر رساں اداریاں دے مطابق تیگرائی باغیاں نے دارالحکومت ادیس بابا ول مارچ کرن دا اعلان کرن توں پہلے ای ملک دے کئی شہراں اُتے قبضہ کر لیا جس اُتے وزیراعظم نے اختیارات توں دستبرداری کیتی، قوماں انج بن دیاں نیں جدوں ملک اُتے مشکل ویلا آئے تے سب قومی سلامتی دے امور اُتے اک ہو جاندے نیں پر اسیں جانے کنہاں خیالاں وچ مگن آں خواب غفلت توں جاگن دا ویلا اے تاکہ انسانی شکل والے سپ تے سنپولیے ملکی سالمیت نوں نقصان نہ اپڑا سکن اللہ دا شکر اے کہ پاک فوج ہر قسم دی بیرونی جارحیت دا دندان شکن جواب دین دی صلاحیت رکھدی اے پر آزادی اظہار دی آڑ وچ اغیار دے کارندیاں دی سرکوبی عوامی تعاون نال ممکن اے ایتھوپیا جہے ملک دے وزیراعظم توں سبق حاصل کر لوو کہ عاصمہ جہانگیر کانفرنساں دی بجائے وطن دے اداریاں دی توقیر دا دفاع ای اصل حب الوطنی اے۔