سائبان ویلفیئر سوسائٹی گوجرانوالہ دے 6 ویں یوم تاسیس دی تقریب

جے نوجواناں نوں اقبال دا شاہین بنانا اے تے پرائمری سکولاں وچ تربیت یافتہ،
زمانہ شناس تے مخلص استاداں دا تقرر کرنا ہوئے گا، عتیق انور راجہ

رپورٹ: آفاق بٹ

سائبان ویلفیئر سوسائٹی گوجرانوالہ دا 6واں یوم تاسیس دے موقعے اُتے چیمبر آف کامرس اینڈ انڈسٹری دے اقبال ہال وچ اک پروقار تقریب دا انعقاد کیتا جس دا عنوان سی ’’فکر اقبال والدین اور اساتذہ کا کردار‘‘۔ تقریب دے مہمان خصوصی اسسٹنٹ کمشنر گوجرانوالہ جناب شبیر بٹ صاحب تے جناب سعید تاج صاحب سن صدارت صدر چیمبر آف کامرس اینڈ انڈسٹری جناب شعیب بٹ نے کیتی جد کہ نقابت دے فرائض عتیق انور راجہ نے ادا کیتے۔ باوقار تقریب دا آغاز تلاوت کلام پاک تے نبی پاک ﷺ اُتے درود و سلام پڑھدے ہوئے کیتا گیا۔ فکر اقبال دے حوالے نال منعقد کیتی جان والی ایس تقریب وچ شہر بھر توں جتھے استاد تے ماہرین تعلیم مدعو سن اوتھے اقبال دے شاہین یعنی طلبا و طالبات دی وی اک قابل ذکر تعداد ہال وچ موجود رہی۔

سائنس بیس سکول دے طلبا نے تے فیر الائیڈ سکول سوئی گیس روڈ سکول دے بالاں نے کلام اقبال ایس عقیدت، محبت تے جوش نال سنایا کہ ہال تالیاں نال گونجن لگیا۔ شہر بھر توں تشریف مدعو استاد، دانشوراں ، شاعراں، ادیباں، صحافیاں تے مختلف شعبہ ہائے زندگی نال تعلق رکھن والے معززین نے اپنے خیالات دا اظہار کردے ہوئے اقبال دے نظریات و افکار نوں نویں نسل لئی مشعل راہ بنان اُتے زور دتا۔ مقررین نے ایس گل اُتے وی زور دتا کہ جے والدین تے استاد بچے دی تربیت وچ مثبت کردار ادا کرن تے جلدی ای اک مثالی معاشرہ وجود وچ آ سکدا اے تقریب وچ موجود اساتذہ نے اقبال دے جذبہ خودی نوں نوجواناں وچ پروان چڑھان دی اہمیت اُتے وی زور دتا۔ ماہرین تعلیم دا کہنا سی کہ والدین تے معاشرے دی توقعات انج دی ہو چکیاں نیں کہ تعلیمی اداریاں نے طلبا و طالبات نوںرٹے لا کے نمبر زیادہ توں زیادہ حاصل کر ن وچ لا دتا گیا ایس سلسلے وچ والدین نال گل بات دا سلسلہ شروع کردے ہوئے ایہناں نوں قائل کرنا ہوئے گا کہ زیادہ نمبر عملی زندگی وچ کامیابی دی ضمانت نہیں بن سکدے تے دوجے تسیں اپنے بالاں نوں ڈاکٹر، انجینئر یا افسر بنا ن لئی سکول و کالج نہ گھلو بلکہ طلبا و طالبات نوں تعلیمی اداریاں وچ علم دی روشنی حاصل کرن لئی گھلیا جانا چاہیدا اے جیہڑے اپنی محبت تے کوشش نال اپنا جہاں آپ پیدا کرن دے قابل بن سکے۔ موجودہ حالات وچ نمبر گیم توں جان چھڑانا اک اوکھا کم اے پر دنیا وچ اوہ ای قوماں اپنا ناں و مقام بناندیاں نیں جیہڑی مشکل وچ سوجھ بوجھ نال اپنی راہواں متعین کردیاں نیں۔ جے اسیں شعبہ تدریس نوں عزت دینا شروع کراں گے تے سانوں تعلیمی اداریاں وچ پڑھان لئی اعلیٰ تعلیم یافتہ تے بہترین صلاحیتاں دے مالک استاد میسر ہون گے۔ جیہڑے نوجواناں وچ دور اندیشی، بلند نگاہی، عقابی سوچ تے اُچی پرواز دا جوش پیدا کردے رہن گے۔ انج دے ای اساتذہ دی کوششاں نال اسیں مستقبل وچ اقبال دے خواب دی تعبیر حاصل کر سکاں گے۔

اسسٹنٹ کمشنر شبیر حسین بٹ نے کہیا کہ حضرت اقبال دی زندگی دا مطالعہ کریئے تے سانوں اوتھے ارتقا نظر آندا اے۔ علامہ اقبال دا شعری سفر جیہڑا ایہناں دی جوانی وچ شروع ہویا ایس وچ ہر آن والے دن وطن تے فیر قومیت دا پیغام نظر آندا اے۔ پروفیسر نائلہ بٹ تے ثروت سہیل جیہڑے دو مختلف سرکاری کالجاں وچ پرنسپل دے فرائض ادا کر رہے نیں نے کہیا کہ ایہہ بوہت بدقسمتی اے کہ اج دیاں ماواں ہر قیمت اُتے اپنی دھیاں نوں ڈاکٹر بنان دی کوشش کردیاں نیں۔ ایہناں دیاں لاڈلیاں میٹرک وچ چاہے تھرڈ ڈویژن نال پاس ہون پر ایہناں دا اصرار ہوندا اے کہ ہن ایہہ محنت نال ٹاپ پوزیشن حاصل کر لین گیاں۔ سید عمران حیدر نقوی جیہڑے کئی سال کیو ڈی پی ایس وچ پڑھان دا تجربہ رکھدے نیں ایہناں دا کہنا سی کہ جدوں اسیں اقبال نوں روزانہ دی بنیاد اُتے پڑھنا شروع نہیں کراں گے سانوں ایہناں دا کلام و پیام سمجھن تے ایس اُتے عمل کرن وچ مشکل پیش آندی رہوے گی۔

صوفی سکالر تے سابق صدر چیمبر سعید احمد تاج نے کہیا کہ اج ضروری اے کہ طلبا و طالبات نوکری دے نال اپنا کم کرن لئی وی تعلیم حاصل کرن۔ اپنا کم مشکل تے زیادہ محنت طلب ہوندا اے ایس لئی ساڈے نوجوان بھاری بھر ڈگریاں دے نال نوکریاں تلاش کردے جوانی دے دن ضائع کر رہے نیں۔ اسیں اقبال دے شاہیناں نوں کاروباری گُر سمجھان تے اپنا کاروبار کرن لئی کنج دی محنت تے لیاقت چاہیدی ہوندی اے سب دسدن لئی تیار آں۔ چیئر مین الائنس آف پرائیویٹ سکول ایسوسی ایشن گوجرانوالہ چوہدری محمد شاہد نے کہیا کہ اسیں طلبا و طالبات لئی انج دی تقریبات دا اہتمام کردے رہاں گے جیہڑی ایہناں دی فکری صلاحیتاں نوں پروان چڑھاندے ہوئے ایہناں نوں اپنی پہچان بنان تے معاشرے دا چنگا شہری بنن وچ کم آ سکن۔ سرپرست سائبان چوہدری طاہر جاوید نمبردار نے کہیا کہ سائبان دی ہمیشہ ایہہ کوشش رہی اے کہ نوجواناں نوں ایہناں دی صلاحیتاں دے اظہار لئی پلیٹ فارم مہیا کیتا جا سکے۔ اسیں سمجھنے آں کہ نوجواناں وچ جے اپنی پہچان بنان دا جذبہ پیدا کر دتا جائے تے ایہناں نوں کامیابی لئی درست رستیاں بارے دس دتا جائے تے اوہ چنگی تعلیم دے بعد نوکریاں لئی دھکے کھان دی بجائے اپنی محنت تے رب دی رحمت دے بھروسے نال اپنا کوئی وی نکا موٹا کم شروع کردے ہوئے مستقبل دے بزنس مین بن سکن گے۔ چوہدری مقصود مٹو نے بڑے جذباتی انداز وچ گل بات کردے ہوئے کہیا کہ ہر بندہ ہر محفل توں کجھ نہ کجھ سکھدا اے تے میں اج ایس تقریب توں ایہہ سکھیا اے کہ سانوں اپنے بالاں دے اندر اعتماد پیدا کرن دی کوشش کرنی اے۔ سابق لیکچرار عرفانہ امر جیہڑی کہ ہن گوجرانوالہ ڈویژن دی نامور شاعرہ نیں اوہناںنے کہیا کہ بالاں وچ صلاحیتاں نیں سانوں بس ایہناں نوں سدھی راہ وکھان دی کوشش کرنی اے۔ صدر چیمبر شعیب بٹ نے تقریب وچ بالاں دا جذبہ تے مقررین دے خیالات سن کے خوشی دا اظہار کیتا تے کہیا کہ چیمبر دے ایہہ ہال سائبان لئی ہمیشہ دستیاب رہن گے بلکہ اسیں چاہنے آں کہ ٹیم سائبان انج دی تقریبات دا انعقاد مسلسل کردی رہوے جنہاں وچ نوجواناں دی تربیت شامل ہوئے۔

آخر وچ عتیق انور راجہ نے سب مہماناں دا شکریہ ادا کیتا تے امید ظاہر کیتی کہ بحیثیت قوم اگے ودھن لئی نوجواناں دے اندر اعتماد دا پیدا کیتا جانا بوہت ضروری اے نوجواناں وچ اخلاقی اقدار، سماجی روایات تے یقین پیدا کرن لئی محلے دے مولوی صاحب تے پرائمری دے استاد دی تربیت اُتے بوہت دھیان دین دی لوڑ اے کیوں جے بچے جیہڑی عادتاں بچپن وچ سکھ لیندے نیں اوہ ساری عمر ایہناں دے نال چلدی رہندیاں نیں۔ اسیں پنجاب وچ پیدا ہون والے پنجابی بالاں توں پنجابی زبان کھوہ کے ظلم کیتا اے۔ بالاں لئی تعلیمی اداریاں وچ پنجابی زبان بولن اُتے کسے قسم دی پابندی نہیں لائی جانی چاہیدی بلکہ تعلیمی اداریاں دا فرض اے کہ پنجابی صوفیا دا پیام محبت عام کرن لئی بالاں نوں ایہناں دا کلام پڑھائو۔ سمجھائو تے ایس اُتے عمل کرنا سکھائو۔
تقریب وچ شرکت کرن والیاں وچ روبینا ناز،سونیا جی،سجاد سردار وڑائچ،شکیل باجوہ،سہیل بشیر،موٹیویشنل سپیکر یاسر عرفات، عثمان اشرف،عمر فاروق،بلال باٹھ،راحت ثمر جد کہ مہماناں نوں خوش آمدید کہن والیاں وچ سائبان ٹیم توں خرم شہزاد بھٹہ ،یعقوب انجم مغل،راجہ افضال عزیز،شیخ انعام،چوہدری عبداللہ ،میاں احتشام،مہمانان اعزاز میں بلال ثاقب،چوہدری سجاد مشتاق،رانا اظہر،اسامہ مغل،میاں محمد دین،رفاقت حسین و دیگر شامل سن۔ ایس سلسلے وچ سائبان ویلفیئر سوسائٹی دے عہدیدارا ن نے ایہہ عہد کیتا کہ اوہ اپنی کاوشاں نال اصلاح معاشرہ دا کم جاری رکھن گے یاد رہے کہ پچھلے چھ سال توں صدر سائبان جناب عتیق انور راجہ نے سائبان دے پلیٹ فارم توں بے شمار ثقافتی ادبی تے سماجی تقریبات دا تسلسل نال انعقاد کر کے سماج سیوک ہون دا ثبوت دے رہے نیں تے دوجے پاسے تعلیمی اداریاں دے نال مل کے نویں نسل دے بہتر مستقبل لئی شجر کاری، ٹریفک شعور، گل بات دے آداب تے مطالعہ کتاب دی اہمیت و افادیت اُتے کم کر رہے نیں۔ چھٹے یوم تاسیس دی تقریب وچ حاضرین نے سائبان دے پلیٹ فارم توں ہون والی سماجی ادبی صحافتی تے ثقافتی خدمات نوں سراہیا تے مستقبل وچ پنجاب، ماں بولی پنجابی زبان تے پنجاب دے روایتی ثقافتی پروگراماں وچ طلبا و طالبات نوں شامل کردے ہوئے اک بہترین معاشرے دے حصول لئی کمربستہ رہن دی امید ظاہر کیتی۔