پِلاک ولوں ’’بابا گورو نانک جی انٹرنیشنل کانفرنس‘‘ دا انعقاد

کانفرنس وچ ملکی تے غیر ملکی دانشوراں رَلت کیتی تے اپنے خیالات دا اظہار کیتا

رپورٹ: آفاق بٹ

پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے زیر اہتمام بابا گرونانک جی دے 552 ویں جنم دیہاڑ دے موقعے اُتے ’’بابا گورو نانک جی انٹرنیشنل کانفرنس‘‘ دا انعقاد کیتا گیا جس وچ ملکی و غیر ملکی دانشوراں نے بابا گورونانک جی دے پیغام تے تعلیمات دے حوالے نال گل بات کیتی۔ اظہار خیال کرن والیاں وچ ڈاکٹر نبیلہ رحمن ، پروفیسر زبیر احمد، شگفتہ گمی، سردار ہزارہ سنگھ، سردار انمول سنگھ، ڈاکٹر زیب النساء، اقبال قیصر، ڈی جی پِلاک ڈاکٹر صغرا صدف تے ڈائریکٹر پِلاک محمد عاصم چودھری و دیگر شامل سن۔

سردار ہزارہ سنگھ نے کہیا کہ بابا جی دے کلام وچ عورت نوں کم تر سمجھن والیاں دی شدید مذمت کیتی گئی اے، اوہ کہندے نیں کہ جو ہستی سانوں پیدا کردی اے اوہ انتہائی قابل عزت اے ۔ سردار انمول سنگھ نے کہیا کہ جنھی محبت تے پیار سانوں پاکستان وچ ملیا اے اوہ ناقابل فراموش اے تے ماں بولی پنجابی دے حوالے نال جنہا کم ایتھے ہو رہیا اے اوہ قابل تحسین اے۔ اوہناں نے مزید کہیا کہ سکھ یاتریاں نوں ایہناں دے دورہ پاکستان لئی بہترین سہولتاں اپڑان اُتے اسیں حکومت پاکستان دے تہہ دل توں مشکور آں۔
ڈائریکٹر جنرل پلاک ڈاکٹر صغرا صدف نے کہیا کہ صوفیا سب دے سانجھے نیں ایہناں اُتے کسے دی اجارہ داری نہیں سب نے محبت، امن تے برداشت دا درس دتا اے جس دی فی زمانہ اہمیت ہور وی ودھ گئی اے۔ ڈاکٹر زیب النساء نے کہیا کہ بابا گرونانک دے کلام وچ مادہ پرستی دی بے حد مذمت کیتی گئی اے۔ شگفتہ گمی نے وی پنجابی زبان فن و ثقافت دے فروغ لئی پلاک دیاں کوششاں دی بے حد تعریف کیتی۔اقبال قیصر نے کہیا کہ ایہہ بابا گرونا نانک جی دی کرامت اے کہ جتھے اوہناں نے زندگی دے آخری دن لنگھائے اج اوتھے محبتاں تے پیار دے سلسلے دا آغاز ہو چکیا اے۔ ڈائریکٹر پلاک محمد عاصم چودھری نے اظہار خیال کردے ہوئے کہیا کہ بابا گرونانک جی نے امن، پیار تے برداشت دا پیغام دتا اے تے صوفیا دے ایسے پیغام دی ترویج لئی پلاک مختلف تقریبات دے نال نال ایف ایم،ریڈیوز دے ذریعے پنجابی زبان تے پیغام صوفیا نوں ساری دنیا وچ پھیلان لئی اہم کردار ادا کر رہیا اے۔
ایس موقعے اُتے سائیں ظہور احمد،انور رفیع، عمران شوکت، استاد طاہر اقبال، عقیل طاہر تے ناصر بیراج نے صوفیانہ کلام پیش کیتا تے حاضرین توں بھرپور داد وصول کیتی۔ ادارے ولوں مہماناں نوں پھُلاں دے تحفے وی پیش کیتے گئے تقریب وچ نظامت دے فرائض مسعود خالد ملہی نے سرانجام دتے۔