کیہ کجھ ہون جا رہیا اے

سعد اللہ شاہ

پھول خوشبو کو ہوا میں ذرا گہرا لکھنا
سات رنگوںمیں کبھی اس کا سراپا لکھنا
تتلیاں رنگ لئے پھرتی ہیں چاروں جانب
کتنا مشکل ہے بہاروں کا قصیدہ لکھنا
ایہ تے اک شاعر دی سوچ اے نہیں تے سیاستدان تے خزاں نوں بہار ثابت کرکے قصیدہ گوئی کر لیندے نیں۔ بہرحال جو وی اے اک بندے تے اعتبار کیتا گیا اوہنوں محبوب بنایا گیا تے فیر محبوب دی مرضی جناں چاہے رلائے‘ ستائے یاں بہکائے۔ انج دل تے ہتھ رکھ کے کہوو شعروسخن دیاں گلاں تہاڈے دل نوں چھوہندیاں نیں پر سانوں حالات حاضرہ تے گل کرنی پیندی اے۔ ایہ وی چنگا اے کہ عربی وچ مستقبل و فردا لئی کوئی وکھرا صیغہ نہیں اوہ حال توں ای کم چلا لیندے نیں مستقبل دا صیغہ تے ساڈے کول اے انگریزی وچ وی اے خاص طور تے سیاست وچ تے ہے ہی گا گی۔ تسیں پریشان نہ ہوو سارے وعدے وعید انج دے ای ہوندے نیں ایہ کراں گے ایہ ہو جاوے گا اوہ ہو جاوے گا۔ سارے خواب ای خواب حال وچ تے ساریاں تعبیراں تے تصویراں مستقبل وچ۔ بہرحال حکمران مستقبل وچ انج رہندے نیں جیویں شاعر ماضی وچ۔ہن تسیں ایہ کہوو گے کہ دوویں بھٹکے ہوئے نیں فرق یقینا ہے اک بھٹکدا اے تے دوجا بھٹکاندا اے لوکاں توں فیصلہ کروا لوو اوہناں وچاریاں نوں تے کسے پل چین ای نہیں پیندا۔
گل ہو رہی سی گاگے تے گی والے راگ دی لوک ایہ سن سن کے سُن ہو گئے نیں۔ حالات تیزی نال بدلدے وکھائی دے رہے نیں حالات نے حکمران جماعتاں دے نمائندیاں دی زبان تک بدل کے رکھ دتی اے۔ کدی تے ایہ بیان دیندے سن کہ اینی مہنگائی ہووے گی کہ تہاڈیاں چیکاں نکل جان گئیاں۔ گل اوہناں دی ٹھیک سی پر اینی بے اعتنائی تے بے لحاظی فیر اوہناں نوں کرون دیاں لہراں گنن تے لا دتا گیا۔ اوہ چوتھی لہر تے اپڑے سن اوہناں دے بھائی صاحب دا سکینڈل آ گیا تے اوہ کجھ چپ جہے ہو گئے ہن اوہ فیر بحال ہوئے نیں تے فرما رہے نیں کہ ویکسین لگی تے پی ڈی ایم دی ساری بیماری چلی جاوے گی دوجے پاسے مخالف خوش نیں کہ اوہ اپنی ای حکومت دے جان دیاں گلاں کر رہے نیں۔ مطلب ایہ کہ پی ڈی ایم لئی سب توں وڈی بیماری پی ٹی آئی ای تے ہے جہدے لئی ہن اوہ ان ہائوس تبدیلی لیان دا پروگرام بنا چکے نیں۔ میرا کہن دا مطلب اے کہ تسیں کوئی کم کرو ایہ پھبتیاں‘ جگتاں‘ دھمکیاں کوئی سنجیدہ عمل تے نہیں۔ کدی تسیں فرماندے او کہ لانگ مارچ کیتا تے اوہناں نوں بہت کٹ پوے گی۔ اک ہور وزیر مولاجٹ یاں نوری نت وانگوں کہندے نیں کہ نوازشریف تابوت وچ ای وطن واپس آن گے انج جے تابوت وچوں وی زندہ نوازشریف نکل آئے تے فیر انج آپس دی گل اے کہ تہاڈی کارکردگی نے نوازشریف نوں مرن نہیں دتا۔ اک شعر یاد آ گیا:
وہ تشدد تھا الٰہی توبہ
میں تو مجرم کی خطا بھول گیا
ہن ویکھو منظرنامہ کیویں بدل رہیا اے۔ ہارون رشید صاحب نے بہت کجھ بریک کر دتا اے ظاہر اے اوہ بہت جانکار بندے نیں۔ اوہ جو کہندے نیں اوہ یقین دے درجے دا اے انج وی انج ہونا وی چاہیدا اے کوئی حد ہوندی اے آخر اسیں کتھوں تک ترے پہلو سے سرکتے جاویں‘ لگدا اے کہ اسٹیبلشمنٹ ہتھ کھچ چکی اے چڑیا نے وی خبراں لیانیاں شروع کر دتیاں نیں کجھ خبراں نیں تے عجیب تے ناقابل یقین پر ساڈے ایتھے ایہ ان ہونی ہو وی چکی اے۔ نوازشریف بضد نیں کہ چوتھی واری وزیراعظم لئی اوہناں دا راہ صاف کیتا جاوے پر سپریم کورٹ دا فیصلہ اپنی تھاں اک مشکل اے۔ انج تے تاریخ اجہی اے کہ کوئی بریف کیس پھڑ کے بیماری دے باوجود وی سدھا وزیراعظم بن سکدا اے۔ ایہ گلاں ویلے توں پہلاں نیں اجے تے وزیراعظم دی زیرصدارت سینئر وزیراں دا اجلاس ہوندا اے کہ اتحادیاں دا اعتماد کیویں بحال کیتا جاوے۔ انج شبلی فراز اپنے مخصوص ٹاسک یعنی ای ووٹنگ مشین تے بریفنگ دین گے کہ اپوزیشن دے تحفظات یعنی ٹمپرنگ دا جواب نہیں دتا گیا۔ بندہ پچھے ایہ سوال وی کوئی کرن ولے نیں کہ ٹمپرنگ نوں کیویں روکیا جاوے گا۔ منیرنیازی نے کہیا سی:
کسی کو اپنے عمل کا حساب کیا دیتے
سوال سارے غلط تھے جواب کیا دیتے
جو وی اے ایسے طوطے وچ شہزادے دی جان اے۔ سنیا اے سینٹ دے چیئرمین سنجرانی‘ سپیکر اسدقیصر تے عثمان بزدار خلاف کجھ کر گزرن دا پروگرام اپوزیشن نے بنایا اے خاص طور تے عثمان بزدار نوں ہتھ پانا سدھا وزیراعظم ول ہتھ چکنا اے چلو قوم وی ٹی ٹونٹی چوں باہر نکل چکی اے آسٹریلیا چیمپئن بن چکیا اے پر ایہ وی سارے من گئے ٹاس بہت وڈا فیکٹر اے کوئی ٹاس ہار کے وی جاوے گا تے ایہ معجزہ ہووے گا خاص طور تے اکو جیہاں ٹیماں وچ ہن ویکھنے آں حکمرانی دا فیصلہ وی ٹاس تے ہوندا اے یاں کوئی ہور سبیل ہووے گی۔ ہارون رشید صاحب نے ایہ خوب کہی کہ نوازشریف سمجھوتے لئی سوفیصد تیار نیں تے زرداری نے بلوچستان تے نظر رکھی ہوئی اے۔ کناں پرانا شعر کسے دا حافظے وچ اے۔
وہ چلی جائے گی ڈگری لے کے بوڑھی ماں کے گھر
اور تو کیمپس کے پل سے دیکھتا رہ جائے گا
آخر وچ عبدالحکیم ناصف دے دو شعر
اے عاشقو الفت کی شروعات سے پہلے
مر جائو وبائوں کی علامت سے پہلے
تیاری مکمل تھی ملاقات سے پہلے
میں خوش تھا بہت موت کے لمحات سے پہلے